Wednesday, December 29, 2010

ជន​ជាតិ​​សៀម​៧​នាក់​នឹង​ត្រូវ​មក​ដល់​រាជ​ធានី​ភ្នំពេញ​ពាក់​កណ្តាល​អធ្រាត្រ

ជន​ជាតិ​ថៃ​៧​នាក់​ជា​ក្រុម​បាតុ​ករ​អាវ​លឿង​ដែល​ទាហាន​ការ​ពារ​ព្រំ​ដែន​កម្ពុជា​ចាប់​ឃាត់​ខ្លួន​នៅ​ក្នុង​ទឹក​ដី​​កម្ពុជា ខណៈ​ពួក​គេ​ចូល​មក​វាស់​វែង​លុក​លុយ​នោះ​ត្រូវ​បាន​បញ្ជូន​មក​កាន់​រាជ​ធានី​ភ្នំពេញ​ហើយ​ដើម្បី​ប្រគល់​ឱ្យ​រដ្ឋា​ភិបាល​ចាត់​ការ​តាម​ផ្លូវ​ច្បាប់។ ជន​ជាតិ​សៀម​៧​នាក់​នេះ​ត្រូវ​បាន​បញ្ជូន​ពី​ព្រំ​ដែន​អូរ​បីជាន់ មក​កាន់​ស្នង​ការ​ដ្ឋាន​ខេត្ត​បន្ទាយ​មាន​​ជ័យ រួច​ហើយ​បញ្ជូន​បន្ត​មក​កាន់​រាជ​ធានី​ភ្នំពេញ​តាម​រយៈ​រថយន្ត​របស់​ស្នង​ការ​ដ្ឋាន​ខេត្ត​កាល​ពី​វេលា​ម៉ោង​៥​​និង​៣០​នាទី​ល្ងាច ថ្ងៃ​ទី​២៩ ធ្នូ ២០១០ ដោយ​យោង​តាម​ចំណាត់​ការ​របស់​ថ្នាក់​លើ... ពួក​សៀម​ទាំង​៧​នាក់​នេះ​តាម​ប្រភព​ព័ត៌​មាន​ថា មាន​សមា​ជិក​សភា​២​នាក់​ផង​ដែរ ហើយ​ពួក​គេ​ទំនង​នឹង​មក​ដល់​ភ្នំពេញ​នៅ​វេលា​ពាក់​កណ្តាល​អធ្រាត្រ​ថ្ងៃ​ដដែល រង់​ចាំ​ការ​ជំនុំ​ជំរះ​​​ឆាប់​ៗនេះ។ មុន​នេះ​បន្តិច សម្តេច​តេជោហ៊ុន សែន ​នាយករដ្ឋមន្ត្រី​​ បានប្រកាស​ថា សមត្ថ​កិច្ច​​ការពារព្រំដែន​​ និងអាជ្ញាធរ​​ដែនដី ត្រូវ​តែនាំ​​ជន​ជាតិ​​ថៃ​​៧​នាក់​​ ជាក្រុម​​អាវលឿង ​ដែលចាប់បាន​​នៅ​ឯព្រំដែន​​​ក្នុងទឹកដី​កម្ពុជា​នោះឡើង​តុលាការ​​ឱ្យ​​ខាង​តែ​បាន ​ព្រោះជា​​កំហុស​​របស់ពួកគេ​​​ហ៊ាន​​រំលោភ​​​​អធិបតេយ្យ​ភាព​​​របស់​កម្ពុជា។​
សម្តេច​​តេជោនាយករដ្ឋ​មន្ត្រី​​​បានដាក់​​បន្ទុក​​បែបនេះ​​ក្នុង​​ឱកាស​អញ្ជើញ​​ជាអធិបតី​​​​ដ៏ខ្ពង់ខ្ពស់​​ក្នុងពិធី​​​បិទសន្និបាត​​បូកសរុប​​ការងារ​ក្រសួង​អភិ​វឌ្ឍន៍​​ជនបទ​ឆ្នាំ​​២០១០ និង​លើក​ទិសដៅ​​ឆ្នាំ​​២០១១ ​កាលពីរសៀលថ្ងៃទី​​​២៩ ធ្នូ ​២០១០ ​នៅ​​សាល​សន្និសីទ​​ចតុមុខ ​ដោយ​មាន​មន្ត្រីជាន់​ខ្ពស់​​​​រដ្ឋាភិបាល ​​តំណាង​អង្គការ​ជាតិ​-អន្តរជាតិ ​មន្ត្រី​ស្ថានទូត​​ចូលរួមយ៉ាង​​ច្រើនកុះករ ។​ ការចាប់​បាន​​ក្រុមអាវ​លឿង​​ជនជាតិថៃ​​៧​នាក់ ក្នុងនោះ​​មានសមាជិក​​សភា​​២​នាក់ផង ត្រូវបាន​​សម្តេច​តេជោ​​ហ៊ុន សែន ​សង្កត់ធ្ងន់​ថា ​រឿង​ប្រព្រឹត្ត​​​ខុសច្បាប់​​​លុកលុយទឹក​ដីគេនេះ ​បើ​ទោះ​​ជាមាន​​អន្តរាគមន៍​​​សុំ​ឱ្យ​ដោះ​លែង​សមាជិក​​សភាថៃ​២នាក់​នោះ​ក៏ដោយ ​ក៏​យើង​​​មិនអាច​ជួយបាន​​ដែរ ព្រោះ​​ពួកគេ​​យករឿង​ខុស​មក​ជា​មួយ​...។ សម្តេច​តេជោ​​លើកឡើង​ថា ​បើដោះ​លែង​​​​២នាក់ តើ​៥​នាក់​ទៀតគិត​យ៉ាងម៉េច? ព្រោះ​ពួកគេ​បង្ក​កំហុស​​ដូចគ្នា​...។
សម្តេច​នាយករដ្ឋ​មន្ត្រី​​ខ្មែរ ដែលធ្លាប់​​​ព្រមាន​​ដោយពាក្យ​សំដី​ថា ​អ្នកឯង​ហ៊ាន​​ចូលយើង​បាញ់! អ្នក​ឯក​​ចង់​ងាប់​ចូលម៉ោ! កាល​ជម្លោះ​​នៅ​ឯ​​តំបន់ព្រំដែន​​វាល​ឥន្ទ្រី​ និង​ភ្នំ​ទ្រព្យ​នោះ ឥឡូវ​បាន​បញ្ជាក់​ថា ​​ពិត​មែន​​តែ​អ្នកឯង​​ជា​សមាជិក​សភា​ថៃ...ប៉ុន្តែ​​​​សមាជិក​សភា​ថៃ មាន​អភ័យ​ឯកសិទ្ធិ​​តែនៅក្នុង​ទឹកដី​​ថៃ​ប៉ុណ្ណោះ អ្នកឯង​គ្មាន​​អភ័យ​​ឯក​សិទ្ធិ​​នៅក្នុងទឹក​ដីកម្ពុជា​ទេ​...​អ្នក​ឯង​​​ចូលក្នុង​ទឹកដី​កម្ពុជា​​ខុសច្បាប់ ​នាំ​រឿង​ខុស​ច្បាប់​​មក​ជា​មួយ​ទៀត ដូច្នេះ​​បន្ទុក​កាន់តែ​​ធ្ងន់​ហើយ​...​ត្រូវ​​តែ​ឃាត់​ខ្លួន​​​កសាង​​សំណុំរឿង​​បញ្ជូនទៅ​តុលាការ​​ជំនុំជំរះ​តាម​​នីតិវិធី ។​
សម្តេច​​នាយក​រដ្ឋ​មន្ត្រី​​ហ៊ុន សែន ​បានថ្លែង​ថា ការចាប់ខ្លួន​​ជនជាតិថៃ​​៧​នាក់ ​រួម​ទាំង​សមាជិក​​សភា​២នាក់​​ផងនោះ ​ដែលពួកគេ​មក​​វាស់​វែង​​ដី​​គ្មានការអនុញ្ញាត​​​ គ្មានកិច្ច​សហ​ការ​​​ក្នុងទឹក​​ដីប្រទេស​​កម្ពុជា​នេះ ​វាមិនបង្ក​ឱ្យ​មាន​ភាព​កករល្អក់ផ្នែកទំនាក់ទំនង និង​ការទូត​អ្វី​​នោះទេ គឺ​​កម្ពុជា​អនុវត្ត​ច្បាប់​​របស់​កម្ពុជា​​តែ​ប៉ុណ្ណោះ ។ សូម​បញ្ជាក់​ថា ក្រុមជ្រុល​និយម​អាវលឿង ​សៀម​៧​នាក់​​នេះមាន​ស្រី​២ ប្រុស​៥ ត្រូវបាន​​កំលាំង​​សមត្ថកិច្ច​​ជួរមុខបន្ទាត់ព្រំដែន​​ភូមិសាស្ត្រ​​​​ឃុំ​អូរបីជាន់ ស្រុកអូរជ្រៅ​​ធ្វើការ​​ឃាត់ខ្លួន​​ ខណៈ​ពេល​​គេបាន​​ចូលមក​ធ្វើការ​​វាស់វែង​ក្នុង​​ទឹ​កដី​​កម្ពុជា​​​​ដោយខុសច្បាប់​​​កាលពីវេលាម៉ោង​​១០​និង​​៣០​​នាទីព្រឹក​ថ្ងៃទី​​២៩ ធ្នូ ​២០១០ ។ ក្រុម​​អា​វលឿងមួយក្រុម​​នេះគឺ​ដឹកនាំ​ដោយ​​ឈ្មោះ​​វីរៈ​ ស៊ុម​ខ្វាមឃីត ហៅ​វិរៈ​​ក្បាល​តូច មេ​ក្រុម​​អាវ​លឿងសៀម ព្រមទាំង​​៦​នាក់​​​ផ្សេង​​ទៀត  ហើយ​​ក្នុង​ចំណោម​​​​នេះមាន​សមាជិក​​សភា​​២នាក់​​ផង​ដែរ ។ ចំណែក​​​អ្នក​រួមដំណើរ​​​​បង្ករឿង​​​​៦​នាក់​ទៀត​ គឺ​១-​ឈ្មោះ​​តាយ ណៃ ភេទ​ប្រុស អាយុ​​៣៤​ឆ្នាំ ​២-​ឈ្មោះ​​ផាន ​លីត​វិគីតសែត ភេទ​ប្រុស ​អាយុ​​៤៧​ឆ្នាំ ​ជា​សមាជិក​​សភា​​ភូថៃ​រ៉ាត់​សាដន ក្រុង​ថែប ៣-​ឈ្មោះ​​កត់​ផុន​ផន​ឈឺ​ឆាក់​សេរី​​​មុនស្រ៊ី ​ភេទ​​ស្រី អាយុ​​៤៨​ឆ្នាំ ​៥-​ឈ្មោះ​ឡាត ​ទ្រី​ភិផាក​ណា​ផៃ ភេទ​ស្រី​​ អាយុ​​៥០​ឆ្នាំ ​៦-​ឈ្មោះ​​លឿ ទ្រី​សែម​ឌីន លើ​តបុត​ ភេទ​ប្រុស អាយុ​​​៥៧​ឆ្នាំ ជា​​លេខា​ធិការ​បក្ស​​​អាវ​លឿង ។ ក្រៅពី​​ការឃាត់ខ្លួន​ក្រុមជ្រុល​​និយម​​មួយ​ក្រុមនេះ កំលាំង​​ការពារ​ព្រំដែន​​ជួរ​មុខ ​ដក​ហូត​បាន​ម៉ាស៊ីន​ថត​ចំនួន​​​៤គ្រឿង និង​​សំភារ​មួយ​ចំនួន ។ ​ពួកគេ​​ទាំង​​៧​នាក់​​បាន​លួច​ចូលមក​ទឹកដីកម្ពុជា នៅ​ចំណុច​បង្គោល​ឡាក់​​លេខ​៤៦​ ស្ថិត​​​​ក្នុង​ភូមិ​​​ជោគជ័យ​​​ ឃុំ​អូរបីជាន់ ស្រុកអូរ​ជ្រៅ ​​ខេត្ត​​បន្ទាយមានជ័យ គឺ​ឆ្លង​​ហួស​​ចូល​មក​ទឹកដីកម្ពុជា ​​ដោយ​គ្មាន​ការ​​អនុញ្ញាត​​​ និង​ផ្តល់​​ព័ត៌​មាន​​ឱ្យស​មត្ថ​កិច្ច​​ ឬអាជ្ញាធរ​​ខ្មែរឡើយ 

