Friday, December 31, 2010

ឧត្តមសេនីយ៍ទោប៊ុន សេង ជួប​មេទ័ព​ភូមិភាគ១ថៃ ​ជុំវិញ​ភាព​តានតឹង​តាម​ព្រំដែន​កម្ពុជា​-​ថៃ

កាលពី​វេលា​ម៉ោង ១២ ថ្ងៃត្រង់​ថ្ងៃ​ទី ៣១ ធ្នូ​នេះ លោក​ឧត្តមសេនីយ៍ទោ ប៊ុន សេង មេបញ្ជាការ​យោ​ធភូមិភាគ​ទី​៥ របស់​កម្ពុជាធ្វើដំណើរ​ចូល​ទៅ​ខេត្ត​ស្រះកែវជួប​នឹង​មេបញ្ជាការ​កងទ័ព​ភូមិភាគ​ទី​១ របស់​ថៃ លោកឧត្តមសេនីយ៍ទោ អ៊ុកប៊ូ​កេតចា​ន់ត្រា​បុត្រ ដើម្បី​ប្រជុំ​ពិភាក្សាគ្នា សម្រួល​សភាពការណ៍​ព្រំដែន នៅ​នឹង​បន្ទាយយោធា​ខេត្ត​ស្រះកែវ ។​

​    គេ​មិន​ទាន់​ដឹង​ពី​លទ្ធផល​នៃ​អង្គប្រជុំ​ភាគី​ទាំង​ពីរ​នៅ​ឡើយ​ទេ ប៉ុន្តែ​គេ​ជឿថា ភាគី​ទាំងពីរ​ជជែក​គ្នា​រឿង​ព្រំដែនកុំឲ្យ​មាន​បញ្ហា​ តានតឹងកើតឡើងដែលឈានដល់ការ ផ្ទុះអាវុធ បញ្ហា​ប្រឈមមុខ​ដាក់គ្នា បន្ទាប់ពី​អាជ្ញាធរ​កម្ពុជា​ចាប់ខ្លួន​ក្រុម​ជ្រុលនិយម​ថៃ ៧ នាក់ កាលពី​ថ្ងៃ​ទី ២៩ ធ្នូ​កន្លងទៅ​នេះ ។ 

    ​តាម​ប្រភព​ព័ត៌មាន​ពី​ព្រំដែន​កម្ពុជា​ថៃឲ្យដឹងថា មេបញ្ជាការ​កងទ័ព​ទាំងពីរអាច​ធ្វើដំណើរ​ទៅ​មើល​បង្គោល​ព្រំដែន​លេខ ៤៦ ត្រង់​ភូមិ​ណង​ចា​ន់របស់​ថៃ និង​ភូមិ​ជោគជ័យ​របស់​ខ្មែរដើម្បី​ពិនិត្យ​ស្ថានការណ៍​នៅ​ទីនោះ។​​ 

    មកទល់ពេលនេះ ពួក​អាវ​លឿង​ថៃ​ប្រមាណ​ជា ១០០០ នាក់ ដែល​បាន​ប្រមាន​ថា នឹង​មក​មើល​បង្គោល​សីមា​លេខ ៤៦ នោះ មិនទាន់​ឃើញ​នៅឡើយ​ទេ ហើយ​កងទ័ព​ថៃ ក៏បាន​ដាក់​កំលាំង​ការពារ​រួចជាស្រេច​ហើយដើម្បី​ទប់ទល់​នឹង​បាតុករអាវ​លឿង​ ទាំងអស់នោះ ។​
    ​ចំណែក​ពលករ​កម្ពុជា ដែល​ទៅ​ធ្វើការ​នៅ​ថៃ​បាន​វិល​មក​ស្រុកកំណើត​វិញជា​បន្តបន្ទាប់ ៕​

លោក​ឧ​ត្ត​ម​សេនីយ៍​ជា តារា​: កម្ពុជា​ប្រើ​សិទ្ធ​ស្វ័យការពារ​ទឹកដី បើ​កងទ័ព​ថៃ​រំលោភ​ឈ្លានពាន​

 ​នៅ​ថ្ងៃទី​៣១ ធ្នូ​នេះ​ស្ថានភាព​ព្រំដែន​ខ្មែរ​-​ថៃ​មាន​សភាព​ស្ងប់ស្ងាត់​ជាធម្មតា​ពុំមាន​អ្វី​តានតឹង​ទេ នេះ​បើតាម​ការអះអាង​ពី​លោកនាយ​ឧ​ត្ត​ម​សេនីយ៍​ជា តារា អគ្គមេបញ្ជាការ​រង​ក​ង​យោធពល​ខេ​មរ​ភូ​មិ្ទ​ប្រចាំការ​ទិស​តំបន់​ព្រះវិហារ ។​

​លោកនាយ​ឧ​ត្ត​ម​សេនីយ៍​ជា តារា បាន​ឲ្យ​ដឹងថា កងទ័ព​កម្ពុជា​រក្សា​ការពារ​បូរណភាព​ដែនដី​របស់ខ្លួន​មិន​ឲ្យ​បាត់បង់​សូម្បី​តែមួយ​មិលីម៉ែត្រ ហើយ​កងទ័ព​កម្ពុជា​គោរព​តាម​បទបញ្ជារ​សម្តេច​តេ​ជោ ហ៊ុន សែន ។​ លោកបន្តថា ប្រសិនបើ​មានការ​រំលោភ​បូរណភាព​ទឹកដី​កម្ពុជា ពី​សំណាក់​កងទ័ព​ថៃ​នោះ កងទ័ព​កម្ពុជា​ប្រើ​សិទ្ធ​ស្វ័យការពារ​ទឹកដី​របស់ខ្លួន ការពារ​ទឹកដី​មិន​ឲ្យ​ថៃ​ចូល​ឈ្លានពាន​ទេ​។​

​ជាមួយគ្នា​នោះដែរ លោក​កុយ គួ​ង អ្នកនាំពាក្យ​ក្រសួងការបរទេស​កម្ពុ​ជា បាន​ឲ្យ​ដឹងថា មកដល់​ថ្ងៃ​៣១​ធ្នូ​នេះ ពុំមាន​អន្តរា​គម​ណាមួយ​ពី​ភាគី​ថៃ​ជាថ្មីទៀត​ទេ។ លោក​បាន​បន្តថា តាមរយៈ​ជំនួប​រវាង​រដ្ឋមន្ត្រីការបរទេស​ទាំងពីរ កាលពី​រសៀល​ថ្ងៃទី​៣០​ធ្នូ គឺ​ថៃ​គោរព​នូវ​អធិបតេយ្យភាព​ទឹកដី​កម្ពុជា ហើយ​មិន​ធ្វើ​ឲ្យ​មានការ​រាលដាល​ទៅ​បញ្ហា​ផ្សេង​ក្រៅពីនេះ បន្ទាប់ពី​កម្ពុជា​អនុវត្តន៍​បាន​ត្រឹមត្រូវ​តាមច្បាប់​តុលាការ​របស់ខ្លួន ចំពោះ​ប្រជាជន​ថៃ​ទាំង​៧​នាក់​ឆ្លងដែន​ចូល​ទឹកដី​កម្ពុជា​ខុសច្បាប់ ដែល​ត្រូវបាន​អាជ្ញាធរ​ខ្មែរ​ចាប់ខ្លួន​កាលពី​ថ្ងៃទី​២៩​ធ្នូ​កន​ស្លង​ទៅនេះ​៕

ឧទ្ធម្ភាគចក្រ កង​ទ័ព​សៀម​៣​គ្រឿង​ហោះ​​ក្រឡឹង​បង្គោល​ព្រំដែន​លេខ​៤៦

ស្ថាន​ភាព​ព្រំដែន​នៅ​ចំណុច​បង្គោល​ព្រំដែន​លេខ​៤៦ ក្នុង​ស្រុក​អូរ​ជ្រៅ សភាពការណ៍​​នៅ​ជា​ធម្មតា គ្រាន់​តែ​ភាគី​សៀម​បង្កើន​កង​កម្លាំង​បន្ថែម​ជាមួយ​នឹង​ឧទ្ធម្ភាគចក្រ​យោធា​​ចំនួន​៣​គ្រឿង​បាន​ហោះ​ក្រឡឹង​នៅ​តំបន់​នោះ​ទៅ​វិញ​ទៅ​មក។
កង​ទ័ព​នៅ​ជួរ​មុខ​បាន​ប្រាប់​ថា យើង​បាន​មើល​ឃើញ​ឧទ្ធម្ភាគចក្រ​យោធា របស់​កង​ទ័ព​សៀម ហោះ​ចុះ​ឡើង រួច​ហើយ​ចុះ​ចត​នៅ​ចំ​ពី​មុខ​ច្រក​ជោគ​ជ័យ ដែល​ជា​កន្លែង​បន្ទាយ​កង​ទ័ព​ឈុត​ខ្មៅ​របស់​សៀម។ ទី​នោះ​ជា​បន្ទាយ​កង​រយ​ទ័ព​ឈុត​ខ្មៅ​លេខ​១២៦។ ក្រៅ​ពី​ឧទ្ធម្ភាគចក្រ យើង​ក៏​បាន​ឃើញ​រថពាសដែក​ចំនួន​៤​គ្រឿង និង​រថយន្ត​ដឹក​កង​ទ័ព​៣​គ្រឿង​ផ្សេង​ទៀត បាន​បើក​ប្រ​ទ្រុយ​ចុះ​ឡើង​នៅ​ក្នុង​ទឹក​ដី​របស់​ពួក​គេ។

