Tuesday, January 25, 2011

កម្ពុជា​ជា​កន្លែង​ស្វែងយល់​និង​ទទួល​បទពិសោធន៍​អំពី​សកម្មភាព​មីន​

ភ្នំពេញ​: លោក ច​ន ច​ច​អូ​វិន​(John George Owens)​ទីប្រឹក្សា​ផ្នែក​ហ្វឹកហ្វឺន​បច្ចេក​ដោះមីន​និង​ជា​តំណាង​អាជ្ញាធរ​មីន​ប្រទេស​ពេ​រូ បាន​ដឹកនាំ​គណៈប្រតិភូ​អាជ្ញាធរ​មីន​ពេ​រូ​ដែលមាន​គ្នា ៥ នាក់​មក​បំពេញ​ទស្សន កិច្ច​នៅ​កម្ពុជា​ក្នុង​គោលបំណង​ស្វែងយល់​និង​ផ្លាស់ប្តូរ​បទពិសោធន៍​អំពី​សកម្មភាព​ដោះមីន​នៅ​កម្ពុជា​។ 

គណៈប្រតិភូ​បាន​ទៅ​ទស្សនា​អគ្គលេខាធិការដ្ឋាន​អាជ្ញាធរ​មីន​កម្ពុជា​កាលពី​
​ព្រឹក​ថ្ងៃ​ទី ២៤ ខែ មករា ឆ្នាំ ២០១១​។​

​លោក ជុំ ប៊ុន​រ៉ុង អគ្គលេខាធិការ​អាជ្ញាធ​រ​មីន​កម្ពុជា​បាន​ជម្រាបជូន​អំពី​ការវិវត្តន៍​នៃ​សកម្មភាព​មីន​ចាប់ពី​ឆ្នាំ ១៩៩២ រ​ហួត​មកដល់​បច្ចុប្បន្ន​និង​ផែនការ​ទៅ​អនាគត​ពី​ឆ្នាំ ២០១០​ដល់ ២០១៩ នៃ​ការអនុវត្ត​ផែនការ​សកម្មភាព​មីន​ដែល​រាជរដ្ឋាភិបាល​ទើបបាន​សម្រេច​ជា​ផ្លូវការ​កន្លង​ទៅ​ថ្មីៗ​នេះ ។​

​លោក​បាន​បញ្ជាក់ថា ស្ថានភាព​គ្រាប់​មីន​និង​គ្រាប់​មិន​ទាន់​ផ្ទុះ​នៅ​កម្ពុជា​បាន​រង​ឥទ្ធិពល​សង្គ្រាមលោកលើកទី​២ សង្គ្រាម​ឥណ្ឌូចិន​និង​សង្គ្រាមរ៉ាំរ៉ៃ​ជិត​៣​ទស្សវត្សរ៍​បានធ្វើឱ្យ​កម្ពុជា​ទទួល​រង​នូវ​វិនាសកម្ម​គ្រប់យ៉ាង ទាំង​ជីវិត​មនុស្ស សម្ភារៈ និង​ហេដ្ឋារចនាសម្ព័ន្ធ​ត្រូវបាន​បំផ្លាញ​ស្ទើរ​គ្មាន​សល់​។​