សម្តេច​តេជោហ៊ុន សែន ៖​ ត្រូវតែ​​នាំ ខ្លួន​ជនជាតិ​ថៃ​៧​នាក់​​ដែល​​មានសមាជិក​​សភា​​២នាក់ឡើងតុលាការ

រាជធានីភ្នំពេញ ៖ សម្តេច​តេជោហ៊ុន សែន ​នាយករដ្ឋមន្ត្រី​​ បានប្រកាស​ថា សមត្ថ​កិច្ច​​ការពារព្រំដែន​​ និងអាជ្ញាធរ​​ដែនដី ត្រូវ​តែនាំ​​ជន​ជាតិ​​ថៃ​​៧​នាក់​​ ជាក្រុម​​អាវលឿង ​ដែលចាប់បាន​​នៅ​ឯព្រំដែន​​​ក្នុងទឹកដី​កម្ពុជា​នោះឡើង​តុលាការ​​ឱ្យ​​ខាង​តែ​បាន ​ព្រោះជា​​កំហុស​​របស់ពួកគេ​​​ហ៊ាន​​រំលោភ​​​​អធិបតេយ្យ​ភាព​​​របស់​កម្ពុជា ។​ សម្តេច​​តេជោនាយករដ្ឋ​មន្ត្រី​​​បានដាក់​​បន្ទុក​​បែបនេះ​​ក្នុង​​ឱកាស​អញ្ជើញ​​ជាអធិបតី​​​​ដ៏ខ្ពង់ខ្ពស់​​ក្នុងពិធី​​​បិទសន្និបាត​​បូកសរុប​​ការងារ​ក្រសួង​អភិ​វឌ្ឍន៍​​ជនបទ​ឆ្នាំ​​២០១០ និង​លើក​ទិសដៅ​​ឆ្នាំ​​២០១១ ​កាលពីរសៀលថ្ងៃទី​​​២៩ ធ្នូ ​២០១០ ​នៅ​​សាល​សន្និសីទ​​ចតុមុខ ​ដោយ​មាន​មន្ត្រីជាន់​ខ្ពស់​​​​រដ្ឋាភិបាល ​​តំណាង​អង្គការ​ជាតិ​-អន្តរជាតិ ​មន្ត្រី​ស្ថានទូត​​ចូលរួមយ៉ាង​​ច្រើនកុះករ ។​
ការចាប់​បាន​​ក្រុមអាវ​លឿង​​ជនជាតិថៃ​​៧​នាក់ ក្នុងនោះ​​មានសមាជិក​​សភា​​២​នាក់ផង ត្រូវបាន​​សម្តេច​តេជោ​​ហ៊ុន សែន ​សង្កត់ធ្ងន់​ថា ​រឿង​ប្រព្រឹត្ត​​​ខុសច្បាប់​​​លុកលុយទឹក​ដីគេនេះ ​បើ​ទោះ​​ជាមាន​​អន្តរាគមន៍​​​សុំ​ឱ្យ​ដោះ​លែង​សមាជិក​​សភាថៃ​២នាក់​នោះ​ក៏ដោយ ​ក៏​យើង​​​មិនអាច​ជួយបាន​​ដែរ ព្រោះ​​ពួកគេ​​យករឿង​ខុស​មក​ជា​មួយ​...។ សម្តេច​តេជោ​​លើកឡើង​ថា ​បើដោះ​លែង​​​​២នាក់ តើ​៥​នាក់​ទៀតគិត​យ៉ាងម៉េច? ព្រោះ​ពួកគេ​បង្ក​កំហុស​​ដូចគ្នា​...។
សម្តេច​នាយករដ្ឋ​មន្ត្រី​​ខ្មែរ ដែលធ្លាប់​​​ព្រមាន​​ដោយពាក្យ​សំដី​ថា ​អ្នកឯង​ហ៊ាន​​ចូលយើង​បាញ់! អ្នក​ឯក​​ចង់​ងាប់​ចូលម៉ោ! កាល​ជម្លោះ​​នៅ​ឯ​​តំបន់ព្រំដែន​​វាល​ឥន្ទ្រី​ និង​ភ្នំ​ទ្រព្យ​នោះ ឥឡូវ​បាន​បញ្ជាក់​ថា ​​ពិត​មែន​​តែ​អ្នកឯង​​ជា​សមាជិក​សភា​ថៃ...ប៉ុន្តែ​​​​សមាជិក​សភា​ថៃ មាន​អភ័យ​ឯកសិទ្ធិ​​តែនៅក្នុង​ទឹកដី​​ថៃ​ប៉ុណ្ណោះ អ្នកឯង​គ្មាន​​អភ័យ​​ឯក​សិទ្ធិ​​នៅក្នុងទឹក​ដីកម្ពុជា​ទេ​...​អ្នក​ឯង​​​ចូលក្នុង​ទឹកដី​កម្ពុជា​​ខុសច្បាប់ ​នាំ​រឿង​ខុស​ច្បាប់​​មក​ជា​មួយ​ទៀត ដូច្នេះ​​បន្ទុក​កាន់តែ​​ធ្ងន់​ហើយ​...​ត្រូវ​​តែ​ឃាត់​ខ្លួន​​​កសាង​​សំណុំរឿង​​បញ្ជូនទៅ​តុលាការ​​ជំនុំជំរះ​តាម​​នីតិវិធី ។​
សម្តេច​​នាយក​រដ្ឋ​មន្ត្រី​​ហ៊ុន សែន ​បានថ្លែង​ថា ការចាប់ខ្លួន​​ជនជាតិថៃ​​៧​នាក់ ​រួម​ទាំង​សមាជិក​​សភា​២នាក់​​ផងនោះ ​ដែលពួកគេ​មក​​វាស់​វែង​​ដី​​គ្មានការអនុញ្ញាត​​​ គ្មានកិច្ច​សហ​ការ​​​ក្នុងទឹក​​ដីប្រទេស​​កម្ពុជា​នេះ ​វាមិនបង្ក​ឱ្យ​មាន​ភាព​កករល្អក់ផ្នែកទំនាក់ទំនង និង​ការទូត​អ្វី​​នោះទេ គឺ​​កម្ពុជា​អនុវត្ត​ច្បាប់​​របស់​កម្ពុជា​​តែ​ប៉ុណ្ណោះ ។
សូម​បញ្ជាក់​ថា ក្រុមជ្រុល​និយម​អាវលឿង ​សៀម​៧​នាក់​​នេះមាន​ស្រី​២ ប្រុស​៥ ត្រូវបាន​​កំលាំង​​សមត្ថកិច្ច​​ជួរមុខបន្ទាត់ព្រំដែន​​ភូមិសាស្ត្រ​​​​ឃុំ​អូរបីជាន់ ស្រុកអូរជ្រៅ​​ធ្វើការ​​ឃាត់ខ្លួន​​ ខណៈ​ពេល​​គេបាន​​ចូលមក​ធ្វើការ​​វាស់វែង​ក្នុង​​
ទឹ​កដី​​កម្ពុជា​​​​ដោយខុសច្បាប់​​​កាលពីវេលាម៉ោង​​១០​និង​​៣០​​នាទីព្រឹក​ថ្ងៃទី​​២៩ ធ្នូ ​២០១០ ។ ក្រុម​​អា​វលឿងមួយក្រុម​​នេះគឺ​ដឹកនាំ​ដោយ​​ឈ្មោះ​​វីរៈ​ ស៊ុម​ខ្វាមឃីត ហៅ​វិរៈ​​ក្បាល​តូច មេ​ក្រុម​​អាវ​លឿងសៀម ព្រមទាំង​​៦​នាក់​​​ផ្សេង​​ទៀត  ហើយ​​ក្នុង​ចំណោម​​​​នេះមាន​សមាជិក​​សភា​​២នាក់​​ផង​ដែរ ។ ចំណែក​​​អ្នក​រួមដំណើរ​​​​បង្ករឿង​​​​៦​នាក់​ទៀត​ គឺ​១-​ឈ្មោះ​​តាយ ណៃ ភេទ​ប្រុស អាយុ​​៣៤​ឆ្នាំ ​២-​ឈ្មោះ​​ផាន ​លីត​វិគីតសែត ភេទ​ប្រុស ​អាយុ​​៤៧​ឆ្នាំ ​ជា​សមាជិក​​សភា​​ភូថៃ​រ៉ាត់​សាដន ក្រុង​ថែប ៣-​ឈ្មោះ​​កត់​ផុន​ផន​ឈឺ​ឆាក់​សេរី​​​មុនស្រ ​ភេទ​​ស្រី អាយុ​​៤៨​ឆ្នាំ ​៥-​ឈ្មោះ​ឡាត ​ទ្រី​ភិផាក​ណា​ផៃ ភេទ​ស្រី​​ អាយុ​​៥០​ឆ្នាំ ​៦-​ឈ្មោះ​​លឿ ទ្រី​សែម​ឌីន លើ​តបុត​ ភេទ​ប្រុស អាយុ​​​៥៧​ឆ្នាំ ជា​​លេខា​ធិការ​បក្ស​​​អាវ​លឿង ។ ក្រៅពី​​ការឃាត់ខ្លួន​ក្រុមជ្រុល​​និយម​​មួយ​ក្រុមនេះ កំលាំង​​ការពារ​ព្រំដែន​​ជួរ​មុខ ​ដក​ហូត​បាន​ម៉ាស៊ីន​ថត​ចំនួន​​​៤គ្រឿង និង​​សំភារ​មួយ​ចំនួន ។ ​ពួកគេ​​ទាំង​​៧​នាក់​​បាន​លួច​ចូលមក​ទឹកដីកម្ពុជា នៅ​ចំណុច​បង្គោល​ឡាក់​​លេខ​៤៦​ ស្ថិត​​​​ក្នុង​ភូមិ​​​ជោគជ័យ​​​ ឃុំ​អូរបីជាន់ ស្រុកអូរ​ជ្រៅ ​​ខេត្ត​​បន្ទាយមានជ័យ គឺ​ឆ្លង​​ហួស​​ចូល​មក​ទឹកដីកម្ពុជា ​​ដោយ​គ្មាន​ការ​​អនុញ្ញាត​​​ និង​ផ្តល់​​ព័ត៌​មាន​​ឱ្យស​មត្ថ​កិច្ច​​ ឬអាជ្ញាធរ​​ខ្មែរឡើយ ៕

