ភ្នំពេញ ៖ លោកឧត្ដមសេនីយ៍ឯក ម៉ក់ ជីតូ ប្រធាននាយកដ្ឋានកណ្ដាលនគរបាលយុត្តិធម៌ក្រសួង មហាផ្ទៃ មានមតិក្នុងពិធីបិទវគ្គបណ្ដុះបណ្ដាលគ្រូបង្គោលវគ្គទី២ ស្ដីពីក្រមព្រហ្មទណ្ឌថ្មីកាលពីព្រឹក ថ្ងៃទី ១៣ ខែមករានេះថាយើងជាមន្រ្តីនគរបាលយុត្តិធម៌ត្រូវតែចេះច្បាប់។
សិក្ខាកាមដែលបញ្ចប់វគ្គបណ្ដុះបណ្ដាលចំនួន៥ថ្ងៃ មានចំនួន២៣៤នាក់ ដែលមកពីស្នងការរាជធានី-ខេត្តនានាទាំង២៤។ ការបណ្ដុះបណ្ដាលនោះមានការចូលរួមពីលោកប៊ុន ហុន អនុរដ្ឋលេខាធិការក្រសួង យុត្តិធម៌ លោកផូវ សំភី អគ្គនាយកនៃអគ្គនាយកដ្ឋានស្រាវជ្រាវ អភិវឌ្ឍន៍វិស័យយុត្តិធម៌ ជាគ្រូឧទ្ទេសនាម ក្រមព្រហ្មទណ្ឌថ្មី។
លោកឧត្ដមសេនីយ៍ឯក ម៉ក់ ជីតូ ប្រធាននាយកដ្ឋានកណ្ដាលនគរបាលយុត្តិធម៌បានមានប្រសាសន៍ នៅក្នុងពិធីនោះថា ក្នុងនាមយើងជាមន្រ្តីនគរបាលយុត្តិធម៌ ត្រូវតែចេះច្បាប់ និងក្រមព្រហ្មទណ្ឌ។ ព្រោះថា ក្រមព្រហ្មទណ្ឌជាអត្ថបទច្បាប់មួយ ដែលប្រមូលផ្ដុំនូវរាល់បទបញ្ញត្តិព្រហ្មទណ្ឌ ដោយមានការបែងចែក ជារចនាសម្ព័ន្ធត្រឹមត្រូវនិងជាឧបករណ៍មួយដ៏សំខាន់ ក្នុងការប្រើប្រាស់សម្រាប់មន្រ្តីនគរបាលអនុវត្តច្បាប់។ លោកឧត្ដមសេនីយ៍បានបញ្ជាក់ថា មន្រ្តីនគរបាលយុត្តិធម៌ត្រូវមានការប្រយ័ត្នប្រយែង៕
រាជសីហ៍
No comments:
Post a Comment