Saturday, December 18, 2010

ស្ពានអាកាសទី២នៅពេទ្យលោកសង្ឃ


គំរោងការធ្វើ ស្ពានអាកាសថែមមួយទៀត នឹងស្ថិតនៅលើទីតាំងស្តុបចំនុចប្រសព្វ មហាវិថី សហព័ន្ធ រុស្សី ផ្លូវ271 និងផ្លូវ598  (ស្តុបពេទ្យ លោកសង្ឈ) ។ ក្រោយពី មានការប្រជុំពិភាក្សា លើគំរោងជា ច្រើនលើក ជាមួយ នឹងក្រុមហ៊ុនOCIC ដែលជាក្រុមហ៊ុនវិនិយោគលើកោះពេជ្រ និងជាក្រុមហ៊ុន ដែលម៉ៅការសាងសង់ ស្ពានអាកាស ក្បាលថ្នល់ផង ដែរនោះ សាលារាជធានី នឹងសំរេច ស្នើសុំគោលការណ៍ ពីរាជរដ្ឋាភិបាល ដើម្បីធ្វើការសាងសង់ស្ពាន អាកាសទីពីរ ដែលមាន ប្រវែង ៣៤៥ម៉ែត្រ ទទឺង១៥.២ម៉ែត្រ កំពស់៥.៥០ម៉ែត្រ ត្រូវប្រើប្រាស់ទឹក ប្រាក់អស់ប្រមាណ ជាង ៨លាន៧សែន ដុលា្លសហរដ្ឋអាមេរិក។ 



ស្ពាននេះនឹងដើរតួនាទីយ៉ាងសំខាន់ ក្នុងការសំរួលចរាចរណ៍ នៅចំនុចប្រសព្វ នោះដែលបច្ចុប្បន្ន ទទួលរងការកក ស្ទះយ៉ាងខ្លាំង។ គួរបញ្ជាក់ដែរថា កន្លងមកអជ្ញាធរ រាជធានីភ្នំពេញ សហការជាមួយ អុ្នកជំនាញការជប៉ុន ខិតខំរិះរក មធ្យោបាយដើម្បី សំរួលស្ថានភាព នៅទីតាំងចំនុច ប្រសព្វនេះ ក៏នៅតែមិនអាច ឆ្លើយតបនឹងកំនើន នៃចរាចរ យានយន្ត នៅតំបន់ នោះដែរ។ 



ក្រុមហ៊ុនម៉ៅការសាងសង់គ្រោង ប្រើប្រាស់ រយៈពេល យ៉ាងតិច១៥ខែ ដើម្បីស្ថាបនា ស្ពានអាកាស ថ្មីនេះ ដែល សាលារាជធានី តំរូវ ឲ្យបញ្ចប់បាន ប្រើប្រាស់ ស្របពេលដែល ព្រះរាជាណាចក្រកម្ពុជា នឹងត្រៀមខ្លួនធ្វើជាម្ចាស់ផ្ទះ ដើម្បី រៀបចំកិច្ចប្រជុំ កំពូលប្រទេសសមាជិក អាស៊ានឆ្នាំ២០១២។ 

កន្លងមកមានការពិភាក្សាជាច្រើនលើករបស់អ្នកជំនាញ ដើម្បីធ្វើស្ពានអាកាស ។ ខ្លះថាធ្វើនៅត្រង់ ផ្លូវកែង ពទ្យលោកសង្ឃ ខ្លះថាធ្វើនៅកែងត្រង់ផ្លូវចូលទួលគោក ខ្លះថាធ្វើនៅត្រង់ក្តាន់២។ឥឡូវនេះសាលាក្រុង បានសំរេច យកត្រង់ពេទ្យលោកសង្ឃ តែមិនដឹងថារដ្ឋាភិបាលយល់ព្រមដែរឬទេ។

ផ្លូវ​​ត​ភ្ជាប់​គ្នា​ពី​ប្រាសាទព្រះវិហារ​-​ជាំ​ក្សាន្ត​-​មុំ​បី​-​កំពង់​ស្រឡៅ​-​ថា​ឡា​បរិ​វ៉ា​ត់​ដំណើរការហើយ

ដោយ : សេសាន
ផ្លូវ​គមនាគមន៍​មួយ​ខ្សែ​ដែល​ត​ភ្ជាប់​ដោយ​សេរី​តាម​បន្ទាត់​ព្រំដែន​កម្ពុជា​-​សៀម និង​ប្រទេស​ឡាវ​នៅ​ប៉ែក​ខាងជើង​ នៃ​ប្រទេស​ពេលនេះ​បានកើត​ចេញ​ជា​រូបរាង​ហើយ ។​ កំណាត់​ផ្លូវ​នោះ ​គឺជា​ផ្លូវ​ត​ភ្ជាប់​ដ៏​វែងឆ្ងាយ​មួយ​ចាប់ពី​តំបន់​ប្រាសាទព្រះវិហារ​ ឆ្លងកាត់​ស្រុក​ជាំ​ក្សាន្ត​ចំណុច​មុំ​បី ទៅកាន់​តំបន់​កំពង់​ស្រឡៅ​ភ្ជាប់​ ទៅ​ស្រុក​ថា​ឡា​បរិ​វ៉ា​ត់​ខេត្តស្ទឹងត្រែង ​ពេលនេះ​បាន​ត​ភ្ជាប់​ជា​ស្ថាពរ​ហើយ ដោយ​អ្នកដំណើរ​គ្រប់រូប​អាច​ឆ្លងកាត់បាន​យ៉ាង​រីករាយ ហើយ​លែង​លឺ​សូរពាក្យ​ថា ​លំបាក​ទៀតហើយ ។ ហើយ​បណ្តាញ​ផ្លូវ​ដែល​ប្រទាក់​គ្នា​ដូច​ខ្សែ​អំបោះ​នោះ ​ពេលនេះ​បាន​សាងសង់​រួចរាល់​ជា​ស្ថាពរ​ហើយ ។​

