Tuesday, January 25, 2011

អាជ្ញាធរ​ស្រុក​បន្ទាយ​ស្រី​ចុះ​ស្រង់​ស្ថិតិ​ប្រជាពលរដ្ឋ​រស់​នៅ​ក្នុង​តំបន់​​លោក​ពើយ​ ប៉ែល​ គ្រប់​គ្រង​

ខេត្ត​សៀមរាប​៖ អាជ្ញាធរ​ស្រុក​បន្ទាយ​ស្រី​បាន​ចុះ​ស្រង់​ស្ថិតិ ប្រជាពលរដ្ឋ​ដែល​រស់​នៅ​លើ​ដី​ ព្រៃ​ជាំ​ក្នុង​តំបន់​លោក​ពើយ​ ប៉ែល​ គ្រប់​គ្រង​ដើម្បី​ស្វែង​រក​ចំនួន​ប្រជាពលរដ្ឋ​ដែល​មាន​ផ្ទះ​រស់​នៅ​ទី​នោះ​​ពិត​ប្រាកដ​ ក្រោយ​ពី​ក្រុម​សមត្ថកិច្ច​ប៉េអិម​ផ្ទៃ​ប្រទេស​ធ្វើ​ការ​ចាប់​ខ្លួន​លោក​ឧត្ដមសេនីយ៍​ក្លែង​ក្លាយ​រូប​នេះ​ កាល​ពី​ពេល​កន្លង​ទៅ​។
ជា​មួយ​និង​ការ​ចុះ​ស្រង់​ស្ថិតិ​របស់​អាជ្ញាធរ​នេះ​ ក្រុម​ប្រជាពលរដ្ឋ​រាប់​រយ​គ្រួសារ​ដែល​រស់​នៅ​ លើ​ដី​មិន​ស្រប​ច្បាប់​ស្ថិត​ក្នុង​ភូមិ​ខ្នា​រង្វាស់​ ឃុំ​ឃុន​រាម​ ស្រុក​បន្ទាយ​ស្រី​ ខេត្ត​សៀម​រាប​ បាន​សម្តែង​ពី​ការ​ ព្រួយ​អារម្មណ៍​យ៉ាង​ខ្លាំង​អំពី​ការ​បាត់បង់​លំនៅដ្ឋាន​របស់​ខ្លួន​ ដោយ​ខ្លាច​រដ្ឋ​ដក​ហូត​យក​ដី​តំបន់​នេះ​ទុក​ជា​ សម្បត្តិ​រដ្ឋ​វិញ​។
អ្នក​ភូមិ​ម្នាក់​ក្នុង​ចំណោម​រាប់​រយ​នាក់​បាន​រៀប​រាប់​ឲ្យ​ដឹង​ថា​ គាត់​បាន​ទិញ​ដី​នេះ​ពី​លោក​ ពើយ​ ប៉ែល​ ដែល​មាន​ក្បាល​ដី​៣០​ម៉ែត្រ​និង​បណ្តោយ​១០០​ម៉ែត្រ​ក្នុង​តម្លៃ​៣០០​ដុល្លារ​ ហើយ​សាង​សង់​លំ នៅ​ដ្ឋាន​ខ្នាត​តូច​ដើម្បី​រស់​នៅ​។​ អ្នក​ភូមិ​រូប​នេះ​បាន​បន្ត​ថា​ ការ​ទិញ​ដី​របស់​គាត់​ពី​លោក​ពើយ​ ប៉ែល​ ពុំ​មាន​ ធ្វើ​លិខិត​ស្នាម​បញ្ជាក់​ពី​រដ្ឋ​អំណាច​មូលដ្ឋាន​ទេ​ គឺ​មាន​តែ​ស្នាម​មេ​ដៃ​និង​ហត្ថលេខា​របស់​លោក​ពើយ​ ប៉ែល​ ប៉ុណ្ណោះ​។
ក្រុម​អ្នក​ភូមិ​ជា​ច្រើន​នាក់​បាន​រៀបរាប់​ឲ្យ​ដឹង​ថា​ ពួក​គាត់​មក​រស់នៅ​ទី​នេះ​គឺ​សុទ្ធ​តែ​ទិញ​ដី​ លោក​ពើយ​ ប៉ែល​ ទាំង​អស់​ដោយ​ធ្វើ​ការ​បែងចែក​ជា​ដីឡូត៍​ក្បាល​​៣០​ម៉ែត្រ​បណ្តោយ​១០០​ម៉ែត្រ​ហើយ​ មាន​អ្នក​ខ្លះ​គេ​លក់​បន្ត​ទៅ​អ្នក​ផ្សេង​ដើម្បី​យក​ប្រាក់​ចំណេញ​ ចំណែក​អ្នក​ខ្លះ​ទៀត​ធ្វើ​ផ្ទះ​រស់​នៅ​។​ ក្រុម​អ្នក​ភូមិ​បាន​បន្ត​ថា​ ក្នុង​ចំណោម​ប្រជាពលរដ្ឋ​ទាំងអស់​នេះ​មាន​អ្នក​ខ្លះ​ទិញ​ដី​ពី​លោក​ពើយ​ ប៉ែល​ និង​អ្នក​ខ្លះ​ ទៀត​គេ​មក​ចាប់​យក​ដី​តំបន់​នេះ​ដោយ​មិន​បាន​ទិញ​ពី​បុគ្គល​ណា​ទេ​។
