រាជធានីភ្នំពេញ ៖ ព្រះរាជអំណោយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងព្រះរាជអំណោយ ព្រះករុណាព្រះមហាវីរក្សត្រ ព្រះវររាជបិតាជាតិខ្មែរ និងសម្តេចព្រះមហាក្សត្រី ព្រះវររាជមាតាជាតិខ្មែរ ត្រូវសម្តេចចៅហ្វាវាំង គង់ សំអុល និងជាឧបនាយករដ្ឋមន្ត្រីនាំយកទៅចែកជូនដល់ប្រជាពលរដ្ឋចំនួន៩៦គ្រួសារ ដែលរងគ្រោះដោយអគ្គីភ័យនៅក្នុងសង្កាត់ច្រាំងចំរេះទី២ ខណ្ឌប្ញស្សីកែវ ។ ពិធីនេះរៀបចំឡើងកាលពីព្រឹកថ្ងៃទី២១ មករា នៅទីធ្លាស្នាក់ការគណបក្សប្រជាជនខណ្ឌប្ញស្សីកែវ ស្ថិតនៅក្បែរកន្លែងកើតមានគ្រោះអគ្គីភ័យ ។ព្រះរាជអំណោយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុង១គ្រួសារទទួលបានអង្គរ១បាវ ស្មើនឹង៥០គីឡូក្រាម ឃីតចំនួន១កញ្ចប់ (មានមុង១ ភួយ១ សារុង១ ក្រមា១) និងថវិកាចំនួន១០ម៉ឺនរៀល ។ ដោយឡែកព្រះរាជអំណោយព្រះករុណាព្រះមហាវីរក្សត្រព្រះវររាជបិតាជាតិខ្មែរ និងសម្តេចព្រះមហាក្សត្រីព្រះវររាជមាតាជាតិខ្មែរ ក្នុង១គ្រួសារទទួលបានក្រមាចំនួន១ សារុង១ និងថវិកាចំនួន១០ម៉ឺនរៀល ។
សម្តេចចៅហ្វាវាំងគង់ សំអុល បានសំដែងការសោកស្តាយ និងចូលរួមរំលែកទុក្ខចំពោះបងប្អូនដែលរងគ្រោះដោយអគ្គីភ័យ ។ ការកើតមានអគ្គីភ័យដោយសារតែបងប្អូនមានការធ្វេសប្រហែសផង សង់លំនៅឋាន ដោយទុកផ្លូវតូចចង្អៀតមិនអាចឱ្យរថយន្តពន្លត់អគ្គីភ័យចូលអន្តរាគមន៍ទាន់ពេលផង ។ ដូចនេះសូមបងប្អូនពេលសង់ផ្ទះឡើងវិញ ត្រូវទុកផ្លូវដែលអាចរថយន្តពន្លត់អគ្គីភ័យចេញចូលបាន ។
លោកឧបនាយករដ្ឋមន្ត្រី គង់ សំអុល រដ្ឋមន្ត្រីក្រសួងព្រះបរមរាជវាំងថ្លែងថា រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខបានយកចិត្តទុកដាក់យ៉ាងខ្លាំង និងណែនាំដល់មន្ត្រីក្រោមឱវាទឱ្យ
ចុះជួយ និងសំរួលការលំបាកជូនបងប្អូន ។ ចំណែកព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាមានព្រះរាជហប្ញទ័យព្រួយបារម្ភ និងមានព្រះរាជតំរិះ គិតដល់បងប្អូន ។ ចំពោះសម្តេចឪ សម្តេចម៉ែដែលគង់នៅក្រៅប្រទេសមានការព្រួយបារម្ភចំពោះជីវភាពបងប្អូនដែលកំពុងជួបការលំបាក ។
លោកឧបនាយករដ្ឋមន្ត្រីគង់ សំអុល បានពាំនាំព្រះរាជបណ្តាំសួរសុខទុក្ខ និងពាំនាំព្រះរាជអំណោយមកចូលរួមរំលែកទុក្ខដល់បងប្អូន ។ ព្រះរាជអំណោយទាំងនេះ គ្រាន់តែជាជំនួយឧបត្ថម្ភសំរាលការលំបាកខ្លះដល់បងប្អូន
ប៉ុណ្ណោះ ។ កន្លងមក កាកបាទក្រហមកម្ពុជាបាននាំ អំណោយមកចែកជូនបងប្អូនដែលនេះជាទឹកចិត្តរបស់កាកបាទក្រហមក្រោមការដឹកនាំរបស់លោកជំទាវបណ្ឌិតប៊ុន រ៉ានី ហ៊ុន សែន ៕
ប៉ុណ្ណោះ ។ កន្លងមក កាកបាទក្រហមកម្ពុជាបាននាំ អំណោយមកចែកជូនបងប្អូនដែលនេះជាទឹកចិត្តរបស់កាកបាទក្រហមក្រោមការដឹកនាំរបស់លោកជំទាវបណ្ឌិតប៊ុន រ៉ានី ហ៊ុន សែន ៕
No comments:
Post a Comment