សម្ដេច ហ៊ុន សែនៈ បើដីថៃ​ធ្វើសកម្ម​ភាព​តាម​ចិត្តចុះ​

 សម្ដេចអគ្គមហាសេនាបតីតេជោ ហ៊ុន សែនមានប្រសាសន៍ នារសៀល​ថ្ងៃទី ២៩ ខែធ្នូ ឆ្នាំ​ ២០១០ ​ថា ខ្ញុំគិតថា ឯកឧត្ដមនាយករដ្ឋមន្ដ្រី អាប់ ភីស៊ីត នឹងយោគយល់ដល់ប្រព័ន្ធច្បាប់របស់កម្ពុជា ដែលមិន អាច​មាន​អ្នកណាមួយ រំលោភបាន ហើយ ខ្ញុំគិតថា ការចាប់ខ្លួនអ្នកទាំង ៧ នាក់នេះគឺមិន រីករាល ដាល​ក្លាយ​ទៅជា​ជម្លោះការទូតសារជាថ្មី រវាង កម្ពុជានឹងថៃទេ ព្រោះអំពើខុសច្បាប់បែបនេះ។
ប្រ​សាសន៍​របស់​សម្តេច​តេជោ​នាយករដ្ឋមន្រ្តី​ទាក់​ទង​ដល់​ការ​ចាប់​ខ្លួនជនជាតិថៃចំនួន ៧ នាក់​ដែល​​បាន ចូលមកដីខ្មែរ​ដោយ​ខុស​ច្បាប់ ដោយមាន​ទាំង តំណាងរាស្ដ្រ​គណបក្ស​ប្រជាធិបតេយ្យ​​របស់​នា យករដ្ឋ​​មន្រ្តី​​ថៃ អាប់ភីស៊ីត​ វេចាជីវ៉ា​ចំនួន ២ នាក់ផងនោះ គឺ​បាន​ធ្វើ​ឡើងនៅក្នុង​ឱកាស​ដែល​ សម្តេច ​​តេជោ​អញ្ជើញចូលរួម​ជា​អធិបតី​ក្នុង​ពិធីបិទ​សន្និបាត​ប្រចាំឆ្នាំ​របស់​ក្រសួងអភិវឌ្ឍជនបទ​​​ ដែល​ប្រារព្ធ​ ធ្វើ​នៅ​សាល​សន្និសីទ​ចតុមុខ​​រាជធានី​ភ្នំពេញ​។​ ​សម្ដេច​តេជោ​នាយក​រដ្ឋមន្ដ្រី​​ថ្លែងឲ្យ​ដឹង​ថា បន្ទាប់ពីការ ចាប់​ខ្លួន​ ​(ព្រឹក​ថ្ងៃទី​២៩ ខែធ្នូ ឆ្នាំ​២០១០)​នោះ​ មាន​អន្ដរាគមន៍​ឱ្យដោះ​លែង​អ្នក​តំណាងរាស្ដ្រ​ ថៃទាំង​ពីររូបនោះ ប៉ុន្ដែ​សម្តេច​បានបដិសេធហើយ បញ្ជាក់​ត្រឡប់​ទៅ​​វិញថា តំណាង​រាស្រ្ត​ទាំង​ពីររូប នេះមកជាមួយសំណុំរឿង ដូច្នោះ​បើដោះលែង ២ នាក់ទុក ៥ នាក់​គឺ​វា​ខុស​រឿង។ តំណាង​រាស្ដ្រ​ ថៃមានអភ័យឯកសិទ្ធិតែក្នុងដីថៃ តែចូល​ដីខ្មែរត្រូវតែចាប់។ បើតំណាង​រាស្ដ្រ​​ខ្មែរ​ចូល​ដី​ថៃថ្ងៃក្រោយ ចាប់ចុះ ប៉ុន្ដែ​យ៉ាងណា​ក៏ដោយ​​ការគោរព​សិទ្ធ​របស់អ្នកដែល​ត្រូវបាន​ចាប់​ខ្លួន​​ត្រូវតែ​បាន​ធានាផង​ដែរ ។
សម្ដេចតេជោ មាន​ប្រសាសន៍​ថា នៅពេលដឹកមកដល់ទីក្រុងភ្នំពេញពីខេត្ដបន្ទាយមានជ័យ ជនជាតិ​​ថៃ​ ទាំង​នោះ នឹងត្រូវទុកនៅកន្លែងប៉ូលីសអន្ដោប្រវេសន៍ ដើម្បីទុក​ឱ្យ​តុលាការ​ក្រុងភ្នំពេញ​ជាអ្នក​ចោទ ​ប្រកាន់ តុលាការ​ចោទប្រកាន់យ៉ាងណាវាជានីតិវិធីរបស់តុលាការ នៅពេល​ចោទ​ប្រកាន់​រួចហើយ​នឹង​ បញ្ជូន​ទៅ​កាន់​ពន្ធនាគារព្រៃសហើយ។ទាក់​ទង​និង​សកម្ម​ភាព​របស់​ “បណ្ដាញ​អ្នក​ស្នេហា​ទាមទា​ កេរ្ដិ៍ដីម៉ែ​ ដឹក​នាំ​ដោយ​លោក​វីរៈស៊ុម ខ្វាមឃិត ដែល​ត្រូវ​បាន​ចាប់​ខ្លួន​ដោយ​សារ​ចូល​មក​ទឹកដី​ខ្មែរ ​ដោយ​ខុស​ច្បាប់​នេះ​ដែរ​ សម្ដេចតេជោនាយករដ្ឋមន្រ្តី​បាន​ថ្លែងបញ្ជាក់​ថា បើដី​​ថៃ​អ្នក​ឯង​ធ្វើ​ សកម្មភាព​តាមចិត្ដចុះ តែដីកម្ពុជា កម្ពុជាត្រូវធ្វើសកម្មភាពតាមផ្លូវច្បាប់ ។ វា​មិនដូច​ប្រជា ពលរដ្ឋ​ថៃចំនួន ៣ នាក់ដែលយើង​បាន​ដោះលែង​នោះ​ទេ ពីព្រោះបណ្ដាញអ្នកស្នេហាជាតិ ថៃ​គេ​មក​ វាស់ដី​​ថៃក្នុងដីខ្មែរ អញ្ចឹង​ខ្មែរ​មានមាន​សិទ្ធ​ចាប់​ហើយ​កាត់​ទោស ។ ធ្វើអ្នក​តំណាងរាស្ដ្របើ​មិនដឹង​ទេ​ វាគួរ​តែ ​ជាប់គុក ។ អ្នក​ឯង​ចេះការពារដីម៉ែ ចេះទាមទាដីម៉ែ ខ្ញុំមិន​ចេះការពារដីម៉ែទេឬ ?
    ពាក់ព័ន្ធជាមួយបញ្ហាប្រាសាទព្រះវិហារវិញ សម្ដេចតេជោ​នាយករដ្ឋមន្ដ្រីមានប្រសាសន៍ថា ខ្ញុំមិន​ ដែល​ទទួល​ស្គាល់ថា ការចុះបញ្ជីប្រាសាទព្រះវិហារ​ចូលទៅ​ក្នុង​បេតិកភណ្ឌ​ពិភពលោក​នាំ​ឱ្យ​មាន​ភាព​ តាន​តឹង​រវាង​កម្ពុជា-ថៃទេ បើសិនជាមាន អ្នកណានៅទីក្រុងបាងកកនិយាយបែបនេះ គឺជាការខុស និង បំពាន ។ សម្ដេច​តេជោ​មានប្រសាសន៍ថា សូមអង្គការយូណេស្កូ ឬមិត្ដភក្ដិបរទេសកុំភ័ន្ដច្រឡំ និង ចាញ់​ការ​ឃោសនា​អកុសល​​ពីជនណាក៏ដោយចុះ ។ អ្វីដែលខ្ញុំទទួលស្គាល់ថា ការតានតឹង គឺ​បណ្ដាល ​មក​ពីការ​ឈ្លាន​ពាន​របស់​កងទ័ព​ថៃ នៅថ្ងៃទី ១៥ ខែកក្កដាឆ្នាំ ២០០៨ រហូតដល់ខ្ញុំបានប្រកាស ជាសាធារណៈថា ការបញ្ជូន​អ្នក​ការទូត​ត្រឡប់មកវិញ ការប្ដូរទូតទៅវិញទៅមកក៏មែនពិត ក៏ប៉ុន្ដែខ្ញុំមិន បានចាត់ទុកថា នេះជា ប្រក្រតីកម្ម​ពេញ​លេញទេ ប្រក្រតីកម្មពេញលេញរហូតដល់ទៅ​ កងទ័ព ឈ្លានពាន​ដកចេញ​ពីវត្ដ​កែវ​សិក្ខាគីរីស្វរៈ។ សម្ដេច​​តេជោ​នាយករដ្ឋមន្រ្តី​មានប្រសាសន៍ថា ចាប់ពីម៉ោង ១០,៣០នាទី ថ្ងៃទី ១ ខែធ្នូឆ្នាំ ២០១០ កងទ័ព​បាន​​កែសម្រួល ចេញ​​ពីវត្ដកែវ សិក្ខាគីរីស្វរៈ ខ្ញុំបានប្រកាសថា ប្រក្រតីកម្មពេញលេញហើយ សូម​កុំ​ភ័ន្ដច្រឡំ​លើបញ្ហានេះ ។

     ចំពោះការចោទប្រកាន់ថា កម្ពុជាឈ្លានពានដីថៃរហូតដល់ទៅ ១,៨ លានរ៉ៃវិញ សម្ដេចតេជោ​​ មាន ប្រសាសន៍ថា នេះជាលើកដំបូងក្នុងប្រវត្ដិសាស្ដ្រដែលកម្ពុជាឈ្លានពានគេ កន្លងទៅធ្លាប់តែថា គេ​ឈ្លាន ពានកម្ពុជា គេចោទយើងថាជាអាយ៉ង ប៉ុន្ដែឥឡូវកម្ពុជាមានឈ្មោះថាឈ្លានពាន តែក្នុង​ពេល​ជា​មួយ​គ្នា នោះដែររដ្ឋាភិបាលថៃ និងកងទ័ពថៃបាននិយាយថា មកដល់ពេលនេះ​គ្មាន​ការបាត់បង់​ទឹកដី​ថៃ​ បន្ដិច​ណាទេ ដូច្នោះមានន័យថា ពួកក្រុមនិយមជ្រុលនិយាយខុសការពិត ។ រដ្ឋាភិបាល​ថៃ​ក៏​ចេះ​ស្នេហា ជាតិ​ដែរ នាយករដ្ឋមន្ដ្រីថៃលោក អាប់ភីស៊ីត ក៏ចេះស្នេហាជាតិដែរ រដ្ឋមន្ដ្រីការពារជាតិថៃ​ក៏ចេះ​ ស្នេហា​ជាតិ​ដែរ អគ្គបញ្ជាការកងទ័ពថៃក៏ចេះស្នេហាជាតិដែរ ហើយគាត់បាននិយាយថា គ្មានការបាត់ បង់​ទឹកដីនោះទេ បើខាងកម្ពុជាថាអត់បាត់ ខាងថៃថាអត់មាន​បាត់បង់​ទឹកដីនោះ​វាគ្មាន​ ការបាត់បង់​ ទឹក​ដី​នោះ​ទេ ។

ចំពោះការដកសហគមន៍ប្រជាពលរដ្ឋខ្មែរចេញ​ពីភូមិ​“គ១”នោះ សម្ដេចតេជោ​មានប្រសាសន៍ថា ខ្ញុំសូម បញ្ជាក់​ត្រឡប់​ទៅវិញថា នេះមិនមែនដក ចេញតាមការទាមទារបស់ថៃនោះទេ។ ភូមិគ១ និង ប្រជាពលរដ្ឋ​ដែល​រស់​នៅគឺស្ថិត​នៅ​ក្នុង​​តំបន់ត្រូវការពារ ការ​ដកចេញគឺ​ធ្វើ​តាមតម្រូវការ នៃអាជ្ញាធរ ​ព្រះវិហារ និង អង្គការ​យូណេស្កូ​គឺមិនមែន​ដកចេញ​តាមការទាមទារ របស់ក្រុមណា​មួយដែល​ មិនមែន​ជា​កម្ពុជា​នោះទេ ។

   នៅ​វេលាម៉ោង​ប្រមាណ​ជា​ ១០ ព្រឹក​ថ្ងៃទី​២៩ ខែធ្នូ ឆ្នាំ​ ២០១០ អង្គភាព​នគរបាល​ការពារ​ ព្រំដែន ​កម្ពុជា​លេខ​ ៥០៣ បាន​ចាប់ឃាត់​ខ្លួន​ជនជាតិ​ថៃ​ចំនួន​ ៧ រូប​ ដែល​ចូល​ជ្រៅ​មក​ក្នុង​ ទឹក​ដី​ កម្ពុជា​ដោយ ​ខុស​ច្បាប់​ ស្ថិត​ក្នុង​ភូមិ​ជោគជ័យ​ ឃុំ​អូរបីជាន់​ ស្រុក អូរជ្រៅ​ ខេត្ត​បន្ទាយមានជ័យ​។​/

ឯកឧត្តម​ ស្វាយ ស៊ី​ថា ប្រគល់​ថវិកាមូល​និធិ​ទី​ស្តី​ការ​គណៈ​រដ្ឋមន្ត្រី​ ជូន​ដល់​ គ្រួសារសពដែល​រង​គ្រោះ​ដោយ​ឧបទ្ទ​វហេតុលើ​ស្ពាន​ពេជ្រ



