រាជធានីភ្នំពេញ ៖ មន្ត្រីសាលាក្តីបានឱ្យដឹងថា មានពលរដ្ឋប្រមាណ៤៦០នាក់ បានស្នើសុំមកសាលាក្តី ដើម្បីចូលរួមស្តាប់សវនាការមុនអង្គសេចក្តីជាសាធារណៈលើពាក្យស្នើសុំបន្ទាន់ឱ្យដោះលែងនួន ជា អតីតប្រធានសភាតំណាងប្រជាជន និងលោកខៀវ សំផន អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យស្ថិតនៅក្រៅឃុំ ដែលត្រូវចាប់ផ្តើមនៅវេលាម៉ោង៩និង៣០នាទីព្រឹកថ្ងៃទី៣១ មករា ២០១១ ។
លោកឌឹម សុវណ្ណារុំ មន្ត្រីអ្នកនាំពាក្យនៃសាលាក្តីខ្មែរក្រហមបានថ្លែងថា នួន ជាអាយុ៨៥ឆ្នាំ អតីតប្រធានសភាតំណាងប្រជាជន និងលោកខៀវ សំផន អាយុ៧៨ឆ្នាំ អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យនឹងត្រូវអនុញ្ញាតឱ្យអ្នកចូលរួមស្តាប់សវនាការមុនអង្គសេចក្តីរបស់ពួកគេមកពីខេត្តកណ្តាល កំពង់ស្ពឺ កំពង់ចាម កំពត ដែលរួមមានក្រុមនិស្សិត, អ្នកស្រាវជ្រាវជាតិ និងអន្តរជាតិ ។ ក្នុងពេលសវនាការនឹងមានការផ្សាយបន្តផ្ទាល់តាមរយៈទូរទស្សន៍ CTN ផងដែរ ។ មន្ត្រីសាលាក្តីខ្មែរក្រហមឱ្យដឹងទៀតថា អង្គជំនុំជម្រះរបស់សាលាដំបូងនៃតុលាការខ្មែរក្រហមលើកនេះគឺសាកសួរផ្ទាល់មាត់រួចហើយធ្វើការសន្និដ្ឋានសំរេចតែម្តង។
ក្នុងសេចក្តីប្រកាសព័ត៌មានចុះថ្ងៃទី២៤ មករា ២០១១ បានបង្ហាញថា លោកនួន ជានឹងបើកសវនាការវេលាម៉ោង៩និង៣០នាទី ។ ចំណែកនៅវេលាម៉ោង១និង៣០នាទីរសៀលថ្ងៃដដែល ជាសវនាការរបស់លោកខៀវ សំផន ។ លោកឌឹម សុវណ្ណារុំ អ្នកនាំពាក្យសាលាក្តីបានឱ្យដឹងថា សវនាការមុនអង្គសេចក្តីទៅលើអតីតមេខ្មែរក្រហម លោកនួន ជា និងលោកខៀវ សំផន អំពីការសុំឱ្យស្ថិតនៅក្រៅឃុំនេះ គឺធ្វើឡើងបន្ទាប់ពីក្រុមមេធាវីការពារជនជាប់ចោទដាក់ពាក្យស្នើសុំទៅសាលាក្តី និងយល់ថា ការបន្តឃុំខ្លួនអតីតមេខ្មែរក្រហមថ្នាក់ខ្ពស់បំផុតទាំងពីរនាក់នេះហួសរយៈពេលកំណត់ហើយ ៕
ដោយ ៖ កោះឯករាជ្យ
No comments:
Post a Comment