លោក​ឧត្ដមសេនីយ៍​ប៊ុន សេង មេ​បញ្ជា​ការ​ភូមិ​ភាគ​៥ បាន​ប្រាប់​កម្ពុជា​ថ្មី​ថា បើ​ទោះ​បី​ជា​គេ​ចល័ត​ទ័ព​ឬ​មាន​ឧទ្ធម្ភាគចក្រ​អម​ក៏​ដោយ សភាព​ការណ៍​មិន​តាន​តឹង​ទេ។ លោក​មេ​បញ្ជា​ការ​រូប​នេះ​ប្រាប់​ថា គេ​បន្ថែម​កង​ទ័ព​ដើម្បី​ទប់​កម្លាំង​បាតុករ ដែល​គ្រោង​មក​ចំណុច​ព្រំដែន​នេះ​តែ​ប៉ុណ្ណោះ។ លោក​ឧត្ដម​សេនីយ៍ ប៊ុន សេង បាន​បញ្ជាក់​ថា ខ្ញុំ​បាន​ជួប​ជាមួយ​មេ​បញ្ជា​ការ​​ភូមិ​ភាគ​១​របស់​ថៃ នៅ​ក្នុង​ខេត្ត​ស្រះ​កែវ កាល​ពី​វេលា​ម៉ោង​១២​ថ្ងៃ​ត្រង់ ហើយ​យើង​បាន​សម្រួល​គ្នា​​ថា កង​ទ័ព​នៅ​តែ​សហការ​គ្នា​ល្អ រឿង​ចាប់​ខ្លួន​ជន​ជាតិ​ថៃ​៧​នាក់ ទុក​លទ្ធភាព​ឲ្យ​ច្បាប់​ជា​អ្នក​​សម្រេច។

លោក​បាន​ប្រាប់​ទៀត​ថា ភាគី​ខាង​ទាហាន​ថៃ គេ​ស្នើ​សុំ​ឲ្យ​មាន​ការ​សម្រួល​ដោះ​លែង​ដល់​ជន ជាតិ​ថៃ​៧​រូប​នោះ​ដែរ តែ​ខ្ញុំ​ប្រាប់​ថា វា​ហួស​សមត្ថភាព​របស់​ខ្ញុំ​ហើយ ព្រោះ​រឿង​នោះ​វា​ឡើង​ដល់​ប្រ ព័ន្ធ​តុលាការ​ ចំណែក​​ខ្ញុំ​ជា​កង​ទ័ព។
ដោយ​ឡែក​ក្រុម​បាតុករ​អាវ​លឿង ដែល​គ្រោង​ជាង​១​ពាន់​នាក់ មក​តវ៉ា​នៅ​ចំណុច​ព្រំដែន ខាង​លើ មិន​ឃើញ​មាន​វត្តមាន​មក​ដល់​​ព្រំដែន​ទេ តែ​កង​ទ័ព​ថៃ បាន​បង្កើន​កម្លាំង​ជា​ច្រើន​ទប់​ស្កាត់​នៅ​ជួរ​ខាង​មុខ៕

ប្រជាពលរដ្ឋចំនួន៥៥០នាក់មកពីខេត្ត កំពង់ចាមនិងខេត្តកំពតមកទស្សនកិច្ច ស្វែងយល់ពីបេសកកម្មស្វែងរក យុត្តិធម៌របស់សាលាក្តីខ្មែរក្រហម


អង្គជំនុំជម្រះវិសាមញ្ញ សាលាក្តីខ្មែក្រហម កាលពីម្សិលមិញមាន ប្រជាពលរដ្ឋចំនួន ៥៥០នាក់មកពីខេត្ត កំពង់ចាមនិងខេត្ត កំពតបាន មកទស្សនកិច្ច ស្វែងយល់ពីបេសកកម្មស្វែងរក យុត្តិធម៌របស់ សាលាក្តី ខ្មែរក្រហម ។ លោក ក្រាញ់ តូនី ប្រធានរដ្ឋបាល ស្តីទីនៃអង្គជំនុំជម្រះ វិសាមញ្ញក្នុងតុលាការកម្ពុជា ក៏បាន ទទួលជួបប្រជាពលរដ្ឋ ទាំង ៥៥០នាក់ ព្រមទាំងពន្យល់អំពីនិតិវិធីរបស់តុលាការ ដែលបានបំណើរ ការកន្លងមក ក្នុងការស្វែងរក យុត្តិធម៌របស់អង្គជំនុំជម្រះ វិសាមញ្ញតុលាការខ្មែរក្រហម ។ គិតចាប់ ពីថ្ងៃទី ៣០ខែមិនា ឆ្នាំ ២០០៩ ដែលជា ថ្ងៃចាប់ផ្តើម សវនាការសាធារណៈកាត់ទោស សំណុំរឿង ០០១កាំង កេងអ៊ាវ ហៅ ឌុច រហូតមកដល់ថ្ងៃទី ៣០ ខែរធ្នូ ២០១០នេះ មានប្រជាពលរដ្ឋ បានចូល រួមទស្សនា សវនាការ និងទស្សនកិច្ចសិក្សាស្វែងយល់មានចំនួន ៦៧០០០នាក់ហើយ។

លោក ក្រាញ់ តូនី បានបញ្ជាក់បន្ថែមថា តួលេខនេះគឺជាចំនួនដច្រើនលើសលុប និងជាការបំបែក ឯកត្តកម្ម ពិភព លោកដែលគ្មានតុលាការអន្តរជាតិណា អាចធ្វើបានយ៉ាងដូច្នេះទេ ។ នេះគឺជាមោទនភាពជាតិមួយ ហើយក៏ដោយសារ តុលាការនេះ បានកើតឡើងនៅទឹកដីកម្ពុជា ដែលបទឧក្រិដ្ឋកើតមាននៅទីនេះ ហើយជន រងគ្រោះទាំងអស់ អាចចូលរួម ទស្សនាសវនាការ កាត់ទោសក៏ដូចជា ទស្សនកិច្ចសិក្សា។ ដោយយោងតាម ស្មារតីនៃសន្តិភាព ស្ថេរភាពនយោបាយ និងការបង្រួបបង្រួមជាតិ រាជរដ្ឋាភិបាលកម្ពុជា ដឹកនាំដោយ សម្តេចអគ្គមហាសេនាបតីតេជោ ហ៊ុន សែន បានផ្តួល អង្កការចាត់តាំងខ្មែរក្រហមទាំងស្រុង នា ឆ្នាំ ១៩៩៨ និងបាននាំយកមេដឹកនាំមកកាត់ទោស ដោយតុលាការមួយ ដែលបង្កើតរួមគ្នា រវាងកម្ពុជា និងអង្កការ សហប្រជាជាតិ ។ ក្រុមការងារចរចារខាងកម្ពុជា ដែលដឹកនាំដោយ ឯកឧត្តម សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី អ,វ,ត,ក ត្រូវបានបង្កើតឡើង នាខែ កុម្ភៈឆ្នាំ ២០០៦ ហើយសាល ក្រមកាត់ទោសឌុច កាលពី ២៦ខែកក្កដា ឆ្នាំ ២៩១០ ត្រូវបានទទួលស្គាល់ ដោយសហគមន៏ជាតិ និង អន្តរជាតិ។

សំណុំរឿង ០០១ អង្គជំនុំជម្រះតុលាការកំពូល នឹងបើកសវនាការ សាធារណៈនៅសប្តាហ៏ទី៤ នៃខែមិនា ឆ្នាំ្ ២០១១ បន្ទាប់ពីបណ្តឹងឧទ្ធរណ៏ ឬបណ្តឹងសាទុក្ខ របស់ភាគីព្រះរាជ្ញា មេធាវីការពារក្តី និងមេធាវីដើមបណ្តឹង ដែលមិនពេញ ចិត្តនិងការសម្រេចរបស់អង្គជំនុំជម្រះសាលាដំបូង ដែលបានកាត់ក្តីអោយជនជាប់ចោទ កាំង កេងអ៊ាវ អោយចាប់ ពន្ធនាគា៣៥ឆ្នាំ។

ក្នងករណី០០២ ដែលទាក់ទង នឹងករណីចោទប្រកាន់សម្លាប់រង្គាលរវាងពីឆ្នាំ១៩៧៥ដល់ដើមឆ្នាំ១៩៧៩ នឹង ចាប់ ផ្តើមនៅឆមាសទី១ឆ្នាំ២០១១នេះហើយ ប្រើរយៈពេល២ឆ្នាំ។ ជនរងគ្រោះកម្ពុជា តាំងពីឆ្នាំ១៩៧៩មក បាននិយាយ ថា មានមនុស្សជាង៣លាននាក់បានស្លាប់ ដោយរបប ខ្មែរក្រហម ៣ឆ្នាំ ៨ខែ ២០ថ្ងៃ បើទោះបី ជាក្រុមអង្គការ អន្តរជាតិ បាននិយាយថា ការស្លាប់ មានតែចំនួន ជាងមួយលាននាក់នោះក៏ដោយ។ អតីត មេដឹកនាំខ្មែរក្រហម ៤រូបដែលនឹងត្រូវ រងនូវការចោទប្រកាន់ទាំងនេះរួមមាន អតីតប្រធានសភាជាតិ ខ្មែរ ក្រហម លោកនួនជា អតីត ប្រធានាធិបតីរបបខ្មែរក្រហម លោកខៀវសំផន អតីតឧបនាយករដ្ឋមន្ត្រីនិងជារដ្ឋ មន្ត្រីក្រសួងការបរទេសខ្មែរក្រហម លោកអៀងសារី និងអតីតរដ្ឋមន្ត្រីក្រសួងសង្គមកិច្ច លោកស្រីអៀងធីរិទ្ធ។

សាលាក្រុង​ភ្នំពេញ​អនុញ្ញាត​ឲ្យ​អ្នកភូមិ​បឹងកក់ ​ធ្វើ​កូដកម្ម​មួយ​សប្តាហ៍​លើ​ទីលាន​ប្រជាធិបតេយ្យ​