​    ​លោក​ឧ​ត្ត​ម​សេនីយ៍​ទោ ខេង សុមេធ បាន​មានប្រសាសន៍​បន្តថា កំណាត់​ផ្លូវ​ពី​ក្នុងស្រុក​ជាំ​ក្សាន្ត​ ត្រូវបាន​កសាង​ដោយ​កងវិស្វកម្ម​អគ្គបញ្ជាការ​ នៃ​កងយោធពល​ខេមរភូមិន្ទ ។ ដោយឡែក​ចាប់ពី​ចំណុច​ឃុំ​ទឹកក្រហម​ក្នុងស្រុក​ជាំ​ក្សាន្ត​ដដែល​ ត្រូវបាន​កសាង​ដោយ​កងវិស្វកម្ម​តេ​ជោ​ហ៊ុន សែន សៀមរាប កាលពី​ឆ្នាំ២០០៩ រហូតដល់​ចំណុច​មុំ​បី ។ ដោយឡែក​កំណាត់​ផ្លូវ​ពី​ចំណុច​មុំ​បី​ឃុំ​ទឹក​ក្រហម ស្រុក​ជាំ​ក្សាន្ត​ដដែល​ទៅដល់​ចំណុចកំពង់​ស្រឡៅ ស្រុក​ឆែប និង​ត​ភ្ជាប់​ទៅដល់​ស្រុក​ថា​ឡា​បរិ​វ៉ា​ត់​ខេត្តស្ទឹងត្រែង កងវិស្វកម្ម​តេ​ជោ​ហ៊ុន សែន សៀមរាប ចាប់ផ្តើម​កសាង​មុន​រដូវវស្សា​ឆ្នាំនេះ រហូតដល់​បច្ចុប្បន្ន​សំ​រេច​បាន ១០០​ ភាគរយ​ហើយ ។ កំណាត់​ផ្លូវ​ពី​មុំបី​ទៅដល់​ស្រុក​ថា​ឡា​បរិ​វ៉ា​ត់ ដែល​បាន​ត​ភ្ជាប់​គ្នា​ទាំងស្រុង​ហើយ​នោះ គឺមាន​ប្រវែង ១៤២​ គីឡូម៉ែត្រ ។ កំណាត់​ផ្លូវ​ជាង ១៤០ គីឡូម៉ែត្រ​នេះ គឺមាន​កសាង​លូ ស្ពាន​ជាច្រើន​កន្លែង​ផងដែរ ។​

​    ​ការឈាន​ទៅដល់​ការតភ្ជាប់​ផ្លូវ​គមនាគមន៍​ថ្មី​មួយ​ខ្សែ​នេះ​ ត្រូវបាន​លោក​ឧ​ត្ត​ម​សេនីយ៍​ទោ ខេង សុមេធ បញ្ជាក់ថា គឺជា​គំនិត​ច្នៃប្រឌិត និង​ទទួល​បទបញ្ជា​ដ៏​ខ្ពង់ខ្ពស់​ពី​សំណាក់​សម្តេច​តេ​ជោ​ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ។​ ​គោលដៅ​សំខាន់​ដែល​សម្តេច​តេ​ជោ​ហ៊ុន សែន ផ្តួចផ្តើម​ឲ្យ​មាន​កសាង​កំណាត់​ផ្លូវ​នេះ គឺ​ចង់​អភិវឌ្ឍន៍​តំបន់​បន្ទាត់​ព្រំដែន​ឲ្យ​មានការ​រីកចំរើន​ទៅ​ថ្ងៃ​អនាគត និង​កាត់បន្ថយ​ភាពក្រីក្រ​ជូន​ប្រជាជន​នៅ​តំបន់​នោះ​ឲ្យ​កាន់តែ​ប្រសើរឡើង ។​

​    ​លោក​ឧ​ត្ត​ម​សេនីយ៍​ទោ ហួត ឈាង បាន​ឲ្យ​ដឹងថា ផ្លូវ​នេះ​គឺ​កើតឡើង​ក្នុងសម័យ​តេ​ជោ​ហ៊ុន សែន ហើយ​បើ​គ្មាន​សម្តេច​ទេ​ជោ ហ៊ុន សែន ទេ ប្រហែលជា​ខេត្តស្ទឹងត្រែង​មិនមាន​ផ្លូវ​ណា​ដើរ​ឡើយ​ គឺ​រត់​ដូច​កណ្តុរអញ្ចឹង ។​
​    ​លោក ជា ថា​វរិ​ទ្ធ អភិបាលស្រុក​ថា​ឡា​បរិ​វ៉ា​ត់ បានបញ្ជាក់​ប្រាប់ថា នេះ​ជា​ប្រវត្តិសាស្ត្រ​ដ៏​ធំធេង​មួយ ដែល​បាន​ចារ​ទុក​ក្នុង​ក្រាំង​មាន​សម័យ​តេ​ជោ​ហ៊ុន សែន ដែល​បាន​កើរ​ចេញ​ជា​រូបរាង​ឡើង​នូវ​កំណាត់​ផ្លូវ​ដ៏​វែងឆ្ងាយ​មកដល់​ទីរួមស្រុក​របស់គាត់ ។​ ​លោក​បាន​បញ្ជាក់ទៀតថា មិន​ធ្លាប់មាន​ទេ​ពីមុនមក ហើយ​ប្រជាពលរដ្ឋ​សប្បាយរីករាយ​មិនមាន​អ្វី​មក​ប្រៀបផ្ទឹម​បានឡើយ ព្រោះ​ប្រជាជន​លែង​ពិបាក​ថា មិនមាន​ផ្លូវ​ដើរ​ទៀតហើយ ។​ ​ពីមុន​ខេត្តស្ទឹងត្រែង ឬ​ស្រុក​ថា​ឡា​បរិ​វ៉ា​ត់​ចង់ទៅ​ភ្នំពេញ​ត្រូវ​ឆ្លង​ចូលទៅ​ប្រទេស​ឡាវ, វៀតណាម ហើយ​ទើប​ចូលមក​កម្ពុជា​បាន ។ ប៉ុន្តែ​សំរាប់​ឥឡូវ​ចង់​មកពី​ស្រុក​ថា​ឡា​បរិ​វ៉ា​ត់​ខេត្តស្ទឹងត្រែង គឺ​គេ​អាចធ្វើ​ដំណើរ​ត្រង់​មក​ព្រះវិហារ ឬ​ទៅ​សៀមរាប ឧ​ត្ត​រ​មានជ័យ​បាន​យ៉ាង​ស្រួល​មិនមាន​ការលំបាក​ដូច​មុន​ទៀតហើយ ហើយ​ប្រជាជន​ក៏ដូចជា​ភ្ញៀវ​គ្រប់រូប ​ធ្វើដំណើរ​បាន​ដោយ​រីករាយ​ចាប់ពីពេលនេះ​តទៅ​ថ្ងៃ​អនាគត ៕

តំណាងរាស្ដ្រជប៉ុនសន្យា នឹងជួយ ជំរុញផ្នែក ឯកជន ជប៉ុនអោយ បង្កើនការ វិនិយោគក្នុង ព្រះរាជាណាចក្រ កម្ពុជា