​សង្គ្រាម​បាន​បន្សល់ទុក​គ្រាប់ មីន​និង​គ្រាប់​មិន​ទាន់​ផ្ទុះ​យ៉ាងច្រើន​សន្ធឹកសន្ធាប់​គ្រប់​ដណ្តប់​លើ​ផ្ទៃដី​ប្រមាណ​ជាង ៤ ពាន់​គីឡូម៉ែត្រ​ក្រឡា គ្រាប់​មីន​ចំនួន ៤,៦ លាន​គ្រាប់​បាន​បង្កប់​នៅក្នុង​ដី​និង​គ្រាប់​យុទ្ធភណ្ឌ​មិន​ទាន់​ផ្ទុះ​ដែល​ទម្លាក់​ដោយ​យន្តហោះ ចម្បាំង​ពី​ឆ្នាំ ១៩៦០ ដល់ ឆ្នាំ ១៩៧៥ មាន​ចំនួន ២,៧៥ លាន​តោន​ហើយ​វា​បាន​បង្ករ​ឱ្យ​ប្រជាពលរដ្ឋ​កម្ពុជា ស្លាប់​បាត់បង់​ជីវិត​និង​ពិការ​អស់​ជាង ៦ ម៉ឺន​នាក់ ។​
​    ​
​លោក​បាន​បន្តថា លទ្ធផល​នៃ​កិច្ចប្រតិបត្តិការ​ដោះមីន​ដោយ​ប្រតិបត្តិ​ករ​ធំៗ​ទាំង​៤​មាន NPMEC. CMAC MAG. nig HALO Trust NGOs និង​ក្រុមហ៊ុន​ដោះ​មីន​ផ្សេងទៀត​គិត​មកដល់​ឆ្នាំ ២០១០ នេះ សម្រេចបាន​លើ​ផ្ទៃដី ៦១៤ គីឡូម៉ែត្រ​ក្រឡា រកឃើញ​និង​កម្ទេច​ចោល​គ្រាប់​មីន​ប្រឆាំង​មនុស្ស​ជិត​១​លាន​គ្រាប់ មីន​ប្រឆាំង​រថក្រោះ​ជាង ២ ម៉ឺន​គ្រាប់ និង​គ្រាប់​មិន​ទាន់​ផ្ទុះ​ជាង​២​លាន​គ្រាប់ ហើយ​តាមរយៈ​នៃ​កិច្ច សហប្រតិបត្តិការ​ក្នុង​វិស័យ​មីន​បាន​កាត់បន្ថយ​អត្រា​ជន​រង​គ្រោះថ្នាក់​បាន​ធ្លាក់ចុះ​យ៉ាង​លឿន​ដែល​ក្នុង​ឆ្នាំ ១៩៩៦ មាន​ជន​រង​គ្រោះថ្នាក់​ដោយសារ​មីន​និង​គ្រាប់​មិន​ទាន់​ផ្ទុះ​ចំនួន​ជាង ៤.០០០ តែ​នៅ​ឆ្នាំ ២០១០​កន្លង ទៅ​នេះ​មាន​ចំនួន​តែ ២.៦០០ នាក់​ប៉ុណ្ណោះ​។​

​លោក ច​ន ច​ច​អូ​វិន បាន​មានប្រសាសន៍​បញ្ជាក់​ជូន​អាជ្ញាធរ​មីន​កម្ពុជា​ថា ពេ​រូជាប្រទេស​មួយ​ដែល​មាន​បញ្ហា​គ្រាប់​មីនដូច​កម្ពុជា​ដែរ​ដែល​មាន​ចំការមីន​ជាង ៤៥ ចំការ​មីន​ហើយ​ប៉ះពាល់​យ៉ាងខ្លាំង​សម្រាប់​ការអភិវឌ្ឍន៍​ប្រទេស​ដោយ មាន​គ្រាប់មីន​ប្រមាណ​ជាង ៣៥.០០០ គ្រាប់​ដាក់​ក្នុង​សម័យ​សង្គ្រាម​តាម​ព្រំដែន​។​

​លោក​ប្រធាន​គណៈប្រតិភូ​បាន​វាយតម្លៃ​និង​កោតសរសើរ​ចំពោះ​សមិទ្ធិផល​និង​សកម្មភាព​កម្ចាត់​មីន​នៅក្នុង​ប្រទេស​កម្ពុជា​ដែល​ទទួលបាន​ជោគជ័យ​ហើយ​សង្ឃឹមថា ដំណើរ​ទស្សនកិច្ច​នេះ​នឹង​ដកស្រង់​បាន​នូវ​បទ ពិសោធន៍​ពី​កម្ពុជា​ហើយ​យកទៅអនុវត្ត​សកម្មភាព​កម្ចាត់​មីន​នៅ​ប្រទេស​ប៉េ​រូ​ឱ្យបាន​ជោគជ័យ​ដូច​នៅ​កម្ពុជា​ដែរ​។​

​នេះ​មិនមែន​ជា​លើក​ទី​១​ទេ តែ​ជា​ញឹកញាប់​ណាស់​ដែល​ប្រទេស​នានា​លើ​សាកល​លោក​បាន​មក​ស្វែងយល់​ដើម្បី​ដក​បទពិសោធន៍​ស្តី​ពី​ការដោះមីន​នៅ​កម្ពុជា​៕

ដោយ : សម្បត្តិ

No comments:

Post a Comment