កាលពី​ព្រឹក​ថ្ងៃទី​៣១​ធ្នូ​នេះ លោក​កើត ឆែ នាយករង​សាលា​រាជធានី​ភ្នំពេញ​បានអនុញ្ញាត​ឲ្យ​អ្នកភូមិ​បឹងកក់​ចំនួន ៧​ភូមិ ចូលជួប​ដើម្បី​ពិភាក្សា​ធ្វើ​កូដកម្ម​រយៈពេល​មួយ​សប្តាហ៍ គឺ​ពី​ថ្ងៃទី​៣​ដល់​៩​មករា ២០១១ នៅលើ​ទីលាន​ប្រជាធិបតេយ្យ ។​

​    ​បើតាម​ការអះអាង​ពី​អ្នកស្រី​លី មុំ តំណាង​ឲ្យ​អ្នកភូមិ​បឹងកក់ បាន​ឲ្យ​ដឹងថា គោលបំណង​របស់​អ្នកភូមិ​បឹងកក់​ធ្វើ​កូដកម្ម​នៅនឹងកន្លែង​លើ​ទីលាន​ ប្រជាធិបតេយ្យ​រយៈពេល​មួយ​សប្តាហ៍​ដោយមាន​អ្នកចូលរួម​ប្រមាណ​ជា ៣០០​នាក់ ក្នុង​គោលបំណង​បង្ហាញ​ពី​ការរំលោភ​សិទ្ធិ​លំនៅឋាន​អ្នកភូមិ​បឹងកក់​ពី​ សំណាក់​ក្រុមហ៊ុន​ស៊ូ​កា គូ​អ៊ី​ន និង​ទាមទារ​ឲ្យ​មាន​សំណង​សមរម្យ​សម្រាប់​ប្រជាពលរដ្ឋ​ត្រូវ​បណ្តេញចេញ រួមទាំង​ទាមទារ​ទំហំ​ដី ១៥ ហិច​តា សម្រាប់​អ្នកភូមិ​បឹងកក់​អភិវឌ្ឍន៍​នៅនឹងកន្លែង ។​

​    ​តាមរយៈ​ជំនួប​ពិភាក្សា​ជាមួយ​មន្ត្រី​សាលាក្រុង​រយៈពេល​ជាង​២​ម៉ោង​ កន្លងមក សាលាក្រុង​បានអនុញ្ញាត​ឲ្យ​អ្នកភូមិ​បឹងកក់​ធ្វើ​កូដកម្ម​នៅ​ទីលាន​ ប្រជាធិបតេយ្យ​រយៈពេល​មួយ​សប្តាហ៍ តែ​ត្រូវគោរព​នូវ​លក្ខខណ្ឌ​ចំនួន​៤ គឺ​:

​    ​១- ធ្វើ​កូដកម្ម​រយៈពេល​ចន្លោះ​ពី​ម៉ោង​៦​ព្រឹក​រហូតដល់​ម៉ោង​៦​ល្ងាច ការពារ​សន្តិសុខ​ផ្ទៃក្នុង ទទួលខុសត្រូវ​ខ្លួនឯង សមត្ថកិច្ច​ជា​អ្នកការពារ​ខាងក្រៅ ។​
​    ​២- ជៀសវាង​យក​វេទិការ​នេះ​បំរើ​ផង​ប្រយោជន៍​នយោបាយ ធ្វើការ​វាយប្រហារ​ធ្វើ​ឲ្យ​ប៉ះពាល់​កិត្តិយស សមាជិកសភា សមាជិក​ព្រឹទ្ធសភា និង​រាជរដ្ឋាភិបាល ។​
​    ​៣- ក្រោយពេល​បញ្ចប់​កូដកម្ម​នៅវេលា​ម៉ោង​៦​ល្ងាច​រៀងរាល់ថ្ងៃ ត្រូវធ្វើ​អនាម័យ​លើ​ទីលាន​ប្រជាធិបតេយ្យ​ដោយ​ខ្លួនឯង ។​
​    ​៤- ក្នុងករណី​ធ្វើ​កូដកម្ម​មិន​ប្រព្រឹត្ត​តាមច្បាប់ អ្នកដឹកនាំ​ធ្វើ​កូដកម្ម​ទទួលខុសត្រូវ​ចំពោះមុខ​ច្បាប់​៕

អង្គភាព​ប្រឆាំង​អំពើពុករលួយ​ប្រកាស​ឈ្មោះ​អ្នក​យក​លុយ​ពី​ឡាន​ដឹកឈើ​ក្រញូង​នៅ​កំពង់ធំ​

 អ្នក​ជាប់​ពាក់ព័ន្ធ​ក្នុងការ​រកស៊ី​ដឹក​ឈើ​ក្រញូង​ខុសច្បាប់ និង​ឈ្មោះ​បុគ្គល​ព្រមទាំង​អង្គភាព​ដែល រាយ​បណ្តាក់​តាម​ថ្នល់​ចាំ​យក​លុយ​ពី​ឡាន​ដឹក​ឈើ​ក្នុង​ខេត្ត​កំពង់ធំ​ត្រូវបាន​ប្រកាស​ឈ្មោះ​ដោយ លោក​ឧិ​ម យ៉ិនទៀង​ប្រធាន​អង្គភាព​ប្រ​ឆឆាំង​អំពើពុករលួយ​។ ក្នុង​ចំណោម​អ្នក​ទាំងនោះ​ក៏មាន​ឈ្មោះ​និង​អង្គភាព​កាសែត​ មួយចំនួន​ព្រមទាំង​អង្គការ NGO ផងដែរ  ។​

​ការប្រកាស​នេះ​បាន​ធ្វើឡើង​កាលពី​រសៀល​ថ្ងៃទី ៣០ ធ្នូ ឆ្នាំ ២០១០ នៅ​សាលប្រជុំ​តូច​នៃ​សាលា​ខេត្តកំពង់ធំ​ដោយ​មាន​ការចូលរួម​ពី​ថ្នាក់ដឹកនាំ​ខេត្ត​រហូត​ដល់​អ្នក មាន​ឈ្មោះ​ក្នុង ការប្រព្រឹត្ត​ខាង​លើ​។ តារាង​បញ្ជី​ឈ្មោះ​ត្រូវបាន​គេ​បញ្ចាំង​តាម​ស្លា​យ និង​អាន​ដោយ​លោក ឧិ​ម  យ៉ិនទៀង  ដែល​ក្នុងនោះ​មាន​អង្គភាព​ប្រមាណ​ជិត ៣០​ពាក់ ព័ន្ធ​ទៅនឹង​ការទទួល​សំណូក​ពី​ឡាន ដឹក​ក្រញូង ហើយក៏​មាន​តារាង​តំលៃ​ដែល​អង្គភាព​នីមួយៗ​ទទួល​បាន​សម្រាប់​ឡាន​នី​មួយៗ ទៀតផង  ។ 

​តារាង​ទាំងនោះ​គេ​សង្កេត​ឃើញ​អ្នក​ទទួល​សំណូក​ចាប់ពី​ថ្នាក់​អភិបាល​ខេត្ត រហូត​ដល់​អ្នកកាសែត និង​អង្គការ NGO  ដែល​អំពើ​ទទួល​សំណូក​នោះ​ហាក់ដូចជា​ប្រព័ន្ធ​ទៅ​ហើយ​ដោយ​លោក​និយាយ លេងសើច​ថា នៅសល់​តែ​ពេទ្យ គ្រូបង្រៀន និង​លោកសង្ឃ​តែប៉ុណ្ណោះ​។ លោក​ប្រធាន​អង្គភាព ប្រឆាំង​អំពើពុករលួយ​បាន​លើក ឡើង​ថា អង្គភាព​ដែល​ពាក់ព័ន្ធ​ធ្ងន់ធ្ងរ​ជាងគេ​គឺ​អង្គភាព​រដ្ឋបាល ព្រៃឈើ​ព្រោះ​ជា​អង្គភាព​ជំនាញ ក្រៅពី​នោះ​គឺជា​អង្គភាព​សហការ​។​

​សូមបញ្ជាក់​ថា អង្គភាព​ប្រ​ឆឆាំង​អំពើពុករលួយ ដឹកនាំ​ដោយ​លោក ឧិ​ម  យ៉ិនទៀង បាន​ចុះ​ទៅ​កាន់​ខេត្ត​កំពង់ធំ​កាលពី​ថ្ងៃ​ទី ៣០ ធ្នូ ឆ្នាំ ២០១០ ហើយ​បាន​កោះប្រជុំ​ ដល់​មន្ត្រីរាជការ​និង​កងកំលាំង ប្រដាប់​អាវុធ​ក្នុង​ខេត្ត​នៅ​សាលប្រជុំ​ធំ​សាលាខេត្ត​នា​ពេល​ព្រឹក​ដោយ​លោក​លើកឡើង​ជា​ទូទៅ ស្ដី​អំពី​ច្បាប់​ប្រឆាំង​អំពើពុករលួយ និង​លើក​ឡើង​ពី​របៀប​កត់ត្រា​ទ្រព្យសម្បត្តិ លុះដល់​ពេល រសៀល លោក​បាន​ជួបប្រជុំ​ដាច់​ដោយឡែក​ចំពោះ​អ្នក​ដែល​មានឈ្មោះ​ក្នុង​បញ្ជីខ្មៅ​នៅ​ក្នុង​សាល ប្រជុំ​តូច។ 