 ប្រតិភូតំណាងរាស្ដ្រមកពីគណបក្សប្រជាធិបតេយ្យ ដែលជាគណបក្សកាន់អំណាច នៅប្រទេសជប៉ុន បីរូបរួមមាន ៖  ឯកឧត្ដម ស៊ូយ៉ូស៊ី សៃតូ (TSUYOSHI SAITO) ឯកឧត្ដម ណាអូតូ សាកាហ្គូជី (NAOTO SAKAGUCHI) ឯកឧត្ដម តាកាហាស៊ី សូអ៊ីជី(TAKAHASHI SHOICHI) បាន សន្យាជាមួយ ឯកឧត្ដមបណ្ឌិត សុខ អាន ឧបនាយក រដ្ឋមន្ដ្រី រដ្ឋមន្ដ្រី ទទួលបន្ទុក ទីស្ដីការគណរដ្ឋមន្ដ្រី នារសៀលថ្ងៃទី១៧ ខែធ្នូ ឆ្នាំ២០១០ ថា នឹងខិតខំធ្វើកិច្ចការ ជាច្រើនបន្ថែម ទៀត ដើម្បីជួយជំរុញ និងលើក ទឹកចិត្ដដល់ផ្នែក ឯកជនជប៉ុន អោយមកវិនិយោគទុននៅក្នុងព្រះរាជាណាចក្រកម្ពុជា ។

 ការអះអាងរបស់ប្រតិភូតំណាងរាស្ដ្រជប៉ុន បានធ្វើឡើងនៅក្នុងជំនួបពិភាក្សាមួយ នៅទីស្ដីការ គណរដ្ឋមន្ដ្រី ដែលក្នុងឱកាសនោះ ឯកឧត្ដមបណ្ឌិត សុខ អាន បានជំរាប ជូនភ្ញៀវជប៉ុនថា រាជរដ្ឋា ភិបាល និងប្រជាជនកម្ពុជា បានចាត់ទុកប្រទេសជប៉ុនជា ប្រទេស ទីមួយ ដែលបានផ្ដល់ជំនួយប្រភេទ ODA ដល់ ព្រះរាជាណាចក្រកម្ពុជាកន្លងមក ។ ផ្អែកលើជំនួយបច្ចេកទេស ការកសាងធនធានមនុស្ស និង កសាង ហេដ្ឋារចនាសម្ព័ន្ធ និងផ្អែកលើ ទំនាក់ទំនង មិត្ដភាព រវាងប្រទេសទាំងពីរ កម្ពុជា-ជប៉ុន ឈានដល់ កំរិត ខ្ពស់ តាមរយៈព្រះរាជដំណើរ ទស្សនៈកិច្ចរបស់  ព្រះមហាក្សត្រ នរោត្ដមសីហមុនី  និង សម្ដេចអគ្គមហាសេនាបតី តេជោ ហ៊ុន សែន នៅប្រទេស ជប៉ុន នាពេលកន្លងមក ប្រជាជនកម្ពុជា ត្រូវការ ថែមទៀតនូវការវិនិយោគ របស់ក្រុមហ៊ុនឯកជនជប៉ុនផងដែរ ។

 ឯកឧត្ដមបណ្ឌិត សុខ អាន បានបញ្ជាក់ថា បច្ចុប្បន្នសភាពការណ៍នៅកម្ពុជា មានអំណោយ ផលសំរាប់ក្រុមហ៊ុន វិនិយោគទុននានា ដែលក្នុងនោះសំរាប់ប្រទេសជប៉ុន កម្ពុជា មានធនធានមនុស្សជា ច្រើន ដែលបានបញ្ចប់ ការសិក្សានៅប្រទេសជប៉ុន ចេះ ភាសាជប៉ុន ។ កម្ពុជាមានតំលៃពលកម្មថោក ហើយ អ្នកបច្ចេកទេស ជប៉ុន ជាច្រើនក៏បាន សិក្សាពីកម្ពុជា ដែលបង្កលក្ខណៈ ងាយស្រួលសំរាប់ ក្រុមអ្នកវិនិយោគទុន មកពីប្រទេស ជប៉ុន ក្នុងការ រកស៊ីនៅក្នុងប្រទេសកម្ពុជាបន្ថែមពីលើក្រុមហ៊ុនជប៉ុន ដែលបច្ចុប្បន្នមាន ប្រមាណ ២២ក្រុមហ៊ុនរួចហើយ ។

មានប្រសាសន៍ក្នុងឱកាសនោះដែរ ឯកឧត្ដម ស៊ូយ៉ូស៊ី សៃតូ (TSUYOSHI SAITO) តំណាងអោយ ប្រតិភូ តំណាង រាស្ដ្រ ជប៉ុន បានជំរាបជូន ឯកឧត្ដមបណ្ឌិត សុខ អាន ថា រដ្ឋសភាជប៉ុន នឹងអនុម័ត គំរោងថវិកាជាតិ ឆ្នាំ២០០១ ដែលក្នុង នោះក៏មានទាំង ថវិកាជំនួយសំរាប់កម្ពុជា និងថវិកាសំរាប់ រដ្ឋសភា និងរដ្ឋាភិបាលជប៉ុនធ្វើការងារ សំរួលដល់ការ វិនិយោគទុនរបស់ជប៉ុនផងដែរ ។ ក្នុងនាមជាអ្នក តំណាងរាស្ដ្រក្នុង សម្ព័ន្ធមិត្ដភាពតំណាងរាស្ដ្រជប៉ុន  ឯកឧត្ដម ស៊ូយ៉ូស៊ី សៃតូ (TSUYOSHI SAITO) បាន សន្យាថា នឹងខិតខំចលនាក្នុងរដ្ឋសភា និងរដ្ឋាភិបាលជប៉ុន ព្រមទាំងក្រុមហ៊ុនជប៉ុន នានាអោយបង្កើត ការវិនិយោគមកក្នុងព្រះរាជាណាចក្រកម្ពុជា ដែលជាមូលដ្ឋានក្នុងការ បង្កើន ចំណងមិត្ដភាពរវាងប្រទេស ទាំងពីរ ជប៉ុន-កម្ពុជា ។ ដោយឡែក ឯកឧត្ដម តាកាហាស៊ី សូអ៊ីជី (TAKAHASHI SHOICHI) ក៏បានសន្យា ថា នឹងរៀបចំអោយមាន គំរោង មួយ ដើម្បីជំរុញអោយមានជើងយន្ដហោះ ហោះហើរត្រង់រវាង ជប៉ុន-កម្ពុជា នាឆ្នាំ ២០១២ ខាងមុខនេះ ដែលបញ្ហានេះត្រូវបានស្វាគមន៍ដោយ ឯកឧត្ដមបណ្ឌិត សុខ អាន  ព្រោះថា ការហោះហើរត្រង់រវាងកម្ពុជា-ជប៉ុន មិនត្រឹមតែបង្កើនការផ្លាស់ប្ដូរភ្ញៀវ ទេសចរណ៍ប៉ុណ្ណោះទេ តែថែមទាំង អាចជួយជំរុញដល់ការវិនិយោគទុនជប៉ុននៅកម្ពុជា ផងដែរ ។
 នៅក្នុងជំនួបពិភាក្សានោះដែរ ឯកឧត្ដមប្រតិភូអ្នកតំណាងរាស្ដ្រជប៉ុន បានកោត សរសើរ ចំពោះការ វិវឌ្ឍន៍រីកចំរើន យ៉ាងឆាប់រហ័សរបស់ព្រះរាជាណាចក្រកម្ពុជា និងបាន កោតសរសើរ ចំពោះ ថ្នាក់ដឹក នាំនៃរាជរដ្ឋាភិបាល កម្ពុជា ក្នុងការរៀបចំសន្និសីទអន្ដរជាតិ នៃគណបក្សនយោបាយអាស៊ី (ICAPP) នៅរាជធានីភ្នំពេញ ទទួលបានជោគជ័យ ក្នុង នាម ជាប្រធានអ្នករៀបចំ ។