          កាលពី​​ថ្ងៃ​ទី២៧.​២៨ថ្ងៃទី​២៩ ខែ​ធ្នូ​ ឆ្នាំ​២០១០ នៅ​សាលាខេត្ត​ កំ​ពង់​ស្ពឺ កំ​ពង់​ឆ្នាំង​ ពោធិ៍សាត់​ និង​ បាត់​ដំ​បង មាន​ប្រារព្ធពិ​ធី​ប្រគល់​ថវិការបស់​ សប្បុរសជន ​ទាំង​ក្នុង​ និង​ក្រៅ​ប្រទេសដែល​ផ្តល់​តាម ​រយៈមូល​ និធិ​ទី​ស្តី​ការ​គណៈ​រដ្ឋមន្ត្រី ជូន​ដល់​គ្រួសារ​សព ​ដែល​បាន​ទទួល​មរណៈភាព​ក្នុង ​ឧបទ្ទ​វហេតុ​ លើ​ស្ពាន​ពេជ្រ​កាលពីថ្ងៃ​ទី​ ២២ ខែ​វិច្ឆិកា ឆ្នាំ​ ២០១០។   ពិធី នេះ​បាន​ប្រារព្ធ ធ្វើឡើង ក្រោម​ ធិប​តី​ភាព​ឯកឧត្តម  ស្វាយ ស៊ី​ថា ​រដ្ឋលេខាធិការ ទី​ស្តីការ​គណៈ​រដ្ឋមន្ត្រី និង​​ជា​តំ​ណាង​ដ៏ខ្ពង់​ខ្ពស់​ របស់​ឯកឧត្តម​បណ្ឌិត​សភាចារ្យ សុខ អាន​ឧបនាយករដ្ឋមន្ត្រី​ រដ្ឋមន្ត្រី​ទទួល​បន្ទុក ​ទី​ស្តី​ការ គណៈ​រដ្ឋមន្ត្រី ក្នុង​នោះ ថវិកាដែល​ត្រូវ​ផ្តល់​​​ជូន​ដល់​គ្រួសារសព​សម្រាប់​ខេត្ត​កំ​ពង់​ស្ពឺ២០នាក់ កំពង់​ ឆ្នាំ​ង​ ៣នាក់ ​ខេត្ត​ពោ​ធិ៍​សាត់​៥​នាក់ និង​ខេត្តបាត់​ដំ​បង៣នាក់ ​ម្នាក់​ៗ​ទទួល​បាន​ទឹក​ប្រាក់ចំ​នួន​​​២១៤៥ ដុល្លារ សហរដ្ឋអាមេរិក។

          ឯកឧត្តម​​ ស្វាយ ​ស៊ីថា បាន​មាន​ប្រសាសន៍​ទៅ​កាន់​ក្រុម​គ្រួសារសពថា​ ការប្រគល់​នូវ​ ថវិការ ទាំង​នេះ​ គឺ​ជាការចូល​រួម​ចំ​ណែក​ផ្នែក​មនុស្សធម៌ដ៏មាន​សារៈសំ​ខាន់​ ហើយ​​ក៏​ជា​ការ​​ជួយ​ដោះ​ ស្រាយ​ សម្រាលទុក្ខលំ​បាក​របស់គ្រួសារ​ប្រជាពល​រដ្ឋរងគ្រោះ​​ផង​ដែរ​។ ឯកឧត្តម​ បាន​មាន​ប្រសាសន៍​ បន្តថា​ ក្នុង​នាម​សម្តេច​តេជោ ហ៊ុន សែន​ នាយក​រដ្ឋមន្ត្រីនៃ​ព្រះ​រាជា​ណាចក្រកម្ពុជា និង​លោក ជំ​ទាវ​បណ្ឌិត​ ប៊ុន​ រ៉ានី​ ហ៊ុន​ សែន​ ប្រធាន​កាកបាទក្រហម​កម្ពុជា និង​ក្នុងនាម​ឯកឧត្តម​បណ្ឌិត​ សភាចារ្យ​ សុខ​ អាន​សូម​ពាំនាំ​នូវ​ការ​ផ្តាំផ្ញើរ​ការ​​​សួរសុខទុក្ខ និង​ការចូល​រួម​រំ​លែក​​ទុក្ខសោក​ដ៏​ ក្រៀម​ក្រំជាមួយ​ក្រុម ​គ្រួសារនៃ​សព​ទាំង​អស់​​ ពី​សំ​ណាក់​ថ្នាក់​ដឹក​នាំ​នៃ​រាជ​រដ្ឋា​ភិបាល​កម្ពុជា​ ​។ ការ ​ស្លាប់បាត់​បង់​ជីវិតក្នុង ​​​សោក​នាដកម្ម​នៅ​ស្ពាន​ពេជ្រ​ ភ្លាម​ៗ គឺត្រូវ​បានប្រមុខ​រាជ​រដ្ឋាភិបាលកម្ពុជា​ យក​ ចិត្តទុក​ដាក់ក្នុង​ការ ​ជួ​យសង្រ្គោះ និ​ង ដោះ​ស្រាយ​ទុក្ខលំបាក​ជាបន្ទាន់​ជូន​គ្រួសារ​សព​  និង​បាន​បំ​ផុស ​ចលនាឲ្យ​មាន ​ការ​បង្កើត​ឡើង​នូវ​មូល​និធិផ្សេង​ៗជាច្រើន ដោយ​មាន សប្បុរសជនទាំង​​ក្នុង​​និង​ ក្រៅ​ ប្រទេស​បាន ចូល​​រួម​ចំ​ណែក​ ​ក្រៅ​ពី​នេះ​ មាន​ការឧបត្ថម្ភ​​ថវិកា​ ពី​កាកបាទ​ក្រហមកម្ពុជា និង​ក្រុម​ការងារ​ នៃ​គណ បក្សប្រជាជន​ ជាពិ​សេស គឺព្រះ​រាជ​អំ​ណោយ​របស់​ព្រះ​មហាក្សត្រខ្មែរព្រះ​បាទសម្តេច ​ព្រះ​នរោត្តម សីហមុនី​ សម្តេច​​ព្រះ​​នរោត្តម​ សី​ហនុ ព្រះ​មហាវី​រ​ក្សត្រ ​ព្រះវររាជបិតាឯករាជ្យ និង​សម្តេច ​ព្រះ​មហាក្សត្រី នរោត្តម មុនីនាថ ព្រះ​វររាជ​មាតាជាតិ​ខ្មែរ ដែល​គ្រួសារ​នៃ​សព ​ម្នាក់​ៗទទួល​បាន ថវិការហូត​ដល់​​ជាង​១ម៉ឺន​ដុល្លារសហរដ្ឋអាមេរិក​។

ឯកឧត្តម ស្វាយ ស៊ីថា​ បាន​គូសបញ្ជាក់​ថា​ ការឈឺចាប់ដោយ​ការ​ ទទួល​មរណៈភាព​នៃ​ក្រុម​គ្រួសារ​ញាតិ​ មិត្តរបស់​ប្រជាពល​រដ្ឋ ពិត​ជា​មាន​នូវ​ការ​​ស្តាយស្រណោះ​ ប៉ុន្តែ​ គ្រួសារ​នៃ​សព​ទាំង​អស់​គួរត្រូវ​ គិត ​​ពិ​ចារណាថា «ជី​វិត​ គឺ​ជា​ការ​តស៊ូរ និង​អត់​ធ្មត់»​ ​​​​។ ឯកឧត្តម​ បាន​ជម្រាប​ជូន​គ្រួសារនៃ​សព​ថា សោក​នាដកម្ម​លើស្ពាន​កោះ​ពេជ្រ​ គឺ​ពុំ​មែន​ជាអំ​ពើ​ភេរវកម្មឬក៏ជា​ការ​ឆក់​ខ្សែភ្លើង​ដូចពាក្យ​ចរ​ចា​ម​​​ អារាម​ របស់​ក្រុម​មួយ​ក្តាប់​តូច​ ឬជន​ដែល​ប្រឆាំង​នឹង​រាជ​រដ្ឋាភិបាល​បាន​លើក​ឡើង​នោះ​ទេ​ គឺ​លទ្ធ​ផល​នៃ​ការ​ ស្រាវ​ជ្រាវ​របស់​សមត្ថ​កិច្ច​បាន​បញ្ជាក់​ថា​ ការ​ស្លាប់​ គឺ​មក​ពី​ហ្វូង​មនុស្សច្រើន​ ផ្អើល​រត់​ជាន់​ដួល​សង្កត់​ លើ​គ្នា​ និង​ខ្វះ​ខ្យល់​អុក​ស៊ី​ហ្សែន​ បណ្តាល​ឲ្យ​ស្លាប់​និង​របួស​។ ជាមួយ​គ្នានេះ​ឯកឧត្តម​ ស្វាយ ស៊ី​ថា​ ក៏បាន​អំ​ពាវ​នាវ​ឲ្យ​អាជ្ញាធរ​ ជាពិសេសគ្រួសារ​ជន​រង​គ្រោះ​ត្រូវ​នាំ​គ្នា​បន្សាប​នូវ​ព័ត៌មាន​ ដែល​ត្រូវ​បាន​​ក្រុម​ អគតិ​មួយ​ចំ​នួន បាន​និង​កំ​ពុង​នាំ​គ្នា​បំ​ផ្លើស ញុះ​ញង់​ បំ​ពុល​បរិយាកាស​សង្គម​ ដោយ​បំ​ផុស​ថា ថវិកា​​របស់​រាជ​​រដ្ឋាភិបាល និង​សប្បុរសជន​នានាពុំ​បាន​ផ្តល់​ឲ្យ​គ្រួសារ​សព​នោះទេ ឬមាន​ការ​គៃ បន្លំ​ជាដើម ប៉ុន្តែ​ រឿង​នោះ​ គឺមិន​ពិត​ឡើយ​ ពី​ព្រោះគ្រួសារ​សព​គ្រប់​គ្នា​បាន​ទទួល​ប្រាក់​គ្រប់​ ចំ​នួន ​ដោយ​ផ្ទាល់​ដៃ​ និង​ពិធីប្រគល់​ត្រូវ​បាន​ផ្សព្វផ្សាយ​ជា​សាធា​រណៈ។

ដូច្នេះ​ ការឃោសនា​អកុសល​ទាំង​នោះ​គឺ​បង្ក​ឡើង​ដោយ​ក្រុម​ឱកាសនិយម​ដើម្បី​កេង​ចំ​ណេញ​​​​ធ្វើ​អាជីវកម្ម​ នយោបាយ​​​តែប៉ុណ្ណោះ​។ ជាង​នេះ​ទៅ​ទៀត​ ឯកឧត្តម ​ស្វាយ​ ស៊ី​ថា​ ក៏បាន​ផ្ដាំផ្ញើដល់​គ្រួសារ​នៃសព ទាំង​អស់​ ត្រូវ​ទុក​ដាក់​ថវិកា​ដែល​ទទួល​បាន​ នៅ​ទី​កន្លែង​ដែល​មាន​សុវត្ថិភាព​ ឬយក​ទៅ​ធ្វើ​ជា​ទុន​ក្នុង​ការ​ប្រើ​ប្រាស់​ ដើម្បី​កែ​លម្អរជី​វភាព​គ្រួសារ​ឲ្យ​បាន​ប្រសើរឡើង​។ ក្រៅពី​នេះ​ ឯកឧត្តម​ ក៏បាន​សំ​នូម​ពរ​ដល់​អាជ្ញាធរ​ គ្រប់​ លំ​ដាប់​ថ្នាក់​ បន្ត​ជួយ​ការពារ​សុវត្ថិភាព​ជូន​ប្រជា​ពល​រដ្ឋ ហើយ​ប្រសិន​បើ​ ប្រជា​ពល​រដ្ឋមាន​ទុ​ក្ខលំ​បាក​ត្រូវ​ រាយ​ការណ៍ជាបន្ទាន់​ជូន​មន្ត្រី​នៅ​តាម​មូល​ដ្ឋាន​ ដើម្បី​ថ្នាក់​ដឹក​នាំ​ជួយ​សម្រួល​ដោះ​ស្រាយ​តាម​ការ​ពិត​ ជាក់​ស្តែង​។

នៅ​ក្នុង​ពិធី​ប្រគល់​ប្រាក់ជំ​នួ​យ​​ឧបត្ថម្ភ​សម្រាប់​គ្រួសារ​សព​នៅ​ខេត្ត​កំ​ពង់​ស្ពឺ កំ​ពង់​ឆ្នាំង ពោធិ៍​សាត់​ និង​ ខេត្តបាត់​ដំ​បង ​ ក្នុង​រយៈពេល៣ថ្ងៃកន្លង​មកនេះ គណៈ​អភិ​បាល​ និង​អភិបាល​រងខេត្ត តំ​ណាង​​អាជ្ញាធរ​ដែន​ដី​ បាន​សំ​ដែង​នូវ​អំ​ណរគុណ​និង​ដឹង​គុណ​យ៉ាង​ជ្រាល​ជ្រៅ​ចំ​ពោះ​រាជ​រដ្ឋាភិបាល​ ជា​ពិសេស សម្តេច​អគ្គមហា សេនាបតី​តេជោ ហ៊ុន សែន និង​លោក​ជំ​ទាវ​បណ្ឌិត​ ប៊ុន រ៉ានី​  ហ៊ុន សែន​ប្រធាន​កាកបាទ​ក្រហមកម្ពុជា ក៏​ដូច​ជា​សប្បុរសជន​នានា ទាំង​ក្នុង​និង​ក្រៅ​ប្រទេស​ ដែល​បាន​គិត​គូរជួយ​បរិច្ចាគ​នូវ​ថវិកាដល់ គ្រួសារ ​ជន​រងគ្រោះដែល​បាន​ទទួល​មរណៈភាព​​​ ដោយ​ឧបទ្ទវ​ហេតុ​លើ​ស្ពាន​កោះ​ពេជ្រ​នាពេល​​កន្លង​មក​ ដែល សកម្ម​ភាព​នេះ​បាន​​បង្ហាញ​នូវ​សាមគ្គី​ជាតិ​​រវាង​ខ្មែរនិង​ខ្មែរ ក្នុង​ការ​ជួយ​រំ​លែក​ទុក្ខគ្នាក្នុង​គ្រាមាន​ការ​លំ​បាក៕