​នាពេលនោះ លោក​បាន​ព្រមាន​ដល់​បុគ្គល​កងកំលាំងប្រដាប់អាវុធ​និង​អង្គភាព​ពាក់ព័ន្ធ​ឲ្យ​បញ្ឈប់ សកម្មភាព​ដែល​ខុស​ច្បាប់​ទាំងនោះ​ជាបន្ទាន់ កុំឲ្យ​មាន​ទៀត តែបើ​មាន​ច្បាប់​នេះ​នឹង​មិន​លើក លែង​ឡើយ​។  លោក​ទុក​ឧិ​កាស​ឲ្យ​កែប្រែ​ដោយ​គ្រាន់តែ​ធ្វើការ​ព្រមាន​និង​ឲ្យ​ប្រធាន​ក្រុមប្រឹក្សា ខេត្ត​ជា​អ្នក​ធ្វើ​ការអប់រំ​បន្ត​។  ប៉ុន្តែ ចំពោះ​អង្គភាព​ជំនាញ​មេព្រៃ​នឹង​ត្រូវ​ដាក់​វិន័យ​រដ្ឋបាល របស់​អង្គភាព​សាមី​។​

​លោក ឧិ​ម  យ៉ិនទៀង បាន​ថ្លែងថា ដោយសារ​តែ​ខេត្ត​កំពង់ធំ​ស្ថិតនៅ​កណ្តាល​គេ​ហើយ​ប្រភព​ឈើ​មិនមែន​ចេញពី​ទី​នេះ​ពោល​គឺ​គ្រាន់តែ​ឆ្លងកាត់​តែប៉ុណ្ណោះ ដូច្នេះ​ អាច​អនុគ្រោះ​ចាត់ទុកថា​ជាការ ព្រមាន​លើក​ទី ១ តែ​សុំ​កុំ​មាន​ជា​លើក​ទី ២ ឲ្យសោះ លោក​ក៏​បាន​ព្រមាន​ខ្លាំងៗ​ដល់​ខេត្ត​ដទៃ ដែល​ជា​ប្រភព​ចេញ​ឈើ​ថា​ឲ្យបាន​ការ​ ប្រុងប្រយ័​ត្នកុំបណ្តែតបណ្តោយបែបនេះ តទៅទៀត៕                 

ថៃ​ប្រកាសថា​នឹងដាក់​ទាហាន​ជាច្រើន​រយ​នាក់​នៅ​តំបន់​បង្គោល​សីមា​លេខ​៤៦

ខាង​ថៃ​ថា​បាន​អះអាង​នៅ​ព្រឹក​ថ្ងៃ​ទី​៣១​ខែ​ធ្នូ​នេះ​ថា ពួកគេ​នឹង​ដាក់​ពង្រាយ​ទាហាន​ជាច្រើន​រយ​នាក់​នៅ​ក្បែរ​តំបន់​ព្រំដែន​ត្រង់​បង្គោល​សីមា​លេខ​៤៦ ដែល​ជា​ទីកន្លែង​កម្ពុជា​បាន​ចាប់​ជនជាតិ​ថៃ​៧​នាក់​នោះ​។​ប៉ុន្តែ​ថៃ​បានបញ្ជាក់​ថា នេះ​មិនមែន​ជា​ការ​គំរាម​ខាង​យោធា​ទេ តែ​ខ្លួន​ធ្វើ​នេះ​ដើម្បី​ត្រៀមទប់ទល់​ជាមួយ​បាតុករ​អាវ​លឿង​ដែល​គ្រោង​នឹង​មក​ទីនេះ​​(៣១​ធ្នូ​)​។​

​    ​ប្រភព​ពត៌មាន​ពី​ព្រំដែន​ខេត្ត​បន្ទាយមានជ័យ​បានឲ្យដឹងថា នៅ​ព្រឹក​ថ្ងៃទី​៣១​ធ្នូ​នេះ ខាង​ទាហាន​ថៃ​បាន​ជូន​ដំណឹង​មក​ខាង​កងទ័ព​និង​អាជ្ញាធរ​កម្ពុជាថា ពួកគេ​នឹង​ពង្រាយ​បន្ថែម​ទាហាន​ជាច្រើន​រយ​នាក់​ទៀត​នៅ​តំបន់​ព្រំដែន​នៃ​ភូមិ​ណង​ចាន់ ឃុំ ស្រុក​គោក​ធ្យូង ខេត្ត​ស្រះកែវ​(​ថៃ​) ដែល​ឈម​នឹង​ភូមិ​ជោគជ័យ ឃុំ​អូរ​បី​ជាន់ ស្រុក​អូរជ្រៅ ខេត្ត​បន្ទាយ​មាន​។​គឺ​នៅ​តំបន់​បង្គោល​សីមា​លេខ​៤៦​។​ភាគី​ថៃ​បាន​ជូនដំនឹង​ថា សូម​កុំ​ឲ្យ​ខាង​កម្ពុជា​ភ្ញាក់ផ្អើល​ចំពោះ​វត្តមាន​ទាហាន​ដ៏​ច្រើន​សន្ធឹកសន្ធាប់​នេះ ពី​ព្រោះ​ការ​ដាក់​ពង្រាយ​ទាហាន​បន្ថែម​នេះ​ក្នុង​គោលបំនង​ទប់ទល់​ជាមួយ​បាតុករ​អាវ​លឿង​ថៃ​ដែល​គ្រោង​ធ្វើ​ដំណើរ​មក​កាន់​ទី​នេះ​។​បាតុករ​នោះ​មាន​ចំនួន​ប្រមាណ​១០០០​នាក់​។​

​    ​កន្លែង​ដែល​ថៃ​បន្ថែម​ទព័នោះ​គឺជា​កន្លែង​ដែល​កម្ពុជា​បាន​ចាប់ខ្លួន​ជនជាតិ​ថៃ​៧​នាក់​កាលពី​ថ្ងៃ​ទី​២៩​ធ្នូ ក្នុងនោះ​មាន​ទាំង​សមាជិក​សភា មេ​បាតុកម្ម​អាវ​លឿង​និង​អ្នកកាសែត​ផង ពីបទ​លួច​ចូល​ដោយ​ខុស​ច្បាប់​ក្នុង​បំនង​ទុច្ចរិត​។​

ប្រជាជន​កម្ពុជា​ជិត ៧ ម៉ឺន​នាក់ បាន​មក​មើល​សាលាក្តី​ខ្មែរក្រហម​ក្នុង​អំឡុង​ពេល​ជិត ២ ឆ្នាំ


យោង​តាម​ការបញ្ជាក់រ​បស់​សាលាក្តី​ខ្មែរក្រហម បាន​អះអាង​ថា ប្រជាជន​កម្ពុជា ៦ ម៉ឺន ៧ ពាន់​នាក់ បាន​មក​មើល​សាលាក្តី​ខ្មែរក្រហម ក្នុង​អំឡុង​ពេល​ជិត​២​ឆ្នាំ​ចុងក្រោយ​នេះ ។ តួលេខ​នេះ​បាន​ធ្វើឲ្យ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា ក្លាយ​ជា​តុលាការ​ឧក្រិដ្ឋកម្ម​អន្តរជាតិ​ទី​១ ដែល​ទទួលបាន​ការគាំទ្រ និង​ចូលរួម​ពី​ប្រជាជន​ក្នុង​ចំនួន​ដ៏​ច្រើន​បំផុត​ក្នុង​ប្រវត្តិសាស្ត្រ នៃ​ការបង្កើត​តុលាការ​ឧក្រិដ្ឋកម្ម​អន្តរជាតិ​លើ​ពិភពលោក ។ 

​    ​តួលេខ​ខាងលើ​ត្រូវ​បាន​រាប់​ចាប់តាំងពី​ថ្ងៃ​ទី​៣០ ខែ​មីនា ឆ្នាំ​២០០៩ ដល់​ថ្ងៃ​ទី​៣០ ខែ​ធ្នូ ឆ្នាំ​២០១០ និង​រាប់បញ្ចូល​ទាំង​ប្រជាពលរដ្ឋ​សាមញ្ញ មកពី​តាម​បណ្តា​ខេត្ត​នានា​ជនជាតិភាគតិច មកពី​ខេត្ត​រតនគិរី និង​មណ្ឌលគិរី សិស្ស និស្សិត មន្ត្រីរាជការ អង្គទូត ដើម​បណ្តឹងរដ្ឋប្បវេណី និង​អ្នកសារព័ត៌មាន ។ 
​    ​នៅ​ក្នុង​ចំនួន​នេះ អ្នក​ដែល​បាន​ចូលរួម​កម្មវិធី​ទស្សនកិច្ច​សិក្សា​នៅ​ឆ្នាំ​២០០៩ មាន​ចំនួន ៣.០១៨ នាក់ និង​ឆ្នាំ​២០១០ ចំនួន ៣២.៦៣៣ នាក់ ហើយ ៣១.៣៤៩ នាក់​ទៀត បាន​មក​ចូលរួម​ស្តាប់​សវនាការ សាធារណៈ​ក្នុង​សំណុំរឿង ០០១ ប្រឆាំង​នឹង​អតីត​ប្រធាន​មន្ទី​រស​-២១ កាំ​ង ហ្គេក​អ៊ាវ ហៅ ឌុ​ច ដែល​ដំណើរការ​ពី​ថ្ងៃ​ទី​៣០ ខែ​មីនា ដល់​ថ្ងៃ​ទី​២៧ ខែវិច្ឆិកា ឆ្នាំ​២០០៩ ។ 

