Wednesday, January 05, 2011

អ្នក​ខេត្តស្រះកែវ ទប់ស្កាត់​​ពួកអាវ​លឿង​​...អនុញ្ញាត​ឱ្យតែ​តំណាង​៧​នាក់​ប៉ុណ្ណោះ ​ចូលទៅ​ខ្សែ​បន្ទាត់ព្រំដែន


 ទាហាន​​ការពារព្រំដែន​​កម្ពុជា
ព្រំដែន​គោកធ្យូង​ទឹកដីថៃ ​៖ ​ក្រុម​អ្នក​តវ៉ា​​អាវលឿងរាប់រយនាក់​​ដែល​មានបំណង​​សំរុក​ចូល​​​ទៅកាន់ឃុំគោកធ្យូង ខ្សែ​បន្ទាត់ព្រំដែន​​ទឹក​ដី​​ថៃ ចង់មើល​​ទីតាំង​ដែលសមត្ថ​កិច្ច​​កម្ពុជា​ចាប់​ខ្លួន​​ពលដ្ឋ​​របស់ពួកគេ​​៧​នាក់នោះ ត្រូវបាន​ទប់​ស្កាត់​​​នៅវេលាម៉ោង​​ប្រមាណ​​១រសៀល ​ថ្ងៃទី​៥ មករា ​២០១១ ​ត្រង់ចំណុចភូមិ​​​អាង​សិលា (ថៃ) ​ដោយពលរដ្ឋ​​អ្នកស្លូតត្រង់​​រស់នៅ​ក្នុងខេត្តស្រះ​កែវ ​ប្រទេស​ថៃ ។ ដោយសារតែ​​មានការ​ទប់ស្កាត់ពីសំណាក់​​ពលរដ្ឋ​​ថៃ​រស់នៅក្នុង​​ខេត្តស្រះកែវ ​ទៅលើពួក​អាវ​លឿង​​រាប់រយនាក់ មិនឱ្យ​ចូលទៅកាន់ឃុំ​​គោក​ធ្យូងនោះ បាន​​បង្ក​ឱ្យមាន​ការ​ប្រទូស្ត​រ៉ាយ​​យ៉ាងខ្លាំង​​ស្ទើរតែ​​ប្រើហិង្សា​​ដាក់គ្នា​ទៅហើយ ​រវាង​​អ្នក​ខេត្តស្រះកែវ និង​ក្រុម​និយមជ្រុល​​អាវ​លឿង​...​​ប៉ុន្តែ​ភ្លាមៗ​​នោះកំលាំង​​ចំរុះរបស់ថៃ បាន​សំរបសំរួល​​សុំ​ឱ្យ​មានតំណាង​ពួកអាវលឿង ៧​នាក់ ​ចូលទៅ​កាន់ឃុំ​​គោកធ្យូង ខ្សែ​បន្ទាត់​ព្រំ​ដែនថៃ​នោះ​វិញ​ ​ទើបពួកប្រឆាំង​​អាវ​លឿង និង​អ្នកខេត្ត​ស្រះកែវ វិលទៅរកភាព​ធូ​រ​ស្រាល​ ។​
មកដល់​វេលាម៉ោង​​ជិត​៤រសៀល​​ថ្ងៃទី​៥ មករា ២០១១ គេ​ឃើញ​តំណាងក្រុម​ជ្រុល​និយម​​អាវលឿង​​៧​នាក់ រួមជា មួយ​លោក​​សានិត ​ណាត់​​ស៊ុកស៊ី អភិបាលខេត្តស្រះកែវ និងមេ​បញ្ជា​ការ​​រង​កងទ័ព​ជើងគោល​ឈ្មោះ​​វ៉ាលីត បានចូល​ទៅ​កាន់​ខ្សែបន្ទាត់​​​ព្រំដែន​ឃុំ​គោកធ្យូង ហើយ​សម្លឹង​​មើល​ទៅបង្គោល​​ព្រំដែនលេខ​​៤៦ ទីដែល​សមត្ថ​កិច្ច​កម្ពុជាចាប់​​ខ្លួន​ពលរដ្ឋ​ ថៃ​​៧​នាក់​នោះ ​ទើប​​ពួក​គេ​អស់ចិត្ត បន្ទាប់មក​ក៏​​ចាកចេញ​​ទៅវិញភ្លាមៗ​ដោយមាន​​ទាហាន​​ការពារព្រំដែន​​ថៃ​បាន​ចាប់​ដៃ​រលាក់​សួស្តី​​​គ្នាជាមួយ​ទាហាន​​ការពារព្រំដែន​​កម្ពុជាផងដែរ ។​
សូមបញ្ជាក់​ថា មុនពេល​តំណាង​ពួកអាវ​លឿង​​បានចូលទៅដល់ឃុំ​គោកធ្យូង ខ្សែ​បន្ទាត់​ព្រំដែន​​នោះ គឺកាល​ពីវេលា​​ម៉ោង​១​រសៀល​​ថ្ងៃទី​​៥ មករា ​២០១១ មើលពីព្រំដែន​​ម្ខាង​​នៃឃុំ​អូរបីជាន់ ទឹកដីកម្ពុជា ទៅរក​ឃុំ​គោក​​ធ្យូង ទឹក​ដីថៃ​ គេឃើញ​ តម្រួត​ព្រំដែន​​ថៃ​រាប់​សិប​នាក់​បាន​រាយ​បន្លា​លួស​​លាត​សន្ធឹង​​យ៉ាង​វែង​នៅ​លើខ្សែ​បន្ទាត់​ព្រំដែន​​របស់ថៃ​​ចំងាយ​ប្រមាណ​ជាង​​២០០ម៉ែត្រ ​ពីបង្គោល​ឡាក់លេខ​​៤៦ ដើម្បី​ការពារ​ទប់ស្កាត់​មិន​ឱ្យ​ពួកអាវ​លឿង​ចូល​​ទៅ​​​​រញ៉េរញ៉ៃ​​នៅ​​តាម​ខ្សែ​បន្ទាត់ព្រំដែន ។​ ​បានជា​​មានការ​រាយបន្លា​លួស​បែបនេះ ព្រោះ​គេ​​ដឹង​ថា ពួកអាវ​លឿង​រាប់​រយនាក់​កំពុង​​ធ្វើ​ដំណើរ​​តាមផ្លូវ​​សំរុក​ចូលមក​​ឃុំគោកធ្យូង​​ទឹក​ដី​ថៃ​​ ដើម្បី​​ពិនិត្យ​​មើល​បង្គោល​​ព្រំដែនលេខ​​​៤៦ ទី​ដែល​សមត្ថ​កិច្ច​​កម្ពុជា​​ធ្វើ​ការ​ចាប់​ឃាត់ខ្លួន​​ពល​រដ្ឋ​ថៃ​​៧​នាក់​ ក្នុងនោះ​​មានតំណាង​រាស្ត្រ​​ម្នាក់​ផង​ចូលលុកលុយ​​ប្រទេស​កម្ពុជា​ដោយខុសច្បាប់ ៕
ក្រុម ​អ្នក​តវ៉ា​​អាវលឿងដែល​មានបំណង​​សំរុក​ចូល​​​ទៅកាន់ឃុំគោកធ្យូង
ខ្សែ​បន្ទាត់ព្រំដែន​​ទឹក​ដី​​ថៃ ត្រូវបាន​ទប់​ស្កាត់​​​ ដោយតម្រួត​ព្រំដែន​​ថៃ

តម្រួត​ព្រំដែន​​ថៃ​រាប់​សិប​នាក់​បាន​រាយ​បន្លា​លួស​​លាត​សន្ធឹង​​យ៉ាង​វែង​នៅ​លើខ្សែ​បន្ទាត់​ព្រំដែន​​
របស់ថៃ​​ចំងាយ​ប្រមាណ​ជាង​​២០០ម៉ែត្រ ​ពីបង្គោល​ព្រំដែនលេខ​​៤៦


 ទាហាន​​ការពារព្រំដែន​​កម្ពុជា

តម្រួតព្រំដែន​ថៃ​ដាក់​ពង្រាយ​​បន្លា​លួស​ទប់ស្កាត់​​ពួកជ្រុលនិយម​​អាវលឿង​​កុំ​ឱ្យ​​​ចូលមក​​បង្គោលព្រំដែនលេខ​៤៦


ព្រំដែន​​ឃុំអូរបីជាន់ ៖ ​មកដល់​​ម៉ោង​១​រសៀល​​ថ្ងៃទី​​៥ មករា ​២០១១ មើលពីព្រំដែន​​ម្ខាង​​នៃឃុំ​អូរបីជាន់ ទឹកដីកម្ពុជា ទៅរក​ឃុំ​គោក​​ធ្យូង ទឹកដីថៃ​ គេឃើញ​តម្រួត​ព្រំដែន​​ថៃ​រាប់​សិប​នាក់​បាន​រាយ​បន្លា​លួស​​លាត​សន្ធឹង​​យ៉ាង​វែង​នៅ​លើខ្សែ​បន្ទាត់​ព្រំដែន​​របស់ថៃ​​ចំងាយ​ប្រមាណ​ជាង​​២០០ម៉ែត្រ ​ពីបង្គោល​ព្រំដែនលេខ​​៤៦ ដើម្បីការពារ​ទប់ស្កាត់​មិន​ឱ្យ​ពួកអាវ​លឿង​ចូល​​ទៅ​​​​រញ៉េរញ៉ៃ​​នៅ​​តាម​ខ្សែ​បន្ទាត់ព្រំដែន ។​
​បានជា​​មានការ​រាយបន្លា​លួស​បែបនេះ ព្រោះ​គេ​​ដឹង​ថា ពួកអាវ​លឿង​រាប់​រយនាក់​កំពុង​​ធ្វើ​ដំណើរ​​តាមផ្លូវ​​សំរុក​ចូលមក​​ឃុំគោកធ្យូង​​ទឹក​ដី​ថៃ​​ ដើម្បី​​ពិនិត្យ​​មើល​បង្គោល​​ព្រំដែនលេខ​​​៤៦ ទី​ដែល​សមត្ថ​កិច្ច​​កម្ពុជា​​ធ្វើ​ការ​ចាប់​ឃាត់ខ្លួន​​ពល​រដ្ឋ​ថៃ​​៧​នាក់​ ក្នុងនោះ​​មានតំណាង​រាស្ត្រ​​ម្នាក់​ផង​ចូលលុកលុយ​​ប្រទេស​កម្ពុជា​ដោយខុសច្បាប់ ៕

ថ្ងៃស្អែក​នេះ​​តុលាការ​នឹង​បង្គាប់​​ឱ្យនាំ​​ខ្លួនពល​រដ្ឋថៃ​ខុសច្បាប់​​៧​នាក់ មកសាក​សួរ​​ដើម្បី​​ដាក់បន្ទុក​​បន្ថែមទៀត

