Tuesday, January 25, 2011

អ្នក​ភូមិ​មួយ​ភាគ​ធំ​នៅ​ឃុំ​អូរ​បី​ជាន់​ជួប​ការ​ខ្វះ​ខាត​ទឹក​ប្រើ​ប្រាស់​ប្រចាំ​ថ្ងៃ

បន្ទាយ​មាន​ជ័យ​៖ ​នៅ​ចម្ងាយ​ប្រមាណ​១០០​ម៉ែត្រ​ពី​ព្រំ​ដែន​ថៃ​ភាគ​ខាង​ជើង​ប្រទេស​កម្ពុជា​ត្រង់​ចំណុច​ ភូមិ​ជោគ​ជ័យ​ ឃុំ​អូរ​បី​ជាន់​​ស្រុក​អូរ​ជ្រៅ​ខេត្ត​បន្ទាយ​មាន​ជ័យ​មាន​ប្រជាពលរដ្ឋ​មួយ​ភាគ​ធំ​ជួប​ការ​លំបាក​រក​ទឹក​ប្រើ​ប្រាស់​សម្រាប់​ធ្វើ​ជា​អាហារ​ ងូត​ និង​ស្រោច​ដំណាំ​។
ក្នុង​កិច្ច​ដំណោះ​ស្រាយ​ជា​បណ្តោះ​អាសន្ន​នា​ថ្ងៃ​ទី​២៤​ខែ​មករា​នេះក្រុម​ការងារ​ដឹក​នាំ​ដោយ​ លោក​ ហួត​​ ឃាង​វេង​ អគ្គ​នាយក​រង​អគ្គនាយក​​ដ្ឋាន​វិទ្យុ​និង​ទូរទស្សន៍​បាយ័ន​ លោក​ នង​ គន្ធាវី​​ សមាជិក​ក្រុម​ការងារ​ស្ថាបនា​អណ្តូង​ទឹក​ស្អាត​ និង​ក្រុម​ការ​ងារ​វិទ្យុ​និង​ទូរទស្សន៍​បាយ័ន​ជា​​ច្រើន​រូប​បាន​​អញ្ជើញ​ចុះ​ធ្វើការ​ប្រគល់​ទទួល​សមិទ្ធ​ផល​​អណ្តូង​ទឹក​ស្អាត​ចំនួន​៥​បន្ថែម​ទៀត​ជា​អំណោយ​របស់​សម្តេច​អគ្គ​មហា​សេនា​បតី​តេជោ​ ហ៊ុន​ សែន​ និង​លោក​ជំទាវ​ ឲ្យ​ប្រជាពលរដ្ឋ​ប្រើ​ប្រាស់​ជា​ផ្លូវ​ការ​។