​    ​ប្រភព​នេះ​បា​និយាយទៀតថា កម្មវិធី​ដំណើរ​ទស្សនកិច្ច​សិក្សា​របស់ អ​.​វ​.​ត​.​ក​. ចាប់ផ្តើម​សាកល្បង​ជា​លើកដំបូង​នៅ​ថ្ងៃ​ទី​១៣ ខែតុលា ឆ្នាំ​២០០៩ ហើយ​ខេត្ត​ដំបូងបង្អស់ ដែល​មាន​ប្រជាជន​មក​ចូលរួម គឺ​ខេត្ត​កំពង់ចាម ចំនួន ១០០ នាក់ ។ ខេត្ត​ចុងក្រោយបង្អស់​គឺ​ខេត្ត​មណ្ឌលគិរី ដែល​មាន​ប្រជាជន​ចំនួន ៣៩០ នាក់ មក​ចូលរួម​នៅ​ថ្ងៃ​ទី​២៣ ខែ​ធ្នូ ឆ្នាំ​២០១០ កន្លង​ទៅ​ថ្មីៗ​នេះ ។ ក្នុង​ចំណោម​ខេត្ត​ក្រុង​ទាំង​២៤ នៃ​ព្រះរាជាណាចក្រ​កម្ពុជា ខេត្ត​កណ្តាល គឺជា​ខេត្ត​ដែល​មាន​អ្នកចូលរួម ដំណើរ​ទស្សនកិច្ច​សិក្សា និង​ស្តាប់​សវនាការ​សាធារណៈ​ច្រើន​ជាង​គេ ដែល​មាន​អ្នកចូលរួម​ចំនួន ៨.១៤០ នាក់ ហើយ​ខេត្ត​ដែលមាន​អ្នកចូលរួម​តិចជាងគេ គឺ​ខេត្ត​កោះកុង ដែល​មាន​ចំនួន ២៧០ នាក់ ។ 

​    ​ដោយឡែក ដំណើ​រទស្ស​កិច្ច​សិក្សា​លើក​ចុងក្រោយ​បង្អស់​នៃ​ឆ្នាំ​២០១០ ដែល​ប្រព្រឹត្ត​ទៅ នៅ​ថ្ងៃ​ទី​៣០ ខែ​ធ្នូ​នេះ មាន​អ្នកចូលរួម​ចំនួន ៥៥០ នាក់ មកពី​ខេត្ត​ចំនួន​ពីរ​ក្នុងនោះ ៣០០ នាក់​មកពី​ខេត្ត​កំពង់ចាម និង ២៥០ នាក់​មកពី​ខេត្ត​កែប ។ ក្នុង​ដំណើរ​ទស្សនកិច្ច​សិក្សា​ថ្ងៃនេះ អ្នកចូលរួម​បាន​ទស្សនា​ខ្សែភាពយន្ត ឯកសារ ទស្សនា​សារមន្ទីរ​ឧក្រិដ្ឋកម្ម​ប្រល័យពូជសាសន៍​ទួលស្លែង និង​មាន​ឱកាស​បាន​ជួប និង​ស្តាប់​ការ​សំណេះសំណាល​របស់ លោក ក្រាញ់ តូ​នី ប្រធានការិយាល័យ​រដ្ឋ​បាល​ស្តីទី និង​ថ្នាក់ដឹកនាំ​ដទៃ ទៀត​នៃ អ​.​វ​.​ត​.​ក​. ៕

សេចក្តីថ្លែងការណ៍របស់ទីភ្នាក់ងារប្រឹក្សាយោបល់សង្គមកម្ពុជាស្តីពី ការវិត្តន៍សិទ្ធិសេរីភាពនៅកម្ពុជា

សេចក្តី​ថ្លែង​ការណ៍​របស់​ទី​ភ្នាក់​ងារ​ប្រឹក្សាយោបល់​សង្គម​កម្ពុជា​
​ស្តី​ពី​ ការវិត្តន៍សិទ្ធិ​សេរី​ភាព​នៅ​កម្ពុជា

            ផ្តើម​ចេញ​ពី​ស្ថេរភាព​នយោបាយ​ ការ​ផ្សះ​ផ្សាបង្រួប​បង្រួម​ជាតិ​ ឯកភាព​ទឹក​ដី​ បន្ទាប់ពី​​ប្រទេ​ស​​កម្ពុជា​​​​បាន​ឆ្លង​ផុត​ពី​របបប្រល័យ​ពូជ​សាសន៍​ប៉ុល​ ពត​ និង​បាន​រំ​ដោះឲ្យ​រួច​ផុត​ពី​មហាទុក្ខសោក​វិនាសកម្ម​នៃ​ការ​កាប់​សម្លាប់​ពល​រដ្ឋខ្មែរ​ នៅ​ថ្ងៃទី​៧​ ខែ​ មករា ឆ្នាំ ១៩៧៩​ មក​ ស្ថាន​ការ​ណ៍​សិទ្ធិ​មនុស្ស​នៅ​ក្នុង​ប្រទេស​កម្ពុជា​មាន​ការ​វិវត្តន៍​កាន់​តែប្រសើ​ឡើង​ពី​មួយ​ឆ្នាំ​ទៅ​មួយ​ឆ្នាំ​គួ​ឲ្យ​កត់​សម្គាល់។

                យើង​ខ្ញុំ​ ជាទី​ភ្នាក់​ងារ​ប្រឹក្សា​យោបល់​សង្គម​កម្ពុជា​ សូម​ទាញ​ចំ​ណាប់​អារម្មណ៍​សាធារណៈ​មតិ ជាតិ​និង​​អន្តរជាតិ​ ថា​ នៅ​ក្នុង​ឆ្នាំ​២០១០នេះ​ ព្រះ​រាជាណាចក្រកម្ពុជា​ បាន​និង​កំ​ពុង​ធ្វើ​ដំ​ណើរយ៉ាង​លឿង​ឆ្ពោះ​ទៅ​កាន់​ផ្លូវ​នៃ​ការ​គោរព​និង​លើក​កម្ពស់​សិទ្ធិ​សេរី​ភាព​យ៉ាង​ទូ​លំ​ទូ​លាយ​ ស្រប​តាម​គោល​ការ​ណ៍​​​ប្រជាធិបតេយ្យ​ សេរី​ពហុ​បក្ស និង​ការ​ពង្រឹង​និតិ​រដ្ឋ។

                បន្ថែម​ពី​លើ​កិច្ច​ខិត​ខំ​ប្រឹង​ប្រែង​របស់​រាជ​រដ្ឋាភិបាល​កម្ពុជា​ ក្នុង​ទស្សនៈ​វិស័យ​ដ៏ច្បាស់​លាស់​​រក្សាបាន​នូវ​សន្តិ​ភាព​ ស្ថេរ​ភាពនយោបាយ​ ​ និង​ការ​អភិ​វឌ្ឍសង្គម​ បាន​នាំឲ្យ​ប្រទេស​នេះមាន​នូវ​កិត្យានុភាព​ និង​ការ​ទំ​នាក់​ទំ​នង​កិច្ច​សហប្រតិបត្តិ​​ការណ៍បាន​យ៉ាង​ល្អ​ប្រសើ ។ លទ្ធ​ផល​វិជ្ជ​មាន​ទាំង​នេះ​​​​ផ្តើមចេញ​ពីការ​​បើកចំ​ហ នូវ​សិទ្ធិ​សេរី​ភាពជូន​​ប្រជា​ពល​រដ្ឋក្នុង​ការ​ធ្វើ​នយោបាយ​ សេដ្ឋកិច្ច សង្គម  ជំ​នឿ​សាសនា សិទ្ធិ​ក្នុង​ការ​បង្កើត​នូវ​អង្គការ សមាគម​ និង​សហជីព​នានា ជាពិ​សេសសិទ្ធិ​ក្នុង​ការ​បញ្ចេញ​មតិ​  គឺ​បាន​​បញ្ជាក់​ច្បាស់​ថា​ កម្ពុជា​បាន​និង​កំ​ពុង​គោរពយ៉ាង​ត្រឹម​ត្រូវ​តាម​ធម្មនុញ្ញ​អង្គការ​សហប្រជាជាតិ សេចក្តី​ប្រកាសស្តី​ពី​សិទ្ធិ​មនុស្ស និង​កតិកាសញ្ញា ព្រម​ទាំង​អនុសញ្ញានានា​។

                ក្រៅ​ពី​នេះ​ ពល​រដ្ឋខ្មែរ​ទាំង​ពីរភេទ​មាន​សិទ្ធិ​គ្រប់​គ្រាន់​តាម​ច្បាប់​រដ្ឋធម្ម​នុញ្ញ​ ក្នុង​ការ​ធ្វើ​កូដកម្ម​ បាតុកម្ម​ដោយ​សន្តិ​វិធី​ និង​សិទ្ធិ​ក្នុង​ការ​ការ​ពារ​ខ្លួន​តាម​ប្រព័ន្ធ​តុលាការ​។​ ពិត​ណាស់​ថា​ បើ​ទោះ​ជា​ការ​គោរព​សិទ្ធិ​មនុស្ស​នៅ​កម្ពុជា​នៅ​មាន​កង្វះ​ខាត ខ្លះៗក៏​ពិត​មែន​​ ក៏​ប៉ុន្តែ យើង​បាន​កត់​សម្គាល់​ឃើញ​ថា​ រាជ​រដ្ឋាភិបាល​ រដ្ឋសភា ព្រឹទ្ធ​សភា  ដោយ​មាន​ការ​ចូល​រួម​ពី​អង្គការ​សមាគម​ផ្សេងៗ ជឿ​ជាក់​ថា​ ដំ​ណើរ​ការ​ប្រជា​ធិ​បតេយ្យ​ និង​ការ​គោរព​សិទ្ធិ​មនុស្សនៅ​កម្ពុជា​និង​បាន​ប្រសើ​ជាង​នេះ​ថែម​ទៀត។ ​ផ្ទុយ​ពី​​ការអះ​អាង​របស់​អង្គការ​សមាគម​សិទ្ធិ​មនុស្ស​មួយ​ចំ​នួន​ ដែល​មិន​ស្ថិត​នៅ​ក្នុង​ភាព​ឯករាជ្យ​ បានធ្វើ​ការ​វាយ​តម្លៃ​ខុសពី​ការ​ពិត​ស្តី​ពី​ស្ថាន​ការ​ណ៍​សិទ្ធិ​មនុស្ស​នៅ​កម្ពុជា ដោយ​ចោទថា​សិទ្ធិ​មនុស្ស​មាន​ការ​ធ្លាក់​ចុះ​ ។ ការ​ចោទ​ប្រកាន់​បែប​នេះ​ដោយ​សារ​ពួក​គេ​ ងប់​ជ្រុប​ និង​ប្រកាន់​យក​​និន្នាការ​គាំ​ទ្រ​គណបក្ស​ប្រឆាំង​ ហើយ​ពួក​គេ​រិះ​គន់​ដើម្បី​បំ​ពេញ​ចិត្តប្រទេស​​ម្ចាស់ជំ​នួយ​តែ​ប៉ុ​ណ្ណោះ​។