រាជធានីភ្នំពេញ ៖ សេចក្តី​រាយការណ៍​ពី​​សាលា​ដំបូង​រាជធានីភ្នំពេញ​​បាន​ឱ្យ​ដឹង​ថា នៅ​ថ្ងៃ​ព្រហស្បតិ៍ ទី​៦ មករា ២០១១ ស្អែកនេះ សាលា​ដំបូង​រាជធានី​ភ្នំពេញ បានបង្គាប់​​ឱ្យនាំខ្លួន​ជន​ជាតិ​ថៃ​​៧​នាក់ ដែលអាជ្ញាធរ​​​ខ្មែរ​ចាប់ខ្លួនពី​បទ​ឆ្លងដែន​​ចូលក្នុង​ទឹកដី​​កម្ពុជា ដោយខុសច្បាប់ មកធ្វើ​ការសាក​សួរ​​​បន្ថែមទៀត ។ កាលពី​ថ្ងៃទី​​៤ មករា ២០១១ ​ប្រធាន​សាលា​ដំបូង​រាជធានី​ភ្នំពេញ ​លោកជីវ កេង បាន​​ប្រាប់​​កោះសន្តិភាព​​តាមទូរស័ព្ទ​​​​ថា ​ជនជាតិថៃ​​៧​នាក់នេះ សាលា​ដំបូង​មិនមែន​ហៅ​មកសួរចំលើយ​​​ទេ ប៉ុន្តែ​ហៅមកសាកសួរ​​បន្ថែម​​ទាក់ទង​​នឹងការឆ្លង​ដែន​ចូលក្នុងទឹកដី​កម្ពុជាដោយខុសច្បាប់ ។ ​លោក​បន្ត​ថា មក​ទល់​នឹង​​ពេលនេះ យើងប្រមូល​បាន​ភស្តុ​តាង​មួយ​ចំនួន​​រួចហើយ ​ពាក់ព័ន្ធ​​​នឹង​ការ​ឆ្លងដែន​ខុសច្បាប់​​របស់​​ជនជាតិសៀម​​ទាំង​៧​នាក់នេះ ។
ពីប្រទេសថៃ​​ឯណោះវិញ ​កាលពីថ្ងៃ​ទី​៤ មករា ២០១១ ​គេហទំព័រ​​​បាងកកប៉ុស្តិ៍​​បាន​ចាក់​ផ្សាយ​​នូវវីដេ​អូ​ឃ្លីប​​មួយ​បញ្ជាក់​ថា លោក​ផានិច ​វីគីតសេត ​តំណាង​រាស្ត្រ​​ថៃ ដែលជាប់​​ចោទ​​ចូល​ក្នុងទឹកដីកម្ពុជា ដោយខុសច្បាប់​នោះ​ ត្រូវបាន​​លោក​​នាយករដ្ឋ​មន្ត្រីថៃ​​អាប់ភីស៊ីត ចាត់​បញ្ជូន​​​ឱ្យ​មក​កាន់ព្រំដេន​​ខ្មែរ-​ថៃ នៅមុនពេល​​ដែល​អាជ្ញាធរ​​ខ្មែរ​ចាប់​ខ្លួន ។ វីដេអូឃ្លីប​​នោះបានបង្ហាញ​ថា ​​​រូបលោក​ផានិច វីគីតសេត​ កំពុង​និយាយ​ទូរស័ព្ទ​​​ទៅកាន់​លេខាធិ​ការ​របស់គាត់ ដើម្បី​ឱ្យ​​ប្រាប់​បន្ត​ទៅ​លេខា​​ធិការ​របស់​​លោក​នាយករដ្ឋ​មន្ត្រី​​​អាប់​ភី​ស៊ីត វីចាជីវ៉ា គឺ​លោក​ស៊ុម​គាត ​ក្រុងវឌ្ឍនា​ស៊ុក ឱ្យ​​ប្រាប់​​លោក​​​អាប់​ភីស៊ីត ​​ផង​ថា លោកកំពុង​ស្ថិត​ក្នុងទឹកដី​កម្ពុជាហើយ ប៉ុន្តែ​លោកតំណាង​រាស្ត្រ​ជាប់ចោទ​​រូបនេះ​បែរជា​​ប្រាប់​លេខាធិការ​​របស់គាត់ មិន​ឱ្យ​ប្រាប់​​អ្នក​ណា​ថា គាត់កំពុង​មាន​វត្តមាន ​ស្ថិតនៅ​​ក្នុង​ទឹក​​ដី​​​កម្ពុជានោះទេ ។
លើសពីនេះ​ទៀត លោក​តំណាង​​រាស្ត្រ​​​​ថៃ​​ជាប់​ចោទ​​​ក៏បាន​និយាយ​​ទូរស័ព្ទ​​ប្រាប់លេខាធិការ​​របស់គាត់ ឱ្យប្រាប់​លេខាធិការ​​លោកអាប់ភីស៊ីត ​ទៀត​ថា សូម​ឱ្យ​នាយករដ្ឋ​មន្ត្រី​​​ថៃ អាប់ភីស៊ីត វ៉េចាជីវ៉ា ​ជួយអន្តរាគមន៍​​​មកលើ​រូប​គាត់​ផង ប្រសិនបើ​​​មានបញ្ហា​ ពីព្រោះ​​លោកតំណាង​​រាស្ត្រ ជាប់ចោទ​រូប​នេះ​បានដឹង​​ជា​មុនហើយ​ថា អា​ច​នឹង​មាន​​បញ្ហា​​​ពេលដែលគាត់​ចូលក្នុងទឹកដី​​​កម្ពុជា​នេះ ជាក់ជាមិនខាន​​ ។ ប៉ុន្តែ​ម៉ោង​ក្រោយ​ការបង្ហាញ​​នូវវីដេអូឃ្លី​ប​នេះ លោកនាយករដ្ឋ​មន្ត្រី​​ថៃ អាប់ភីស៊ីត វ៉េ​ចាជី​វ៉ា ​បានទទួលស្គាល់​​ថា រូបលោក​ពិតជា​​បាន​ចាត់​បញ្ជូន​លោក​តំណាង​រាស្ត្រ​​​ជាប់ចោទ​​ទៅកាន់ព្រំ​ដែន​ខ្មែរ-ថៃ​មែន ប៉ុន្តែ​​​មិនបានដឹង​ថា លោក​ផា​និច វីគីតសេត នៅទីកន្លែង​ណា​នោះទេ  
ដោយ ៖ កោះឯករាជ្យ

សម្តេចតេជោ ៖ អ្នកដែល​​ប្រឆាំង​​នឹង​ថ្ងៃ​​៧ មករា ​គួរតែ​នាំខ្លួន​​ឡើង​សាលាក្តី​​ខ្មែរ​ក្រហម


ខេត្តកំពង់ចាម​ ៖ ​សម្តេចតេជោហ៊ុន​ សែន ​​នាយក​រដ្ឋ​មន្ត្រី​បានចាត់ទុកថ្ងៃទី​​​៧ មករា គឺ​ជា​ថ្ងៃ​​​របស់ប្រជា​ពលរដ្ឋ​​ទាំងអស់គ្នា​ ហើយថា ថ្ងៃ​៧ មករា ​នេះ ​មិនមែន​​ប្រឆាំង​ជាមួយអ្នកណាក្រៅពី​របប​​ប៉ុល ពត នោះឡើយ ។ ជាមួយ​នឹងការ​រំលឹក​​ឡើង​វិញ​​នូវប្រវត្តិ​​​តស៊ូរបស់សម្តេច​ និង​រំលឹក​​ពីចំណង​អាពាហ៍​​ពិពាហ៍​​រវាង​សម្តេច​​ជាមួយ​នឹង​លោក​ជំទាវ​បណ្ឌិត​ប៊ុន រ៉ានី ហ៊ុន សែន ​​កាល​ពី​​ជាង​៣០​ឆ្នាំមុននោះ សម្តេច​អគ្គ​មហា​សេនា​បតីតេជោ​ហ៊ុន សែន​ ​បានចាត់ទុក​​អ្នកដែល​ប្រឆាំង​ថ្ងៃ​៧ មករា ​​គឺជា​​ជន​អគតិ​មិន​ទទួល​ស្គាល់​ការ​ពិតជា​ប្រវត្តិ​​​សាស្ត្រដែល​​ធ្វើ​ឱ្យ​​កម្ពុជា​ធ្លាក់​​មក​ដល់​​ឆ្នាំ​សូន្យ​... ហើយ​ថា ​​អ្នក​ដែល​​យល់​​ថា របបខ្មែរ​ក្រហម​​ជា​របប​ត្រឹមត្រូវ​ល្អ អ្នក​នោះ​​​គឺ​ជាអ្នកគាំទ្ររបប​​​ប៉ុល ពត ដែលគួរតែ​​នាំ​ខ្លួន​ឡើង​សាលាក្តី​​ខ្មែរក្រហម ។
គួរបញ្ជាក់​ថា ការថ្លែង​របស់​​​សម្តេច​នាយក​រដ្ឋ​មន្ត្រី​​​ហ៊ុន សែន យ៉ាង​ដូច្នេះ​​នេះ គឺបានធ្វើ​ឡើង​ក្នុងពិធី​អបអរ​សាទរ​ខួបអនុស្សាវរីយ៍​​លើក​ទី​​៣២​ឆ្នាំ ទិវា​ជ័យជំនះ​​៧ មករា ​និងពិធី​បង្សុកូល​ឧទ្ទិស​កុសល​​ជូនដល់វិញ្ញា​ណក្ខន្ធ​​បុត្រា​របស់​សម្តេចដែលបានស្លាប់​ក្នុង​​របប​ប៉ុល ពត ក៏ដូច​ជា​​សំណេះ​សំណាល​​​ជាមួយប្រជាពលរដ្ឋ​​​ជា​ច្រើន​​ពាន់នាក់​នៅក្នុង​​វិទ្យាល័យ​​ប៊ុន រ៉ានី ហ៊ុន សែន ​ស្ថិត​ក្នុង​​ស្រុកមេមត់ ខេត្តកំពង់ចាម ​នាព្រឹកថ្ងៃ​​​ទី​​៥ មករា ២០១១
ដោយ ៖ កោះឯករាជ្យ

អាជ្ញា​ធរ​ខេត្ត​មិនបានតំរូវ​​ឱ្យ​មន្ត្រីនានាយក​លុយ ពី​អ្នកឡើង​ទៅ​កំសាន្ត​លើ​ភ្នំបូកគោ​ទេ

ខេត្ត​កំពត ៖ គេ​តែង​បាន​កត់​សំគាល់​ឃើញ​ថា នៅ​រដូវ​ចូល​ឆ្នាំ​​សាកល​​ឬ​ចូលឆ្នាំ​ប្រពៃ​ណី​ខ្មែរ កន្លងមក ភ្ញៀវ​ជាតិ​ និងអន្តរ​ជាតិរាប់ម៉ឺននាក់ និងរថយន្ត​រាប់ពាន់​គ្រឿង​បាន​​ធ្វើ​ដំណើរ​ទៅកាន់​ភ្នំ​បូក​គោ ដើម្បី​​ស្រូប​យក​ខ្យល់​អា​កាស​បរិសុទ្ធ​​លើ​កំពូលភ្នំ​ដ៏​ខ្ពស់​សន្លឹម​នេះ ។ ជា​​រៀង​​រាល់​ឆ្នាំ​ពិសេស​ពិធីឆ្លងឆ្នាំ​សាកល​ម្តងៗ​ មានមន្ត្រី​ការ​ពារ​ឧទ្យាន​ជាតិ​ព្រះ​មុនី​វង្សបូកគោជាអ្នក​រាប់​ក្បាល​រថយន្ត​​ឱ្យ​បង់​លុយ​ពី​៣​ពាន់ ទៅ៥ពាន់​ ឬទៅ​១ម៉ឺន​រៀល តាម​ប្រភេទ​រថ​យន្ត​​តូច​ធំ ហើយ​មន្ត្រី​ផ្សេងៗអង្គុយ​ចាំ​កត់ត្រា​ចំនួនមនុស្ស និងរថ​យន្ត​នៅ​ផ្លូវ​ឡើង​ទៅ​ភ្នំ​ ។
ដោយ​ឡែក​ពិធីឆ្លងឆ្នាំសាកល២០១១នេះ មិនមាន​មន្ត្រីណាម្នាក់​អង្គុយ​ចាំយក​លុយ​​ទៀត​ទេ ​គឺបើក​ឱ្យ​ភ្ញៀវ​ឡើង​ទៅកំសាន្ត​លើភ្នំបូកគោ​រយៈ​ពេល​២​ថ្ងៃ​ ចាប់ពីថ្ងៃទី៣១ ធ្នូ​ ២០១០ ដល់​ថ្ងៃទី​១​ មករា ២០១១ ។ ក្នុង​រយៈ​ពេល​២​ថ្ងៃ​នេះ បើ​តាម​ការអះ​អាងពី​អ្នករាប់​ចំនួនរថយន្ត​ឡើង​ភ្នំ​បូក​គោ គឺ​មិនលើស​ពី​៣០០​គ្រឿងទេ ហើយ​មនុស្ស​ក៏​មិនច្រើន​ប៉ុន្មានដែរ ។ មន្ត្រី​នៅស្នាក់​​ការ​ឧទ្យា​ន​ជាតិ​និយាយ​ថា​ ពួកគេ​មិនបាន​តំរូវ​ឱ្យ​ភ្ញៀវបង់លុយក្បាលឡានដូចឆ្នាំមុនៗ​ទេ​ គ្រាន់​តែកត់​ត្រា​ឈ្មោះ​និងលេខ​ទូរស័ព្ទ​​ប៉ុណ្ណោះ ខ្លាច​មានហេតុការណ៍​​អ្វីនៅ​ខាង​លើ​ ឬងាយ​ស្រួល​ទាក់​ទង ។
លោក​អ៊ឹង ម៉េង​ហ៊ួរ ​អភិបាល​រងខេត្តមាន​​ប្រសាសន៍​ថា ក្នុងអំឡុង​ពេលមានការ​ស្ថាបនា​​ផ្លូវ​ឡើង​​ទៅកាន់​ភ្នំបូកគោ​ គឺមិនអនុ​ញ្ញាត​ឱ្យ​ភ្ញៀវ​​ជាតិ និងអន្តរជាតិ​ឡើង​ទៅលើភ្នំ​បូកគោ​ទេ ព្រោះ​ខ្លាច​មានគ្រោះ​ថ្នាក់​ លើ​ក​លែង​តែថ្ងៃ​បុណ្យ​ជាតិធំៗ​ទើបមាន​ការ​អនុញ្ញាត​ឱ្យ​ឡើង​ ហើយ​យ៉ាង​​យូរ​តែក្នុង​រយៈ​ពេល៣​ថ្ងៃប៉ុណ្ណោះ ។ លោក​អភិបាលរង​ខេត្តមាន​ប្រសាសន៍​បន្តថា មិនមានមន្ត្រីថ្នាក់​ខេត្ត​ទៅ​ត្រួត​ពិនិត្យ​ពីចំនួន​ភ្ញៀវ​ទេ​ ។ អ្នកលក់ដូរលើ​ភ្នំបូ​ក​គោ​និយាយ​ថា ពួ​ក​គាត់​លក់​ដូរ​មិនដាច់​ដូច​ឆ្នាំមុនៗ​ទេ​ ដោយសារមិន​មានភ្ញៀវ​​ទេសចរ​​ច្រើន​​ ម្យ៉ាង​វិញ​ទៀតស្ថាន​ភាព​ផ្លូវ​ឡើងទៅលើ​កំពូលភ្នំ​នៅមាន​ការ​លំបាក​នៅ​ឡើយ ព្រោះ​កំពុង​សាងសង់​ ។ កាលពី​ឆ្នាំមុនៗ ផ្លូវ​អាច​ពិបាក​លើសនេះ​ទៅទៀត​ ប៉ុន្តែ​នៅតែ​មាន​ភ្ញៀវ​ច្រើន​ ដូច្នេះ​គេមិនដឹង​ពីមូល​ហេតុ​​នៃការថយ​ចុះ​ភ្ញៀវ​នេះ​ទេ ព្រោះ​មន្ត្រី​នានា​មិន​បានចូល​រួម​ធ្វើ​ការ​ត្រួតពិនិត្យ និងសិក្សា
ដោយ ៖ កោះឯករាជ្យ