សមាជិកសភាជប៉ុនអះអាងថាជំនួយជប៉ុនដល់កម្ពុជាមិនមានការផ្លាស់ប្តូរ(១៨/១២/២០១០)

ឯកឧត្តម អ៊ាង សុផល្លែត ជំនួយ​ការ​សម្តេច​តេជោ​នាយក​រដ្ឋមន្ត្រី​ឱ្យដឹងថា​ក្នុង​ ឱកាស ចូលជួប​សម្តែង​ការ​គួរ​សមចំពោះ សម្តេចអគ្គមហាសេនាបតីតេជោ ហ៊ុន សែន នាថ្ងៃ ទី១៨ ខែធ្នូ ឆ្នាំ២០១០ នៅវិមានសន្តិភាព រាជធានីភ្នំពេញ ឯកឧត្តម NAOTO SAKAGUCHIសមាជិកសភា​ជប៉ុន និងជា​ប្រធាន​សម្ព័ន្ធសភា​មិត្តភាព​កម្ពុជា-ជប៉ុន បាន​ជំរាប​ជូន​សម្តេច តេជោ​នាយក​រដ្ឋមន្ត្រី​​ថា សភា​ជប៉ុន​នឹង​អនុម័ត​ថវិការ​សម្រាប់​ឆ្នាំ ២០១១ នៅ​ថ្ងៃ​ទី​២៤ ខែធ្នូ​ខាង​មុខ​នេះហើយ។ ​ចំពោះ​ជំនួយ​អភិវឌ្ឍ​ផ្លូវ​ការ​ក្រៅប្រទេស​របស់​ជប៉ុន ​( ODA ) ​សម្រាប់​ប្រទេស​កម្ពុជា​គឺ​ពុំ​មាន​ការ​ផ្លាស់​ប្តូរ​នោះ​ទេ ម៉្យាង​ទៀត​ក្នុង​នាម​តំណាងរាស្ត្រ ​ឯកឧត្តម​នឹង​ជួយ​ជម្រុញ​ ឱ្យ​បាន​ឆាប់នូវ​គម្រោង​ទាំង​ឡាយ​ណា​ដែល​រាជ​រដ្ឋាភិបាល​កម្ពុជា​ បាន​ស្នើ​ទៅ​កាន់​ប្រទេស​ជប៉ុន ដូច​ជា​ស្ពាន​អ្នក​លឿង​ជា​ដើម លោក​នឹងជម្រុញ​ការ​សាង ​សង់​ឱ្យ​បាន​ឆាប់​ផង​ដែរ ។ ឯកឧត្តម NAOTO ក៏​បាន​សន្យា​ថា​នឹង​ជួយ​ជម្រុញ​ដល់​ការ ​ហោះ​ហើរ​ពី​ប្រទេស​ជប៉ុន​គឺ​ពី​ទីក្រុង​តូក្យូ​មក​កាន់​កម្ពុជា ឬ​ការ​ហោះ​ហើរ​ត្រី​កោណ​រវាង ​ទីក្រុង​តូក្យូ ហូជីមិញ ឬ​ក៏​តូក្យូ-ហូជីមិញ-សៀមរាប​ជា​ដើម ព្រោះ​ការ​ហោះ​ហើរ​បែប​នេះ​ ជា​កត្តា​សំខាន់​សម្រាប់​ជម្រុញ​ចំណង​មិត្ត​ភាព​រវាង​ប្រទេស​ទាំង​ពីរ ក៏​ដូច​ជា​ជម្រុញ​ការ​ វិនិយោគ​របស់​ជប៉ុន​មក​កាន់​កម្ពុជា ដើម្បី​រួម​ចំណែក​ដល់​ការ​អភិវឌ្ឍ​ន៍ព្រះ​រា​ជា​ណា​ចក្រ​ កម្ពុជា​ផង​ដែរ ។

ឯកឧត្តម NAOTO បាន​សំដែង​នូវ​ការ​ចូល​រួម​មរណៈទុក្ខ​ចំពោះ​សោកនាដកម្ម​ដែល​បាន​កើត​ ឡើង​ នៅ​ស្ពាន​ពេជ្រ​កាល​ពី​ពេល​កន្លង​ទៅ និង​បាន​នាំ​មក​នូវ​លិខិត​របស់​ឯកឧត្តម​ នាយក​រដ្ឋមន្ត្រី​ជប៉ុន​ជូន​ចំពោះ​សម្តេច​តេជោ​នាយក​រដ្ឋមន្ត្រី​ផង​ដែរ ។