                ដើម្បី​បង្ហាញ​ពី​ការ​បើក​ទូ​លាយ​នូវ​សិទ្ធិ​សេរី​ភាព​នេះ​ យើង​ខ្ញុំ​សូម​បាន​ដឹង​ថា​ នៅ​កម្ពុជា​រហូត​មក​ដល់​បច្ចុប្បន្ន​នេះ​ មាន​អង្គការ​សមាគម សហជីព​ ប្រមាណ​ជាង​៣ពាន់​ បាន​និង​កំ​ពុង​ធ្វើ​សកម្ម​ភាព​ដោយ​សេរី​នៅ​ទូទាំង​ប្រ​ទេស​ ក្រៅ​ពី​នេះ​មាន​ទាំង​សារព័ត៌មាន​  គេហទំ​ព័រ វិទ្យុ រាប់​រយ​ ថែម​ទាំង​មាន​វិទ្យុ​ និង​កាសែត​ប្រឆាំង​រដ្ឋាភិបាល​ទៀត​ផង​ ។​ ក្នុង​នោះ​ ការ​បញ្ចេញ​មតិ​យោបល់​ខ្លះ​ បាន​រំ​លោភ​ជ្រុល​ហួសព្រំ​ដែន​នៃ​ច្បាប់​ទើប​មាន​ការ​ប្តឹង​ផ្តល់​ឡើង​តុលាការ​ ដែល​សកម្ម​ភាព​ដោះ​ស្រាយ​តាម​និតិ​វិធី​ច្បាប់​ មិន​មែន​ជា​ការ​គាប​សង្កត់​ក្រុម​បរឆាំង​នោះ​ឡើយ​។

ដូច្នេះ​ យើង​ខ្ញុំ​ទាំង​អស់​គ្នា​តំណាង​ឲ្យ​ទី​ភ្នាក់​ងា​រ​ប្រឹក្សាយោបល់សង្គមកម្ពុជា សូម​ធ្វើ​ការ​​កត់​សម្គាល់​ពី​ដំ​ណើរការ​ប្រជា​ធិ​បតេយ្យ​ និង​ការ​គោរព​សិទ្ធិ​មនុស្ស​នៅ​កម្ពុជា​ ថា​ពិត​ជា​បាន​ប្រសើឡើង​ និង​សូម​សម្តែង​ការ​គាំ​ទ្រ​យ៉ាង​ពេញ​ទំ​ហឹង​ក្នុង​ការចូល​រួម​លើក​ស្ទួយ​ការ​គោរព​សិទ្ធិ​មនុស្សជា​មួយ​រាជ​រដ្ឋាភិបាល​ និង​ស្ថាប័ន​ពាក់​ព័ន្ធ​នានាដើម្បី​​​ សន្តិ​ភាព​ និង​ការ​អភិ​វឌ្ឍ​ប្រទេស​ប្រកប​ដោយ​ចី​រភាព​៕
​ធ្វើ​នៅ​រាជ​ធានី​ភ្នំ​ពេញ​ ថ្ងៃ​ទី  ៣១ ខែ​ ធ្នូ ឆ្នាំ​ ២០១០
ទី​ភ្នាក់​ងា​រប្រឹក្សា​យោបល់​សង្គម​កម្ពុជា​


          អ៊ឹង​ មល្លី​វណ្ណ

​​សេចក្តីថ្លែងការណ៏ របស់សហពន្ធ័សិទ្ធិមនុស្ស និងអភិវឌ្ឍន៏កម្ពុជា​ ស្តីពីស្ថានភាពសិទ្ធិមនុស្សឆ្នាំ ២០១០

ព្រះរាជាណាចក្រកម្ពុជា
ជាតិ ​​   សាសនា    ព្រះមហាក្សត្រ

​​សេចក្តីថ្លែងការណ៏របស់សហពន្ធ័សិទ្ធិមនុស្ស និងអភិវឌ្ឍន៏កម្ពុជា​ស្តីពីស្ថានភាពសិទ្ធិមនុស្សឆ្នាំ ២០១០      
                                                                                                              
សហពន្ធ័សិទ្ធិមនុស្ស និងអភិវឌ្ឍន៏កម្ពុជា ជាសម្ពន្ធ័អង្គការ-សមាគមក្នុងស្រុក មានអង្គការសមាគម ជាសមាជិកចំនួន ៣០ សូមធ្វើការកត់សំគាល់ស្ថានភាពសិទ្ធិមនុស្សឆ្នាំ​​​ ២០១០ នៅព្រះរាជា​ណាចក្រកម្ពុជា ដូចខាងក្រោម ។
          ស្ថានភាពសិទ្ធិមនុស្សឆ្នាំ ២០១០ នៅព្រះរាជាណាចក្រកម្ពុជា​ តាមរយៈការកត់​សំគាល់នូវ ជំហានវិជ្ជមានថ្មី ៗ ដែលបានលេចចេញពីកិច្ចខិតខំប្រឹងប្រែងរបស់រាជរដ្ឋាភិបាល​​ រដ្ឋសភា ព្រឹទ្ធសភា អង្គការសង្គមស៊ីវិលជាតិ និង អន្តរជាតិ ក្នុងការប្រយុទ្ធប្រឆាំងនឹង​អំពើរំលោភបំពានផ្នែក​​សិទ្ធិមនុស្ស​ ការ​រើស​​​​​​អើងប្រឆាំងនឹងស្ដ្រីភេទ អំពើជួញដូរ មនុស្ស អំពើធ្វើអាជីវកម្មផ្នែក​ពេស្យាកម្ម និង អំពើអាសអា​ភាស ដែលនាំអោយប៉ះពាល់ដល់សេចក្ដីថ្លៃថ្នូររបស់ស្រ្តីភេទ ។ ក្នុងនេះអាជ្ញាធរកម្ពុជាបានប្រឹងប្រែង ធានា​រ៉ាប់​​រងអោយមាន​ការគោរពសិទ្ធិមនុស្ស ដូចមានចែងក្នុងធម្មនុញ្ញ​នៃអង្គការសហប្រជាជាតិ សេចក្ដី​ប្រកាសជាសកលស្ដីពីសិទ្ធិមនុស្ស និងកតិកាសញ្ញា​​ ព្រមទាំងអនុសញ្ញា​ទាំងទ្បាយ​ទាក់ទងទៅ នឹង​សិទ្ធិមនុស្ស សិទ្ធិនារី និងសិទ្ធិកុមារ ។ ដោយបាន​ផ្តល់​ជូនប្រជាពលរដ្ឋខ្មែរ​គ្រប់រូបមាន​ភាព​ស្មើគ្នា  ចំពោះ​ មុខច្បាប់​​​ ។ ពលរដ្ឋខ្មែរមាន​សិទ្ធិការពារខ្លួន​តាមផ្លូវ​តុលាការមានសិទ្ធិសេរីភាព និង ករណី​កិច្ច ដូចគ្នាទាំងអស់ គ្មានការប្រកាន់ពូជសាសន៍ ពណ៌សម្បុរ ភេទ ភាសា ជំនឿសាសនា និន្នាការ នយោបាយ​ ដើមកំណើតជាតិ ឋានៈ សង្គម ធនធាន រឺស្ថានភាពឯទៀតទ្បើយ ។ ​

          យើងបានកត់សំគាល់ក្នុងជំហានរីកចំរើនថា ​​​ប្រជាពលរដ្ឋខ្មែរទាំងពីរភេទមានសិទ្ធិបោះឆ្នោត  និងមាន សិទ្ធិឈរឈ្មោះអោយ​គេបោះឆ្នោត ស្របតាមមាត្រាទី ៣៤ ថ្មី រដ្ឋធម្មនុញ្ញនៃ​ព្រះរាជាណាចក្រ កម្ពុជា និង ស្របតាម របបនយោបាយប្រជាធិបតេយ្យសេរីពហុបក្ស ។ លើសពីនេះប្រជាពលរដ្ឋខ្មែរ  ទាំងពីរភេទមានសិទ្ធិ ចូលរួមយ៉ាង សកម្មក្នុងជីវភាពនយោបាយ សេដ្ឋកិច្ច សង្គមកិច្ច និង វប្បធម៌ ស្របតាមមាត្រាទី ៣៥ ដែលមានចែងក្នុង រដ្ឋធម្មនុញ្ញ នៃព្រះរាជាណាចក្រកម្ពុជា។ ប្រជាពលរដ្ឋខ្មែរ ទាំងពីរភេទមានសេរីភាពបង្កើតគណបក្សនយោបាយ អង្គការមិនមែន រដ្ឋាភិបាល អង្គការសារពត័មាន  សហជីព និងចូលជាសមាជិកសហជីព ដោយទទួលបាននូវសិទ្ធិធ្វើកូដកម្ម និង បាតុកម្មដោយ​សន្ដិវិធី ដែលតម្រូវអនុវត្ដក្នុងក្របខ័ណ្ឌច្បាប់។