ទាហាន​ប៉ារ៉ា​ថៃ​បន្ថែម​កម្លាំង​និង​យក​បន្លា​លួស​ជា​រនាំង​ទប់​បាតុករ

ព្រំដែន​កម្ពុជា​-សៀម​ចំណុច​បង្គោល​លេខ​៤៦​ ខេត្ត​បន្ទាយ​មាន​ជ័យ​នៅ​តែ​ក្តៅ​គគុក​នៅ​ ឡើយ​ ដោយ​ហេតុ​ថា​ ពួក​បាតុករ​អាវ​លឿង​សៀម​មិន​បាន​បន្ថយ​កម្លាំង​ទេ​ តែ​បាន​បន្ថែម​កម្លាំង​ឮ​មក​​កាន់​តែ​ច្រើន​ថែម​ទៀត​ មក​ប្រឈម​ជា​មួយ​កង​ទ័ព​កម្ពុជា​ត្រង់​ចំណុច​ចាប់​ខ្លួន​ពួក ​ជ្រុល​និយម​សៀម​ទាំង​៧​នាក់​ ។
លោក​រ័ត្ន​ ស្រ៊ាង​ មេ​បញ្ជាការ​កង​រាជ​អាវុធ​ហត្ថ​ខេត្ត​បន្ទាយ​មាន​ជ័យ​ប្រាប់​កម្ពុជា​ថ្មី​ថា​ពួក ​បាតុករ​អាវ​លឿង​បាន​បន្ថែម​កម្លាំង​កាន់​តែ​ច្រើន​នៅ​ល្ងាច​នេះ​ហើយ​កង​ទ័ព​ថៃ​ឈុត​ប៉ារ៉ា​ក៏ ​បន្ថែម​ដែរ​ ជា​មួយ​និង​ការ​ដាក់​បន្លា​លួស​រារាំង​ពួក​បាតុករ​យ៉ាង​ក្តៅ​គគុក​ ។
លោក​បាន​បញ្ជាក់​ថា​ ដោយ​សារ​តែ​ក្រុម​បាតុករ​មាន​គ្នា​ច្រើន​បាន​បុក​ទម្លាយ​បារ៉ាស់​ខ្លាំង​ ទៅ​ៗ​នៅ​ចំណុច​គោក​ធ្យូង​ កង​ទ័ព​ក៏​បាន​សម្រេច​ឲ្យ​តំណាង​ក្រុម​បាតុករ​ពី​៦​ទៅ​៧​នាក់​មក​ ពិនិត្យ​ចំណុច​ព្រំដែន​ដែល​ជា​កន្លែង​ចាប់​ពួក​គេ​ទាំង​៧​នាក់​។ក្រុម​តំណាង​បាតុករ​ទាំង​នោះ​ត្រូវ​ បាន​នាំ​មុខ​ដោយ​ចៅ​ហ្វាយ​ខេត្ត​ស្រះ​កែវ​ ។​ ពួក​គេ​ត្រូវ​បាន​កំណត់​ឲ្យ​ឈរ​នៅ​លើ​បន្ទាត់​ខ្មៅ​ ព្រំ​ដែន​តែ​ប៉ុណ្ណោះ​ ។ ឥឡូវ​ក្រុម​បាតុករ​ហ្វូង​ធំ​ស្ថិត​នៅ​ចម្ងាយ​ ពី​ព្រំ​ដែន​ប្រហែល​៥​គីឡូ​ម៉ែត្រ​ប៉ុណ្ណោះ​

ស្ថានភាពភូមិជោគជ័យចាប់ពីថ្ងៃចាប់ជនជាតិថៃ៧នាក់និង ការត្រៀមទប់ទល់ជាមួយក្រុមអាវលឿងថៃ

ស្ថានភាព​ព្រំ​ដែន​កាន់​តែ​តាន​តឹង​ពី មួយ​ថ្ងៃ ទៅ​មួយ​ថ្ងៃ នៅ​ចំនុច​បន្ទាត់​ព្រំ​ដែន​កម្ពុជា​​ ថៃ​ នៃ​ស្រុក​អូរ​ជ្រៅ​និង​ក្រុង​ប៉ោយ​ប៉ែត​ខេត្ត​បន្ទាយ​មាន​ជ័យ​ឈម​និង​ខេត្ត​ស្រះកែវ​ប្រទេ​សថៃ​បន្ទាប់​ពី​​កម្ពុជាបាន​ចាប់​ខ្លួន​ជន​ជាតិ​ថៃ​ជ្រុល​និយម​ចំនួន​៧​នាក់​នៅ​ចំនុច​ក្បែរ​បង្គោល​ព្រំ​ដែន​លេខ​៤៦​ដល់​មុខ​វត្ត​ជោគ​ជ័យ​ក្នុង​ភូមិ​ជោគ​ជ័យ​ ឃុំ​អូរ​បី​ជាន់​ ស្រុក​អូរ​ជ្រៅ​។ ការ​តាន​តឹង​និង​ស្មុគស្មាញ​នេះ​គឺ​កើត​ឡើង​ដោយ​សារ​តែ​បាតុករ​អាវ​លឿង​បាន​ប្រមូល​ផ្ដុំ​គ្នា​នៅ​ស្រុក​អារញ្ញ​និង​ស្រុក​គោក​ធ្យូង​នៃ​ខេត្ត​ស្រះកែវ​ជាប់​ព្រំ​ដែន​កម្ពុជា​ធ្វើ​ការ​តវ៉ា​អោយ​ដោះ​លេង​ជន​ជាតិ​ថៃ​ទាំង​៧​នាក់​ដែល​ធ្វើ​អោយ​យោធាថៃ​ចល័ត​ទ័ព​ចុះ​ឡើង​ច្រើន​ទៅ​​ៗ​ចូល​កាន់​តែ​កៀក​ទឹក​ដី កម្ពុជា​។
បញ្ហា​ស្មុគស្មាញ​ទាំង​នេះ​ធ្វើ​អោយ​សមត្ថកិច្ច​អាជ្ញាធរ​ខេត្ត​បន្ទាយ​មាន​ជ័យ​ជា​ពិសេស​កម្លាំង​ទ័ព​ជួរ​មុខ​កំពុង​តែ​ប្រុង​ជើង​ការ​យ៉ាង​ខ្ពស់​ដើម្បី ទប់​ទល់​សភាព​ការ​។ ផ្ដើម​ចេញ​ពី​បញ្ហា​ខាង​លើ​នៅ​ព្រឹក​ថ្ងៃ ទី​៥ ខែ​មករា ឆ្នាំ​២០១១ នេះ​អាជ្ញាធរ​ខេត្ត​បន្ទាយមាន​ជ័យ​បាន​ធ្វើ​ការ​ប្រជុំ​បន្ទាន់​មួយ​ក្រោម​អធិបតី​ភាព ឯកឧត្តម​ កែ​ គឹម​យ៉ាន​ ឧបនាយក​រដ្ឋ​មន្រ្តី​ដើម្បី​ក្ដាប់​សភាព​ការ​តាមបន្ទាត់​ព្រំ​ដែន​និង​វាយ​តំលៃ​ពី​ស្ថានភាព​ព្រំ​ដែន​នាពេល​បច្ចុប្បន្ន​ ។
លោក អ៊ុង អឿន​ អភិបាល​ នៃ​គណៈអភិបាលខេត្ត​បន្ទាយ​មានជ័យ​បាន​ឡើង​រាយ​ការ​ពី​ស្ថានភាព​ព្រំដែន​បន្ទាប់​ពី​ថ្ងៃ​ចាប់​ខ្លួន​ពួក​ជ្រុល​និយម​សៀម​៧​នាក់​ដែល​ចូល​ជ្រៅ​មក​ទឹក​ដី​កម្ពុជាតាំង​ពី​ថ្ងៃ​ទី​២៩ ខែ​ធ្នូ ឆ្នាំ​២០១០ ថាតាំង​ពី​ថ្ងៃ​ទី​២៩​ខែ​ធ្នូ​ឆ្នាំ​២០១០​. វេលា​ម៉ោង​១០​និង​.៣០​​នាទី​ក្រុម​ជ្រុល​និយម​អាវ​លឿង​សៀម​. ចំនួន​០៧​នាក់​ (​ ប្រុស​៥​នាក់​ស្រី​០៣នាក់​ ) បាន​លួច​ឆ្លង​ដែន​​ចូល​មក​ក្នុង​ទឹក​ដី​កម្ពុជា​. តាម​ចំនុច​ច្រក​បង្គោល​សីមា​លេខ​៤៦. ចូល​មក​ក្នុង​ភូមិ​ជោគជ័យ​ ឃុំ​អូរ​បី​ជាន់​ ស្រុក​អូរ​ជ្រៅ​ខេត្ត​បន្ទាយ​មាន​ជ័យ​. រហូត​ដល់​ចំនុច​មុខ​វត្ត​ជោគ​ជ័យ​TA ( ៥១៩៦៦.២២២៧១ ) ត្រូវ​កង​កម្លាំង​ការពារ​ព្រំដែន​លេខ​៥០៣​ធ្វើ​ការ​ឃាត់​ខ្លួន​បញ្ជូន​អោយ​កង​កម្លាំង​ប៉ូលិស​អន្តោ​ប្រវេសន៍​ខេត្ត​បន្ទាយ​មាន​ជ័យ​។​​ក្រោយ​ពី​ការឃាត់​ខ្លួន​ជន​ជ្រុល​និយម​អាវ​លឿង​សៀម​ភ្លាមៗ​នោះ​កង​កម្លាំង​ភាគី​សៀម​ ដែល​ឈរ​ជើង​នៅ​ទល់​មុខ​ច្រក​ជោគ​ជ័យ​ បាន​ប្រតិកម្មអោយ​ភាគី​កម្ពុជា​. ធ្វើ​ការដោះ​លែង​ជន​ជាតិ​សៀម​. តែ​ភាគី​យើង​បាន​ប្រាប់​ថា​ ក្រុម​អាវ​លឿង​ទាំង​៧​នាក់​នោះ​បាន​បញ្ជូន​ទៅ​ថ្នាក់​លើ​ហើយ​ ។

ថ្ងៃ​ដដែល​វេលា​ម៉ោង​ ១៧ម៉​០០​នាទី​ លោក​ឧត្តម​សេនីយ៍​ត្រី​ វលិត​ ផុតាឆៈណៈផាក់ឌី​ មេ​បញ្ជាការ​រង​កំលាំង​បូព៌ា​សៀម​ បាន​ទំនាក់​ទំនង​ជាមួយ​មេបញ្ជា​ការ​កង​ការពារ​ព្រំដែន​លេខ​៥០៣​ប្រចាំ​ទិស​អូរបី​ជាន់​ ជួប​ប្រជុំ​ពិភាក្សា​ដោះ​ស្រាយ​បញ្ហាការ​ឃាត់​ខ្លួន​ជន​ជាតិ​ថៃ​ទាំង​៧​នាក់​នៅ​ទី​បញ្ជាការ​ជួរ​មុខ​តំរួច​ព្រំដែន​កង​អនុ សេនាធំលេខ​១២៦​. TA (​ ៥២១.២២៩​ ) ទល់​មុខ​ច្រក​ជោគ​ជ័យ​សំណើ​សុំ​ឲ្យ​កង​កំលាំង​យើង​ជួយ​អន្តរាគ​មន៍​ ដោះ​លែង​ជន​ជាតិ​សៀម​ទាំង​៧​នាក់​មក​វិញ​តែ​កំលាំង​យើង​បាន​ប្រាប់​ថា​ យើង​ខ្ញុំ​ពុំ​មាន​លទ្ធភាព​ជួយ​បានទេ​ ។ ពេល​នោះ​ភាគី​សៀម​បាន​ប្រាប់​យើង​ថា​ធ្វើ​ការ​បិទ​ច្រក​ព្រំដែន​ ចាប់​ពី​ខាង​ជើង​ប៉ោយ​ប៉ែត​រហូត​ដល់​ជួរ​ភ្នំ​ដង​រ៉ែក​ ។

