Friday, January 14, 2011

កម្ពុជា​ឆ្លើយ​តប​ចំពោះ​សារ​លិខិត​របស់​រដ្ឋមន្រ្តី​ការ​បរទេស​សហរដ្ឋ​អាមេរិក​រឿង​ច្បាប់ NGO

ភ្នំពេញ ៖ រដ្ឋមន្រ្តី​ក្រសួង​ការ​បរទេស​កម្ពុជា​បាន​ឆ្លើយ​តប​ចំពោះ​សារ​លិខិត​របស់​រដ្ឋ​មន្រ្តី​ការ​បរទេស សហរដ្ឋ​អាមេរិក ដែល​សំដែង​ក្ដី​បារម្ភ​ទៅ​លើ​ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល។
កាល​ពីថ្ងៃទី៧​ ខែមករា ឆ្នាំ២០១១ លោកស្រីហ៊ីល ឡារីគ្លីនតុន រដ្ឋមន្រ្តីក្រសួងការបរទេសនៃសហរដ្ឋ អាមេរិក បាន​ចេញសារលិខិតមួយ​បង្ហាញពីការព្រួយបារម្ភ​ជុំវិញ​សេចក្ដីព្រាងច្បាប់​សមាគម និងអង្គការ​មិន មែនរដ្ឋាភិបាល ហើយ​បានស្នើឲ្យកម្ពុជាពិនិត្យឡើងវិញ​លើសេចក្ដីព្រាងច្បាប់នេះ។ ប៉ុន្តែ​កម្ពុជា​បាន​បំភ្លឺ​វិញ​ថា​សេចក្ដីព្រាង​នេះ​មិនរឹតបន្តឹងអង្គការ​សង្គមស៊ីវិល​នោះទេ។
លោកកុយ គួង អនុរដ្ឋលេខាធិការ និងជាអ្នកនាំពាក្យ​ក្រសួងការបរទេស​កម្ពុជា បានមានប្រសាសន៍ ប្រាប់កម្ពុជាថ្មី​នៅរសៀល​ថ្ងៃទី​១៤ ខែមករា ឆ្នាំ២០១១នេះថា ឯកឧត្ដម ឧបនាយករដ្ឋមន្រ្តី ហោ ណាំហុង បានផ្ញើលិខិតមួយច្បាប់ជូនលោកស្រីហ៊ីល ឡារីគ្លីនតុន ហើយកាលពីថ្ងៃទី១៣ ខែមករានេះ ដោយមានខ្លឹម​សារ៤ចំណុចថា ទី១-ច្បាប់នេះបង្កើតឡើង សម្រាប់ប្រតិបត្តិការ​របស់អង្គការ​មិនមែន​រដ្ឋាភិបាល នៅក្នុង​ប្រ ទេសកម្ពុជា ឲ្យមាន​របៀបរៀបរយ​ល្អ និងរលូន​ព្រមទាំងមាន​តម្លាភាព, ទី២-ច្បាប់នេះ​ធ្វើឡើង​ដោយមាន​ការ​យកចិត្តទុកដាក់​ផ្អែកលើមូលដ្ឋាន​ក្របខណ្ឌគតិយុទ្ធ, ទី៣-ច្បាប់នេះ​ទទួលស្គាល់​នូវការរួមវិភាគ​របស់អង្គការ មិនមែនរដ្ឋាភិបាល ក្នុងការ​ចូលរួមអភិវឌ្ឍន៍​សេដ្ឋកិច្ច សង្គម។ រាជរដ្ឋាភិបាល​រៀបចំ​ច្បាប់នេះ​ដើម្បី​សម្រប សម្រួល​អង្គការ​សង្គមស៊ីវិល​ឲ្យមាន​ប្រសិទ្ធភាព និងទី៤-ច្បាប់​នេះ​មិនមានបំណង​រឹតត្បិតសេរីភាព​របស់អង្គ​ការមិនមែន​រដ្ឋាភិបាល​នេះទេ ប៉ុន្តែ​មានបំណង​ធ្វើឲ្យមានតម្លាភាព​ក្នុងប្រតិបត្តិការ​របស់អង្គការ​សង្គមស៊ីវិល ក្នុងក្របខណ្ឌ​ច្បាប់ និង​ពង្រីកកិច្ចសហប្រតិបត្តិការ​ឲ្យ​កាន់តែមានប្រសិទ្ធ​ភាព៕
កោះកែវ

No comments:

Post a Comment