ឯកឧត្តម អ៊ាង សុផល្លែត បានបន្ត​ថា នៅ​ក្នុង​ជំនួប​នោះ​សម្តេច​នាយក​រដ្ឋមន្ត្រី​បាន​ ថ្លែង​អំណរគុណ​ចំពោះ​ការ​ចូល​រួម​រំលែក​ នូវ​មរណៈទុក្ខ​របស់​ឯកឧត្តមសមាជិកសភាជប៉ុន និងបាន​ថ្លែង​អំណរ​​គុណ​ចំពោះ​លិខិត​របស់​ឯកឧត្តម​នាយក​រដ្ឋមន្ត្រី​ជប៉ុន ដែល​មាន​ខ្លឹម​សារ​ ពាក់ព័ន្ធ​ទៅ​នឹង​ខួប​ទី​៥៥ឆ្នាំ ​នៃ​ទំនាក់ទំនង​មិត្តភាព​រវាង​កម្ពុជា-ជប៉ុន និង​ពាក់ព័ន្ធ​ទៅ​ដល់​ ជំនួប​រវាង​ប្រទេស​ជប៉ុន និង​បណ្តា​ប្រទេស​នៅ​តាម​មហា​អនុតំបន់​ទន្លេ​មេគង្គ​នោះ ។ សម្តេច អគ្គមហាសេនសបតីតេជោ ហ៊ុន សែន បាន​ថ្លែង​អំណរ​គុណ​ចំពោះ​រាជរដ្ឋាភិបាល​ជប៉ុន ដែល​បាន​ជួយ​ដល់​ប្រទេស​កម្ពុជា​ក្នុង​ពេល​កន្លង​មក ហើយ​ដែល​ទំនាក់​ទំនង​រវាង​ប្រទេស ​កម្ពុជា ​និង​ជប៉ុន ត្រូវ​បាន​ពង្រីក និង​ពង្រឹង​កាន់​តែ​ខ្លាំង​ឡើង​​។

សម្តេចតេជោ​នាយក​រដ្ឋមន្ត្រី ​ថ្លែង​ថាមក​ដល់​ពេល​នេះ​ជំនួយ​របស់​ប្រទេស​ជប៉ុន​មក​កាន់​ កម្ពុជា នៅ​តែ​ធំ​ជាង​គេ​បំផុត​ចាប់តាំង​ពី​កម្ពុជា​បាន​ចុះ​ហត្ថ​លេខា​ លើ​កិច្ច​ព្រមព្រៀង​ទីក្រុង​ ប៉ារីស​មក​នោះ។ ម៉្យាង​ទៀត​កិច្ច​ផ្តួច​ផ្តើម​រវាង​ជំនួប​នៃ​បណ្តា​ប្រទេស តាម​ដង​ទន្លេ​មេគង្គ​ មាន​សារៈសំខាន់​ណាស់ ដែល​ក្នុង​នោះ​មាន​ការ​ជម្រុញ​ការ​អភិវឌ្ឍន៍​តាម​បណ្តា​ប្រទេស​ តាម​មហា​អនុតំបន់​មេគង្គ ការ​ធ្វើ​សមាហរណ​កម្ម​នៅ​ប្រទេស​ជា​សមាជិក​អាស៊ាន​ថ្មី និង ​អាស៊ាន​ចាស់ ក៏​ដូច​ជា​ការ​កាត់​បន្ថយ​គម្លាត​រវាង​ប្រទេស​សមាជិក​អាស៊ាន​ចាស់ និង​ សមាជិក​ ថ្មី​ផង​ដែរ ។

សម្តេច​តេជោ​ក៏​បាន​ថ្លែង​អំណរ​គុណ​ផង​ដែរ​ចំពោះ​រាជ​រដ្ឋាភិបាល​ជប៉ុន ​ដែល​បាន​ជួយ​ដល់​ កម្ពុជា ពិសេស​ការ​កសាង​ស្ពាន​អ្នក​លឿង ដែល​ស្ពាន​នេះ​ជា​ផ្លូវ​មួយ​សម្រាប់​ត​ភ្ជាប់​បណ្តា​ ប្រទេស​ក្នុង​មហា​អនុតំបន់​មេគង្គ ហើយ​សម្តេច​នាយក​រដ្ឋមន្ត្រី ក៏​បាន​ថ្លែង​អំណរ​គុណ ​ចំពោះ​ការ​គាំ​ទ្រ​ទាំង​ឡាយ​របស់​ជប៉ុន​ដល់​ព្រះ​រា​ជា​ណា​ចក្រ​កម្ពុជា ពិសេស​គឺ​នយោបាយ ​មិន​ប្រែប្រួល របស់​ជប៉ុន​ចំពោះ​កម្ពុជា បើ​ទោះ​បី​ជា​មាន​ការ​ផ្លាស់​ប្តូរ​ថ្នាក់​ដឹក​នាំ​យ៉ាង​ ណា​ក៏​ដោយ ក៏​នយោបាយ​របស់​ជប៉ុន​មក​កាន់​កម្ពុជា ក៏​នៅ​តែ​មិន​មាន​ការ​ផ្លាស់​ប្តូរ​នោះ។/

ដំណើរទស្សនកិច្ច សម្តេចអគ្គមហាសេនាបតីតេជោ ហ៊ុន សែន នៅសារធារណរដ្ឋប្រជាមានិតចិន នាំ​មក​នូវ​ផល​ប្រយោជន៍​យ៉ាង​ច្រើន​សម្រាប់​ប្រទេស​ជាតិ និង​ប្រជាជន​កម្ពុជា(១៨/១២/២០១០)


  សម្តេចអគ្គមហាសេនាបតីតេជោ ហ៊ុន សែន បានធ្វើមាតុភូមិនិវត្តន៍ នាព្រឹកថ្ងៃទី១៧ ខែធ្នូ ឆ្នាំ២០១០ បន្ទាប់ពី បាន ដឹកនាំគណៈប្រតិភូរាជរដ្ឋាភិបាលកម្ពុជាទៅបំពេញទស្សនកិច្ច រយៈពេល ៥ថ្ងៃ ​( ១៣-១៧ ខែធ្នូ ឆ្នាំ២០១០ ) នៅ សាធារណរដ្ឋប្រជាមានិតចិនប្រកប ដោយជោគជ័យ។