(រូបភាព ហេង ប៊ុនឡាយ)
 

បាងកក​ប៉ុស្តិ៍ ៖ ទាហានកម្ពុជា​​ចាប់ខ្លួន​ជនជាតិថៃ៧នាក់​ក្នុងនោះ​​មាន​សមាជិកស​ភា​ម្នាក់

កាសែត​បាងកកប៉ុស្តិ៍​​នៅថ្ងៃទី​២៩ ធ្នូ ផ្សាយ​​ថា លោក Panich Wikitsate សមាជិកសភា​​​គណបក្ស​​ប្រជាធិបតេយ្យ​​ប្រចាំ​ក្រុង​បាងកក ​និង​លោក​​វីរ៉ា ស៊ុម ខ្វាមឃីដ ​ជាមេដឹកនាំ​ក្រុម​មួយ​​ឈ្មោះ​ «បណ្តាញ​​អ្នកស្នេហា​​ជាតិថៃ» រួមទាំង​​ពលរដ្ឋ​​​ថៃ​៥​នាក់ទៀត​​ ត្រូវបាន​​ចាប់ខ្លួន​​ដោយ​ទាហាន​​កម្ពុជា កាលពី​ព្រឹកថ្ងៃទី​​២៩ ធ្នូ ។ កាសែត​​ថៃដដែល​​ឱ្យ​​ដឹង​​ទៀត​ថា ​លោក Panich និង​លោក​វីរ៉ា​ រួម​ទាំង​​ពលរដ្ឋ​ថៃ​ទាំង​៥​នាក់ បាន​ធ្វើ​​ដំណើរ​ទៅកាន់​​ស្រុក​អារញ្ញ​ប្រាថេត នៅ​​ជាប់ ព្រំដែន ​​រវាង​ប្រទេស​​ថៃ និង​ប្រទេស​កម្ពុជា​ ដើម្បី​​​ត្រួតពិនិត្យ​​​ និងស៊ើប​អង្កេត​​​ថា តើ​​មាន ពល​​រដ្ឋ​​កម្ពុជា​លួចឆ្លង​​កាត់ ព្រំដែន​​ចូលទឹក​ដី​​ថៃ​ឬ​ក៏​អត់ ។ ខណៈ​ពេល​​កំពុង​​ត្រួតពិនិត្យ​​​តំបន់​ព្រំដែន​​​ខាង​​ប្រទេស​ថៃ​​ពួកគេត្រូវ​បានចាប់ខ្លួន​​ដោយ​​ទាហាន​កម្ពុជា ។

កាសែត​បាង​កកប៉ុស្តិ៍​​​បានដកស្រង់សំដី​លោក​​កាស៊ីត​ ភិរម្យ រដ្ឋ​មន្ត្រី​​ក្រសួងការបរទេស​ថៃ ​ដែល​ថ្លែង​​នៅថ្ងៃទី​​២៩ ធ្នូ ថា រដ្ឋាភិបាល​​​នឹង​បញ្ជូនតំណាង​​របស់​​ខ្លួន​​​មកកាន់​ប្រទេស​កម្ពុជា ​ដើម្បីចរចា​​ និងពិភាក្សា​ជាមួយកម្ពុជា​​ក្រោយ​ពី​​ទទួលបាន ព័ត៌មាន​​​ថា ពលដ្ឋ​ថៃ​​៧​នាក់ត្រូវ​បាន​ចាប់ខ្លួន​ដោយទាហាន​កម្ពុជា ។ លោកកាស៊ីត ភិរម្យ​​អះអាង​​ថា ពលរដ្ឋ​ថៃ​​៧​នាក់​នោះ​បានធ្វើ​ដំណើរ​​​ទៅកាន់ស្រុក​​​អារញ្ញ​​ប្រាថេត ​ខេត្ត​​ស្រះ​កែវ ​ដើម្បីត្រួតពិនិត្យ​​​តំបន់ព្រំដែន​​​មាន​ជំលោះ​​ក៏​ត្រូវ​​បានចាប់ខ្លួន ដោយទាហា​នកម្ពុជានៅវេលា​​ថ្ងៃ​ត្រង់ ។ រដ្ឋ​មន្ត្រី​​ការបរទេសថៃ​​​រូបនេះ​ថ្លែង​​ទៀត​ថា ​លោក​​នាយក​​រដ្ឋ​មន្ត្រី​​អាប់ភីស៊ីត ត្រូវបាន​ជំរាប​​រួចហើយ​​អំពីការ​ចាប់ខ្លួន​ពលរដ្ឋ​​ថៃ​ទាំង​​៧​នាក់​​នោះ ហើយ​​តំណាង​របស់​​​លោក​​ម្នាក់នឹង​ត្រូវ​​​បញ្ជូន​ទៅកាន់​​ប្រទេស​កម្ពុជា ដើម្បី​​ជួយពួកគេ​​ឱ្យ​បាន​​ទាន់ពេល ។
ដោយឡែក​​កាសែត​ឌឹ​ណេស្សិន ​បានដក​ស្រង់​​​សំដីលោក Panich Wikistreth ដែល​ថ្លែង​ថា ដំបូងរូបលោក បាន ទទួល​របាយការណ៍​​ថា កង​ទ័ព​កម្ពុជា​បានឆ្លង​កាត់​​ព្រំដែន​​​ចូលក្នុង​ភូមិ​​​ Ban Nong Jan ក្នុងសង្កាត់ Khok Soon ខេត្ត​ ​ស្រះកែវ ​នៅ​វេលាម៉ោង​​១១ព្រឹកថ្ងៃទី​​២៩ ធ្នូ នោះហើយ​​ក្រោយពី​​ទទួល​បាន​របាយការណ៍​​​​ដូច្នេះ រូប​លោក​ក៏បាន​ធ្វើដំណើរ​​ទៅត្រួតពិនិត្យ​​​​កន្លែង​នោះ​​ក៏ត្រូវ​បានចាប់ខ្លួន​ដោយទាហាន​​កម្ពុជា​​តែម្តង ​រួមជាមួយ​នឹង​ពលរដ្ឋ​​ថៃ​៦​នាក់​ទៀត ។ ជាមួយគ្នានេះ អ្នកនាំពាក្យ​​ក្រសួង​ការ​បរទេស​ថៃ​​​ លោក​ថានី ថុងភក្តី ​ថ្លែង​ថា ស្ថាន​ទូត​ថៃប្រចាំ​​ប្រទេស​កម្ពុជា ក៏ត្រូវ​បាន​​ជូន​ដំណឹង​​អំពី​​ការចាប់ខ្លួន​​ពលរដ្ឋ​ថៃ​​ទាំង​៧​នាក់នោះ​រួច​ហើយដែរ រួច​​​កំពុងស្ថិត​​ក្នុងដំណើរ​​​ការចរ​ចា​ជា​មួយ​​អាជ្ញាធរ​​កម្ពុជា​​សំរាប់​ការ​ដោះលែង​​ពួក​គេ ៕

ស្ពាន​អាកាស​ទី​២​ប្រវែង​៣៤៥​ម៉ែត្រ​ត្រូវបាន​បើក​សម្ពាធ​សាងសង់

ស្ពាន​អាកាស​ទី​២​ដែល​មាន​ទីតាំង​នៅ​ស្តុប​ពេទ្យ​លោកសង្ឃ​ដែល​ជា​ទីប្រសប់​រវាង​មហាវិថី​ស​ហព​ន្ធ័​រុស្ស៊ី ផ្លូវ​២៧១ ផ្លូវ​កម្ពុជា​ក្រោម និង​ផ្លូវ​៥៩៨​ត្រូវបាន​បើក​សម្ពាធ​
សាងសង់​នៅ​ព្រឹក​ថ្ងៃ​ទី​២៩​ធ្នូ នេះ​ក្រោម​អធិបតីភាព​របស់​សម្តេច​តេជោ ហ៊ុន សែន​។ 

​ស្ពាន​នេះ​មាន​ប្រវែង​៣៤៥​ម៉ែត្រ និង​ទទឹង​ជាង​១៥​ម៉ែត្រ និង​កំពស់​៥​ម៉ែត្រ​កន្លះ​។ ការសាងសង់​ជា បន្ទុក​របស់​ក្រុមហ៊ុន​ដែល​ទទួល​សាងសង់​ស្ពាន​អាកាស​នៅ​ស្ពាន​មុនី​វង្ស​ដែរ​គឺ​ក្រុមហ៊ុន​ដែល​ទទួលបាន​សម្បទាន​អភិវឌ្ឍន៍​កោះ​ពេជ្រ​ឈ្មោះ​ក្រុមហ៊ុន​វិនិយោគទុន​អនិកជន​កម្ពុជា ( OCIC ) ដោយ​ចំណាយ​ប្រាក់​ជាង​៨​លាន​ដុល្លារ​និង​ប្រើ​រយៈពេល​១៣​ខែ​៕​


សម្តេច​អគ្គមហាសេនាបតីតេជោ ហ៊ុន សែន ប្រកាស​បិទស្ទឹងសាងសង់វារីអគ្គីសនី ឫស្សីជ្រុំក្រោម មានអានុភាពតម្លើង៣៣៨មេហ្គាវ៉ាត់

ការដ្ឋាន​វារីអគ្គិសនីស្ទឹងឫស្សីជ្រុំក្រោម មានអានុភាពតម្លើង ៣៣៨ មេហ្គាវ៉ាត់ ដែល​ជាការ​វិនិយោគ​របស់ក្រុមហ៊ុន China Huadian Corporation នៃ​សាធារណៈរដ្ឋប្រជាមានិត​ចិន​ ស្ថិត​​នៅ​ឃុំ​បាក់ខ្លង​ ស្រុកមណ្ឌលសីមា ខេត្ដកោះកុង បាន​ប្រារព្ធពិធីបិទ ស្ទឹងដើម្បី សាងសង់កាល ពីថ្ងៃទី ២៨ ខែធ្នូ ឆ្នំា​២០១០​ ក្រោមអធិបតី​ភាព​ដ៏ខ្ពង់ខ្ពស់​​របស់សម្ដេចអគ្គមហាសេនាបតីតេជោ ហ៊ុន សែន នាយក​រដ្ឋមន្ដ្រី​ នៃព្រះរាជាណាចក្រកម្ពុជា។


សម្ដេច​តេជោនាយករដ្ឋមន្ដ្រី​មានប្រសាសន៍វាយតម្លៃ​ ចំពោះ​ការ​វិនិយោគសាង​សង់​នៅក្នុង​ពិធីនោះ​ថា ការបោះទុន​ដ៏ច្រើន​សន្ធឹក​សន្ធាប់​ដើម្បី​សាង​សង់​វារីអគ្គិសនី​ឫស្សីជ្រុំក្រោមនេះ មិនត្រឹមតែ​ជា​ការ​វិនិយោគ​មួយដ៏ធំ ផ្នែកអគ្គីសនីនៅក្នុង​ព្រះរាជាណាចក្រ​កម្ពុជា​ប៉ុណ្ណោះទេ ប៉ុន្ដែការវិនិយោគ​នេះ​ថែម​ទាំង​បាន​ឆ្លុះបញ្ចាំងអំពីទំនុកចិត្ដរបស់ វិនិយោគិន​បរទេស​មក​លើស្ថិរភាព​នយោបាយ និង យុទ្ធសាស្ដ្រ​ចតុកោណ ដើម្បីកំណើនការងារ សមធម៌ និងប្រសិទ្ធភាព របស់​រាជរដ្ឋាភិបាល​កម្ពុជា ដែល​បាន​អនុវត្ដ​ក្នុងនីតិកាលទី ៣ និង បន្ដអនុវត្ដក្នុងនីតិកាលទី ៤ នៃរដ្ឋសភា​ទៀត​ផង។

