Monday, December 13, 2010

ស្ពានចំនួនពីរទៀតរបស់កោះពេជ្យនឹងប្រើដើម្បីឆ្លង ទៅសួនសម្តេចហ៊ុន សែន

កិច្ចប្រជុំពីគម្រោងសាងសង់ស្ពានចំនួន ០២ខ្សែ នៅខាងជើង ពីកោះពេជ្រ ឆ្លងទៅ សួនច្បារសម្តេច ហ៊ុន សែន បានរៀបចំនៅសាលារាជធានីភ្នំពេញ ក្រោមអធិបតីភាព ឯកឧត្តម កែប ជុតិមា អភិបាលនៃគណៈអភិបាលរាជធានី ភ្នំពេញ កាលពីល្ងាចថ្ងៃទី ១៣ ខែធ្នូ ឆ្នាំ ២០១០ ដោយមានការចូលរួមពី ឯកឧត្តម យិត ប៊ុណ្ណា អនុរដ្ឋលេខាធិការ ក្រសួងសាធារណការ និងដឹកជញ្ជូន ដើម្បីពិនិត្យ លើលក្ខណៈបច្ចេកទេស។ 

តាមរយៈការបង្ហាញរបស់ លោក សាំ ពិសិដ្ឋ នាយករងទីចាត់ការ រៀបចំក្រុង បានឱ្យដឹងថា ស្ពានទាំង២នេះ ជាស្ពានសម្រាប់ការធ្វើដំណើរឯកទិស (one-way) ដែលស្ពាននីមួយៗ មានបណ្តោយ ១០១ ម៉ែត្រ ទទឺង ១២ម៉ែត្រ ចែកជា៤ផ្នែក ដែលក្នុងនោះ ៨ម៉ែត្រ សម្រាប់រថយន្ត គែម៤ម៉ែត្រសង្ខាង សម្រាប់អ្នកថ្មើរជើង និងគ្មានរំញ័រ ព្រមទាំងមានជណ្តើរ​ Emergency ទៀតផង។ ស្ពានទាំងពីរនេះនឹងត្រូវប្រើប្រាស់ អស់ទឹកប្រាក់ប្រមាណ ជិត៣លានដុល្លាអាមេរិក ហើយគ្រោងនឹងសាងសង់រួចរាល់ជាស្ថាពរក្នុង រយៈពេល១០ខែ យ៉ាងយូរ ។ 

ឯកឧត្តមអនុរដ្ឋលេខាធិការក្រសួងសាធារណការ និងដឹកជញ្ជូន បានមានមតិថា គួរបានពិចារណាឱ្យបាន ដិតដល់លើបច្ចេកទេស ពិសេសចរាចរយានយន្តគ្រប់ប្រភេទ សុវត្ថិភាពស្ពាន ហើយស្ពាននិមួយៗគួរបំបែកឲ្យមាន ច្រកធ្វើដំណើរ៣វិញ។ 

បន្ទាប់មក ឯកឧត្តមអភិបាល បានបន្ថែមថា យោងតាមអនុសាសន៍ដឹកនាំដ៏ខ្ពង់ខ្ពស់របស់ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្រុមហ៊ុនកោះពេជ្រ ត្រូវសហការ​ជាមួយជំនាញពាក់ព័ន្ធរបស់សាលារាជធានី សិក្សាឱ្យបានហ្មត់ចត់ និងដំណើរការដ្ឋានខ្លួនឱ្យបានឆាប់ដែលអាច ទៅរួចគឺនៅក្នុង ខែមករា សប្តាហ៍ទី ២ឬ៣។ ដូចយើងដឹងស្រាប់ហើយ ថាចំនួនប្រជាជនក្នុងរាជធានីភ្នំពេញ នឹងកើនឡើងជាបន្តបន្ទាប់ពីមួយឆ្នាំទៅមួយឆ្នាំ ដូច្នេះដើម្បីសម្រួលដល់ចរាចរ និងសុវត្ថិភាពប្រជាជននៅឆ្នាំក្រោយ សូមជំនាញរបស់សាលារាជធានីភ្នំពេញ មន្ទីរសាធារណការនិង ដឹកជញ្ជូន ព្រមទាំងអ្នកបចេ្ចកទេសក្រុមហ៊ុនOCIC ធ្វើការពិចារណាឱ្យបានល្អិតល្អន់ និងលំអិតថែមទៀតទៅលើបញ្ហា បច្ចេកទេសសុវត្ថិភាពចរចរ ជុំវិញតំបន់កោះពេជ្រ ចាប់ពី រូបសំណាកសម្តេចសង្ឈ ជួន ណាត រហូតដល់ តំបន់កោះពេជ្រ និងសូមឱ្យក្រុមហ៊ុនវិនិយោគតំបន់កោះពេជ្រ ប្តូររូបនៅស្ពានហង្សពីពាក់កណ្តាលរូប មករូបពេញវិញឱ្យបានមុនថ្ងៃ ០៧ មករា ឆ្នាំ ២០១១។ 

រូបភាពជំរើសទី១  នៃគំរោងស្ពាន
 

រូបភាពជំរើសទី២ នៃគំរោងស្ពាន




ឯកឧត្តមបណ្ឌិតសភាចារ្យ សុខ​ អាន ជួបសំណេះសំណាលជាមួយគណៈប្រតិភូ គណៈកម្មការសេដ្ឋកិច្ច និងសង្គមសម្រាប់តំបន់អាស៊ី និងបាស៊ីហ្វិក (ESCAP) (១៣/១២/២០១០)