នៅព្រះលានយន្តហោះអន្តរជាតិភ្នំពេញ ឯកឧត្តមឧបនាយករដ្ឋមន្ត្រី ហោ ណាំហុង រដ្ឋមន្ត្រី​ក្រសួង​ការ​បរទេស និង សហប្រតិបត្តិការ​អន្តរជាតិ មាន​ប្រសាសន៍​ថា រដ្ឋាភិបាល​ សាធារណរដ្ឋ​ប្រជាមានិត​ចិន​ បាន​សម្រេច​ផ្តល់​ជំនួយ​ចំនួន​៣០០​លាន​ដុល្លារ​សហរដ្ឋ​ អាមេរិក ​ដែល​ជា​ជំនួយ​នៅ​ក្នុង​ឆ្នាំ​២០១០ ដើម្បី​អនុវត្ត​គម្រោង​ហេដ្ឋារចនា​សម្ពន្ធ​ផ្លូវ និង​ ប្រព័ន្ធ​ធារាសាស្ត្រ​ចំនួន ៣ នៅ​ក្នុង​ប្រទេស​កម្ពុជា ​​រួម​មាន​ការ​សាង​សង់​ផ្លូវ​ជាតិ​លេខ​២១៤ ពី​ត្បែង​មាន​ជ័យ​ខេត្តព្រះវិហារ ទៅ​ថាឡាបរិវ៉ាត់​ខេត្ត​ស្ទឹងត្រែង ​មាន​ទឹក​ប្រាក់ ១០០ លាន ​ដុល្លារ ; ការ​កសាង​ផ្លូវ​ជាតិ​លេខ ៧៦ ពី​សែន​មនោរម្យ​ទៅ​តាអោង​មាន​ទឹក​ប្រាក់​ចំនួន ១០០ លាន​ដុល្លារ ; និង​គម្រោង​អភិវឌ្ឍន៍​​ប្រព័ន្ធ​ប្រឡាយ​នៅ​ទន្លេ​វ៉ៃកូ ខេត្ត​ស្វាយរៀង ដែល​ក្នុង​ ជំហាន​ដំបូង​ត្រូវ​ចំណាយ​ទឹក​ប្រាក់​ចំនួន ១០០ លាន​ដុល្លារ ដែល​អាច​មាន​លទ្ធភាព​ ស្រោច​ស្រព​ដី​ស្រែ ​បាន​រហូត​ដល់​ទៅ​៣​សែន​ហិកតា ដោយ​សារ​មាន​ដី​ស្រែ​ខ្លះ​អាច​ធ្វើ​ ស្រែ​បាន​២​ដង និង​៣​ដង​ទៀត​ផង ។

 ឯកឧត្តម ហោ ណាំហុង មាន​ប្រសាសន៍​ថា នៅ​ក្នុង​ជំនួប​ចរចា​ទ្វេ​ភាគី​រវាង​សម្តេច​តេជោ ជាមួយ​ឯកឧត្តម វេន ជាប៉ាវ នាយក​រដ្ឋមន្ត្រី​នៃ​សាធារណរដ្ឋ​ប្រជាមានិត​ចិន ភាគី​ទាំង​ពីរ​ បាន​ឯកភាព​គ្នា​បង្កើន​ទំហំ​ពាណិជ្ជ​កម្ម​ប្រទេស​ទាំង​ពីរ​ឱ្យ​បាន​រហូត​ដល់ ២៥០០ លាន​ដុល្លារ ​សហរដ្ឋ​អាមេរិក​នៅ​ត្រឹម​ឆ្នាំ​២០១៥ ។ ឯកឧត្តម​បាន​បញ្ជាក់​ថា នៅ​ក្នុង​រយៈពេល ១០​ខែ​ក្នុង ​ឆ្នាំ​២០១០ នេះ​ទំហំ​ពាណិជ្ជកម្ម​របស់​កម្ពុជា-ចិន មាន​ចំនួន ១១០០ លាន​ដុល្លារ​ដែល ​ជា​តួ​លេខ​ដែល​មាន​កំណើន ខ្ពស់​បំផុត ។
ក្នុងឱកាសបំពេញទស្សនកិច្ចនៅសាធារណរដ្ឋប្រជាមានិតចិន ក្រៅពីជួបសម្តែងការគួរសម​ ជា​មួយ​​ថ្នាក់ដឹកនាំចិន រួមមាន ឯកឧត្តម ហ៊ូ ជិនតាវ ប្រធានាធិបតីនៃ សាធារណរដ្ឋ ប្រជាមានិតចិន ឯកឧត្តម វូ បាំងហ្គូ ប្រធាន គណកម្មាធិការ អចិន្ត្រៃយ៍រដ្ឋសភាប្រជាជនចិន សម្តេចតេជោ នាយក​រដ្ឋ​មន្ត្រី បានជួបពិភាក្សាការងារ ជាមួយ សមភាគីចិន ឯកឧត្តម វេន ជាប៉ាវ នាយករដ្ឋមន្ត្រី​នៃ​សា​ធា​រ​ណ​​ប្រជាមានិតចិន និងធ្វើជាអធិបតីក្នុងពិធី ចុះ ហត្ថលេខា លើកិច្ចសហប្រតិបត្តិការរវាងកម្ពុជា-ចិនផង​ដែរ​។
ឯកឧត្តម ហោ ណាំហុង ថ្លែង​ថា​ក្នុង​ចំណោម​ឯកសារ​ទាំង​១២ ដែល​បាន​ចុះ​ហត្ថ​លេខា​ នៅ​អំឡុង​ទស្សនកិច្ច​របស់​សម្តេច​តេជោ​នាយក​រដ្ឋមន្ត្រី​នៅ​ប្រទេស​ចិន​នោះ មាន​ឯកសារ ​ចំនួន ៥ ដែល​លោក​បាន​កត់​សម្គាល់​ថា មាន​សារៈសំខាន់​បំផុត ដែល​ទី(១)​គឺ​គម្រោង ​កសាង​ស្ពាន​ជ្រោយ​ចង្វារ​ថ្មី​មួយ​ទៀត​ដែល​មាន​ទឹក​ប្រាក់​ចំនួន ២៦​លាន​ដុល្លារ (២)ស្ពាន ​តាខ្មៅ ក្នុង​ខេត្ត​កណ្តាល​មាន​ទឹក​ប្រាក់​ចំនួន​៣២​លាន​ដុល្លារ (៣)​ទំនប់​ស្ទឹង​ពោធិ៍​សាត់​ សម្រាប់​វារី​អគ្គីសនី និង​អភិវឌ្ឍ​ធន​ធាន​ទឹក​មាន​ទឹក​ប្រាក់​ចំនួន ៦៣ លាន​ដុល្លារ (៤)​ផ្លូវ​ជាតិ​លេខ ៤១ ពី​ថ្នល់​ទទឹង​ទៅ​ជុំ​គីរី​មាន​ទឹក​ប្រាក់ ៤៥ លាន ដុល្លារ និង​ទី(៥)​ការ​កសាង ​តំបន់​សេដ្ឋកិច្ច​ពិសេស​នៅ​ខេត្ត​ព្រះសីហនុ ។ ឯកឧត្តម ឧបនាយក​រដ្ឋមន្ត្រី​មាន​ប្រសាសន៍​ថា កិច្ច​សន្យា​ចំនួន ២ នៅ​ក្នុង​ចំណោម​ឯកសារ​ដែល​បាន​ចុះ​ហត្ថ​លេខា​នោះ គឺ​ការ​អភិវឌ្ឍ​ ស្ទឹង​ស្រែង​នៅ​ក្នុង​ខេត្ត​ឧត្តរមានជ័យ-សៀមរាប​មាន​តម្លៃ ៥៣,៥ លាន​ដុល្លារ និង​ការ​កសាង​ អគ្គិសនី​តាម​ជន​បទ ដែល​ចាប់​ផ្តើម​ពី​តំបន់​ជុំ​វិញ​រាជធានី​ភ្នំពេញ មាន​ទឹក​ប្រាក់​ចំនួន​ ៥៣,៥ លាន​ដុល្លារ​ផងដែរ។
  គួរបញ្ជាក់ថាដំណើរទស្សនកិច្ចរបស់សម្តេចតេជោនាយករដ្ឋមន្ត្រី នៃព្រះរាជាណាចក្រ កម្ពុជា នៅសាធារណរដ្ឋ ប្រជាមានិតចិន ជា​ដំណើរទស្សនកិច្ច​ដែល ​នាំ​មក​នូវ​ ផល​ប្រយោជន៍​យ៉ាង​ច្រើន​សម្រាប់​ប្រទេស​ជាតិ និង​ប្រជាជន​កម្ពុជា ព្រម​ទាំង​ការ​ពង្រឹង និង ពង្រីក​នូវ​ទំនាក់ទំនង​មិត្តភាព និង​កិច្ច​សហប្រតិបត្តិការ​រវាង​ប្រទេស​ទាំង​ពីរ​ ។  ឯកឧត្តម ឧបនាយករដ្ឋមន្ត្រី ហោ ណាំហុង រដ្ឋមន្ត្រី​ក្រសួង​ការ​បរទេស និង សហប្រតិបត្តិការ​ អន្តរជាតិ មាន​ប្រសាសន៍វាយតម្លៃ​ថា ទំនាក់​ទំនង​កម្ពុជា-ចិន​បាន​ចាប់​ផ្តើម​ ពី​ សហប្រតិបត្តិការ​ជិត​ខាង​ល្អ ឈាន​ដល់​កិច្ច​សហប្រតិបត្តិការ​គួរ​ទុក​ចិត្ត​គ្នា និង​បាន ឈាន​មក​ដល់​កិច្ច​សហប្រតិបត្តិការ​យុទ្ធសាស្ត្រ​គ្រប់​ជ្រុង​ជ្រោយ 

