រដ្ឋមន្ត្រីក្រសួងការបរទេសថៃ បានសម្តែងក្តីរីករាយ ចំពោះការដោះលែង អោយនៅក្រៅឃុំ ជនជាតិថៃ២រូប និងរំពឹងរកការជួបជាមួយ រដ្ឋមន្ត្រីក្រសួងការបរទេសខ្មែរម្តងទៀត នាសប្តាហ៍ក្រោយ។
លោកកាស៊ីតភីរម្យ ក្នុងដំណើរទស្សនកិច្ច ទៅកាន់ប្រទេសឥណ្ឌូណេស៊ី ចំនួន៥ថ្ងៃ ត្រូវកាសែតក្នុងស្រុក បានដកស្រង់ពាក្យសម្តី ដែលនិយាយថា ការដោះលែងអោយនៅក្រៅឃុំ ដល់ជនជាតិថៃ២នាក់ គឺជាជំហានទៅមុខដ៏ធំមួយ ក្នុងបញ្ហាដែលកំពុងមានរវាងថៃនិងកម្ពុជានេះ។ លោកកាស៊ីតភីរម្យ និយាយថា ថៃក៏បានដោះលែងជនជាតិខ្មែរ ៩នាក់ អោយវិលទៅកម្ពុជា នៅក្នុងការឆ្លើយតបទៅវិញនោះដែរ។
លោកកាស៊ីតភីរម្យ បន្ថែមថា រដ្ឋាភិបាលថៃ បានបន្តសេចក្តីស្នើ របស់គេទៅមុខទៀត នៅក្នុងការសុំធានា អោយនៅក្រៅឃុំ អ្នកសេសសល់ ដទៃទៀត។ គិតរហូតតាំងពីថ្ងៃទី២៩ធ្នូ ដែលមានការចាប់ខ្លួនមក ជនជាតិថៃទាំង៧ បានស្ថិតក្នុងកន្លែងឃុំឃាំង អស់រយៈពេល១៧ថ្ងៃ ហើយ។ រដ្ឋមន្ត្រីក្រសួងការបរទេសថៃ និយាយថា លោកនឹងជួបពិភាក្សា ជាមួយនឹងរដ្ឋមន្ត្រីក្រសួងការបរទេសខ្មែរ នាសប្តាហ៍ក្រោយ ក្នុងកិច្ចប្រជុំរដ្ឋមន្ត្រីការបរទេសអាស៊ាន នៅក្នុងប្រទេសឥណ្ឌណេស៊ី។ ទាក់ទងនឹងរឿងជនជាតិថៃទាំង៧នេះដែរ ប្រភពមួយទៀត ពីក្រសួងការបរទេសថៃ បាននិយាយថា ជនជាតិថៃ៣នាក់ នឹងត្រូវគេដោះលែង អោយនៅក្រៅឃុំវេលាថ្ងៃនេះ។
No comments:
Post a Comment