កណ្ដាល ៖ អមដំណើរដោយឯកឧត្តម ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ និង លោក សុន គន្ធ អគ្គនាយកធនាគារអភិវឌ្ឍជនបទផងនោះ កាលពីថ្ងៃទី១៩ មករាឯកឧត្តម យឹម ឆៃលី ឧបនាយករដ្ឋមន្ត្រី និងជាប្រធានក្រុមប្រឹក្សាស្តារ និងអភិវឌ្ឍវិស័យកសិកម្ម និង ជនបទ បានអញ្ជើញធ្វើទស្សនកិច្ចការងារ ទៅកាន់ក្រុមហ៊ុនអង្គរកសិកម្មរុងរឿងចំកាត់ ស្ថិតនៅក្នុងស្រុកអង្គស្នួល ខេត្តកណ្តាល ដើម្បីពិនិត្យពីខ្សែសង្វាក់ផលិកម្មរោងចក្រកិនស្រូវនៅទីនោះ ។
ក្រុមហ៊ុនអង្គរកសិកម្មរុងរឿងចំកាត់បានបង្កើតឡើងនៅឆ្នាំ១៩៩៩ ដោយបានកសាងហេដ្ឋារចនាសម្ព័ន្ធរោងចក្រទំនើបនៅក្នុងដំណើរការផលិកម្មរោងចក្រកិនស្រូវ ដោយមានសមត្ថភាពផលិតអង្ករមានគុណភាពខ្ពស់ក្នុងការនាំចេញ គឺមានបរិមាណ ៣០តោនក្នុងមួយម៉ោង ។ លោក ជីវ ហ៊ាង អគ្គនាយកក្រុមហ៊ុនអង្គរកសិកម្មរុងរឿងចំកាត់បានរាយការណ៍ឱ្យដឹងថា នៅក្នុងឆ្នាំ ២០១០ក្រុមហ៊ុនបានទិញស្រូវពីសហគមន៍កសិករជាមធ្យម ៤ ម៉ឺនតោន ហើយចំនួននៃការ ទិញស្រូវពីប្រជាកសិករនឹងកើនរហូតដល់ពី ៦ទៅ៧ម៉ឺនតោននៅក្នុងឆ្នាំ២០១១ នេះ ។ ចំណែកអង្ករដែលក្រុមហ៊ុនផលិតបានត្រូវវេចខ្ចប់តាមបទដ្ឋានបច្ចេកទេស និង គុណភាពខ្ពស់ស្របតាមស្តង់ដារអន្តរជាតិ ហើយក៏បាននាំចេញ ទៅលក់នៅក្រៅប្រទេសផងដែរ ។
ឯកឧត្តម យឹម ឆៃលី បានអបអរសាទរ និងកោតសរសើរដល់ដំណើរការរបស់ក្រុមហ៊ុន ដែលបានបោះទុនចូលរួមក្នុងដំណើរការអភិវឌ្ឍវិស័យកសិកម្ម ជាពិសេសឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃ និង ប្រកបដោយគតិបណ្ឌិតរបស់សម្តេចតេជោនាយករដ្ឋមន្ត្រីស្តីពីការជម្រុញផលិតកម្មស្រូវ និងការនាំចេញអង្ករ ដោយសម្តេចតេជោបានកំណត់ចក្ខុវិស័យក្នុងការរៀបចំគោលនយោបាយអភិវឌ្ឍសេដ្ឋកិច្ចគឺមានមហិច្ឆតាចង់ឱ្យកម្ពុជាក្លាយជាប្រទេសនាំចេញ«អង្ករគឺមាស ស»យ៉ាងសំខាន់នៅលើទីផ្សារអន្តរជាតិ តាមរយៈការបង្កើនផលិតភាពកសិកម្ម ការធ្វើពិពិធភាវូបនីយកម្មវិស័យកសិកម្ម និងពាណិជ្ជូបនីយកម្មកសិកម្មគឺការប្រែក្លាយពីកសិកម្មចិញ្ចឹមឆ្នាំង ទៅជាកសិកម្ម សម្រាប់លក់ដូរ ។ ឯកឧត្តម ឧបនាយករដ្ឋមន្ត្រីបានលើកទឹកចិត្តដល់លោកអគ្គនាយកក្រុមហ៊ុនឱ្យខិតខំជាបន្តទៀតដើម្បីជម្រុញឱ្យការនាំអង្ករកម្ពុជានៅលើទីផ្សារពិភពលោករិតតែមានចំនួនច្រើន និង មានការពេញចិត្តអង្ករកម្ពុជា ជាពិសេសប្រែក្លាយប្រទេសកម្ពុជា ជាជង្រុកស្រូវនៃតំបន់អាស៊ីអាគ្នេយ៍ គឺជម្រុញការផលិតស្រូវឱ្យបានចំនួនច្រើនជាង ៤លានតោន ក្នុងនោះបរិមាណអង្ករសម្រាប់ការនាំចេញត្រូវសម្រេចឱ្យបានយ៉ាងតិច១ លានតោននៅឆ្នាំ២០១៥ នោះ ៕
ស្នាយពល
No comments:
Post a Comment