 នៅល្ងាចថ្ងៃទី ១៣ ខែធ្នូ ឆ្នាំ ២០១០ នៅទីស្តីការគណៈរដ្ឋមន្រ្តី ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានអនុញ្ញាតឲ្យ គណៈប្រតិភូ ESCAP មួយក្រុមដឹកនាំដោយលោក Nagesh Kumar នាយកផ្នែកគោល នយោ បាយម៉ាក្រូសេដ្ឋកិច្ច និងការអភិវឌ្ឍចួលជួបសម្តែងការគួសម។

គណៈប្រតិភូ ESCAP បានជម្រាបជូន ឯកឧត្តមបណ្ឌិតសភាចារ្យ សុខ អាន ឲ្យដឹងអំពី​គោលបំណងនៃ​ដំណើទស្សនកិច្ចរបស់គណៈប្រតិភូ គឺដើម្បីស្វែងយល់ និងផ្លាស់ប្តូរបទ ពិសោធ ជាមួយនឹងកម្ពុជា ហើយគណៈប្រតិភូទាំងអស់បានធ្វើការវាយតម្លៃខ្ពស់ចំពោះ ការរីកចំរើននិង ភាពរស់រាយរាក់ទាក់របស់ប្រជាជនកម្ពុជា។​​

 ជាការឆ្លើយតប ឯកឧត្តម​បណ្ឌិត សុខ អាន បានជម្រាបដល់គណៈប្រតិភូទាំងអស់ពី ភាពជោកជ័យ​របស់កម្ពុជាក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តី​នៃព្រះរាជាណាចក្រកម្ពុជា ក្រោមនយោបាយ ឈ្នះ-ឈ្នះ ដែលបានបញ្ចប់ទាំង​ស្រុងនូវ​ចលនា និងអង្គការចាត់តាំងរបស់ខ្មែរក្រហម ក្នុងឆ្នាំ១៩៩៨ ដែល ធ្វើឲ្យកម្ពុជា​ទទួលបានឯកភាព​ជាតិទាំងស្រុងដែលមិនធ្លាប់មានជាង ៥០០ ឆ្នាំកន្លងមកនេះ នៅក្នុងប្រវត្តិសាស្រ្តរបស់ខ្លួន។ សុខសន្តិភាព និងស្ថេរភាព នយោបាយនេះហើយជាមូលដ្ឋាន គ្រឹះសម្រាប់ការអភិវឌ្ឍកម្ពុជា ជាមួយនឹងការដាក់ចេញ និងអនុវត្តនូវគោលនយោបាយជា ច្រើន មានជាអាទិ៍ យុទ្ឋសាស្រ្តត្រីកោណ និងចតុកោណ ជាដើម។ ឯកឧត្តមឧបនាយរដ្ឋមន្រ្តី ក៏បានជម្រាបដល់គណៈប្រភូផងដែរអំពីភាពជោគជ័យ របស់កម្ពុជា​ក្នុងការអនុវត្តគោលដៅអភិវឌ្ឍ សហសវត្សរិ៍ (MDG) ទាំងក្នុងវិស័យអប់រំ សុខាភិបាល ការកាត់បន្ថយ​ភាពក្រីក្រ និងបញ្ហា យេនឌ័រ ជាដើម។​

ឯកឧត្តម​បណ្ឌិត​ សុខ អាន ក៏​បាន​ជម្រាប​ជូន​ភ្ញៀវ​ផងដែរ​​ពី​ជោគ​ជ័យ​នៃ​សន្និសីទ​ គណបក្ស​​នយោបាយ​នៅ​អាស៊ី ​(ICAPP) ដែល​ទើប​បញ្ចប់​ទៅ​ថ្មី​ៗ​នេះ​​​ នា​រាជធានី ភ្នំពេញ​ ក្រោម​ការ​រៀប​ចំ​របស់​​គណបក្ស​ប្រជាជន​កម្ពុជា​។ ក្នុង​នោះ​ប្រតិភូ​ ដែ​ល​ចូលរួម​ក្នុង​ សន្និសីទ​ ICAPP ​បាន​សរសើរ​ចំពោះ​ការ​ដឹក​នាំ​របស់​សម្តេច​អគ្គមហាសេនាបតីតេជោ​ ហ៊ុន សែន​ ​ក្នុង​ការ​កសាង​អភិវឌ្ឍ​ប្រទេស​ និង​ការ​កសាង​សន្តិភាព​ បង្រួប​បង្រួម​ជាតិ​ ហើ​យ​ បាន​យក​កម្ពុជា​ធ្វើ​ជា​​គំរូ​សំរាប់​ដោះ​ស្រាយ​បញ្ហា​នៅ​ក្នុង​បណ្តាប្រទេស​ផ្សេង​ទៀត​។
បន្ទាប់ពីបានស្តាប់ការពន្យល់ ​និងឃើញដោយផ្ទាល់ភ្នែកនូវស្ថានភាពពិតរបស់កម្ពុជាមកលោក Nagesh Kumar និងគណៈប្រភូទាំងអស់បានសម្តែងនូវការកោតសរសើចំពោះការរីក ចំរើនគួរឲ្យកត់​សម្គាល់របស់​កម្ពុជា ជាមួយនឹងក្តីរំពឹងដោយគ្មានការសង្ស័យថា កម្ពុជានឹង មាន អនាគតមួយប្រកប​ដោយភាពត្រចះ​ត្រចង់។