Friday, January 21, 2011

សវនាការ​ជនជាតិថៃ៧នាក់នឹងចាប់ផ្តើមនៅ​រសៀល​ថ្ងៃទី២១មករា​នេះ​

ភ្នំពេញ: សវនាការ​កាត់ក្តី​ជនជាតិ​ថៃ​ទាំង​៧​នាក់​ដែល​អាជ្ញាធរ​ខ្មែរ​ចាប់ខ្លួន​កាលពី​ថ្ងៃ​ទី​២៩​ធ្នូ​ឆ្នាំ​២០១០​ត្រូវបាន​ផ្លាស់ប្តូរ​កាលបរិច្ឆេទ​ជា​បន្ទាន់​ទៅ​តាម​សំណើរ​របស់​ជនជាប់ចោទ​។​

​សវនាការ​ដែល​គេ​គ្រោង​នឹង​បើក​ធ្វើ​នៅ​ថ្ងៃ​ទី​១​កុម្ភៈ​ខាង​មុខ​ត្រូវបាន​ផ្លាស់ប្តូរ​ដោយ​តុលាការ​សម្រេច​មក​ធ្វើ​នៅ​រសៀល​ថ្ងៃទី​២១​មករា​នេះ​វិញ​។ ការសម្រេច​នេះ​បាន​ធ្វើឡើង​កាលពី​ល្ងាច​ថ្ងៃ​ម្សិលមិញ​ដោយយោង​តាម​សំណើរ​ដោយ​ទទូច​របស់​តំណាង​ជនជាប់ចោទ​និង​ស្ថានទូត​ថៃ​។​

​ជនជាតិ​ថៃ​ទាំង​៧​នាក់​ដែល​ក្នុងនោះ​មាន​តំណាងរាស្ត្រ​ម្នាក់​ផង​ត្រូវបាន​អាជ្ញាធរ​ខ្មែរ​ចាប់ខ្លួន​កាលពី​ថ្ងៃ​ទី​២៩​ធ្នូ​ឆ្នាំ​២០១០​ខណៈ​ដែល​ពួកគេ​ដើរ​ចូល​ក្នុង​ដី​ខ្មែរ​ដោយ​ខុស​ច្បាប់​ក្នុង​ភូមិសាស្ត្រ​ចំណុច​គីឡូ​ម៉ែត​លេខ​២៦​ក្នុង​ខេត្ត​បន្ទាយមានជ័យ​។ 

ពួកគេ​ត្រូវបាន​តុលាការ​សាលាដំបូង​រាជធានី​ភ្នំពេញ​ចោទប្រកាន់​ពីបទ​ឆ្លង​ដែល​ខុសច្បាប់ និង​ចូល​ក្នុង​តំបន់​យោធា​ក្នុង​បំណង​ទុច្ចរិត​។ ប៉ុន្តែ ជនជាតិ​ថៃ​២​នាក់​ក្នុងចំណោម​៧​នាក់​ត្រូវបាន​តុលាការ​ចោទ​បន្ថែម ពី​បទ​ប៉ុនប៉ង​ប្រមូល​ព័ត៌មាន​ដែល​អាច​ធ្វើឱ្យ​អន្តរាយ​ដល់​ការ​ការពារជាតិ​។​

​រហូតមកទល់​ពេលនេះ មាន​ជនជាតិ​ថៃ​៦​រូប​ហើយ​ដែល​ត្រូវបាន​សាលា​ដំបូង​និង​សាលា ឧទ្ធរណ៍​ដោះលែង​ឱ្យ​នៅក្រៅ​ឃុំ​បណ្តោះអាសន្ន​ដោយ​កំពុង​ស្នាក់នៅ​ក្នុង​ស្ថានទូត​ថៃ​ពោល​គឺ​នៅសល់​តែ​បុរស​ម្នាក់​ឈ្មោះ វីរៈ ស៊ុម​ខ្វាន​ឃី​ត ប៉ុណ្ណោះ​ដែល​កំពុង​ជាប់​ក្នុង​មន្ទីរឃុំឃាំង​ព្រៃ​ស​៕

ដោយ : បញ្ញវន្ត CEN

No comments:

Post a Comment