សម្ដេចតេជោថ្លែងថា ខ្ញុំសូមបញ្ជាក់ថា ការអភិវឌ្ឍវិស័យថាមពល និង បណ្ដាញ​អគ្គិសនី​នៅតែ​ជារបៀបវារៈ​ដ៏សំខាន់នៃ នយោបាយសេដ្ឋកិច្ចរបស់រាជរដ្ឋាភិបាលសម្រាប់នីតិកាលទី ៤ នៃរដ្ឋសភានេះ និង នីតិកាលបន្ដទៀត ហើយការចាប់ផ្ដើម សាងសង់វារីអគ្គិសនីនៅថ្ងៃនេះ ពិតជា​បាន​បញ្ជាក់​យ៉ាង​ច្បាស់​នូវ​គោលនយោបាយរបស់រាជរដ្ឋាភិបាលក្នុងការអភិវឌ្ឍវិស័យអគ្គិសនី និង ការ​ជម្រុញ​ឱ្យ​វិស័យ​ឯកជន​ជាដៃ​គូ និងជាក្បាលម៉ាស៊ីននៃកំណើនសេដ្ឋកិច្ចជាតិ ដែលរាជរដ្ឋាភិបាលគឺជា “យុទ្ធសាស្ដ្រវិទូ”និង ជាអ្នកគ្រប់គ្រងការអភិវឌ្ឍ ដែលមានតួនាទីធានានូវបរិស្ថានធុរកិច្ចល្អប្រសើរ មានស្ថិរភាព មានតម្លាភាព និង ភាពអាចប៉ាន់ប្រមាណបានសម្រាប់វិស័យឯកជន។

ឯកឧត្ដម ស៊ុយ សែម រដ្ឋមន្ដ្រីក្រសួងឧស្សាហកម្ម រ៉ែ និងថាមពល មាន​ប្រសាសន៍ឱ្យដឹងថា មក​ដល់​ពេលនេះកម្ពុជា កំពុងដំណីរ ការផលិតថាមពលអគ្គិសនីធំៗចំនួន ៧ ដែល​រាជ​រដ្ឋាភិបាល​បាន អនុម័ត​ឱ្យ​ដំណើរការសាងសង់ ក្នុងនោះរួមមាន គំរោងវារីអគ្គិសនី កំចាយមានអនុភាព ១៩៣.២មេហ្គាវ៉ាត់ គំរោង វារីអគ្គិសនី​ស្ទឹងអាតៃមានអនុភាព១២០មេហ្កាវ៉ាត់ គំរោងវារីអគ្គិសនី​ស្ទឹង​តាតៃ​មាន​អនុភាព២៦០មេហ្កា​​វ៉ាត់​​ គំរោងវារីអគ្គិសនីគីរីរម្យ៣មានអនុភាព១៨មេហ្កាវ៉ាត់ គំរោង​វារីអគ្គិសនី​ឬស្សី​​ជ្រុំក្រោមមាន​អនុភាព​៣៣៨​មេហ្គា​វ៉ាត់ គំរោងអគ្គិសនីដុតធ្យូងថ្មទី១មានអនុភាព១០០មេហ្កាវ៉ាត់ គំរោង​អគ្គិសនីដុតធ្យូងថ្មទី២ មានអនុភាព២៧០ មេហ្កាវ៉ាត់។ ឯកឧត្ដមរដ្ឋមន្ដ្រីមានប្រសាសន៍បន្ដថា ក្រៅពីគំរោងទាំងនេះ យើង​នៅ​មាន​​គំរោង​វារីអគ្គិសនី សេសានក្រោមទី២ មានអនុភាព៤០០មេហ្កាវ៉ាត់ កំពុង​ធ្វើការចរចាកិច្ចព្រមព្រៀង និង​​គំរោងវារីអគ្គិសនី​១២​ផ្សេងទៀត កំពុងសិក្សា។

បើ​ទោះបីជាបានបង្ហាញពីសារៈសំខាន់នៃការអភិវឌ្ឍវិស័យវារីអគ្គិសនីនេះក៏ដោយ ក៏សម្ដេច​តេជោ​បាន​គូសបញ្ជាក់ថា នៅក្នុងគម្រោងអភិវឌ្ឍនីមួយៗ រាជរដ្ឋាភិបាលបាន​ថ្លឹងថ្លែង​ដោយ​ហ្មត់​ចត់​នូវ​ផល​ប៉ះ​ពាល់​បរិស្ថានដែលនឹងអាចកើតមាននោះ។ សម្ដេចតេជោ​នាយករដ្ឋមន្រ្តី​មានប្រសាសន៍ថា ខ្ញុំ​សូម​បញ្ជាក់​ថា យើង​​មិនអាចគិតគូរតែការអភិវឌ្ឍ ដោយមិនគិតគូរអំ ពីការប៉ះពាល់ បរិស្ថានទេ ប៉ុន្ដែទន្ទឹមនឹងនេះ យើង​ក៏មិន​អាច​គិតគូរតែពីបញ្ហាបរិស្ថាន ដោយមិនគិតគូរអំពីការអភិវឌ្ឍនានា ដែល​ប្រទេសយើង​ត្រូវការ ជា​ចាំបាច់​​នោះ​ដែរ ។ ពិតណាស់ថា រាជរដ្ឋាភិបាលមានយន្ដការការងារយ៉ាងច្បាស់លាស់ និង ត្រឹម​ត្រូវអំពី​បញ្ហា​​បរិស្ថាន និង ការអភិវឌ្ឍ ដោយធ្វើការថ្លឹងថ្លែង និង រក្សា​តុល្យភាព​ឱ្យ​បាន​សមរម្យ​បំផុត​រវាង​ការ​អភិវឌ្ឍ និងការ​រក្សាបរិស្ថាន ។

សម្ដេចតេជោមានប្រសាសន៍ថា យន្ដការត្រួតពិនិត្យ និង ថ្លឹងថ្លែងបញ្ហាបរិស្ថាន និង ការអភិវឌ្ឍនេះ គឺ​មានតាំង ពីដំណាក់កាល ចាប់ផ្ដើមសិក្សាធ្វើផែនការមេ រហូតដល់ដំណាក់​កាលនៃ​ការសិក្សា​បុរេ​សមិទ្ធិលទ្ធភាព​ និង សមិទ្ធិលទ្ធភាព នៃគម្រោងនីមួយៗ ហើយ លទ្ធផល​នៃការ​ថ្លឹងថ្លែង​នេះ​នឹង​យក​មក​អនុវត្ដ​ក្នុងការចរចារកិច្ចព្រមព្រៀងវិនិយោគក្នុងការសម្រេច លើការវិនិយោគ និង ការ​អនុវត្ដ​គម្រោង​វិនិយោគ និង បន្ថែមពីលើនេះ នៅពេលអភិវឌ្ឍគម្រោងនីមួយៗ យុទ្ធសាស្ដ្ររបស់ រាជរដ្ឋាភិបាល​គឺត្រូវ​ប្រើប្រាស់​ឱ្យអស់ នូវលទ្ធភាពរបស់គម្រោងនីមួយៗ ដើម្បីកាត់បន្ថយផលប៉ះពាល់ផ្នែកបរិស្ថាន និងសង្គម ផងដែរ ។

ឯកឧត្ដម ស៊ុយ សែម រដ្ឋមន្ដ្រីក្រសួងឧស្សាហកម្ម រ៉ែ និងថាមពល មានប្រសាសន៍ឱ្យដឹងដែរថា គំរោងវារីអគ្គិសនី​ឬស្សីជ្រុំក្រោម​នេះមាន​ទីតាំង​ស្ថិត​នៅ​ក្នុងឃុំ បាក់ខ្លង ស្រុកមណ្ឌលសីមា ខេត្ដកោះកុង មានចម្ងាយ​ប្រមាណ​២៨០គីឡូម៉ែត្រ ពី​រាជធានី​ភ្នំពេញ និងមានចម្ងាយ ប្រមាណ៤៩គីឡូម៉ែត្រ ពីទី​រួម​ខេត្ដ​កោះកុង។ គម្រោង​វារីអគ្គិសនី​ស្ទឹង​ឫស្សី​ជ្រុំក្រោម​ ជាការវិនិយោគរបស់ ក្រុមហ៊ុន China Huadian Corporation របស់​ប្រទេស​ចិនក្រោមរូបភាព “សាងសង់​-ដំណើរការ-ផ្ទេរ ”(BOT)ក្នុង​ទឹក​ប្រាក់​វិយោគ​ចំនួន ៤៩៥​លាន​៧៦​ដុល្លារ​​សហរដ្ឋអាមេរិក មាន​អនុភាព​៣៣៨មេហ្កាវ៉ាត់ ដែលអាច ផលិត​ថាមពល​អគ្គិសនី​ប្រចាំឆ្នាំ​ជា​មធ្យម​ប្រមាណ​១០២០.៩​លាន​គីឡូ​វ៉ាត់ម៉ោង មានរយៈ​ពេល​សម្បទាន​៣៥ឆ្នាំ ក្នុងនោះ​​៥ឆ្នាំ​សំរាប់​ដំណើរ​ការ​សាងសង់​ និង៣០ឆ្នាំ​សំរាប់​ដំណើរ​ការធ្វើអាជីវកម្ម។ ថ្លៃអគ្គិសនី​លក់ឱ្យក្រុម​ហ៊ុន​អគ្គិសនី​កម្ពុជា ស្មើ​និង​៧.៣៥សេន​ដុល្លាអាមេរិក ក្នុង​មួយ​គីឡូវ៉ាត់​ម៉ោង។ មក​ដល់​ពេល​សម្ពោធ​បើក​ការដ្ឋាន​​នេះដំណើរការសាងសង់សំរេចបាន ប្រមាណ​១០% និងគ្រោង​បព្ចាប់​ដំណើរ​​ការសាងសង់​ជា​ស្ថាពរ​នៅ​ឆ្នាំ​២០១៤។

ឯកឧត្ដមរដ្ឋមន្ដ្រី ក៏ដូចជាតំណាង ក្រុម​ហ៊ុនសាងសង់ មាន​ប្រសាសន៍​​ឱ្យដឹងដែរថា នៅពេលបញ្ចប់​ការសាងសង់ គម្រោង​វារីអគ្គិសនី​ស្ទឹង​ឫស្សីជ្រុំក្រោមនេះ មិន​ត្រឹម​តែ​ផ្ដល់ផលប្រយោជន៍​ក្នុង​ការ​រួម​ចំណែក​ការពារទឹកជំនន់ បង្កើត​បាន​ជា​តំបន់​ទេសចរណ៍ បង្កើត​មុខ​របរ​ជូន​ដល់ប្រជាជននិង បង្កើនប្រាក់​ចំណូល​​ជូនរដ្ឋប៉ុណ្ណោះទេ ប៉ុន្ដែ​ថែម​ទាំង​បង្កើន​សមត្ថភាព ផ្គត់ផ្គង់ ថាមពល​អគ្គិសនីប្រកប ដោយស្ថិរភាព បង្កើន​ឯករាជ្យភាព និង​សន្ដិសុខ​ថាមពល​ព្រម​ទាំង​មានថ្លៃអគ្គីសនីសមរម្យ ដែល​ជាការរួមវិភាគទាន​ដ៏​សំខាន់​សម្រាប់ការ អភិវឌ្ឍសេដ្ឋកិច្ចជាតិ និង​កាត់​បន្ថយភាពក្រីក្ររបស់ប្រជាជន។


យោង​តាមការសិក្សាបង្ហាញឱ្យដឹងថា ប្រទេសកម្ពុជា ជាប្រទេស​មួយដែលមានសក្ដានុពល​ប្រភព​វារីអគ្គិស​នីខ្ពស់ ដែលអានុភាព សរុបប្រហែលជា ១០ ០០០ មេហ្គាវ៉ាត់ ហើយប្រភពវារីអគ្គិសនី គឺជា​ប្រភព​អគ្គិសនី​មួយក្នុងចំណោមប្រភពអគ្គិសនីនានា ដែល រាជរដ្ឋាភិបាល ​ក្រោម​ការ​ដឹក​នាំ​ដ៏​ខ្ពង់​ខ្ពស់​របស់​សម្តេច​អគ្គមហាសេនាបតីតេជោ ហ៊ុន សែន យកចិត្ដទុកដាក់អភិវឌ្ឍ ដើម្បីជំនួស​ការអភិវឌ្ឍ​រោង ចក្រ​ផលិត​អគ្គិសនី​ ដែលប្រើដោយ​ប្រេង ឥន្ធនៈជាវត្ថុធាតុដើមនោះ ។