នៅ​ថ្ងៃ​ទី​៣០ ខែ​ធ្នូ​ ឆ្នាំ​២០១០​ វេលាម៉ោង​០៩.៤០នាទី​ភាគី​សៀម​បាន​សុំ​បើក​ច្រក​បឹង​ត្រកួន​វិញ។ ថ្ងៃ​ទី​៣០​ ខែ​ធ្នូ​ ឆ្នាំ​២០១០ ម៉ោង​ ៨និង​ ០០នាទី​ព្រឹក​សៀម​បាន​បញ្ជូន​កំលាំង​ទាហាន​ប៉ារ៉ា​វេរសេនាធំ​លេខ​២១​. កង​ពល​ធំ​លេខ​២ អម​ដោយ​រថ​ពាស​ដែក​ប្រមាណ​២០​គ្រឿង​មក​កាន់​តំបន់​ព្រំដែន​. ចាប់​ពី​ទល់​មុខ​តំបន់​អាង​សិលា​ ដល់​ទល់​មុខ​តំបន់​ចំការ​គរ. ដោយ​យក​លែស​ថា​ ទប់​ស្កាត់​ក្រុម​បាតុករ​អាវលឿង​ ដែល​មាន​បំណង​ធ្វើ​បាតុកម្ម​តវ៉ា​ទាមទា​អោយ​ដោះ​លែង​ជនជាតិ​សៀម​ទាំង​៧​អ្នក​ទៅ​វិញ​។

ថ្ងៃ​ទី​៣១ ខែ​ធ្នូ ឆ្នាំ​២០១០ ម៉ោង​៩និង​៣០​នាទី​ កង​កំលាំង​តំរួត​សៀម​លេខ​១២៦​ចំនួន​០៣​នាក់​សុំ​សហការ​ត្រូត​ពិនិត្យ​បង្គោល​សីមា​លេខ​៤៦​រួម​ជាមួយ​កំលាំង​យើង​ មាន​កង​ព្រំដែន​លេខ​៥០៣​ចំនួន​០៨​នាក់​កង​រាជ​អាវុធហត្ថ​០៤​នាក់​ផ្នែក​សឹក​រង​ស្រុក​អូរជ្រៅ​០២​នាក់​។

ម៉ោង៩​និង​៤០​នាទី​ថ្ងៃ​ដដែល​ មេ​បញ្ជាការ​តំរួត​ការពារ​ព្រំដែន​កង​អនុសេនាធំ​លេខ​១២៦​បាន​ជូន​ដំណឹង​មក​កំលាំង​យើង​ នៅ​តំបន់​ភូមិ​ជោគ​ជ័យ​ថា​នៅ​ម៉ោង​១៤និង​០០​នាទី​នេះ​មេ​បញ្ជាការ​យោធភូមិ​ភាគទី​១​សៀម​ សុំ​ចូល​មក​ពិនិត្យ​កន្លែង​កំលាំង​យើង​ឃាត់​ខ្លួន​ក្រុម​ជ្រុល​និយម​សៀម​ទាំង​៧​នាក់​។ យើង​បាន​រាយការណ៍​និង​សុំ​យោបល់​ថ្នាក់លើ​តែ​ថ្នាក់​លើ​មិន​អនុញ្ញាតិ​ឲ្យ​កំលាំង​សៀម​ចូល​ទេ​។

ម៉ោង​៩និង​៤៥​នាទី​ទាហាន​សៀម​ បាន​បញ្ជូន​កំលាំង​និង​រថ​ពាស​ដែក​ចំនួន​០៤​គ្រឿង​មក​ដាក់​នៅ​ចំនុច​TA ( ៥០១.២១៧ ) ទល់​មុខ​បង្គោល​សីមា​លេខ​៤៨ ។ ម៉ោង​១០ និង​ ០០នាទី​ឧទ្ធម្ភាកចក្រ​សៀម​០១​គ្រឿង​បាន​ចុះ​មក​នៅ​ភូមិ​គោក​ធ្យូង​ប្រទេស​សៀម​។ ម៉ោង​១០​និង​​៤០​នាទី​ឧទ្ធម្ភាកចក្រ​០១​គ្រឿង​ទៀត​បាន​មក​ចុះ​នៅ​ភូមិ​គោក​ធ្យូង​។ ម៉ោង​១១និង​០០នាទី​សៀម​បាន​បញ្ជូន​កំលាំង​ចំនួន​១៤​រថយន្ត​ចូល​មក​ទី​បញ្ជាការ​កង​អនុសេនាធំ​លេខ​១២៦​ទល់​មុខ​ច្រក​ជោគជ័យ​។

ថ្ងៃ​ដដែល​វេលាម៉ោង​១១និង៣០​នាទី​​ទាហាន​សៀម​ដេញ​ប្រជា​ពលរដ្ឋ​ខ្មែរ​ដែល​ចូល​ទៅ​ធ្វើ​កម្មករ​ក្នុង​ទឹក​ដី​ថៃ​ឲ្យ​ត្រឡប់​មក​ប្រទេស​ខ្មែរ​វិញ។​ ម៉ោង​១៥​និង​១០​នាទី​ឧទ្ធម្ភាចក្រ​ថៃ​០១​គ្រឿង​បាន​ហោះ​ពីលិច​មកទល់​មុខ​ច្រក​ជោគ​ជ័យ។
ថ្ងៃទី​០១​ខែ​មករា​ឆ្នាំ​២០១១​ម៉ោង​១០​និង​៣០​នាទី​សៀម​បាន​បញ្ជូន​កំលាំង​បន្ថែម​០១​រថយន្ត​ប្រមាណ​១៣​នាក់​មក​ដាក់​នៅ​ចំណុច​ទល់​មុខ​ច្រក​ជោគជ័យ​។​ថ្ងៃ​ទី​០១​ខែ​មករា​ឆ្នាំ​២០១១​ម៉ោង​១២​និង​១០​នាទី​ទាហាន​ឈុត​ខ្មៅ​ថៃ​បាន​បញ្ជូន​កំលាំង​ចំនួន​១៥​នាក់​សហការជាមួយ​តំរួត​ការពារ​ព្រំដែន​​លេខ​១២៦​នៅ​ទល់​មុខ​ភូមិ​អាង​សិលា​ខ្មែរ​ .ទប់​ស្កាត់​ក្រុម​បាតុករ​អាវ​លឿង​ ។

ថ្ងៃ​ទី​០២​ខែ​មករា​ ឆ្នាំ​២០១១ ម៉ោង​៧​និង​៣០​នាទី​ក្រុម​បាតុករ​អាវ​លឿង​សៀម​ប្រមាណ​១០០០នាក់​បាន​ធ្វើ​សកម្មភាព​ឆ្ពោះ​មក​តំបន់​ព្រំដែន​៣​គោលដៅ​ ។ គោល​ដៅ​ទល់​មុខ​ចំការគរ​ គោល​ដៅ​ទល់​មុខ​ភូមិ​ជោគ​ជ័យ​ និង​គោល​ដៅ​ទល់​មុខ​អាង​សិលា​ តែ​ត្រូវ​បាន​កំលាំង​តំរួត​និង​ប្រជាពល​រដ្ឋ​សៀម​ធ្វើ​ការ​ទប់ស្កាត់​បាន​។ ថ្ងៃ​ទី​០៣ ខែ​មករា​ ឆ្នាំ​២០១១ វេលាម៉ោង​១៤​និង​០០នាទី​ក្រុម​បាតុករ​អាវលឿង​ប្រមាណ​៥០០នាក់​បាន​នាំ​គ្នា​ធ្វើ​ដំណើរ​តាម​រថយន្ត​ ពី​អារញ្ញ​ឆ្ពោះ មក​កាន់​តំបន់​ព្រំដែន​​តែ​ត្រូវ​បាន​អាជ្ញាធរ​សៀម​និង​កង​កំលាំង​ទាហាន​សៀម​ទប់​ស្កាត់​នៅ​ចំណុច​ភូមិ​អាង​សិលា​ប្រទេស​សៀម​។​ ម៉ោង​១៤​និង​៣៥​នាទី​ឧទ្ធម្ភាចក្រ​សៀម​០១​គ្រឿង​បាន​ហោះ​តាម​បណ្ដោយ​ព្រំដែន​ពី​អារញ្ញ​ មក​បង្គោល​សីមា​លេខ​៤៣​រួច​ត្រឡប់​ទៅ​វិញ​។ ព្រឹក​ថ្ងៃ​ទី​០៤​ខែ​មករា​ឆ្នាំ​២០១១ សៀម​បាន​បញ្ជូន​កំលាំង​ប្រមាណ​ពី​១៥០​-​២០០​នាក់​មក​ឈរ​នៅ​ទល់​មុខ​តំបន់​ភូមិ​ជោគ​ជ័យ​ដើម្បី ធ្វើការទប់​ស្កាត់​ក្រុម​បាតុករ​អាវ​លឿង​។ ថ្ងៃ​ទី​០៤​ ខែ​មករា​ ឆ្នាំ​២០១១ ម៉ោង​១១​និង​៣០​នាទី​ឧទ្ធម្ភាចក្រ​សៀម​០១​គ្រឿង​បាន​ហោះ​តាម​បណ្ដោយ​ព្រំដែន​ពី​អារញ្ញ​មក​ភូមិ​សាស្រ្ត​ទល់​មុខ​ភូមិ​ជោគជ័យ​រួច​ត្រឡប់​ទៅ​វិញ​។

ថ្ងៃ​ទី​០៥​ខែ​មករា​ឆ្នាំ​២០១១ ស្ថានភាព​ព្រំ​ដែន​ក្នុង​ទឹក​ដី​ថៃ​ក្រុម​អាវលឿង​បន្ទាប់​ពី​យប់​ម៉ិញ​បាន​សំរុក​ទៅ​ភូមិ​គោក​ធ្យូង​ទល់​មុខ​បង្គោល​ព្រំ​ដែន​លេខ​៤៦​។​ក្រុម​អាវ​លឿង​បាន​ដក​ថយ​ពី​មុខ​ស្ថាន​កុង​ស៊ុល​ខ្មែរ​ប្រចាំ​ខេត្ត​ស្រះ​កែវ​បន្សល់​ត្រឹម​តែ​១០០​នាក់​ដោយ​ក្រុម​អាវ​លឿង​ទៅ​កើន​ក្នុង​ទឹក​ដី​ថៃ​ទល់​មុខ​ច្រក​អូរ​បី​ជាន់​ទឹក​ដី​កម្ពុជា​ ហើយ​និង​ប្រមូល​ផ្ដុំ​នៅ​វាល​ស្រុក​អារញ្ញ​មុខ​ស្ថានីយ៍​រថភ្លើង​ស្រុក​អារញ្ញ​នឹងប៉ុស្តឹប៉ូលីសខ្លងឡឹក។

ផ្នែកតាមសភាពការណ៏កន្លងមកនេះ យើងសន្និតដ្ឋានបានថាៈ សៀមមានគោលបំណងរំលោភ ឈ្លានពានយក ភូមិ ជោគជ័យរបស់កម្ពុជា។ពួកក្រុងជ្រុលនិយមអាវលឿងនៅតែមានមហិច្ឆតាចូលមកក្នុងភូមិ ជោគជ័យដើម្បីយក លេសអោយរាជរដ្ឋាភិបាល កម្ពុជាធ្វើការដោះលែងជនជាតិសៀមទាំង៧នាក់មកវិញ។ សៀមយក តំបន់នេះ បង្កបញ្ហាដើម្បីបំរើអោយការងារនយោបាយរបស់គេ ហើយកំណត់យកតំបន់នេះ ជា ចំនុចក្តៅដូចនៅតំបន់ ប្រាសាទព្រះវិហារ។

តាមការរៀបរាប់ចង្អុលបង្ហាញរបស់យោធាជួរមុខប្រចាំនៅបន្ទាត់ព្រំដែនកំពុងកាន់តឹងបានរៀបរាប់ថាៈ កាលពីល្ងាចនិងយប់ថ្ងៃទី ៤.០១.២០១១ កំលាំងឈុតខ្មៅថៃ ៣០០នាក់ និង១០០នាក់ទៀតបានដាក់បន្ថែម នៅភូមិអាងសិលា ឃុំ អូរបីជាន់របស់កម្ពុជា។ចំពោះស្ថានភាពព្រំដែនព្រឹកថ្ងៃទី ៥.០១.២០១១ នឹងកាន់តែតាន តឹង រវាងបាតុករអាវលឿងនិងពលរដ្ឋ និង យោធាថៃដែលធ្វើអោយកម្ពុជាកាន់តែត្រៀមទប់ទល់ការពារកាន់តែ ខ្លាំង។
លុះនៅវេលាម៉ោង១២រសៀលថ្ងៃទី ៥ មករា ២០១១ នេះតាមប្រភពព័ត៌មានពីប៉ូលីសការពារព្រំដែន បានអោយដឹងថាៈ ក្រុមបាតុករអាវលឿងកំពុងតែប្តូរយុទ្ធសាស្រ្តសំរុកទៅបង្គោលព្រំដែនលេខ ៤៦ ដោយប្រើ វិធីពីហែលក្បួនតាមរថយន្តមកហែរក្បួនតវ៉ាតាមថ្មើរជើងវិញ។ ប៉ុន្តែពេលនេះបាតុករអាវលឿងដែលមាន ចំនួនពី ៣០០០នាក់ ទៅ ៤០០០នាក់ដែលកំពុងតែកកស្ទុះនៅលើលផ្លូវបំបែកក្នុងភូមិប៉ារ៉ៃ ស្រុកអារញ្ញ។ ដែលការកកស្ទុះនេះបណ្តាលមកពីប្រជាពលរដ្ឋថៃ និង កងទ័ពថៃធ្វើការរារាំងដោយដាក់ប៉ារ៉ាស់ពាសពេញ តាមដងផ្លូវ នឹងមានការប៉ះទង្គិចពាក្យសំដីរវាងពលរដ្ឋថៃនិងបាតុកករអាវលឿង។

