Tuesday, January 25, 2011

គណបក្ស​សមរង្ស៊ី​មិនទាន់មាន​ដំណោះស្រាយ​រឿង​ប្តូរ​តំណាងរាស្ត្រ​ពាក់កណ្តាល​អាណត្តិ​


ភ្នំពេញ​: ​នៅក្នុង​សន្និសីទ​កាសែត​នៅ​ព្រឹក​ថ្ងៃទី​២៥​មករា​នេះ គណបក្ស​សមរង្ស៊ី​មិន​បាន​បង្ហាញ​ដំណោះស្រាយ​ណាមួយ​ចំពោះ​ការតវ៉ា​របស់​បេក្ខជន​បំរុង​តំណាងរាស្ត្រ​ទាំង​៨​រូប​ទេ​។ នៅពេល​ចោទសួរ​អំពី​បញ្ហា​នេះ លោក​យឹម សុវណ្ណ អ្នកនាំពាក្យ​គណបក្ស​ប្រឆាំង​បាន​អះអាង​ថា​នេះ​ជា​សិទ្ធិ​ប្រជាធិបតេយ្យ​របស់​ពួកគេ​។​

​លោក​យឹម សុវណ្ណ​អះអាង​ដោយ​ខ្លី​ថា គណបក្ស​សម រង្ស៊ី​កំពុង​អនុវត្ត​តាម​រូបមន្ត​សមស្រប​មួយ​តាមរយៈ​ការផ្តល់​តួនាទី​ខ្លះ​ដល់​ពួកគេ​ក្នុង​ពេល​រង់ចាំ​ការបោះឆ្នោត​អាណត្តិ​ក្រោយ​។ ក្រុម​អ្នក​ចុះហត្ថលេខា​លើ​ញ្ញត្តិ​ទាំង​៨​រូប​នៅ​មិនទាន់​មាន​ប្រតិកម្ម​អ្វី​ទេ​នៅ​ព្រឹក​នេះ​ដោយ​ពួកគេ អះអាង​ថា​រង់ចាំ​លទ្ធផល​នៃ​ការប្រជុំ​នៅ​ល្ងាច​នេះ​សិន​។​

​បេក្ខជន​តំណាងរាស្ត្រ​៨​នាក់​ដែល​ត្រៀម​ខ្លួន​ចូល​កាន់តំណែង​នៅ​ចុងខែ​មិនា​ខាងមុខ បានឆ្លៀតឱកាសដែលលោក​សម រង្ស៊ី​បាន​កោះប្រជុំ​គណៈអចិន្ត្រៃយ៍​គណបក្ស​​នៅ​ទីក្រុង​ម៉ានីល​ប្រទេស​ភី​លី​ពី​នដើម្បីតវ៉ា​។ សមាជិក​អចិន្ត្រៃយ៍​គណបក្ស​សម រង្ស៊ី បាន​ធ្វើដំណើរ​ទៅ​កាន់​ទីនោះ​ដើម្បី​ជួប​ប្រជុំ​ជាមួយ​លោក​សម​រង្ស៊ី​ប្រធាន​បក្ស​ប្រឆាំងពីថ្ងៃទី១៦ដល់២៤មរាឆ្នាំ២០១១​ព្រោះតែលោកសមរង្ស៊ី​មិន​អាច​ចូល​ស្រុក​ខ្មែរ​បាន​ទេ​ព្រោះ​ខ្លាច​អាជ្ញាធរ​ចាប់​ដាក់​ពន្ធនាគារ​។​

​សមាជិក​គណៈនាយក​គ​ណ​បក្ស​សម រង្ស៊ី​៨​រូប​ដែល​ត្រៀម​ខ្លួន​ចូល​កាន់តំណែង​ជា​សមាជិក​សភា​ពាក់កណ្តាល​អាណត្តិ​បាន​សរសេរ​ញ្ញត្តិ​មួយ​រំលឹក​លោក​សម​រង្ស៊ី​ឱ្យ​គោរព​ការសន្យា​របស់​ខ្លួន​ដែល​បាន​សន្យា​តាំងពីដើម​អាណត្តិ​ថា​ពួកគេ​នឹង​ទទួល​តំណែង​ជា​តំណាងរាស្ត្រ​នៅ​ពាក់កណ្តាល​អាណត្តិ​ពោល​គឺ​ចាប់ពី​ថ្ងៃ​ទី​២៤​មិនា​ឆ្នាំ​២០១១​តទៅ​។​

​ញ្ញត្តិ​នេះ​ត្រូវបាន​ធ្វើឡើង​កាលពី​ថ្ងៃ​ទី​២២​មករា​បន្ទាប់ពី​មាន​ព័ត៌មាន​ថា​លោក​សម រង្ស៊ី​ចង់ បំភ្លេច​កិច្ចសន្យា​នេះ​ចោល​វិញ​ដោយសារ​ភាពចម្រូងចម្រាស​ផ្ទៃក្នុង​ជា​ច្រើន​។ សមាជិក គណៈនាយក​ទាំង​៨​រូប​បាន​រំលឹក​ឱ្យ​លោក​សម​រង្ស៊ី​គោរព​បាវ​នា​របស់​គណ​បក្ស​គឺ​សីលធម៌ សច្ចៈ​ធម៌ និង​យុត្តិធម៌​។​

​សូមបញ្ជាក់​ថា គោលការណ៍​តំណាងរាស្ត្រ​ពាក់កណ្តាល​អាណត្តិ​នេះ​ត្រូវបាន​គណបក្ស​សម រង្ស៊ី​សម្រេច​ជា​ផ្លូវការ​កាលពី​ថ្ងៃ​ទី​១១​ឧសភា​ឆ្នាំ​២០០៨​។ ប៉ុន្តែ​រយៈ​ពេល​២​ឆ្នាំ​កន្លះ​បាន​កន្លងទៅ គោលការណ៍​នេះ​បាន​បង្ក​ឱ្យមាន​ភាពចម្រូងចម្រាស​ជាច្រើន​នៅក្នុង​ចំណោម​ក្បាលម៉ាស៊ីន​ដឹកនាំ​គណបក្ស​សម រង្ស៊ី​។ មនុស្ស​ជាច្រើន​ជាពិសេស​តំណាងរាស្ត្រ​ក្នុង​តំណែង​បាន​ជំទាស់​។ រហូតមកទល់​ពេលនេះ​គោលការណ៍​នេះ​នៅតែ​មិន​អាច​ដោះស្រាយ​ចេញ​ដដែល​៕

ដោយ : រតនា

No comments:

Post a Comment