Tuesday, January 25, 2011

មន្ត្រី​រាជ​ការ​ចូល​និវត្តន៍​និង​ជន​ពិការ​ទូ​ទាំង​ខេត្ត​កំពត​ត្អូញត្អែរ​ពី​ការ​បើក​ប្រាក់​ឧបត្ថម្ភ​ប្រចាំ​ខែ​មាន​ការ​យឺត​យាវ

កំពត​ ៖ មន្ត្រី​រាជ​ការ​ចូល​និវត្តន៍​ក៏​ដូច​ជា​ជន​ពិការ​ទូ​ទាំង​ខេត្ត​កំពត​មាន​ការ​ត្អូញត្អែរ​ទៅ​និង​មន្ទីរ​សង្គម​កិច្ច​ខេត្ត​កំពត​រឿង​ខក​ខាន​ពុំ​បាន​បើក​ប្រាក់​ឧបត្ថម្ភ​ប្រចំា​ខែ​ដោយ​បាន​អូស​បន្លាយ​បន្ត​រហូត​ដល់​ជិត​១​ឆ្នាំ​ទើប​បើក​ជូន​។
បើ​តាម​ការ​អះ​អាង​ពី​មន្ត្រី​ចាស់​ចូល​និវត្តន៍​រួម​ទាំង​ជន​ពិការ​ជា​ច្រើន​រូប​សុទ្ធ​តែ​ត្អូញត្អែរ​ដូច​ៗ​គ្នា​ដោយ​ពួក​គាត់​បាន​លើ​ហេតុ​ផល​ថា​បើ​តាម​អនុក្រឹត្យ​ក៏​ដូច​ជា​ការ​ប្រកាស​របស់​ប្រ​មុខ​រាជរដ្ឋាភិបាល​គឺ​បាន​ប្រកាស​បើក​ប្រាក់​ឧបត្ថម្ភ​ក្នុង​អំឡុង​ខែ​មិនា​ឆ្នាំ​២០១០​ប៉ុន្តែ​ខាង​មន្ទីរ​សង្គម​កិច្ច​ខេត្ត​កំពត​ទើប​តែ​បើក​លុយ​ឲ្យ​ក្នុង​ខែ​មករា​ឆ្នាំ​២០១១​នេះទេ