នាយករដ្ឋ​មន្ត្រី​​ប្រកាស​ឱ្យក្មួយ​​ប្រុស​ឆាប់​​ចូល​ផ្ទះ​ជួបប្រពន្ធ​វិញ ប្រព្រឹត្ត​​ផ្តេស​ផ្តាស​​នៅ​ខាង​ក្រៅ​មិនអាចទទួល​យកបាន​ទេ

រាជ​ធានី​ភ្នំពេញ ៖ សម្តេច​តេជោហ៊ុន សែន ​នាយករដ្ឋ​មន្ត្រី​​ បានប្រកាស​​ជាសាធារណៈ​​ថា សូមក្មួយប្រុស​ហ៊ុន ជា ដែល​កំពុង​គេ​ច​ផ្ទះ គេច​ប្រពន្ធ​​ប្រញាប់​ចូល​ផ្ទះជួប​ប្រពន្ធ​វិញ​​​ផង ​បន្ទាប់​ពី ​ស្នាក់នៅ​ក្រៅ​ផ្ទះអស់​រយៈ​ពេល​​​យូរ​ថ្ងៃ​​មក​ហើយ​...​​ការប្រព្រឹត្ត​​​កំហុសឆ្គង​នេះពូ​មិន​អាច​​ទទួល​យកបានទេ ។​ សម្តេច​​អគ្គ​មហា​សេនាប​តី​តេជោ ហ៊ុន សែន បាន​មាន​ប្រតិ​កម្ម​ចំពោះ​ក្មួយ​​ប្រុស​បែប​នេះ ខណៈ​សម្តេច និង​លោកជំទាវ​បណ្ឌិត​ប៊ុន រ៉ានី ហ៊ុន​ សែន ​អញ្ជើញ​ជា​អធិបតី​​ក្នុង​ពិធី​សម្ពោធ​បើក​ការដ្ឋាន​ស្ថាបនា​​ស្ពាន​អាកាស​​ទី​២ ដែល​មាន​ទីតាំង​​​ត្រង់​ផ្លូវ​បំបែក​ជា​៥ ​ភ្លើង​​ស្តុប​មន្ទីរ​​ពេទ្យ​​ព្រះ​កុសុមៈ កាលពីព្រឹកថ្ងៃទី​​២៩ ធ្នូ ២០១០ ​ប៉ុន្តែ​​ពិធីថ្លែង​សុន្ទរកថា​​ និងជួបជុំ​​ត្រូវ​បាន​​រៀបចំ​​នៅក្នុង​ទីធ្លា​​សាកលវិទ្យា​ល័យ​​ភូមិន្ទ​​ភ្នំពេញ​ ។
សម្តេច​តេជោ​​​បាន​មាន​ប្រសាសន៍​​​ថា តាម​ការ​ស៊ើប​ដឹង​...​គឺហ៊ុន ជា កំពុងតែ​​ស្នាក់នៅ​សណ្ឋា​គារ​​​​ក្រុង​ភ្នំពេញ​​ជាមួយស្រី... យើង​មិន​​ចង់​​ឱ្យ​ហ៊ុន ជា ​នៅក្រៅ​ផ្ទះ​តទៅ​ទៀតទេ ​ព្រោះ​វា​អាច​នឹង​​ប្រព្រឹត្ត​​អ្វី​ខុស...​​អាច​ជាប់​​ជាមួយក្រុម​អ្នក​ញៀន​​ផង​ដែរ​...​ដូច្នេះ​​បើ​ហ៊ុន ជា ដឹង​ខ្លួន ឆាប់​​ចូល​ផ្ទះវិញ ។ សម្តេច​តេជោ​​បានប្រាប់​ឱ្យ​​លោក​​នាយ​ឧត្តម​សេនីយ៍​​នេត សាវឿន ​តាមរក​​ហ៊ុន ជា ផងដែរ​ថា ​ឥឡូវនេះ ​លោកនេត សាវឿន ក្នុង​នាមជា​​បង​ប្រុស​​​​ជីដូន​មួយ​​ត្រូវ​​តាម​រក​ហ៊ុន ជា ឱ្យឃើញ​​យើង​មិន​​ចង់​ឱ្យ​​ហ៊ុន ជា​ប្រព្រឹត្ត​​​អ្វី​ផ្តេសផ្តាសទេ ។
​ស្តីពី​ស្ពាន​អាកាស​​ទី​២ ឬ​ស្ពាន​​អាកាស​ថ្មី​ដែល​គ្រោង​សាង​សង់​​នេះវិញ​ ជា​ស្ពាន​បេតុង​អាម៉េ​ មាន​ប្រវែង​៣៤៥​ម៉ែត្រ ទទឹង​១៥,២០​ម៉ែត្រ ​ហោះ​ស្រប​​តាម​មហា​វិថី​សហ​ព័ន្ធ​​រុស្ស៊ី ចំណុច​កណ្តាល​មាន​កំពស់​​៥,៥​ម៉ែត្រ យក​ត្រង់​ចំណុច​​ផ្លូវ​​បំបែក​ជា​៥​​នៃ​​មហា​វិថី​សហ​ព័ន្ធ​រុស្ស៊ី និង​ផ្លូវ​លេខ​៥៩៨ ។ ស្ពាន​អាកាស​នេះ ជា​ស្ពាន​ទ្វេ​ទិស​ចរាចរណ៍​​សំរាប់​រថយន្ត​ទៅ​មក និង​គ្មាន​​ចិញ្ចើម​សំរាប់​ថ្មើរ​ជើង​ទេ ។ ស្ពាន​អាកាស​ទី​២​នេះ វែង​ហើយ​ធំ​ជាង​ស្ពាន​អាកាស​ទី​១ ក្បាល​​ថ្នល់​ដែល​អនុ​វត្ត​​ដោយ​ក្រុម​ហ៊ុន OCIC ជា​ថវិកា​បាន​មក​ពី​ជួល​ដី​កោះ​ពេជ្រ​​ដូច​ស្ពាន​ទី​១ ដែរ ។
ស្ពាន​អាកាស​ទី​២ នេះ មាន​​​ដៃ​ស្ពាន​មួយ​ទៀត ទំលាក់​ទៅ​មហា​វិថី​កម្ពុជា​ក្រោម បំបែក​ពី​​ស្ពាន​ធំ​ស្រប​មហា​វិថី​សហ​​ព័ន្ធ​រុស្ស៊ី​មាន​ប្រវែង​១៦០​ម៉ែត្រ ទទឹង​៦,៥​ម៉ែត្រ ជា​ស្ពាន​ឯក​ទិស​ចរា​ចរណ៍​​ក្នុង​ទិស​ដៅ​ចុះ​ពី​ស្ពាន​ធំ​ទៅ​មហា​វិថី​កម្ពុជា​ក្រោម​ ​ដែល​មាន​មួយ​​កន្លែង​សំរាប់​​រថយន្ត និង​មួយ​កន្លែង​សំរាប់​ម៉ូតូ និង​គ្មាន​​ចិញ្ចើម​សំរាប់​ថ្មើរ​ជើង​​ដែរ ។ ការ​ស្ថាបនា​ស្ពាន​នេះ មាន​ដាក់​បង្គោល​​​ភ្លើង​បំភ្លឺ លាប​​គំនូស​ចរា​ចរណ៍​ ​ដាក់​របាំង​បេតុង​ចែក​ទ្រូង​ស្ពាន ​ស្ថាបនា​​បង្កាន់​ដៃ​ស្ពាន​សង​​ខាង​កំពស់​១,០៨​ម៉ែត្រ ទទឹង​០,៥​ម៉ែត្រ ​មាន​ជំរាល​៥,៧% ។ ស្ពាន​​មាន​សសរ​១៤​បូក​ទាំង​ដៃ​ស្ពាន និង​​​មាន​ការ​​ស្ថាបនា​សួន​ច្បារ​នៅ​​​ខាង​ក្រោម​ រៀប​ចំ​​បណ្តាញ​​អូរ​អម​សង​ខាង​​ស្ពាន និង​តំបន់​​ជុំ​វិញ ។ ​​មាន​ស្ថាបនា​ពង្រីក​ផ្លូវ​កៅស៊ូ​អម​សង​ខាង​ស្ពាន​នៅ​ផ្នែក​​ខាង​លិច​ភ្លើង​ស្តុប​​ទទឹង​៧​ម៉ែត្រ និង​ផ្នែក​ខាង​កើត​ភ្លើង​​ស្តុប​ទទឹង​​៥.៥០​ម៉ែត្រ ។ ក្រៅ​ពី​នេះ ​មាន​ការ​ស្ថាបនា​រង្វង់​មូល​នៅ​ខាង​លិច​សាកល​វិទ្យា​ល័យ​ភូមិន្ទ​ភ្នំពេញ និង​ស្ថាបនា​សួន​ច្បារ​សំរាប់​បែង​​ចែក​ទ្រូង​ផ្លូវ​លើ​​ផ្លូវ​លេខ​២៧១ និង​ផ្លូវ​លេខ​៥៩៨ ព្រម​ទាំង​ដាក់​ស្លាក​សញ្ញា​ចរា​ចរណ៍​​ផង​ដែរ ៕

ប្រមុខ​រដ្ឋាភិបាល​បញ្ជា​ឲ្យ​គាស់​រំលើង​ប្ញ​សគល់​អ្នកជួញដូ​រគ្រឿង​ញៀន​

នៅក្នុង​ឧិ​កាសចូលរួម​សម្ពាធកា​រដ្ឋាន​សាងសង់​ស្ពាន​អាកាស​ទី​២​នៅ​ស្តុប​ពេទ្យ​លោកសង្ឃ នៅ​ព្រឹក​ថ្ងៃទី​២៩​ធ្នូ​នេះ សម្តេច​ហ៊ុន សែន បាន​ចេញ​បញ្ជា​ឲ្យ​សមត្ថកិច្ច​បង្ក្រាប​អ្នកជួញដូរ​គ្រឿងញៀន​ឲ្យ​ខាង​តែ​បាន​ពីព្រោះ​វា​កំពុង​បង្ក​បញ្ហា​ធំធេង​ដល់​សង្គម​។​

​បញ្ជា​របស់​សម្ត​ច​បាន​ធ្វើឡើង​បន្ទាប់ពី​សមត្ថកិច្ច​បាន​ចាប់​អ្នករត់ពន្ធ​គ្រឿងញៀន​ដ៏​ធំ​មួយ​នៅ​ថ្ងៃ​ទី​២៧​និង​២៨​ធ្នូ​នេះ​ដោយ​ចាប់ខ្លួន​មនុស្ស​យ៉ាង​ហោច​ណាស់​ក៏​៦​នាក់​ដែរ​និង​រឹបអូស​គ្រឿងញឿន​បានជាច​ច្រើនលាន​គ្រាប់​។ 

ការជួញដូរ​គ្រឿងញៀន​នេះ​បាន​ធ្វើឡើង​ជា​ទ្រង់ទ្រាយ​ធំ ដោយ​ឈ្មួញ​បាន​នាំចូល​ពី​ប្រទេស​កូរ៉េ​តាមរយៈ​ការដឹក​បង្កប់​ក្នុង​ថ្នាំពេទ្យ​។ ក្រៅពីនោះ​នៅ​មាន​ករណី​បង្ក្រាប​គ្រឿងញៀន​ជាច្រើន​ទៀត​តាម​បណ្តា​ខេត្ត​នានា​។​

​សម្តេច​បាន​បញ្ជាក់ថា ទោះ​ជា​អ្នក​ជួញដូរ​មាន​ជាប់​ពាក់​ពន្ធ័​នឹង​មន្ត្រី​ប៉ូលិសក៏​មិនអាច​លើកលែង​បានដែរ​។ ប្រមុខ​រដ្ឋាភិបាល​បាន​លើក​ឧទាហរណ៍​ករណី​នៅ​ប៉ោយ​ប៉ែត​ដែល​មាន​មន្ត្រី ប៉ូលិស​ជាប់​ពាក់​ពន្ធ័​៕