       ទន្ទឹមនឹងនេះ   យើងមានការផ្តោតអារម្មណ៏ខ្លាំងទៅលើការបាញ់សំលាប់ជនជាតិខ្មែរស្លូតត្រង់​ ក្រៅច្បាប់ ពីសំណាក់ទាហ៊ានសៀមក្នុងរយៈពេលកន្លងមក ដែលពួកគាត់បានចូលទៅក្នុងព្រៃក្បែរ​តំបន់ព្រំ​ដែនកម្ពុជា-ថៃ​​បណ្តាលអោយមានមនុស្សស្លាប់   និង រងរបួសជាច្រើនករណី  ទោះបីជាមាន កំណត់ទូតពី ក្រសួង ការ បរទេស  និង កិច្ចសហប្រតិបត្តិការអន្តរជាតិជាច្រើនលើក ជូនខាងភាគីថៃក៏ ដោយ ក៏ករណី​នេះបានកើត ឡើងជាបន្តបន្ទាប់គួរអោយសោគស្តាយ​ទង្វើព្រៃផ្សៃឃោរឃៅអមនុស្ស ធម៌ប្រព្រឹត្តិឡើងដោយ ទាហ៊ាន សៀមប្រឆាំងនឹងជនស្លូតត្រង់កម្ពុជាចាប់តាំងពីខែ កក្កដា ឆ្នាំ ២០០៨ រហូតដល់បច្ចុប្បន្ន ដូចជាករណីបាញ់ ប្រហារ ការធ្វើទារុណកម្ម និងការបាត់ខ្លួន។ល។ សកម្មភាពទាំង នេះជា​ទង្វើប្រឆំាងនឹង ៖
-   ធម្មនុញ្ញអង្គការសហប្រជាជាតិ ថ្ងៃទី ២៦ ខែ មិថុនា ឆ្នាំ ១៩៤៥ មាត្រា ៥៥ តំរូវអោយរដ្ឋជាភាគី គោរព និង លើកកំពស់សិទ្ធិជាសកល និង សេរីភាពជាមូលដ្ឋានរបស់មនុស្ស ។
-   សេចក្ដីប្រកាសជាសកលស្ដីពីសិទ្ធិមនុស្សថ្ងៃទី ១០ ខែ ធ្នូ ឆ្នាំ ១៩៤៨ ត្រង់មាត្រា ៥ ចែងថា គ្មានជន ណាម្នាក់ត្រូវទទួលទារុណកម្ម ឬ ប្រព្រឹត្ដកម្មកាចសាហាវឥតមនុស្សធម៌ ឬ ថោកទាបបានឡើយ 
-  កតិកាសញ្ញាអន្ដរជាតិស្ដីពីសិទ្ធិពលរដ្ឋ និង នយោបាយ មាត្រា ៦ ត្រង់កថាខណ្ឌទី ០១ ចែងថាជន គ្រប់រូបមានសិទ្ធិមានជីវិតជាប់ពីកំណើត ។ សិទ្ធិនេះត្រូវការពារដោយច្បាប់ ។ គ្មានជនណាម្នាក់ត្រូវគេ ប្រហារជីវិតតាមអំពើចិត្ដបានឡើយ ។
-  ធម្មនុញ្ញអាស៊ានមាត្រា ១ មាត្រា ២ មាត្រា ១៥  ដែលតំរូវអោយរដ្នជាសមាជិកត្រូវគោរពសិទ្ធិមនុស្ស ជាមូលដ្ឋាន ដែលក្នុងនោះប្រទេសថៃក៏ជារដ្ឋភាគីហត្ថលេខីផងដែរ ។ 

  ទោះជាស្ថានភាពសិទ្ធិមនុស្សឆ្នាំ​​​២០១០ នៅមានចំនុចខ្វះខាតខ្លះៗ ក្តី ក៏សហពន្ឋ័សិទ្ឋិមនុស្ស និង អភិវឌ្ឍន៍កម្ពុជា សូមគាំទ្រលើកទឹកចិត្តដល់ការខិតខំប្រឹងប្រែងទាំងអស់​ ចំពោះរាជរដ្ឋាភិបាល រដ្ឋសភា និង ព្រឹទ្ធសភា អង្គការមិនមែនរដ្ឋាភិបាល និង ស្ថាប័នដ៏ទៃទៀតដែលកំពុងអនុវត្តការងារក្នុង បុព្វហេតុលើកស្ទួយ សិទ្ធិមនុស្ស នៅកម្ពុជា ។
                                                      ធ្វើនៅរាជធានីភ្នំពេញ.ថ្ងៃទី ៣០   ខែ   ធ្នូ  ឆ្នាំ  ២០១០
                                      សហពន្ឋ័សិទ្ឋិមនុស្ស និងអភិវឌ្ឍន៍កម្ពុជា
                                       ប្រធាន

                                         ថៅ  វាសនា

អតីត​នាយក​រដ្ឋមន្រ្តី​ថៃ ប្រាប់​ស៊ូថេប ឲ្យ​មក​ជួប​សម្ដេច​តេជោ ដោះ​ស្រាយ​បញ្ហា​ជន​ជាតិ​ថៃ​ទាំង​៧​រូប មុន​ពេល​តុលាការ​កាត់​ក្ដី

ភ្នំពេញ លោក​បានហាន ស៊ីលប៉ាអាចារ្យ ប្រធាន​ក្រុម​ទីប្រឹក្សា​គណបក្ស​ឆាតឆៃ បាតាណា និង​ជា​អតីត​នាយក​រដ្ឋមន្រ្តី​ថៃ បាន​ប្រាប់​លោក​ស៊ូថេប​ ថងស៊ូបាន ឧបនាយក​រដ្ឋមន្រ្តី​ថៃ ឲ្យ​មក​​កាន់​ប្រទេស​​កម្ពុជា​ឲ្យ​បាន​ឆាប់ ​​ដើម្បី​ចរចា​រក​ដំណោះ​ស្រាយ​​​​ដោះ​លែង​ជន​ជាតិ​ថៃ​ទាំង​៧​នាក់​ ដែល​​ត្រូវ​បាន​​ឃុំ​​ខ្លួន​នៅ​ក្នុង​ពន្ធនាគារ​ប្រទេស​កម្ពុជា។
លោក​ស៊ីលប៉ាអាចារ្យ បាន​លើក​ឡើង​ថា លោក​ស៊ូថេប គួរ​មក​កាន់​ប្រទេស​កម្ពុជា​ឲ្យ​បាន​ឆាប់​ដើម្បី​ជួប​ចរចា​ដោយ​ផ្ទាល់ជាមួយ​សម្ដេច​តេជោ ហ៊ុន សែន នាយក​រដ្ឋមន្រ្តី​​នៃ​ព្រះ​​រា​ជា​ណា​ចក្រ កម្ពុជា អំពី​ករណី​ដោះ​លែង​ជន​ជាតិ​ថៃ​ទាំង​៧​នាក់​នោះ។ លោក​ស៊ីលប៉ាអាចារ្យ បាន​ថ្លែង​ទៀត​ថា ការ​ជួប​ចរចា​នេះ គួរ​តែ​ត្រូវ​បាន​ធ្វើ​ឡើង​មុន​ពេល​ដែល​តុលាការ​ក្រុង​ភ្នំពេញ កាត់​ក្ដី​ករណី​ជន​ជាតិ​​​ថៃ​ទាំង​៧​រូប​​នោះ ហើយ​បើ​កាន់​តែ​ឆាប់​គឺ​កាន់​តែ​ប្រសើរ។

ជន​ជាតិ​ថៃ​ទាំង​៧​រូប​នោះ ត្រូវ​បាន​តុលាការ​ក្រុង​ភ្នំពេញ ចោទ​ប្រកាន់​ពី​បទ​ឆ្លង​ដែន​ចូល​ដោយ​ទុច្ចរិត​ក្នុង​ទីលាន​យោធា និង​ពី​បទ​ឆ្លង​ដែន​ចូល​មក​ប្រទេស​កម្ពុជា​ដោយ​គ្មាន​ច្បាប់ ហើយ​ត្រូវ​បាន​ឃុំ​ខ្លួន​នៅ​ពន្ធនាគារ​ព្រៃ​ស​នៅ​ថ្ងៃ​ទី​៣០ ខែ​ធ្នូ​នេះ។
លោក​កាស៊ីត ភិរម្យ រដ្ឋមន្រ្តី្ក​ក្រសួង​ការ​បរទេស​កម្ពុជា បាន​ជួប​ចរចា​រក​ដំណោះ​ស្រាយ​ពី​បញ្ហា​នេះ​ជាមួយ​លោក​ឧបនាយក​រដ្ឋមន្រ្តី ហោ ណាំហុង រដ្ឋមន្រ្តី​ក្រសួង​ការ​បរទេស​និង​កិច្ច​សហ ប្រតិបត្តិការ​អន្តរជាតិ​កម្ពុជា ប៉ុន្តែ​មិន​មាន​ផល​វិជ្ជមាន​អ្វី​នោះ​ទេ គឺ​បាន​ត្រឹម​​តែ​ទុក​លទ្ធភាព​ឲ្យ​តុលា ការ​ជា​អ្នក​សម្រេច​តែ​ប៉ុណ្ណោះ ពីព្រោះ​កម្ពុជា​ជា​ប្រទេស​នីតិរដ្ឋ មិន​អាច​បុគ្គល​ណា​ម្នាក់​រំលោភ​ច្បាប់ កម្ពុជា​បាន​នោះ​ទេ៕