គួរបញ្ជាក់ថាចំនុចកកស្ទះខាងលើបើគិតពីចម្ងាយមកដល់ព្រំដែនកម្ពុជាដល់ចំនុចច្រករបៀងព្រៃគុប ក្នុង ភូមិ ព្រៃគុប សង្កាត់ ប៉ោយបែត មានចម្ងាយប្រហែលជា ៦Km ៕

រំលឹក​ខួប​ទី​៣២ នៃ​ទិវា​ជ័យជំនះ ៧​មករា ខេត្ត​ស្វាយរៀង​

សាលាខេត្ត​ស្វាយរៀង បាន​ប្រារព្ធ​ទិវា​មី​ទ្ទី​ញ​រំលឹក​ខួប​ទី​៣២ នៃ​ជ័យជំនះ ៧ មករា (៧ មករា ១៩៧៩-​មករា ២០១១) កាលពី​ព្រឹក​ថ្ងៃទី​៤ ខែ​មករា ឆ្នាំ​២០១១ នេះ​ក្រោម​អធិបតីភាព​របស់​លោក​នាយ​ឧត្តមសេនីយ៍ ម៉ឹង សំផន រដ្ឋលេខាធិការ​ក្រសួង​ការពារជាតិ និង​លោកស្រី និង​មាន​អ្នកចូលរួម​ប្រមាណ ៥ ពាន់​អ្នក​ទៀត ។​

​    ​លោក ជៀង អំ អភិបាលខេត្ត​ស្វាយរៀង បាន​អាន​សុន្ទ​កថា​របស់​សម្តេច​ពោធិ​សាល ជា ស៊ីម ប្រធានព្រឹទ្ធសភា និង​ជា​ប្រធាន​គណបក្ស​ប្រជាជន​កម្ពុជា ថ្លែង​ក្នុង​ពិធី​មី​ទ្ទី​ញ​រំលឹក​ខួប​ទី​៣២ នៃ​ទិវា​ជ័យជំនះ ៧ មករា ដែល​នៅក្នុង​សន្ទរកថា នោះ​បាន​លើកឡើង​អំពី​សមិទ្ធផល​យ៉ាង​ធំធេង ជា​ប្រវត្តិសាស្ត្រ​ជូន​ជាតិ​គឺ :
​    ​-​ដំណាក់កាល​ពី​ឆ្នាំ ១៩៧៩ ដល់​ឆ្នាំ ១៩៩៣
​    ​-​ដំណាក់កាល​ពី​ឆ្នាំ​១៩៩៣ រហូតដល់​បច្ចុប្បន្ន មិន​គ្រាន់តែ​សម្រេច​បាន​សន្តិភាព និង​ការអភិវឌ្ឍន៍​បច្ចុប្បន្ន​ប៉ុណ្ណោះ​ទេ គឺ​យើង​បាន​លប់បំបាត់​ទាំងស្រុង​នូវ​មូលហេតុ​ផ្ទៃក្នុង ដែល​នាំ​ឲ្យ​កើតសង្គ្រាម ចាក់គ្រឹះ​សន្តិភាព​ដ៏​រឹងមាំ និង​ពង្រឹងកំលាំង​ជឿជាក់ ចំពោះ​អនាគត​ដ៏​ល្អ​ប្រសើរ សម្រាប់​ប្រជាជន​យើង​គ្រប់ៗ​ជំនាន់​តរៀង​ទៅ ។​

​    ​លោកនាយ​ឧត្តមសេនីយ៍ ម៉ឹង សំផន បាន​មានប្រសាសន៍ថា : ទិវា​នៃ​ជ័យជំនះ​នេះ​ធ្វើឡើង​ក្នុង​ស្មារតី​ចងចាំ​ជានិច្ច​នូវ​ឧក្រិដ្ឋកម្ម នៃ​របប​កម្ពុជា​ប្រជាធិបតេយ្យ និង​អត្ថន័យ​ដ៏​ធំធេង​ជា​ប្រវត្តិសាស្ត្រ​នៃ​ជ័យជំនះ ៧ មករា និង​ក្នុង​ស្មារតី​គោរព​ដឹងគុណ​ដ៏​ជ្រាលជ្រៅ ចំពោះ​វីរ​យុទ្ធជន យុទ្ធ​នារី​នៃ​កង ទ័ព​បដិវត្តន៍​កម្ពុជា ព្រមទាំង​វីរ​យុទ្ធជន​នៃ​កងទ័ព​ស្មគ្រ័ចិត្ត​វៀតណាម ដែល​បាន​ប្រយុទ្ធ​ធ្វើ​ពលី​កម្ម ប្រកប​ដោយ​វីរភាព​ដ៏​ឧត្តុង្គឧត្តម​បំផុត ដើម្បី​បុព្វហេតុ​នៃ​ការ​រស់​ឡើង​វិញ​របស់​ប្រជាជន​កម្ពុជា ។​

​    ​ជ័យ​ជ​នះ ៧ មករា ១៩៧៩ ប្រៀប​ដូច​ជា​ពន្លឺ​ដ៏​ភ្លឺ​ចាំងចែង​ដែល​បាន​មក​បំភ្លឺ​មាតុភូមិ​កម្ពុជា ឲ្យចេញ​ផុត​ពី​សម័យកា​លដ៏ខ្មៅ​ងងឹត​បំផុត​នោះ ។ ហើយ​ប្រជាជន​កម្ពុជា​បាន​ចងចាំ​ជានិច្ច​ថា : ថ្ងៃ​៧ មករា គឺជា​ថ្ងៃកំណើត​ទី​២ របស់​ខ្លួន​បើ​គ្មាន​ថ្ងៃ​ជ័យជំនះ ៧ មករា ក៏​គ្មាន​អ្វីៗ​នា​សព្វ​ថ្ងៃនេះ​ដែរ ។ ៣២ ឆ្នាំ​មកនេះ​ស្មារតី​៧ មករា​បាន​បំភ្លឺ​ផ្លូវ​យើង​ជា​និច្ច និង​ជា​ប្រភព​កម្លាំង​លើកទឹកចិត្ត​ដ៏​ខ្លាំងក្លា ដែល​បាន​ធ្វើឲ្យ​យើង​អាច​ពុះ ពារ​ជំនះ​រាល់​ឧបសគ្គ​តូចធំ បាន​ដោយ​ជោគជ័យ ហើយ​ស្មារតី ៧ មករា គឺ​សាមគ្គីភាព​វីរភាព និង​ជ័យជំនះ ។​

​    ​គួរបញ្ជាក់​ថា ៖ ខេត្ត​ស្វាយរៀង​ត្រូវ​បាន​រំដោះ​ចេញពី​របប​ប្រល័យ​ពូជសាសន៍ កម្ពុជា​ប្រជាធិបតេយ្យ​នៅ​ថ្ងៃ​ទី​៤ ខែ​មករា ឆ្នាំ​១៩៧៩ មុន​ការរំដោះ​រាជធានី​ភ្នំពេញ​ចំនួន ៣ ថ្ងៃ ៕

កម្ពុជា បង្កើន​កម្លាំង ខណៈ​បាតុករ​អាវ​លឿង​ថៃ លើកគ្នា មក​កាន់​តំបន់​ព្រំដែន តែ​ត្រូវ​រារាំង​

នៅ​ព្រឹក​ថ្ងៃទី​៥​មករា ឆ្នាំ​២០១០​នេះ នៅ​ចំណុច​ភូមិ​ជោគជ័យ ឃុំ​អូរ​បី​ជាន់ ស្រុក​អូរជ្រៅ ខេត្ត​បន្ទាយមានជ័យ នៅ​បង្គោល​ព្រំដែន​កម្ពុជា​-​ថៃ លេខ ៤៦ និង ៤៧ កងកម្លាំង​កម្ពុជា ត្រូវបាន​បង្កើន​ច្រើន ដោយ​ក្នុង​នោះ មាន​កង​កម្ម៉ង់ដូ កម្លាំង​នគរបាល និង​ប៉េ​អឹម ត្រូវបាន​បញ្ជូន​ទៅ​កាន់​ព្រំដែន​ ។ ការបង្កើន​កម្លាំង​នៅ​ព្រំដែន​កម្ពុជា​-​ថៃ ចំណុច​ភូមិ​ជោគជ័យ​របស់​កម្ពុជា និង​ភូមិ​ណង​ចាន់ របស់​ថៃ ដើម្បី​ការពារ កុំ​ឲ្យ​បាតុ​ក​រអាវ​លឿង​ថៃ រុលចូល​ទឹកដី​កម្ពុជា ដែល​ក្រុម​ជ្រុលនិយម​ថៃ​ទាំងនោះ ចាត់ទុកថា ជា​ទឹកដី​របស់​ថៃ ​។​