ក្នុងឱកាសស្នាក់អាស្រ័យនៅសាធារណរដ្ឋប្រជាមានិតចិន សម្តេចអគ្គមហាសេនាបតីតេជោ ហ៊ុន សែន បាន អញ្ជើញចូលគាល់ ព្រះមហាវររាជបិតា នរោត្តម សីហនុនិង ព្រះវររាជមាតា នៅ ព្រះរាជតំណាក់ ក្នុងទីក្រុង ប៉េកាំង ដែលក្នុងឱកាសនោះ សម្តេចតេជោ​ទទួលបាននូវ​ការ​កោត​សរសើរ​​ អំពី​ការអនុវត្តនយោបាយចិន តែមួយបន្តពី ព្រះអង្គបានល្អផងដែរ។

ប្រគួតកីឡាវាយកូលគោលពានរង្វាន់សម្ដេច ហ៊ុន សែន ឆ្នាំទី២ ដើម្បីអបអរសាទរខួបលើកទី៣២ នៃទិវាជ័យជំនះ ៧មករា

នៅថ្ងៃអាទិត្យទី១៩ ព្រឹកនេះនៅទីលានវាយកូនគោល Siem Reap Lake Golf Club ខេត្ដសៀមរាប នឹងមានរៀបចំនូវកម្មវិធី ប្រគួតកីឡាវាយកូនគោល ពានរង្វាន់សម្ដេចអគ្គមហា សេនាបតីតេជោ ហ៊ុន សែន ឆ្នាំទី២ដើម្បីអបអរសាទរ ខួបលើកទី៣២ នៃទិវាជ័យ
ជំនះ ៧មករា ១៩៧៩-៧មករា ២០១១។ក្រោមទស្សនៈ វិស័យដ៍ខ្ពង់ខ្ពស់របស់ សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ដ្រីនៃ ព្រះរាជាណាចក្រកម្ពុជា ហើយកម្មវិធីនេះក៍ នឹង ដំណើការក្រោមវត្ដមាន ឯកឧត្ដមនាយឧត្ដមសេនីយ៍ ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួង ការពារជាតិ ប្រធានសហព័ន្ធកីឡាវាយកូនគោលកម្ពុជា តំណាងដ៍ខ្ពង់ខ្ពស់ សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ហើយក៍ និង មានការចូល រួមពីកីឡាករ មកពីសមាជិកព្រឹទ្ធសភា រដ្ឋសភា និង រាជរដ្ឋាភិបាលកម្ពុជាក្រោមការជួយ ឧបត្ថម្ភពី ក្រុបហ៊ុន KTC Leisure Co.,Ltd ដែលជាក្រុមហ៊ុនដ៍ធំ និង មានឈោ្មះល្បីរបស់សាធារណៈរដ្ឋកូរ៉េ និងមានបណ្ដាញសាខាជាច្រើន នៅលើពិភពលោកដែលបានបណ្ដាក់ ទុនវិនិយោគជាច្រើននៅលើ ទឹកដីនៃព្រះរាជាណាចក្រកម្ពុជាយើងដូចជាៈ ការផលិតខ្សែកាបអគ្គីសនី វារីអគ្គីសនី ការផ្គត់ផ្គង់ទឹក ស្អាត រួមនិងវិស័យផ្សេងៗជាច្រើនទៀត ដើម្បីរួមចំណែកជាមួយរាជរដ្ឋាភិបាល កម្ពុជាក្នុងការ
អភិវឌ្ឍន៍ ប្រទេសជាតិ ក៍ដូចជាការផ្ដល់ការងារជាច្រើនសន្ធឹកសន្ធាប់ សំរាប់ប្រជាពលរដ្ឋរបស់យើង ជាក់ស្ដែងដូចជាការផ្ដល់ការងារដល់ ប្រជាពលរដ្ឋនៅខេត្ដសៀមរាប នាទីទីលានវាយកូនគោល Siem Reap Lake Golf Club ខេត្ដសៀមរាប ដែលមានលក្ខណៈស្ដង់ដាលំដាប់ពិភពលោក។ ទាំងនេះក៍យើងមិនត្រូវភ្លេចទេ នៅរាល់សមិទ្ធិផលដែលបានកើត ឡើងនាពេលនេះក៍ដោយ សារ មហា គុណូប ការៈថ្ងៃ៧មករា១៩៧៩ដែលមានឥស្សរជនឆ្នើមទាំង៣ ដូចជា សម្ដេច ជា ស៊ីម សម្ដេច ហេង សំរិន និង សម្ដេច ហ៊ុន សែន ដែលបានពលិកម្មគ្រប់បែបយ៉ាង ដើម្បីបុព្វហេតុជាតិមាតុភូមិ និង ប្រជាជន។