ប្រាក់​នៅ​ក្នុង​​ហោប៉ៅរបស់ WB សាង​សង់​​បណ្ណា​ល័យ​មួយយឺតយ៉ាវ​ណាស់​...​យើង​ធ្វើ​​តែ​​១៨​ខែប៉ុណ្ណោះ

សម្តេច​តេជោ​ហ៊ុន សែន ​​នាយករដ្ឋ​មន្ត្រី​​ បានធ្វើ​​ការរិះគន់​ទៅលើធនាគារ​​ពិភពលោក (WB) ថា ធនាគារ​នេះ (WB) ​មាន​ការ​យឺ​ត​យ៉ាវ​​ខ្លាំង​ណាស់ក្នុង​ការ​សាង​សង់​​បណ្ណា​ល័យ​​ដែលមាន​​គំរោង​​តាំងពី​​​ឆ្នាំ​២០០៧មក​ម៉្លេះ ​ឥឡូវ​​ជិត​ដាច់ឆ្នាំ​​២០១០ ទៅហើយ​ នៅតែ​សាង​សង់​​មិន​ទាន់រួច​រាល់​​ទៀត...​​​មិនដឹង​ថា គេធ្វើ​យ៉ាង​​ម៉េច​ទេ? សម្តេច​​អគ្គ​មហា​សេនាប​តី​តេជោ ហ៊ុន សែន បាន​មាន​ប្រតិ​កម្ម​ចំពោះ​ធនាគារ​ពិភព​លោក​​បែប​​នេះ ខណៈ​សម្តេច និង​លោកជំទាវ​បណ្ឌិត​ប៊ុន រ៉ានី ហ៊ុន​ សែន ​អញ្ជើញ​ជា​អធិបតី​​ក្នុង​ពិធី​សម្ពោធ​បើក​ការដ្ឋាន​ស្ថាបនា​​ស្ពាន​អាកាស​​ទី​២ ដែល​មាន​ទីតាំង​​​ត្រង់​ផ្លូវ​បំបែក​ជា​៥ ​ភ្លើង​​ស្តុប​មន្ទីរ​​ពេទ្យ​​ព្រះ​កុសុមៈ កាលពីព្រឹកថ្ងៃទី​​២៩ ធ្នូ ២០១០ ​ប៉ុន្តែ​​ពិធីថ្លែង​សុន្ទរកថា​​ និងជួបជុំ​​ត្រូវ​បាន​​រៀបចំ​​នៅក្នុង​ទីធ្លា​​សាកលវិទ្យា​ល័យ​​ភូមិន្ទ​​ភ្នំពេញ​ ។
បណ្ណាល័យ​​ដែល​សាងសង់​​យឺតយ៉ាវ​​នេះគឺ​​ជា​បណ្ណាល័យ​​ធ្វើនៅក្នុង​បរិវេណ​​សាកលវិទ្យា​ល័យ​​ភូមិន្ទ​ភ្នំពេញ ​ជិត​៤​ឆ្នាំ​​ទៅហើយ ​នៅតែ​សាង​សង់​​មិនទាន់​ហើយទៀត ​ប្រហែល​​ជា​មកពី​លុយ​នៅ​ក្នុង​ហោប៉ៅ​​របស់គេ​​ហើយ​មើលទៅ​ ទើបបាន​ជា​​វាអញ្ចឹង​? បើ​លុយ​​​របស់​យើង​​​វិញ គឺ​យើង​ធ្វើ​លឿនជាងនេះ​ ​យើង​បាន​គិតគូរ​​សាង​សង់​​បណ្ណា​ល័យ​​​មួយផងដែរ ​​មានទំហំប៉ុន​គ្នា ធ្វើតែ​​រយៈ​​ពេល​​១៨​ខែ​ប៉ុណ្ណោះ​ រួច​រាល់​​​បាត់ទៅ​ហើយ​...​​អាហ្នឹង​​លុយរបស់​យើងផ្ទាល់​​គឺវា​អញ្ចឹង ។​ ​ស្តីពី​ស្ពាន​អាកាស​​ទី​២ ឬ​ស្ពាន​​អាកាស​ថ្មី​ដែល​គ្រោង​សាង​សង់​​នេះវិញ​ ជា​ស្ពាន​បេតុង​អាម៉េ​ មាន​ប្រវែង​៣៤៥​ម៉ែត្រ ទទឹង​១៥,២០​ម៉ែត្រ ​ហោះ​ស្រប​​តាម​មហា​វិថី​សហ​ព័ន្ធ​​រុស្ស៊ី ចំណុច​កណ្តាល​មាន​កំពស់​​៥,៥​ម៉ែត្រ យក​ត្រង់​ចំណុច​​ផ្លូវ​​បំបែក​ជា​៥​​នៃ​​មហា​វិថី​សហ​ព័ន្ធ​រុស្ស៊ី និង​ផ្លូវ​លេខ​៥៩៨ ។ ស្ពាន​អាកាស​នេះ ជា​ស្ពាន​ទ្វេ​ទិស​ចរាចរណ៍​​សំរាប់​រថយន្ត​ទៅ​មក និង​គ្មាន​​ចិញ្ចើម​សំរាប់​ថ្មើរ​ជើង​ទេ។ ស្ពាន​អាកាស​ទី​២​នេះ វែង​ហើយ​ធំ​ជាង​ស្ពាន​អាកាស​ទី​១ ក្បាល​​ថ្នល់​ដែល​អនុ​វត្ត​​ដោយ​ក្រុម​ហ៊ុន OCIC ជា​ថវិកា​បាន​មក​ពី​ជួល​ដី​កោះ​ពេជ្រ​​ដូច​ស្ពាន​ទី​១ ដែរ ។
ស្ពាន​អាកាស​ទី​២ នេះ មាន​​​ដៃ​ស្ពាន​មួយ​ទៀត ទំលាក់​ទៅ​មហា​វិថី​កម្ពុជា​ក្រោម បំបែក​ពី​​ស្ពាន​ធំ​ស្រប​មហា​វិថី​សហ​​ព័ន្ធ​រុស្ស៊ី​មាន​ប្រវែង​១៦០​ម៉ែត្រ ទទឹង​៦,៥​ម៉ែត្រ ជា​ស្ពាន​ឯក​ទិស​ចរា​ចរណ៍​​ក្នុង​ទិស​ដៅ​ចុះ​ពី​ស្ពាន​ធំ​ទៅ​មហា​វិថី​កម្ពុជា​ក្រោម​ ​ដែល​មាន​មួយ​​កន្លែង​សំរាប់​​រថយន្ត និង​មួយ​កន្លែង​សំរាប់​ម៉ូតូ និង​គ្មាន​​ចិញ្ចើម​សំរាប់​ថ្មើរ​ជើង​​ដែរ ។ ការ​ស្ថាបនា​ស្ពាន​នេះ មាន​ដាក់​បង្គោល​​​ភ្លើង​បំភ្លឺ លាប​​គំនូស​ចរា​ចរណ៍​ ​ដាក់​របាំង​បេតុង​ចែក​ទ្រូង​ស្ពាន ​ស្ថាបនា​​បង្កាន់​ដៃ​ស្ពាន​សង​​ខាង​កំពស់​១,០៨​ម៉ែត្រ ទទឹង​០,៥​ម៉ែត្រ ​មាន​ជំរាល​៥,៧%។ ស្ពាន​​មាន​សសរ​១៤​បូក​ទាំង​ដៃ​ស្ពាន និង​​​មាន​ការ​​ស្ថាបនា​សួន​ច្បារ​នៅ​​​ខាង​ក្រោម​ រៀប​ចំ​​បណ្តាញ​​អូរ​អម​សង​ខាង​​ស្ពាន និង​តំបន់​​ជុំ​វិញ។ ​​មាន​ស្ថាបនា​ពង្រីក​ផ្លូវ​កៅស៊ូ​អម​សង​ខាង​ស្ពាន​នៅ​ផ្នែក​​ខាង​លិច​ភ្លើង​ស្តុប​​ទទឹង​៧​ម៉ែត្រ និង​ផ្នែក​ខាង​កើត​ភ្លើង​​ស្តុប​ទទឹង​​៥.៥០​ម៉ែត្រ។ ក្រៅ​ពី​នេះ ​មាន​ការ​ស្ថាបនា​រង្វង់​មូល​នៅ​ខាង​លិច​សាកល​វិទ្យា​ល័យ​ភូមិន្ទ​ភ្នំពេញ និង​ស្ថាបនា​សួន​ច្បារ​សំរាប់​បែង​​ចែក​ទ្រូង​ផ្លូវ​លើ​​ផ្លូវ​លេខ​២៧១ និង​ផ្លូវ​លេខ​៥៩៨ ព្រម​ទាំង​ដាក់​ស្លាក​សញ្ញា​ចរា​ចរណ៍​​ផង​ដែរ៕ ​
ដោយ ៖ កោះឯករាជ្យ

មន្ត្រី​​ជាន់ខ្ពស់​​ថ្នាក់​​ឧត្តម​សេនីយ៍​​​​នគរ​បាល​​​ជិត​៣០​នាក់​ដល់​អាយុ​ត្រូវ​​ចូល​និវត្តន៍

រាជធានីភ្នំពេញ ៖ តាមប្រភពព័ត៌មាន​​ពី​មន្ត្រី​​ដែលស្និទ្ធ​​នឹង​ក្រសួង​​មហាផ្ទៃ​​បានធ្លោយ​​​ឱ្យ​​ដឹង​ថា ​យ៉ាង​ហោច​ណាស់​​មន្ត្រី​​​ជាន់ខ្ពស់​​ថ្នាក់​ឧត្តម​​​សេនីយ៍​​​នគរ​បាល​​ជិត៣០នាក់ត្រូវ​​ដល់​អាយុ​ចូល​និវត្តន៍ ។ លោក​ឧត្តម​​សេនីយ៍​​ឯក​ខៀវ សុភ័គ ​អ្នក​នាំ​ពាក្យ​ក្រសួង​​មហាផ្ទៃ​​ បាន​មានប្រសាសន៍​​ប្រាប់​កោះសន្តិភាព​​កាលពីព្រឹកថ្ងៃទី​​​២៩ ធ្នូ ​​២០១០ ​ឱ្យ​​ដឹង​ថា ​ថ្នាក់​​ឧត្តម​សេនីយ៍​​​ខាង​នគរបាល​ ដែល​ត្រូវ​​​ដល់​អាយុ​ចូលនិវត្តន៍​​មាន​ចំនួន​​ជិត​​៣០​​នាក់ ក្នុងនោះ​មាន​លោក​ហេង ហាក់ អគ្គ​នាយក​​នៃ​អគ្គ​នាយក​​ដ្ឋាន​ពន្ធនាគារ និង​លោក​ឧត្តម​​សេនីយ៍​​ឯក​​សូរ ផន ​អគ្គ​ស្នង​ការ​​​រង​​នគរ​បាល​ជាតិ​...​។​
​ចំណែក​ខាង​ឧត្តមសេនីយ៍​​យោធា​​ កោះ​សន្តិ​​ភាពមិន​​អាច​ទាក់ទង​​​លោក​ឧត្តម​សេនីយ៍​ឯក ឈុំ សុជាតិ ​អ្នកនាំពាក្យ​​​ក្រសួង​ការពារជាតិ បាន​ឡើយ​ ​កាលពីព្រឹកថ្ងៃ​ទី​​​២៩ ធ្នូ ​២០១០ ​ដោយ​ទូរស័ព្ទ​​របស់លោក​​ហៅ​មិន​ចូល​...​មិន​ដឹង​​ថា មាន​ថ្នាក់​​ឧត្តមសេនីយ៍​​យោធា​​ដល់​អាយុ​ត្រូវ​ចូល​​និវត្តន៍​ដែរឬ​យ៉ាង​ណា​នោះទេ?​ ប៉ុន្តែ​​តាម​ប្រភព​ព័ត៌​មាន​​បាន​ធ្លោយ​​ឱ្យ​​ដឹង​ថា ​ថ្នាក់​​ឧត្តម​សេនីយ៍​​ដែលត្រូវ​​ចូល​និវត្តន៍​​ក៏មានច្រើននាក់​ដែរ​...។ ព័ត៌​មាន​លំអិត​នឹង​ផ្សាយ​​​ជូននៅ​ពេលក្រោយ និង​នៅលើ​ទំព័រ​កាសែត​កោះសន្តិ​ភាព.