ភ្នំពេញ ៖ សាលាដំបូងរាជធានីភ្នំពេញ គ្រោងនឹងបើកសវនាការជំនុំជម្រះនៅថ្ងៃទី១ ខែកុម្ភៈ ឆ្នាំ២០១១ខាងមុខនេះ លើសំណុំរឿងជនជាតិថៃទាំង៧នាក់ ដែលឆ្លងដែនចូលប្រទេសកម្ពុជាដោយខុសច្បាប់ ។
ប្រភពព័ត៌មានពីមន្រ្តីតុលាការសាលាដំបូងរាជធានីភ្នំពេញ បានប្រាប់កម្ពុជាថ្មីឲ្យដឹងនៅព្រឹក ថ្ងៃទី១៩ ខែមករានេះថា សវនាការនឹងជំនុំជម្រះអង្គសេចក្ដីទាំងមូល ទាក់ទិននឹងសំណុំរឿងជនជាតិ ថៃទាំង៧នាក់ ដែលមានឈ្មោះទី១-ឈ្មោះ Panich Vikitreth (ផានិក វិគិតសេត) តំណាងរាស្រ្តក្រុងបាងកក មកពីគណបក្សប្រជាធិបតេយ្យ, ទី២-ឈ្មោះ Kochpontorn Chusanaseree (គុជពុនថន ជូសាណាសេរី) ជំនួយការលោក ផានិក វិគិតសេត, ទី៣-ឈ្មោះ Veera Somkwamkid (វីរៈ ស៊ុំក្វាមឃីត) អគ្គលេខាធិការបណ្ដាញប្រជាជន ប្រឆាំងអំពើពុករលួយ, ទី៤-Samdin Lersbusya (សែម ឌីន ឡឺតប៊ូឆា) លេខាធិការបក្សឋានសួគ៌ និងផែនដី, ទី៥- Taynae Moongmachon (តាយណែ មួងម៉ាកចន) អ្នកសារព័ត៌មាន, ទី៦-Naruemol Chitwaratana (ណារឿមមុល ជីតវ៉ារ៉ាត់តាណា) មេផ្ទះ និងទី៧-Ratree Paiputanapaiboon (រ៉ាត់ទ្រី ប៉ៃប៉ូតាណាប៉ៃប៉ូន) លក់គ្រឿងទេស-អ្នកសារព័ត៌មាន។ ជនជាប់ចោទទាំង៧នាក់ ត្រូវបានតុលាការចោទប្រកាន់ថាបានចូលក្នុងទឹកដីប្រទេសកម្ពុជាដោយ ខុសច្បាប់ និងចូលតំបន់ហាមឃាត់របស់យោធា។ ប៉ុន្តែតុលាការសម្រេចឲ្យជនជាប់ចោទចំនួន៦នាក់នៅក្រៅឃុំបណ្ដោះអាសន្នហើយ នៅសល់តែម្នាក់ប៉ុណ្ណោះគឺឈ្មោះ Veera Somkwamkid (វីរៈ ស៊ុំក្វាមឃីត) អគ្គលេខាធិការបណ្ដាញប្រជាជន ប្រឆាំងអំពើពុករលួយ បន្តឃុំខ្លួនក្នុងគុកព្រៃស៕
កោះកែវ
No comments:
Post a Comment