​    ​ប្រភព​ពី​ជាយដែន បានបញ្ជាក់​ថា ការបង្កើន​កម្លាំង​កម្ពុ​ជា នៅ​ទល់ដែន​ថៃ​នេះ គឺ​ទប់ទល់​នឹង​បាតុករ​អាវ​លឿង​ថៃ ហើយ​បើ​បាតុករ​ទាំងនោះ ចូល​ទឹកដី​កម្ពុជា គឺ​យើង​មិន​ប្រើ​អាវុធ​ទប់ទល់​ឡើយ តែ​យើង​ប្រើកម្លាំង ចាប់ខ្លួន​បាតុករ​ថៃ​ទាំង​នោះ ហើយ​បញ្ជូន​ទៅកាន់​ទោស ក្នុង​តុលាការ ដូច​ករណី​ជនជាតិ​ថៃ ៧ នាក់ ដែល​ត្រូវ​បាន​កងកម្លាំង​កម្ពុជា ចាប់ខ្លួន កាលពី​ថ្ងៃ​ទី​២៩​ធ្នូ ឆ្នាំ​២០១០ ​។​
​    ​ដោយឡែក​នៅ​ឯ​សាលាខេត្ត​បន្ទាយមានជ័យ នា​ព្រឹក​ថ្ងៃទី​៥​មករា​នេះ កិច្ចប្រជុំ​មួយ ត្រូវបាន​ធ្វើឡើង ដើម្បី​វាយតម្លៃ​ពី​សភាពការណ៍​ព្រំដែន​កម្ពុជា និង​ថៃ នៅ​ទិសពាយ័ព្យ ពិសេស​នៅ​ខេត្ត​បន្ទាយមានជ័យ ដើម្បី​ដាក់ចេញ​នូវ​យុទ្ធសាស្ត្រ​ការពារ​ព្រំដែន កុំឲ្យ​មាន​ការរំលោភបំពា​ន ​។​
​    ​កិច្ចប្រជុំ​នោះ ដឹកនាំ​ដោយ​លោក​ឧបនាយករដ្ឋមន្ត្រី កែ គឹមយ៉ាន អតីត​អគ្គមេបញ្ជាការ​កង​យោធពល​ខេមរភូមិន្ទ ដោយ​មាន​ការចូលរួម​ពី​អភិបាលខេត្ត អភិបាលស្រុក មេបញ្ជាការ​កងទ័ព និង​នគរបាល​ការពារ​ព្រំដែន​កម្ពុជា​-​ថៃ ​។​
​    ​ប្រភព​ពី​កិច្ចប្រជុំ បានឲ្យដឹងថា មាន​ការវាយតម្លៃ​ថា ព្រំដែន​កម្ពុជា និង​ថៃ នៅ​ខេត្ត​បន្ទាយមានជ័យ មាន​ភាព​តានតឹង ហើយ​ផុយស្រួយ ដែល​តម្រូវ​ឲ្យ​កម្ពុជា បង្កើន​កម្លាំង ដើម្បី​ទប់ទល់​នឹង​កម្លាំង​ទាំង​ស៊ីវិល និង​កងកម្លាំងប្រដាប់អាវុធ​របស់​ថៃ ខ្លាចក្រែង​កងទ័ព​ថៃ យក​លេស​ទប់ទល់​បាតុករ​ថៃ ហើយ​ឆ្លៀត​ចូល​ទឹកដី​កម្ពុជា ​។​
​    ​អង្គប្រជុំ ក៏​បាន​គូសបញ្ជាក់ថា មិន​ឲ្យ​បទពិសោធន៍​នៅ​វត្ត​កែវ​សិក្ខា​គិរី​ស្វា​រៈ នៅ​ព្រំដែន​ប្រាសាទ​ព្រះវិហារ ត្រូវបាន​ថៃ​ប្រើប្រាស់​នៅ​ព្រំដែន​ខេត្តបន្ទាយមានជ័យ​ឡើយ​ ។ បទពិសោធន៍​នៅ​វត្ត​កែវ​សិក្ខា​គិរី​ស្វា​រៈ កាលពី​ថ្ងៃ​ទី​១៥​កក្កដា ឆ្នាំ​២០០៨ គឺ​កងទ័ព​ថៃ បាន​ចូល​រំលោភ ឈ្លានពាន​លើ​ទឹកដី​កម្ពុជា ជិត​ប្រាសាទ​ព្រះវិហារ ក្រោម​លេស​ថា ចូល​មក​ការពារ​ជនជាតិ​ថៃ ៣ នាក់ ដែល​បាន​ចូល​ទឹកដី​កម្ពុជា ដោយ​ខុសច្បាប់ នៅ​ចំណុច​មុខ​ប្រាសាទព្រះវិហារ របស់​កម្ពុជា​ ។​
​    ​សូមបញ្ជាក់​ថា មកដល់​ព្រឹក​ថ្ងៃទី​៥​មករា​នេះ បាតុករ​អាវ​លឿង​ថៃ បាន​ប្រមូលផ្តុំ នៅ​ស្រុក​គោក​ធ្យូង ដើម្បី​ដង្ហែ​ក្បួន​បាតុកម្ម ទៅ​កាន់​តំបន់​ព្រំដែន​កម្ពុជា និង​ថៃ ចំណុច​បង្គោល​លេខ ៤៦ នៅ​ភូមិ​ជោគជ័យ របស់​កម្ពុជា និង​ភូមិ​ណង​ចាន់ របស់​ថៃ​។ ក៏ប៉ុន្តែ​បាតុករ​ថៃ​ប្រហែលជា ៥០០ ទៅ ៦០០ នាក់​នោះ បាន​ប៉ះទង្គិច​ជាមួយ​អ្នកភូមិ​ជាយ​ដែន ទាហាន​បូព៌ា ទាហាន​ឈុតខ្មៅ​ថៃ និង​កង​តម្រួត​ថៃ ដោយ​មាន​ការប្រតាយប្រតប់ បណ្តា​ឲ្យ​របួស និង​ចាប់ខ្លួន​មេ​បាតុករ​អាវ​លឿង​ថៃ​ ។ ​
​    ​សេចក្តីរាយការណ៍​ពី​ជាយ​ដែន បានបង្ហាញ​ថា ការប៉ះទង្គិច ដែល​កើតចេញ​ពី​ការរារាំង​ដំណើរ​របស់​បាតុករ​អាវ​លឿង​ថៃ​នោះ កើតឡើង​នៅក្នុង​ភូមិ​ប៉ា​រ៉ៃ ក្នុង​ស្រុក​អារញ្ញ​ប្រាថេត និង​នៅភូមិ​អាង​សិលា ក្នុងស្រុក​គោក​ធ្យូង ជាប់​ព្រំដែន​កម្ពុជា ក្នុង​សង្កាត់​ប៉ោយ​ប៉ែត និង​ឃុំ​អូរ​បី​ជាន់ ​។​
​    ​ក្នុង​ព្រឹត្តិការណ៍​នោះ រថពាសដែក របស់​ទាហាន​ថៃ ៥ គ្រឿង រួម​ទាំង​ទាហាន​ឈុតខ្មៅ និង​ទាហាន​ប៉ា​រ៉ា​ថៃ ប្រមាណ ៣០០ នាក់ ត្រូវបាន​គេ​បញ្ជូន​ទៅ​កាន់​តំបន់​ព្រំដែន ជិត​បង្គោល​ឡាក់​លេខ ៤៦ ដើម្បី​រារាំង​ក្រុមបាតុករ​ថៃ​ ។​
​    ​សូម​រម្លឹកថា បាតុករ​អាវ​លឿង​ថៃ បាន​ធ្វើ​បាតុកម្ម​តវ៉ា នៅ​ខេត្ត​ស្រះកែវ ជាប់​នឹង​ខេត្ត​បន្ទាយមានជ័យ​របស់​កម្ពុជា ពីរ​បី​ថ្ងៃ​មក​ហើយ ដើម្បី​ទាមទារ​ឲ្យមាន​ការដោះលែង​ជនជាតិ​ថៃ ៧ នាក់ ដែល​មាន​ទាំង​សមាជិក​សភា​ថៃ ២ នាក់​ផង​ ។ ជនជាតិ​ថៃ​ទាំង ៧ នាក់​នោះ បាន​ចូល​ទឹកដី​កម្ពុជា ដោយ​ខុសច្បាប់ នៅ​ចំណុច​បង្គោល​ព្រំដែន​លេខ ៤៦ ក្នុងភូមិ​ជោគជ័យ ឃុំ​អូរ​បី​ជាន់ ស្រុក​អូរជ្រៅ ខេត្ត​បន្ទាយមានជ័យ​។ ជនជាតិ​ថៃ​ទាំង ៧ នាក់​នោះ ត្រូវបាន​ឃុំឃាំង​នៅ​ពន្ធនាគារ​ព្រៃ​ស នៅ​ភ្នំពេញ ដើម្បី​រង់ចាំ​ការកាត់ទោស ដែល​អាច​នឹង​ធ្វើឡើង​នា​ថ្ងៃទី​៦​មករា ឆ្នាំ​២០១១

ធនាគារ​អភិវឌ្ឍន៍អាស៊ី​ជួយ​ស្តារការអាន​នៅ​កម្ពុជា​

ក្នុង​គោលដៅ​លើកស្ទួយ​ការអាន​នៅ​កម្ពុជា ធនាគារ​អភិវឌ្ឍន៍អាស៊ី បាន​បើក​មណ្ឌល​ព័ត៌មាន​សាធារណៈ​នៅក្នុង​សាកលវិទ្យាល័យ​៣​គឺ​សាកលវិទ្យាល័យ​វេ​ស្ទើន​កំពង់ចាម សាកលវិទ្យាល័យ​សៅ​អ៊ី​ស​អេ​សៀ ខេត្តសៀមរាប និង​សាកលវិទ្យាល័យ​គ្រប់គ្រង​និង​សេដ្ឋកិច្ច​ខេត្ត​ព្រះសីហនុ​។ 

​យោងតាម​សេចក្តីប្រកាស​ព័ត៌មាន​របស់​ធនាគារ​អភិវឌ្ឍន៍អាស៊ី មណ្ឌល​ព័ត៌មាន​សាធារណៈ​ទាំងនោះ មាន​បំពាក់​ដោយ​ម៉ាស៊ីនត្រជាក់ ម៉ាស៊ីន​ព្រីន ភ្ជាប់​ដោយ​ប្រពន្ធ័ Internet និង​សៀវភៅ​រាប់​ពាន់​ក្បាល ជា​ភាសា​ខ្មែរ​និង​អង់គ្លេស​។ មណ្ឌល​ព័ត៌មាន​សាធារណៈ​ទី​៤​ត្រូវ​គេ​គ្រោង​នឹង​បើក​នៅ​ក្រុង​បាត់ដំបង​ក្នុង​ពេល​ឆាប់ៗ​នេះ​។​

​ធនាគារ​អភិវឌ្ឍន៍អាស៊ី​បាន​កត់សម្គាល់​ថា បើទោះបីជា​ប្រជាពលរដ្ឋ​ខ្មែរ​មាន​ជីវភាព​ប្រសើរ​ឡើង​ក៏​ដោយ ក៏​ទម្លាប់​នៃ​ការអាន​បាន​បាត់បង់​នៅក្នុង​សម័យ​ខ្មែរក្រហម​ដែល​ពេលនោះ​សៀវភៅ​ត្រូវបាន​គេ​ចាត់ទុក​ជា​របស់​មិន​សំខាន់​៕

អង្គភាព​ប្រឆាំង​អំពើ​ពុក​រលួយ​ផ្សព្វផ្សាយបែប​បទ​នៃ​ការ​ប្រកាស​ទ្រព្យ​សម្បត្តិដល់ ​មន្ត្រីក្រសួង​យុត្តិធម៌

កាលពីព្រឹកថ្ងៃទី០៥ ខែមករា ឆ្នាំ២០១១ ស្ថាប័នប្រឆាំងអំពើពុករលួយបានរៀបចំពិធី ផ្សព្វផ្សាយគំរោងនីតិវិធី នៃការ ប្រកាសទ្រព្យ​សម្បត្តិ ដល់មន្ត្រីក្រសួងយុត្តិធម៌​ដែលមាន​ការចូលរួមពីចៅក្រម ព្រះអាជ្ញា ព្រះរាជអជ្ញារង ក្រឡាបញ្ជី ដែលសរុបប្រមាណ១០០នាក់។
លោកអ៊ិត រ៉ាឌី អនុរដ្ឋលេខាធិការក្រសួងយុត្តធម៌ បានមានប្រសាសន៍ថា អ្នកដែលត្រូវ​ប្រកាសទ្រព្យសម្បត្តិស្ថិត នៅក្រោម ក្រសួងយុត្តធម៌ ​រួមមានទាំងចៅក្រម ព្រះរាជអាជ្ញា​ ព្រះរាជអាជ្ញារង និងក្រឡាបញ្ជី ប្រមាំ៩០០នាក់ ដែល ត្រូវធ្វើការប្រកាសទ្រព្យសម្បត្តិ​របស់ខ្លួន។ ទាក់ទងទៅនឹងកាលបរិច្ឆេទនៃការ ប្រកាសទ្រព្យសម្បត្តិ ចំពោះមន្រ្តីក្រសួង យុត្តធម៌ នឹង​ធ្វើការប្រកាសទ្រព្យសម្បត្តិនេះ លោក អនុរដ្ឋលេខាធិការក្រសួងយុត្តិធម៌ អ៊ិត រ៉ាឌី បានប្រាប់អោយដឹងថា​ នឹងចាប់ផ្តើមប្រកាសទ្រព្យសម្បត្តិនៅក្នុងសប្តាហ៍ទី៣ នៃខែ​មករា ឆ្នាំ២០១១។


លោក​ឃាង សេង ប្រធានផែ្នកជំរុញការអនុវត្តច្បាប់នៃអង្គភាពប្រឆាំងអំពើពុករលួយ​ ដែលបានអញ្ជើញជាអធិបតី នៅក្នុងពិធីនោះបានលើក​ឡើងថា រហូតមកដល់ពេលនេះយើងបានផ្សព្វផ្សាយ គ្រប់ ក្រសួង អស់ ហើយ ដែលមានជិត៣០ក្រសួង និង២៤ រាជធានីខេត្ត ប៉ុន្តែការប្រកាសទ្រព្យសម្បត្តិ លោកអះអាងថា អាចត្រូវរំកិល ពេលខ្លះរង់ចាំអនុក្រិត្យចេញសិន ពីព្រោះការប្រកាសទ្រព្យសម្បត្តិត្របោះត្រារបស់អង្គភាព។លោកឲ្យដឹងដែរថា សម្បត្តិដែលត្រូវប្រកាសរួមមាន អចលនទ្រព្យ ដូចជាដីធ្លីអាគារលំនៅដ្ឋាន យានយន្ត និងគ្រឿងចក្រ ទ្រព្យសម្បត្តិដែលងាយស្រួលដោះដូរជាសាច់ប្រាក់ មានដូចជា គ្រឿងអលង្គការ នាឡិកា ដែលមានតំលៃក្នុងមួយឯកតាចាប់ពី៤លាន​រៀលឡើង​សកម្មផាពអាជិវកម្មពាណិកម្ម។ ការប្រកាសអំពីបំណុល ការប្រកាសអំពី​ចំណូល។
លោកបានមានប្រសាសន៍ទៀតថា ចំពោះការប្រកាសអំពីប្រាក់ អង្គភាពប្រឆាំងអំពើ ពុករលួយ មិនមានការចាប់បង្ខំអោយប្រកាសពីចំនួនប្រាក់ក្នុង និងក្រៅធនាគារដែល ខ្លួនមាននោះទេ សាម៉ីខ្លួនចង់ប្រកាសក៏ មិនចង់ប្រកាស់ក៏បាន។ លោកបន្តថា រាល់ព័ត៌មាននៃការប្រកាសទ្រព្យសម្បត្តិ អ្នកសរសេរត្រូវតែធានា ថា ទម្រង់ បែបបទនោះពិតជាត្រឹមត្រូវពេញលេញ។លោក​ឃាង​សេង បានបញ្ជាក់ថា ការប្រកាសទ្រព្យ
សម្បត្តិលើកទី២ នឹងធ្វើនៅ​ក្នុងឆ្នាំ២០១៣៕

សម្ដេច​តេជោ ៖ អ្នក​ដែល​មិន​ទទួល​ស្គាល់​ថ្ងៃ​៧​មករា ​គឺ​ជា​ក្រុម​គាំទ្រ​រ​បប​ប៉ុល ពត គួរ​តែ​​ត្រូវ​កាត់​ទោស