ចិនជួយ៣០០លានដុល្លារលើ គម្រោងអភិវឌ្ឍន៍ធំ៣

រដ្ឋាភិបាលចិនបានផ្តល់ជំនួយចំនួន ៣០០លានដុល្លារដល់ កម្ពុជាសម្រាប់កម្រោង អភិវឌ្ឍន៍ធំ៣ទាក់ទង នឹងការធ្វើថ្នល់ និងសំណង់ធារាសាស្ត្រ។ លោកឧបនាយករដ្ឋមន្ត្រីហោណាំហុង បានមានប្រសាសន៍ ជុំវិញបញ្ហានេះ កាលពីថ្ងៃទី១៧ធ្នូ ក្រោយពេលដែលគណៈប្រតិភូរាជ រដ្ឋាភិបាលកម្ពុជាដឹកនាំដោយ សម្តេចហ៊ុនសែន បានអញ្ជើញវិល ត្រឡប់មកពីបំពេញទស្សនកិច្ចពីប្រទេសចិនវិញ។ លោកឧបនាយក រដ្ឋមន្ត្រីហោណាំហុង បានថ្លែងថា ក្នងទឹកប្រាក់ចំនួន៣០០លានដុលា្លរ ដែលចិនបានសន្យាជួយ រួមមាន១០០លានដុលា្លរសម្រាប់កសាងផ្លូវ ជាតិ២១៤ ពីត្បែងមានជ័យ ទៅស្រុកថាឡាបរិវ៉ាត់ ខេត្តស្ទឹងត្រែង និង ចំនួន១០០លានដុលា្លរទៀតសម្រាប់កសាងផ្លូវជាតិលេខ៧៦ពីសែន មនោរម្យទៅតាអោង នៃខេត្តមណ្ឌលគីរី និង១០០លានដុល្លារទៀត សម្រាប់អភិវឌ្ឍន៍ប្រព័ន្ធប្រឡាយនៅទន្លេវ៉ៃកូ ខេត្តស្វាយរៀង។ សេច ក្តីរាយការណ៍បានអោយដឹងថាប្រព័ន្ធប្រឡាយនៅទន្លេវ៉ៃកូ ខេត្តស្វាយ រៀង នៅពេលកសាងរួច នឹងអាចជួយស្រោចស្រពដីស្រែបានរហូត ដល់ទៅ៣សែនហិកតា។

វៀតណាមជួយអប់រំនិស្សិតខ្មែរ

និស្សិតកម្ពុជាជាង ១១០០ នាក់ ត្រូវកេរាយការណ៍ថា បានទទួលការបណ្តុះបណ្តាល សិក្សាដោយស្ថាប័ន អប់រំនៅវៀតណាម ចាប់តាំងពី ឆ្នាំ ២០០៦ មក ។
តួលេខនេះត្រូវបានបង្ហាញ នៅក្នុងសន្និសីទមួយដែលបាន ធ្វើឡើងនៅក្នុងទី ក្រុងហាណូយ កាលពី ថ្ងៃទី ១៧ ខែធូ នេះ ដើម្បីពិនិត្យមើលលើកិច្ច សហប្រតិបត្តិការលើការបណ្ដុះ បណ្ដាលរវាងវៀតណាម និងកម្ពុជា ពីឆ្នាំ ២០០៦ ដល់ ២០១០ ។
នាពេលបច្ចុប្បន្ននេះ មាននិស្សិតកម្ពុជាចំនួនប្រមាណជា ៦០០ នាក់កំពុងសិក្សានៅវៀតណាម ដែលភាគច្រើនសិក្សាលើជំនាញ វេជ្ជសាស្ត្រ ឱសថសាស្ត្រ កសិកម្ម សេដ្ឋកិច្ច ស្ថាបត្យកម្ម និងបច្ចេកវិទ្យា ។

ពិនិត្យស្ថានភាពទេសចរណ៍នៅច្រកប៉ោយប៉ែត

ក្រុមការងារអគ្គបញ្ជាការកង យោធពលខេមរភូមិន្ទថៃ និងទាហានឈុតខ្មៅថៃ មួយក្រុម ដែលមានគ្នា ប្រមាណជា២០នាក់ បានចុះមកទស្សនកិច្ច នៅតំបន់ច្រកព្រំដែន ស្ថិតក្នុងស្រុក អារញ្ញ ខេត្តស្រះកែវ ទល់មុខនឹងក្រុងប៉ោយប៉ែត ខេត្តបន្ទាយមានជ័យ ។
ដំណើរទស្សនកិច្ច កាលពីរសៀលថ្ងៃ សុក្រម្សិលមិញនេះ ធ្វើឡើងបន្ទាប់ពីអាជ្ញាធរនៃ ប្រទេសកម្ពុជាថៃ បានធ្វើពិធីលើកលែងទិដ្ឋាកា កាលពីថ្ងៃទី១៦ខែឆ្នូកន្លងទៅ។
យោងតាមមន្រ្តីការិយាល័យ ទំនាក់ទំនងថៃកម្ពុជា បានឲ្យដឹងថា គោលបំណងដែល គណៈប្រតិភូថៃ មកទស្សនកិច្ចនៅតំបន់ច្រកព្រំដែននេះ គឺដើម្បីត្រួតពិនិត្យ ពីស្ថានភាព ប្រជាពលរដ្ឋ និងភ្ញៀវទេសចរ ដែលធ្វើដំណើរចេញចូល ក្នុងប្រទេសទាំង២ ក្រោយការធ្វើពិធីលើកលែងទិដ្ឋាកា កាលពីថ្ងៃទី១៦ខែឆ្នូកន្លងទៅ។