នៅក្នុងជំនួបសំដែងការគួរ សមជាមួយ សម្ដេចអគ្គមហាសេនាបតីតេជោ ហ៊ុន សែន នាថ្ងៃទី ១៩ ខែមករាឆ្នាំ២០១១ នៅភូមិគ្រឹះក្នុងរាជធានីភ្នំពេញ នាយកធានាគារ ANZ ROYALE AUSTRALI លោក MIKE SMITH បានជំរាបជូនសម្ដេចតេជោនាយករដ្ឋមន្ដ្រីថា ធនាគារ ANZ ចង់ដើរតួនាទីយ៉ាងសំខាន់ ជាពិសេសលើវិស័យ ហិរញ្ញវត្ថុដើម្បីជួយកម្ពុជា ។ លោក SMITH បាននិយាយថា នៅក្នុងប្រទេសកម្ពុជាធនាគារ ANZ បានទទួលជោគជ័យយ៉ាង ខ្លាំង ហើយពេលនេះក៏កំពុងតែពង្រីកសាខារបស់ខ្លួនឱ្យបានកាន់តែច្រើនថែមទៀត ។
យោងតាមឯកឧត្តម អ៊ាង សុផល្លែត ជំនួយការសម្ដេចតេជោនាយករដ្ឋមន្ដ្រីឱ្យដឹងថា នៅក្នុងជំនួបនោះសម្ដេចតេជោនាយករដ្ឋមន្ដ្រី បានចូលរួមអបអរសាទរចំពោះដំណើរវិវត្ដន៍ដ៏ល្អ របស់ធនាគារ ANZ ROYAL នៅក្នុងប្រទេសកម្ពុជា ដោយមានប្រសាសន៍ថា ការនេះបានចូលរួមចំណែកក្នុងការទប់ស្កាត់ និង ជម្រុញធ្វើឱ្យមានស្ថិរភាពម៉ាក្រូសេដ្ឋកិច្ច នៅពេលដែលពិភពលោកកំពុងតែជួបប្រទះនូវវិបត្ដិហិរញ្ញវត្ថុនោះ។ សម្ដេចតេជោ មានប្រសាសន៍ថា ប្រសិនបើធនាគារ ANZ មានបញ្ហាអ្វីនោះនឹងអាចនាំទៅដល់ការដួលរលំធនាគារ ផ្សេងៗទៀតនឹងក៏នាំទៅដល់ការលំបាករបស់រាជរដ្ឋាភិបាលកម្ពុជាផងដែរ ។
ឯកឧត្តម អ៊ាង សុផល្លែត ថ្លែងថា សម្ដេចតេជោនាយករដ្ឋមន្ដ្រីបានស្នើឱ្យធនាគារANZ បន្ដចូលរួមឱ្យបានកាន់តែសកម្មថែម ទៀតនៅក្នុងវិស័យហិរញ្ញវត្ថុនៅកម្ពុជា។ សម្ដេចតេជោថ្លែងថា សេចក្ដីត្រូវការរបស់រាជរដ្ឋាភិបាលគឺធនធានខួរក្បាល ដែលធនាគារANZ អាចចូលរួមចំណែកក្នុងការផ្ដល់យោបល់ក្ដី និង ការផ្ដួចផ្ដើមក្ដីតាមរយៈវេទិការាជរដ្ឋាភិបាល ជាមួយវិស័យឯកជន នោះ ។
សម្ដេចតេជោ ហ៊ុន សែន ក៏បានមានប្រសាសន៍ចូលរួមផ្តល់នូវការរំលែកផលវិបាកទាំងឡាយ ដែលបានកើតឡើងចំពោះប្រទេសអូស្ដ្រាលី ពាក់ព័ន្ធជាមួយបញ្ហាគ្រោះទឹកជំនន់នាពេលថ្មីៗនេះផងដែរ ។/
No comments:
New comments are not allowed.