សម្ដេច​តេជោ ហ៊ុន សែន បាន​ថ្លែង​ទៅ​កាន់​អង្គ​ពិធី​​​សំណេះ​សំណាល​ជាមួយ ប្រជាពលរដ្ឋ​នៅ​ស្រុក​មេមត់ ក្នុង​ពិធី​រំលឹក​ខួប​អនុស្សាវរីយ៍ ទិវា​៧​មករា​លើក​ទី​៣២។ សម្ដេច​បន្ត​ថា​អ្នក​​ខ្លះ​ផ្ដល់​តម្លៃ​ថ្ងៃ​ទី​២៣ តុលា ឆ្នាំ​១៩៩១។ បើ​ប៉ុល ពត មិន​ត្រូវ​បាន​ផ្ដួល​រលំ​​នៅ​​ថ្ងៃ​៧​មករា តើ​ប៉ុល ពត​ព្រម​ចរចា​នៅ​អង្គការ​សហប្រជាជាតិ​នោះ​ទេ។ បើ​អ្នក​ឯង​មាន​សារជាតិ​ជា​មនុស្ស បើ​ទុក​ប៉ុល ពត នៅ​តើ​មាន​ដល់​ថ្ងៃ​នេះ​ទេ? មាន​ដល់​ថ្ងៃទី​២៣ តុលា ឆ្នាំ១៩៩១ ដែរ​ឬទេ? ​ម្ចាស់​ហត្ថលេខី​​ដែល​បាន​ចុះ​ហត្ថលេខា​នោះ មិន​មាន​នៅ​សល់​ប៉ុន្មាន​ទេ អ៊ីចឹង​តើ​អាច​ចរចា​បាន​ដែរ​ឬ​ទេ? និយាយ​ឲ្យ​ខ្លី​មួយ​ម៉ាត់ អា​ពត វា​មិន​មាន​ការ​ចរចា​ទេ គឺ​វា​សម្លាប់​ចោល​បាត់​ទៅ​​ហើយ។ យើង​មាន​មោទនភាព​ដោយ​យើង​ចេះ​ដោះ​ស្រាយ​បញ្ហា​ដោយ​ខ្លួន​ឯង។
សម្ដេច​តេជោ ថ្លែង​ទៀត​ថា ថ្ងៃ​៧មករា រំ​ដោះ​ទាំង​ប្រែត និង​រំដោះ​ទាំង​ក្បាល​អ្នក​ជេរ​៧មករា ទៀត​ផង ដែល​អ្នក​ទាំង​នោះ​សុទ្ធ​តែ​ជា​ជន​អគតិ

សម្ដេច​ហ៊ុន សែន ៖ មាន​មេបក្ស​ខ្លះ​គេ​វិភាគ​រឿង​នយោបាយ​ជាតិ និង​អាមេរិក តែ​បក​មក​ហ៊ុន សែន​វិញ ដដែល

មេ​បក្ស​ខ្លះ​គេ​បាន​វិភាគ​រឿង​នយោបាយ​ចិន និង​អាមេរិក គេ​និយាយ​ថា ចិន​អាច​នឹង ដើរ​លឿន​ជាង​អាមេរិក ដោយ​សារ​ប្រទេស​ចិន​ដូរ​មេ​ដឹក​នាំ មិន​ដូច​នៅ​កម្ពុជា​នោះ​ទេ គឺ​ទុក​មេ​ដឹក​នាំ ដដែល​ៗ​ដូច​ហ៊ុន សែន។ ខ្ញុំ​សូម​ជម្រាប​ទៅ​អាម៉ាសៀ​នោះ​វិញ​ថា ចិន​គេ​ប្ដូរ​មេ​ដឹក​នាំ គេ​មិន​បាន​ប្ដូរ បក្ស​នោះ​ទេ ហើយ​ទី​២​គឺ​មេ​ដឹក​នាំ​ដែល​ប្ដូរ​គឺ​មាន​អាយុ​ជាង​៧០​ឆ្នាំ។ ខុស​ពី​ហ៊ុន សែន ដែល​ទើប​តែ មាន​អាយុ​ជាង​៥០​ឆ្នាំ​ទេ​អាវ៉ា។ ទៅ​មក​ៗ​និយាយ​រឿង​ហ៊ុន សែន ដដែល។ បើ​និយាយ​ឲ្យ​ចំ​ទៅ​ប្រកួត មិន​ឈ្នះ​ហ៊ុន សែន​ទេ និយាយ​សុំ​ត្រង់​ៗ​តែ​ម្ដង​ទៅ។ ប៉ុន្តែ​ទាល់​តែ​យូរ​បាន​អាច​ឈ្នះ​ហ៊ុន សែន

លោកកាស៊ីត ៖ ទំនាក់ទំនង​ថៃ-​កម្ពុជា​​នឹង​​មាន​បញ្ហា​ទៀត​​បើ​ក្រុង​ ភ្នំពេញ​អូស​បន្លាយពេល​​​ឃុំឃាំង​ជនជាតិ​សៀម​៧នាក់

កាសែត​ឌឹណេហ្សិន ​នៅថ្ងៃទី​​៥ មករា ​បាន​ចេញ​ផ្សាយ​​​ដោយដកស្រង់​សំដី​ប្រភពរដ្ឋាភិ​បាល​​ថៃ​​ថា លោកកាស៊ីត ភិរម្យ ​រដ្ឋ​មន្ត្រី​​ក្រសួង​ការបរទេស​​ចង់​ឱ្យ​គណៈ​រដ្ឋ​មន្ត្រី​សើរើ​​ឡើងវិញ ​នូវទំនាក់ទំនង​រវាង​ប្រទេស​ថៃ​​ និងប្រទេស​កម្ពុជា​ ប្រសិនបើ​​ក្រុងភ្នំពេញ នៅតែ​​អូស​បន្លាយ​​ពេល​​ចំពោះ​ករណី​របស់ពលរដ្ឋ​ថៃ​​៧​នាក់​​ដែល​កំពុង​ឃុំខ្លួន​នៅក្នុងប្រទេស​​កម្ពុជា ។ កាសែត​ថៃ​ដដែល​បានដកស្រង់​សំដីលោកកាស៊ីត ដែល​ថ្លែង​​ប្រាប់​​គណៈ​រដ្ឋ​មន្ត្រី​​​ក្នុងកិច្ចប្រជុំ​​គណៈ​រដ្ឋ​មន្ត្រី​​​ប្រចាំ​សប្តាហ៍​​​​រៀបចំឡើង​កាលពី​​ថ្ងៃ​ទី​​៤ មករា ​កន្លងមក​ថា ​រូបលោក​ទទួលបរាជ័យ​​ក្នុង​ការ​​​ពិភាក្សា​ជាមួយ​អាជ្ញាធរ​កម្ពុជា​ ក្នុងការ​ដោះ​ស្រាយ​​ករណី​ពលរដ្ឋ​ថៃ​​ទាំង​៧​នាក់​នោះ ក្រៅ​តុលាការ​ ពីព្រោះ​​ក្រុងភ្នំពេញ មានការ​​ខឹង​សម្បា​យ៉ាងខ្លាំង​​ចំពោះ​​​មនុស្សម្នាក់​​ក្នុងក្រុម​នោះ​ជា​ពិសេស​​មេដឹកនាំ​​សកម្មជន​អាវលឿង​លោក​វី​រ៉ា ​ស៊ុមខ្វាម​ឃីត ​។
លោកកាស៊ីត ថ្លែង​ថា ទោះបីជា​​រដ្ឋាភិបាល​​​របស់​លោកអាប់ភីស៊ីត ​​ធ្វើអន្តរាគមន៍​​ក្នុងប្រព័ន្ធ​​យុត្តិធម៌​​របស់ប្រទេស​​កម្ពុជា​ក៏​ដោយ ក៏​រូប​លោក​នៅតែ​​សង្ឃឹម​ថា អាជ្ញាធរក្រុងភ្នំពេញ​​នឹង​បង្កើន​​ល្បឿន​​ដំណើរ​​ការ​ដោះស្រាយ​​ករណី​របស់​​ជនជាតិថៃ​​៧​នាក់​នោះ ។ រដ្ឋ​មន្ត្រី​​ការបរទេស​ថៃ​​​រូបនេះថ្លែង​​ទៀត​ថា ទំនាក់ទំនង​រវាង​ប្រទេស​​កម្ពុជា និង​ប្រទេសថៃ​កំពុង​មានលក្ខណៈ​​ល្អ​ប្រសើរ​ឡើង ហើយ​លោកសង្ឃឹម​ថា កម្ពុជា​នឹង​​មិន​យករឿង​​ពលរដ្ឋថៃ​៧​នាក់​នេះ​ធ្វើជា​រឿង​​ធំ​ដុំ​នោះទេ

បូស​កំពុង​ធ្លាយ​មុខ អាប់​ភី​ស៊ី​ត​សារភាព​ពី​ការ​បញ្ជូន​លោក​ផា​និក​មក​កាន់​កន្លែង​ដែល​ត្រូវ​ចាប់ខ្លួន