ថៃ​បន្ថែម​កម្លាំង​ក្រាស់ក្រែល​នៅ​ចំណុច​បង្គោល​លេខ​៤៦ ចាំ​ទប់​បាតុករ​អាវ​លឿង

ភ្នំពេញ ៖ មេ​បញ្ជា​កង​យោធពល​ខេមរ​ភូមិន្ទ ប្រចាំ​នៅ​ច្រក​ណង​ចាន់ បាន​ឲ្យ​ដឹង​ថា កង​ទ័ព​ថៃ​​បាន​​បន្ថែម​កម្លាំង​មក​ចំណុច​លេខ​៤៦ ដែល​ជា​ចំណុច​ទីតាំង​ចាប់​ខ្លួន​ជន​ជាតិ​ថៃ​៧​រូប។ ការ​បន្ថែម កម្លាំង​របស់​ពួក​គេ ត្រូវ​បាន​មេ​ទ័ព​ថៃ​ប្រាប់​ថា ដើម្បី​ទប់​ស្កាត់​មេ​បាតុករ​អាវ​លឿង ដែល​គ្រោង​មក​តវ៉ា នៅ​ចំណុច​នេះ។
មេ​បញ្ជា​ការ​រូប​នេះ​​បាន​បន្ថែម​ទៀត​ថា កង​ទ័ព​ថៃ​បាន​ផ្ដល់​ព័ត៌មាន​ថា ក្រុម​បាតុករ​អាវ​លឿង គេ​គ្រោង​មក​តវ៉ា​គឺ​មាន​គ្នា​ប្រមាណ​ជាង​១​ពាន់​នាក់ ដើម្បី​ប្រឆាំង​នឹង​ការ​ចាប់​ខ្លួន​បក្ខ​ពួក​របស់​គេ នៅ​ចំណុច​ខាង​លើ។ ប៉ុន្តែ​យ៉ាង​ណា​ក៏​ដោយ កង​ទ័ព​ទាំង​ពីរ​បាន​សហការ​គ្នា​ល្អ​ថា សូម​កុំ​ឲ្យ​មាន​ការ​ប្រឈម​មុខ​គ្នា ព្រោះ​ការ​បន្ថែម​កម្លាំង​ទ័ព​ថៃ គឺ​ដើម្បី​ទប់​ស្កាត់​កម្លាំង​បាតុករ​តែ​ប៉ុណ្ណោះ។
ដោយ​ឡែក​នៅ​វេលា​ម៉ោង​១០​និង​៣០​នាទី​មុន​នេះ មេ​បញ្ជា​ការ​ភូមិ​ភាគ​៥​របស់​កម្ពុជា និង​មេ បញ្ជា​ការ​ភូមិ​ភាគ​១​របស់​ថៃ បាន​ជួប​ប្រជុំ​គ្នា​នៅ​ចំណុច​ច្រក​ប៉ោយ​ប៉ែត បន្ទាប់​មក​ក៏​បាន​ឯកភាព​គ្នា ថា នឹង​ចុះ​ទៅ​ដល់​ចំណុច​នោះ​ទាំង​អស់​គ្នា។ រហូត​មក​ដល់​ម៉ោង​១១​និង​៣០​នាទី​នេះ ក្រុម​បាតុករ អាវ​លឿង​មិន​ទាន់​មក​ដល់​ចំណុច​ព្រំដែន​តាម​ការ​គ្រោង​ទុក​របស់​គេ​នៅ​ឡើយ​ទេ។ ប៉ុន្តែ​តាម​ព័ត៌មាន គេ​បា្រប់​ថា ពួក​គេ​អាច​នឹង​មក​ដល់​នៅ​ចន្លោះ​ម៉ោង​១២​ថ្ងៃ​ត្រង់ ឬ​អាច​ដល់​ម៉ោង​១​និង​៣០​នាទី​រសៀល ថ្ងៃ​ទី​៣១ ខែ​ធ្នូ​នេះ។
គួរ​បញ្ជាក់​ថា ចំណុច​ច្រក​ព្រំដែន​របៀង​ទាំង​៣ រវាង​កម្ពុជា-ថៃ នៅ​តែ​បន្ត​បិទ​ជា​ដដែល ដោយ មិន​ទាន់​មាន​ដំណើរ​ការ​ចេញ​ចូល​នៅ​ឡើយ​នោះ​ទេ៕

ទាហាន​ថៃ​បាន​​ដំឡើង​​សាច់ដុំ​​​កម្លា​​​បរិ​យាកាស​នៅក្នុងទឹកដី​​របស់គេ ខេត្តស្រះ​កែវ ទល់មុខ​កន្លែង​​ចាប់ពលរដ្ឋ​​ថៃ​៧​នាក់

​​ខេត្តបន្ទាយមានជ័យ​ ៖ ​ស្ថានភាព​យោធា​នៅ​​​តាម​តំបន់ព្រំដែន​​​ក្នុង​ខេត្ត​ស្រះកែវ ប្រទេស​ថៃ ​មានការ​ប្រែប្រួល​​បន្តិច ដោយ​សារ​​​កង​ទ័ព​ថៃ ​នៅក្នុង​​បន្ទាយ​​របស់គេ​​មាន​ការហ្វឹកហាត់​​​ទាហាន​ញឹកញាប់​​ និង​បើក​​រថពាសដែក រថ​ក្រោះ​ចេញ-ចូល រោទិ៍​បង្កើន​​សម្លេង​ខ្លាំងៗ កំដៅ​សាច់​ដុំ ​ហាក់​​កម្លា​បរិយាកាស​កាលពីថ្ងៃទី​​៣០ ធ្នូ ​​២០១០ កន្លង​មក​នេះ ប៉ុន្តែ​​​សំរាប់​​កង​ទ័ព​កម្ពុជា​​ដែល​ស្ថិត​នៅ​​ទល់មុខ​គ្នា​​​​ក្នុងខេត្ត​បន្ទាយ​មានជ័យ គិត​ថា នេះជារឿង​​ធម្មតា​...​​អ្នក​ឯង​​ធ្វើ​អ្វី​​ធ្វើ​ទៅ​នៅក្នុងទឹក​ដីរបស់អ្នក​ឯង​ ។​
​មន្ត្រីជាន់់ខ្ពស់​​យោធាកម្ពុជា លោក​ជា តារា ​អគ្គមេ​បញ្ជា​​ការរង​នៃ​កង​យោ​ធពលខេមរ​ភូមិន្ទ បាន​មាន​​ប្រសាសន៍​​ថា លោកទទួលដំណឹង​​​ថា កង​ទ័ព​ថៃ​​បាន​ចល័ត​ទ័ព​នៅ​ក្នុងទឹកដី​​របស់គេ​ពិត​មែន ប៉ុន្តែ​​នៅតាម​បណ្តោយ​ព្រំដែន​​ខេត្ត​ព្រះ​វិហារ​​មាន​ស​ភាពធម្មតា​ទេ យើងតែង​តែ​ធ្វើការ​​ទំនាក់ទំនង​គ្នាទៅវិញ​ទៅមក ហើយ​​បើ​និយាយ​​ពី​កាតព្វ​កិច្ច​ការពារ​ទឹកដី​​វិញ ​យើង​មិន​​​​ធ្វេស​ប្រហែស​ទេ ។
លោកឈូក អាង​​ មេបញ្ជា​ការ​​ប៉ូលិស​​ការ​ពារ​ព្រំដែន​គោក​វរសេនាតូច​លេខ​៩១១ បាន​ឱ្យ​​ដឹង​ថា ​ខាង​កង​ទ័ព​ថៃ​មិន​មានការ​បង្កើន​​កំលាំង​​អ្វីទ ​ចាប់​ពី​​ខ្សែ​បន្ទាត់ព្រំដែន​​ទល់មុខ​​ប៉ោយប៉ែត​​រហូត​ដល់ច្រក​​ទ្វារ​បឹង​ត្រកួន​ ស្រុក​ថ្មពួក ​គ្រាន់​តែ​​មានការ​​ផ្លាស់ប្តូរ​ទ័ព​​ខ្លះៗ និង​ធ្វើការ​ហ្វឹក​​ហាត់​​ញឹកញាប់​​ក្នុងទឹកដី​របស់​គ ដោយ​មាន​​ប្រើ​​រថ​ពាស​ដែក​ និង​រថ​ក្រោះ​ខ្វាត់​ខ្វែង​ផងដែរ​ ​រីឯ​កំលាំង​​ទ័ព​​ខាងកម្ពុជាវិញ​ នៅ​តែការពារ​ទឹក​ដី​​​ម៉ឺង​​ម៉ាត់​​​ដដែល ។​
លោកអនុសេនីយ៍​​​ជិន សុផល ​នាយ​រង​​ប៉ុស្តិ៍​​ការពារព្រំដែន វរសេនាតូច​​លេខ​​៩១១ ​បាន​និយាយ​ថា ​ម្សិល​មិញ​​​ឃើញនៅក្នុងទឹកដី​ថៃ ​ក្រុម​ទាហាន​​ថៃ​​បានបើក​​រថ​ពាស​ដែក​​៣គ្រឿង ​​​មក​កាន់​​ខ្សែ​ត្រៀម​​​ជួរ​មុខ​​​នៃបន្ទាត់​​​ព្រំដែន ប៉ុន្តែ​​​ថ្ងៃ​នេះ​​ឃើញ​​ដក​ទៅវិញ​​១គ្រឿង​​ហើយ ។ ​
ចំណែក​​លោក​នាក់ វង្ស ​មេ​បញ្ជា​ការ​​រង និង​​នាយសេនាធិការ​​កង​ពល​តូចថ្មើរ​​ជើង​លេខ​៤២ បាន​ឱ្យ​​ដឹង​ថា ​​នៅ​តាម​ខ្សែ​បន្ទាត់ព្រំដែន​ខេត្ត​ឧត្តរ​មានជ័យ​​ឯណោះ​វិញ ​ចាប់ពី​តំបន់​មុំ​៣ រហូត​​ដល់​ប្រាសាទ​​តា​មាន់ធំ ជួរ​ភ្នំដង​រែក ស្ថាន​ភាពយោធារវាង​កម្ពុជា​-​​ថៃ ​មិនមាន​ភាពតានតឹង​​កើតឡើង​ទេ បន្ទាប់ពីមាន​ការ​ចាប់ខ្លួន​ពលរដ្ឋថៃ​៧​នាក់​​បញ្ជូន​​​មកកាន់រាជធានី​ភ្នំពេញ​រួចមក ​ពោល​គឺ​​ការ​ទំនាក់​ទំនង​​នៅល្អ​​ធម្មតា ៕