ពួក​គាត់​បាន​ឲ្យ​ដឹង​ថា​ក្នុង​រយៈ​ពេល​ជិត​មួយ​ឆ្នាំ​នេះ​ពួក​គាត់​រស់​នៅ​អាស្រ័យ​តែ​លើ​ប្រាក់​ឧបត្ថម្ភ​របស់​រាជរដ្ឋាភិបាល​ដែល​តែង​តែ​យក​ចិត្ត​ទុក​ដាក់​គិត​គូរ​ជា​ប្រចាំ​ខែ​ប៉ុន្តែ​បែរ​ជា​ខាង​មន្ទីរ​សង្គម​កិច្ច​ខេត្ត​កំពត​ពុំ​សូវ​គិត​គូរ​បើក​ប្រាក់​ឧបត្ថម្ភ​នេះ​ឲ្យ​បាន​ទាន់​ពេល​វេលា​នោះ​ឡើយ​ជា​ហេតុ​ធ្វើ​អោយ​ពួក​គាត់​មាន​បញ្ហា​ខាង​ជីវភាព​ទៀត​ផង​ជា​ពិសេស​ដូច​ជា​ប៉ះ​ចំ​ថ្ងៃ​ចូល​ឆ្នាំ​ខ្មែរ​និង​ពិធី​បុណ្យ​ភ្ជុំ​បិណ្ឌ​ពួក​គាត់​សឹង​តែ​រក​លុយ​មួយ​រៀល​សម្រាប់​ទិញ​សម្ភារៈ​ធ្វើ​ពិធី​ពុំ​បាន​ផង​។នេះ​ជា​ការ​ព្រួយ​បារម្ភ​កាន់​តែ​ខ្លាំង​ចំពោះ​មន្ត្រី​ចូល​និវត្តន៍​ក៏​ដូច​ជា​ជន​ពិការ​គ្រប់​បណ្ដា​ស្រុក​នៃ​ខេត្ត​កំពត​ព្រោះ​ថវិកា​ក្នុង​ឆ្នាំ​២០១១​ដែល​អនុក្រឹត្យ​ប្រកាស​កាល​ពី​ខែ​មិនា​បែរ​ជា​មន្ទីរ​សង្គម​កិច្ច​បើក​នៅ​ខែ​មករា​ឆ្នាំ​២០១១​ទៅ​វិញ​។ទោះ​បី​ជា​ការ​បើក​ប្រាក់​ឧបត្ថម្ភ​២០​ភាគ​រយ​និង​ប្រាក់​បន្ថែម​របស់​រាជ​រដ្ឋាភិបាល​ចំនួន​២​ម៉ឺន​រៀល​ក្នុង​មួយ​ខែ​បាន​បើក​សរុប​គ្រប់​ចំនួន​ក៏​ដោយ​ពួក​គាត់​នៅ​តែ​ខ្វល់​ខ្វាយ​ខ្លាច​ក្រែង​ក្នុង​ឆ្នាំ​២០១១​នេះ​ខាង​មន្ទីរ​សង្គម​កិច្ច​អនុវត្តន៍​ដូច​ឆ្នាំ​២០១០​ទៀត​ពួក​គាត់​ពិត​ជា​ដាច់​ខ្យល់​ស្លាប់​ជា​មិន​ខាន​។
ពាក់​ព័ន្ធ​រឿង​រ៉ាវ​ខាង​លើ​កម្ពុជា​ថ្មី​បាន​ភ្ជាប់​ទូរស័ព្ទ​ទៅ​លោក​ ទេព ​ឆែម​ ប្រធាន​មន្ទីរ​សង្គម​កិច្ច​ខេត្ត​កំពត​សុំ​ការ​ពន្យល់​ជុំ​វិញ​បញ្ហា​នេះ​លោក​ក៏​បាន​ប្រាប់​អោយ​ដឹង​ថា​នៅ​ព្រឹក​ថ្ងៃ​ទី​២៥​ខែ​មករា​ឆ្នាំ​២០១១​នេះ​ថា​រឿង​បើក​ប្រាក់​ឧបត្ថម្ភ​វា​ពិត​ជា​មាន​ការ​យឺត​យ៉ាវ​មែន​នេះ​គឺ​ដោយ​សារ​តែ​ខាង​ធនាគារ​និង​រតនាគារ​បិទ​បញ្ជី​អស់​ទើប​ខាង​មន្ទីរ​សង្គម​កិច្ច​បើក​ប្រាក់​ពុំ​ទាន់​ពេល​វេលា​ម្យ៉ាង​ទៀត​បញ្ជី​ហិរញ្ញ​វត្ថុ​ក៏​មាន​ឧបសគ្គ​ខ្លះ​ៗ​ផង​ដែរ​ទើប​បាន​ជា​មន្ទីរ​របស់​លោក​មាន​ការ​យឺត​យ៉ាវ​ប៉ុន្តែ​បច្ចុប្បន្ន​មន្ទីរ​សង្គម​កិច្ច​ក៏​ខិត​ខំ​ប្រឹង​ប្រែង​អស់​ពី​កម្លាំង​កាយ​ចិត្ត​ហើយ​ក្នុង​ឆ្នាំ​២០១១​នេះ​លោក​ក៏​សូម​សន្យា​ថា​មិន​ឲ្យ​មាន​ការ​យឺត​យ៉ាវ​ដូច​ឆ្នាំ​២០១០​ទៀត​ឡើយ​៕
ណារិទ្ធ

No comments:

Post a Comment