កាសែត​បាងកកប៉ុស្តិ៍​​នៅថ្ងៃទី​៤ មករា ផ្សាយ​ថា លោកនាយករដ្ឋ​មន្ត្រី​​​អាប់ភីស៊ីត វ៉េ​ចាជីវ៉ា ​កាលពីព្រឹកថ្ងៃទី​​៤ មករា នោះ​ បាន​សារ​ភាព​ថា ​រូបលោក​បានបញ្ជូន​​លោក Panich Vikitsreth សមាជិក​​សភា​គណបក្ស​​របស់លោក​​ទៅកាន់​តំបន់​​ព្រំដែន​​រវាង​​​​ប្រទេស​ថៃ និង​ប្រទេស​កម្ពុជា ជា​កន្លែង​​ដែលលោក Panich និងពលរដ្ឋ​ថៃ​៦​នាក់ទៀត​​​ត្រូវ​ចាប់​ខ្លួន​ដោយ​ទាហាន​​កម្ពុជា ។ ​លោកអាប់ភីស៊ីត ​អះអាងបញ្ជាក់​​ដូច្នេះ​​មុនពេល​លោក​អញ្ជើញ​​ធ្វើជា​អធិបតី​​​ក្នុង​កិច្ចប្រជុំ​គណៈ​​រដ្ឋ​មន្ត្រី​​ប្រចាំ​សប្តាហ៍​​ដែល​​របៀប​វារៈ​​កំពូល​សំរាប់​កិច្ច​​ប្រជុំ​នេះគឺ​​ស្តីអំពី​​ពលរដ្ឋ​ថៃ​​៧​នាក់ ដែលត្រូវ​ចាប់ខ្លួន និងកំពុង​​ឃុំខ្លួន​នៅ​ក្នុង​ប្រទេស​​កម្ពុជា ។
​ទោះបីជា​​បែបណា ​ការផ្សាយ​​ដោយកាសែត​​បាង​កកប៉ុស្តិ៍​​​នេះមិន​ដឹង​ថា ជា​ការពិត​ ឬ​បែប​ណា​​នោះទេ ​ហើយក៏​មិន​​​បានបញ្ជាក់​​ឱ្យច្បាស់​លាស់​​ពី​ចេតនា​​នៃការ​បញ្ជូន​មក​នោះដែរ ។ ព្រោះ​​ថា លោក Panich ជា​តំណាង​​រាស្ត្រ​​​​ គួរ​តែ​មក​​ជា​ផ្លូវការ​​ណាមួយ ដើម្បី​​ស្វែង​យល់ពី​បញ្ហា​ព្រំដែន​​​មិនមែន​លួច​​មក​ជាមួយពួកអាវលឿង​​ដែលជា​ក្រុម​​ជ្រុលនិយម​​មួយក្តាប់​​តូច​ដែល​តែង​បង្ក​​អរិភាព​​ដល់​កម្ពុជា​នោះទេ ។​ យោង​តាម​​កាសែត​​ដដែលនេះបាន​​សរសេរ​ទៀត​ថា ជាមួយគ្នានេះ ​គណបក្ស​ប្រជា​ធិប​តេយ្យ​​​កំពុងកាន់​អំណាច​របស់​​លោកអាប់​ភីស៊ីត ​ក៏​នឹង​បើក​កិច្ច​​ប្រជុំ​​មួយផងដែរ ​នៅវេលារសៀល​​​ថ្ងៃ​ទី​​៤ មករា ដើម្បី​​ពិភាក្សា​​អំពីបញ្ហា​​​ជនជាតិ​សៀម​​ទាំង​៧​នាក់​នេះ ហើយ​សមាជិក​​សភា​គណ​បក្ស​​ប្រជាធិបតេយ្យ​​មួយចំនួន​ចង់ធ្វើដំណើរ​​​មក​កាន់ប្រទេស​​​កម្ពុជា ដើម្បី​​​សួរសុខទុក្ខ​​អ្នក​ទាំង​៧​នាក់នោះ ។ ​
ទាក់ទិន​ទៅនឹង​​ជនជាតិ​​សៀមទាំង​​៧​នាក់​នោះ លោក​ឧបនាយករដ្ឋ​​មន្ត្រី​​ស៊ូ​ថេប ​ធឿក​ស៊ូបាន់ ​ថ្លែងថា ពេលនេះ​ថៃ​ត្រូវតែ​អត់ធ្មត់​​ឱ្យ​បាន​​ច្រើន​​​ ហើយពឹង​ផ្អែក​​តែលើការ​ចរចា​ប៉ុណ្ណោះ ។ ​លោកស៊ូថេប ​បង្ហាញ​​​ពីក្តីសង្ឃឹម​​ថា សម្តេច​តេជោហ៊ុន សែន ​នាយករដ្ឋ​មន្ត្រី​កម្ពុជា ​នឹង​ពិ​ចារណា​អំពីទំនាក់ទំនង​​មិត្ត​ភាព​រវាង​ប្រទេស​​ថៃ​​ និងប្រទេស​កម្ពុជា ។ ឧបនាយករដ្ឋ​មន្ត្រី​​​ថៃ​រូបនេះ​​អះអាង​បញ្ជាក់​​ថា បញ្ហា​របស់​​លោក Panich មិនមែន​ជា​ល្បែង​នយោបាយ​​ ហើយ​លោក​បាន​សំដែង​​ពីការព្រួយបារម្ភ​​ចំពោះ​​ផែនការ​​ប្រមូ​លផ្តុំ​​របស់​បណ្តាញ​​អ្នកស្នេហា​ជាតិ​ថៃ នៅ​ខេត្ត​​ស្រះកែវ ​នៅថ្ងៃទី​៤ មករា ​ព្រោះ​អាច​​ប៉ះពាល់​ដល់ស្ថានការណ៍​​ដែល​កំពុង​​មាន​ភាព​​តានតឹងស្រាប់ ។​ ​លោក​ស៊ូថេប ​មានជំនឿ​ថា បញ្ហា​នឹង​ត្រូវ​ដោះស្រាយ​​តាម​រយៈ​ការ​ចរចា​ជាមួយ​កម្ពុជា​ដោយ​​មិន​ចាំបាច់​​មានការ​សំរបសំរួល​ពីប្រទេស​​ណាមួយ ហើយ​បញ្ហា​នេះ​​គួរតែ​​ត្រូវដោះស្រាយ​​​ឱ្យ​​​​បាន​រួច​រាល់​មុនពេល​​ការបំពេញ​ទស្សនកិច្ច​​​ដែល​គ្រោង​​ទុករបស់​លោក​ឧ​ប​នាយករដ្ឋ​មន្ត្រី​​​​សុខ អាន នៃប្រទេស​​កម្ពុជា​​មក​​កាន់ប្រទេសថៃ ។ លោក​ឧ​បនាយករដ្ឋ​មន្ត្រី​​ស៊ូថេប ​សារភាព​ថា ថៃ​យល់ឃើញ​ថា មានការ​លំបាក​បំផុតក្នុង​ការ​ជួយពលរដ្ឋ​​ខ្លួន​៧​នាក់ ដែល​កំពុងឃុំ​ខ្លួន​នៅ​ពន្ធនាគារ​ព្រៃ.សក្នុងប្រទេស​កម្ពុជា ហើយ​​លោក​ថ្លែង​ថា ​ពេល​​​នេះអាជ្ញាធរ​​ថៃ​កំពុងរិះរក​មធ្យោបាយ​​ជួយពលរដ្ឋ​​ទាំង​៧​នាក់​នេះ ។ ជា​មួយគ្នា​​នេះ លោកស៊ូថេប ក៏បាន​សារភាព​ដែរ​ថា ពលរដ្ឋថៃទាំង​៧​នាក់នេះ ពិតជា​ចូលទឹកដីកម្ពុជា​​ដោយខុសច្បាប់មែន ។​ លោកស៊ូថេប ​ថ្លែងទៀត​ថា ​រូបលោក​រង់ចាំ​​រហូតដល់​​ក្រោយ​ថ្ងៃ​​ឈប់សំរាក​​ចូលឆ្នាំ​សាកល​ថ្មី ​ក្រែង​​មាន​ប្រតិកម្ម​​អ្វី ឬ​ការ​​ឆ្លើយ​តប​​ណាមួយ​ពី​អាជ្ញាធរ​​ក្រុង​ភ្នំពេញ​​ ទាក់ទិន​ទៅ​នឹងបញ្ហា​​ពល​រដ្ឋ​ថៃ​​ទាំង​៧​នាក់​នោះ ។
តាម​ទី​ភ្នាក់​ងារ​ព័ត៌​មាន​មេ​ណេ​ជឺ​អន​ឡាញ​កាល​ពី​ថ្ងៃ​​ទី​៤ មករា ក៏​បាន​ឱ្យ​ដឹង​​ដូច​កាសែត​បាងកក​ប៉ុស្តិ៍​ដែរ​ថា នាយក​រដ្ឋ​មន្ត្រី​ថៃ​លោក​អាប់​ភី​ស៊ីត​ វេ​ចា​ជី​វ៉ា ទទួល​ស្គាល់​ថា លោក​បាន​បញ្ជូន​លោក Panick ទៅ​មើល​ព្រំ​ដែន​កម្ពុជា-ថៃ​ ហើយ​ត្រូវ​បានអាជ្ញា​ធរ​កម្ពុជា​​ចាប់​ខ្លួន​ ។ ទី​ភ្នាក់​ងារព័ត៌​មាន​ដដែល​បន្ត​ថា នៅ​ក្នុង​កិច្ច​ប្រជុំ​គណៈ​រដ្ឋ​មន្ត្រី​ថ្ងៃ​៤ មករា បាន​​ពិភាក្សា​រក​ដំណោះ​ស្រាយ​​ជួយ​ជន​ជាតិ​ថៃ​ដែលត្រូវ​កម្ពុជា​​ចាប់ខ្លួន​ ។ ប្រភព​ព័ត៌​មាន​ខាង​លើ​បាន​បន្ត​ទៀត​ថា សំរាប់​កិច្ច​ប្រជុំ​គណ​បក្ស​ប្រជា​ធិប​តេយ្យ​បាន​ធ្វើ​នៅ​រសៀល​ថ្ងៃ​ទី​៤ មករា ដើម្បី​រក​ដំណោះ​ស្រាយ​ជួយ​លោក Panich និង​ក្រុម​ជន​ជាតិ​ថៃ​៦​នាក់​ទៀត​ដែល​ត្រូវ​ចាប់​ខ្លួន​ ។ ចំណែក​តំណាង​រាស្ត្រ​ប្រចាំ​ក្រុង​បាង​កក​របស់​គណ​បក្ស​ផ្សេង​ទៀត​ក៏​បាន​បង្ហាញ​​គោល​បំណង​ធ្វើ​ដំណើរ​មក​កម្ពុជា​សួរ​សុខ​ទុក្ខ​លោក​ Panick​នៅ​ពន្ធ​នា​គារ​ព្រៃ​ស​ផង​ដែរ​ ។
ដោយ​ឡែក​ស្ថាន​ភាព​នៃ​ការ​ធ្វើ​បាតុ​កម្ម​របស់​ក្រុម​អាវ​លឿងនៅ​ថ្ងៃ​ទី​៤ មករា ក្នុង​ស្រុក​អារញ្ញ​ ខេត្ត​ស្រះ​កែវ​ ប្រទេស​ថៃ​ គឺ​មាន​ក្រុម​បាតុ​ករ​អាវ​លឿង​ជ្រុល​និយម​ប្រហែល​២០០​នាក់​កាន់​ស្លាក​បដា​​ ដោយ​មាន​អត្ថ​ន័យ​ថា «មិន​ឈ្នះ​មិន​បញ្ឈប់​» ដើម្បី​ទាម​ទារ​ឱ្យ​កម្ពុជា​ដោះ​លែង​ជន​ជាតិ​ថៃ​ទាំង​៧​នាក់​។ ក្រៅ​ពី នេះ​ក្រុម​បាតុ​ករ​​ថែម​ទាំង​​រិះ​គន់​លើ​ការ​បំពេញ​តួនាទី​របស់​រដ្ឋា​ភិ​បាល​ដែល​បណ្តែត​បណ្តោយ​ឱ្យ​កម្ពុជា​ចាប់​ខ្លួន​ជន​ជាតិ​ថៃ​ទាំង​៧​នាក់​​។ ការ​ធ្វើ​បាតុ​កម្មនោះ​មាន​សមត្ថ​កិច្ច​ប៉ូលិស​ក្នុង​ឃុំ​ខ្លង​លីក រួម​ជាមួយ​ទាហាន​ឈុត​ខ្មៅ​​ការ​ពារសន្តិ​សុខ​​នៅ​ជុំ​វិញ​ក្រុម​បាតុករ​ផង​ដែរ ។ តាម​ប្រភព​ព័ត៌មាន​ថា​ តុលា​ការ​កម្ពុជា​នឹង​បើក​សវនា​ការ​រឿង​ក្តី​ជន​ជាតិ​ថៃ​​នៅ​ថ្ងៃ​ទី​៦ មករា

ដាំដើម​មន​ចិញ្ចឹម​ដង្កូវ​នាង​យក​សរសៃ​សូត្រ

  លោក​ស្រី បេន អភិ​បាល​​ខេត្ត​ បាន​ដឹក​នាំ​មន្ត្រី​រាជ​ការ​ប៉ូលិស​ប៉េអឹម​​ទៅ​ដាំ​ដើម​មន​លើ​ដី​មជ្ឈ​មណ្ឌល​​អភិ​វឌ្ឍន៍​ខេត្ត ក្នុង​ភូមិ​ត្រពាំង​អង្គ សង្កាត់​រកា​​ក្រៅ ក្រុង​ដូន​កែវ ដោយ​មាន​ការ​អញ្ជើញ​ចូល​រួម​ពី​លោក​លី ប្រុស រដ្ឋ​​លេខាធិការ​ក្រសួង​អភិវឌ្ឍន៍​ជន​បទ ព្រម​ទាំង​មន្ត្រី​រាជ​ការ​ជុំ​វិញ​ខេត្ត និង​លោកគ្រូ អ្នក​គ្រូ​​​យ៉ាង​ច្រើន​កុះ​ករ ។ លោក​ប្រធាន​មន្ទីរ​​អភិ​វឌ្ឍន៍​ជន​បទ​ខេត្ត​បាន​និយាយ​ថា ដើម​មន​នេះ​ត្រូវ​បាន​នាំ​ចូល​ពី​ប្រទេស​​​ចិន រួច​យក​មក​ផ្សាំ​​នៅ​ស្រុក​ព្រះ​នេត្រ​ព្រះ​សំរាប់​​ចែក​ទៅ​​​ដាំ​នៅ​តាម​ខេត្ត ហើយ​ចំពោះ​​​ការ​ដាំ​ដើម​មន​នៅ​មជ្ឈ​មណ្ឌល​អភិ​វឌ្ឍន៍​ជន​បទ​នា​ពេល​នេះ ​មាន​ផ្ទៃ​ដី​​ចំនួន​៣​ហិកតា តែ​អនុ​វត្ត​ជំហាន​ដំបូង​មាន​ចំនួន​៣០​អា ដែល​មាន​ដើម​មន​ចំនួន​៥០០​ដើម ។
លោក​ស្រី បេន ​អភិ​បាល​​ខេត្ត​បាន​មាន​ប្រសាសន៍​ថា មន្ទីរ​​អភិ​វឌ្ឍន៍​ជន​បទ សូមថែរក្សា​ស្រោច​ទឹក​ដើម​មន​ដែល​​ដាំ​នេះ​ឱ្យ​បាន​ល្អ​ ព្រោះ​ការ​ដាំ​ដើម​មន​នា​ពេល​នេះ​ជា​​លើក​ទី​១ ហើយ​សំរាប់​ចិញ្ចឹម​​ដង្កូវ​នាង​ធ្វើ​សូត្រ​ ហើយ​ខេត្ត​តាកែវ​មាន​ស្រុក​បាទី​មួយ​ផ្នែក ស្រុក​សំរោង​​ និង​ស្រុក​ព្រៃ​កប្បាស កំពុង​តែ​ប្រកប​របរ​តម្បាញ​ហូល​ផា​មួង ជា​​ការ​ជួយ​កាត់​បន្ថយ​ភាព​ក្រីក្រ​​នៅតាម​ភូមិ​​ បង្កើន​ជីវ​ភាព​គ្រួសារ​ឱ្យ​បាន​ធូរ​ធារ​​មួយ​កំរិត​ ​ដែល​មួយ​ចំនួន​លក់​នៅ​ក្នុង​ស្រុក និង​មួយ​ចំនួន​​​ទៀត​បាន​នាំ​ចេញ​ទៅ​លក់​​នៅ​ក្រៅ​ប្រទេស ។
លោក​អភិ​បាល​ខេត្ត​មាន​ប្រសាសន៍​បន្ត​ទៀត​ថា ដោយ​ពុំ​មាន​សរសៃ​សូត្រ​​គ្រប់​​គ្រាន់​ក្នុង​​ការ​ត្បាញ​ហូល​ផាមួង​នោះ ​​យើង​បាន​​នាំ​សរសៃ​សូត្រ​មក​ពី​ប្រទេស​ក្រៅ​ ហើយ​ថ្ងៃ​នេះ​យើង​បាន​ដាំ​ដើម​មន​សំរាប់​ចិញ្ចឹម​ដង្កូវ​នាង​យក​សរសៃ​​សូត្រ​ ។ ដូច្នេះ​នា​ពេល​​អនាគត​​​យើង​មិន​​ចាំ​បាច់​នាំ​​ចូល​​សរសៃ​សូត្រ​​​ពី​ក្រៅ​ស្រុក​ទៀត​នោះ​ទេ ដែល​ទាំង​​​​នេះគឺ​ជា​គោល​នយោ​បាយ​​កាត់​បន្ថយ​ភាព​ក្រីក្រ​​រប​ស់​រាជ​រដ្ឋា​ភិបាល​ដែល​មាន​សម្តេច​តេជោ ហ៊ុន សែន ជា​ប្រមុខ​ដឹក​នាំ