យោង​តាម​ប្រសាសន៍​របស់​មេឃុំ​លោក​ សួង​ មឿន​ បាន​ឲ្យ​ដឹង​ថា​ ទូ​ទាំង​ឃុំ​អូរបី​ជាន់​កន្លង​មក​នៅ ​រាល់​ដើម​រដូវ​ប្រាំង​និង​​ដើម​រដូវ​វស្សា​ប្រជាពលរដ្ឋ​ជា​ច្រើន​មាន​ការ​លំបាក​ខ្លាំង​ក្នុង​ការ​រក​ទឹក​មក​ប្រើ​ប្រាស់​ដោយ​សារ​​កង្វះ​ទឹក​ស្អាត​ប្រើ​ប្រាស់​នេះ​ហើយ​ទើប​ធ្វើ​ឲ្យ​​ប្រជាពលរដ្ឋ​មួយ​ចំនួន​​ជីក​ត្រពាំង​ តូច​ៗ​​ ខ្លះ​គ្មាន​ទឹក​ប្រើប្រាស់​ត្រូវ​ទៅ​ដង​នៅ​ឆ្ងាយ​ដោយ​ការ​ទិញ​ទឹក​យក​មក​ប្រើ​ប្រាស់​ហើយ​ប្រភព​ទឹក​ដែល​បាន​មក​ទាំង​នោះ​មិន​ធានា​ដល់​ភាព​អនាម័យ​ និង​សុខភាព​របស់​គេ​ឡើយ​។
តំណាង​ជាង​ជីក​អណ្តូង​បាន​ឲ្យ​ដឹង​ថា​ តំបន់​នេះ​មួយ​ភាគ​ធំ​ពិបាក​ជីក​អណ្តូង​ហើយ​អណ្តូង​ដែល​ជីក​បាន​មក​គឺ​បាន​ជួល​ឲ្យ​គេ​ជីក​ក្នុង​តម្លៃ​ខ្ពស់​ក្នុង​ខណៈ​នេះ​គេ​ក៏​សង្កេត​ឃើញ​មាន​ត្រពាំង​អណ្តូង​ទឹក​របស់​អ្នក​ភូមិ​មួយ​ចំនួន​មាន​ការ​រីង​​ស្ងួត​ដោយ​សារ​មាន​តម្រូវ​ការ​ប្រើប្រាស់​ទឹក​ច្រើន​អាកាសធាតុ​ក្តៅ​ហួតហែង​និង​ការ​បម្រែបម្រួល​​អាកាសធាតុ​ជា​ដើម​។​ តំណាង​ប្រជាពលរដ្ឋ​បាន​ឲ្យ​ដឹង​ថា​ ការ​ទទួល​បាន​អណ្តូង​ទឹក​ស្អាត​ ជា​អំណោយ​របស់​​សម្តេច​តេ​ជោ​និង​លោក​ជំទាវ​ គឺ​ប្រជាពលរដ្ឋ​នៅ​ក្នុង​ភូមិ​មាន​ ការ​សប្បាយ​ចិត្ត​ជា​ខ្លាំង​ ហើយ​ទឹក​អណ្តូង​នេះ​ទៀត​គឺ​បាន​ស្ថាបនា​ទាន់​ពេល​វេលា​ និង​ទាន់​តម្រូវ​ការ​​ ចង់​បាន​ជា​ចាំបាច់​។
លោក​ ហួត​ ឃាង​វេង​ តំណាង​ឲ្យ​លោក​ជំទាវ​ហ៊ុន​ ម៉ាណា​ អគ្គ​នាយិកា​អគ្គ​នាយក​ដ្ឋាន​វិទ្យុ​និង​ទូរទស្សន៍​បាយ័ន​មាន​ប្រសាសន៍​ថា​នេះ​ជា​ការ​យក​ចិត្ត​ទុក​ដាក់​និង​រួម​ចំណែក​ជួយ​រំលែក​ទុក​ លំបាក​ប្រជាពលរដ្ឋ​ជួប​ការ​ខ្វះខាត​ទឹក​ស្អាត​ប្រើប្រាស់​នៅ​តំបន់​ដាច់ស្រយាល​​​ និង​ការ​លើក​កំពស់​សុខភាព​អនាម័យ​របស់​ប្រជាពលរដ្ឋ​តាម​រយៈ​ការ​សំណើ​សុំ​ពី​អាជ្ញាធរ​មូលដ្ឋាន​ ការ​ស្ថាបនា​អណ្តូង​ទឹក​ស្អាត​ ។ ​លោក​ ហួត​ ​ឃាង​វេង​ បន្ត​ថា​ អនុវត្ត​តាម​ទិសដៅ​ការងារ​មនុស្ស​ធម៌​ អគ្គ​នាយក​ដ្ឋាន​វិទ្យុ​និង​ទូរទស្សន៍​បាយ័ន​គ្រោង​​និង​បន្ត​អនុវត្ត​សកម្មភាព​ការ​ចុះ​ពិនិត្យ​ផ្តល់​ព្យាបាល​ជំងឺ​ជូន​ប្រជាពលរដ្ឋ​ដោយ​ឥត​គិត​ថ្លៃ​ស្ថាបនា​អណ្តូង​ទឹក​ស្អាត​ជូន​ប្រជាពលរដ្ឋ​ប្រើប្រាស់​ឲ្យ​​បាន​នៅ​គ្រប់​ខេត្ត​ក្រុង​ទូទាំង​ប្រទេស​ ដោយ​ឡែក​ក្នុង​រយៈ​៣​ឆ្នាំ​កន្លង​មក​នេះ​គឺ​រៀង​រាល់​ថ្ងៃ​ទី​៧​​ខែ​មករា​ក្រុម​ការងារ​បាន​ចុះ​ស្ថាបនា​អណ្តូង​ ហើយ​មាន​តំបន់​ដាច់​ស្រយាល​ជួប​​ការ​ខ្វះខាត​ទឹក​នៅ​ក្នុង​ប្រមាណ​១៥​ ​ខេត្ត​ក្រុង​បាន​ទទួល​អណ្តូង​ទឹក​ដែល​ជា​អំណោយ​​សម្តេច​តេជោនិង​លោក​ជំទាវ​ហើយ ​ការងារ​នេះ​ បាន​ធ្វើ​នៅ​បុគ្គលិក​មាន​ការ​ទំនេរ​ពី​ការងារ​។
លោក ​ហួត​​ ឃាង​វេង​បន្ត​ថា​ អណ្តូង​ទឹក​ស្អាត​ដែល​អគ្គនាយកដ្ឋាន​វិទ្យុ​និង​ទូរទស្សន៍​ បាយ័ន​បាន​ចាប់​ផ្តើម​សិក្សា​ និង​ស្ថាបនា​នៅ​ថ្ងៃ​ទី​៧​​ខែ​មករា​ឆ្នាំ​២០១១​ នេះ​ហើយ​ការ​ប្រារព្ធ​ពិធី​ទទួល​និង​ប្រគល់​ជូន​ប្រជាពលរដ្ឋ​ប្រើប្រាស់​ជា​ផ្លូវការ​នាពេលនេះ​នឹង​បានរួមចំនែក​ជួយ​សម្រាល​ទុកលំបាក​ដល់​ប្រជាពលរដ្ឋ​ក្នុង​ការ​រក​ទឹក​ដែល​ជា​អាហារ​មួយ​មិន​អាច​ខ្វះ​បាន​សម្រាប់​ជីវិត​មនុស្ស​ សត្វ​ និង​រុក្ខជាតិ​ទូទៅ​ ហើយ​​សង្ឃឹម​​ថា​​​ បង​ប្អូន​ដែល​អាស្រ័យ​ផល​ទឹក​អណ្តូង​ទាំងអស់​ត្រូវ​ចេះ​ប្រើប្រាស់​រួម​គ្នា​ រួម​គ្នា​ថែ​រក្សា​ភាពអនាម័យ​និង​ការ​ធានា​បាន​ការ​ប្រើប្រាស់​បាន​យូរ​អង្វែង​។
ក្នុង​ឱកាស​នោះ​ លោក​ ហួត​ ឃាងវេង និង​លោក នង គន្ធាវី ​និង​ក្រុម​ការងារ បាន ចែក​អំណោយ​សម្តេច​តេជោ និង​លោក​ជំទាវ មាន​ថវិកា ១​ម៉ឺន​រៀល សារ៉ុង ១ ជូន​ប្រជាពលរដ្ឋ​ចូល​រួម​ចំនួន​ប្រមាណ​ជាង​២០០នាក់៕

No comments:

Post a Comment