ក្រុម​ប្រជាពលរដ្ឋ​បាន​បន្ត​ថា​ មុន​ដំបូង​មាន​ប្រជាពលរដ្ឋ​តែ​ជាង​២០​គ្រួសារ​ប៉ុណ្ណោះ​ដែល​រស់​ នៅ​ទី​នេះ​​រហូត​មក​ទល់​ពេលនេះ​ចំនួន​ប្រជាពលរដ្ឋ​បាន​កើន​ឡើង​រហូត​ដល់​រាប់​រយ​គ្រួសារ​ឯណោះ​។​​ ប្រជា​ពល​រដ្ឋ​បន្ត​ថា​ នៅ​ពេល​ដែល​ឃើញ​មន្ត្រី​របស់​អាជ្ញាធរ​ចុះ​មក​ស្រង់​ស្ថិតិ​បែប​នេះ​ពួក​គាត់​មាន​ការ​ព្រួយ​បារម្មណ៍​អំពី​​ការ​​បាត់​បង់​​លំនៅដ្ឋាន​​របស់​​ពួក​​គាត់​​។​​ ក្រុម​​ប្រជាពលរដ្ឋ​​ក៏​​​បាន​​សំណូមពរ​​ដល់​​អាជ្ញាធរ​​បើ​​ដក​​ ហូត​យក​ដី​នេះ​គួរ​តែ​ដោះស្រាយ​គោលនយោបាយ​ដល់​ពួកគាត់​ដែល​ទិញ​ដី​ពី​លោក​ពើយ​ ប៉ែល​ ផង​។
អភិបាល​ស្រុក​បន្ទាយ​ស្រី​លោក​ ម៉ឹង​ វុទ្ធី​ បាន​ថ្លែង​ប្រាប់​តាម​ ទូរស័ព្ទ​ថា​ ការ​ចុះ​ស្រង់​ស្ថិតិ​របស់​អាជ្ញាធរ​នេះ​គឺ​ក្នុង​គោលបំណង​ស្វែង​រក​ចំនួន​ប្រជាពលរដ្ឋ​ដែល​កំពុង​រស់នៅ​លើ​ដី​នេះ​ឲ្យ​បាន​ពិត​ប្រាកដ​ដើម្បី​ភាព​ងាយស្រួល​ក្នុង​ការ​គ្រប់គ្រង​រដ្ឋបាល​ប៉ុណ្ណោះ​។​ លោក​អភិបាល​ស្រុក​បាន​បន្ត​ថា​ ដី​តំបន់​ព្រៃ​ជាំ​ដែល​បងប្អូន​ប្រជាពលរដ្ឋ​កំពុង​រស់នៅ​នេះ​ស្ថិត​នៅ​ក្រោម​ការ​គ្រប់គ្រង​របស់​ស្ថាប័ន​រដ្ឋបាល​ព្រៃឈើ​ដូច្នេះ​ការ​សម្រេច​បែប​ណា​នោះ​គឺ​អាស្រ័យ​លើ​ស្ថាប័ន​មួយ​នេះ​។
មន្ត្រី​រដ្ឋបាល​ព្រៃឈើ​សង្កាត់​កន្ទួត​ខ្នារ​ក្រៅ​ដែល​មាន​ភារកិច្ច​គ្រប់គ្រង​តំបន់​ព្រៃ​ជាំ​នេះ​បាន​ឲ្យ​ដឹង​ថា​ ដីព្រៃ​ឈើ​តំបន់​ព្រៃ​ជាំ​ជា​ប្រភេទ​ព្រៃ​ពាក់​កណ្តាល​ស្រោង​និង​ព្រៃ​របោះ​ហើយ​ត្រូវ​លោក​ ពើយ​ ប៉ែល​ កាប់​ទន្ទ្រាន​កាន់​កាប់​អស់​ចំនួន​ជាង​១៨០០​ហិកតា​។​ មន្ត្រី​រដ្ឋបាល​ព្រៃឈើ​បាន​បន្ត​ថា​ សមត្ថកិច្ច​រដ្ឋបាល​ព្រៃឈើ​បាន​ចុះ​ទប់​ស្កាត់​ជា​ច្រើន​លើក​តែ​ត្រូវ​លោក​ពើយ​ ប៉ែល​ ប្រើ​កង​កម្លាំង​យោធា​ដែល​ ខ្លួន​គ្រប់គ្រង​ប្រឆាំង​រារាំង​ភារកិច្ច​របស់​មន្ត្រី​ជំនាញ​។
មន្ត្រី​ដដែល​បាន​បន្ត​ទៀត​ថា​ ដោយ​សារ​តែ​សកម្មភាព​រំលោភ​បំពាន​របស់​លោក​ពើយ​ ប៉ែល​ ចេះ​តែ​រីក​រាល​ដាល​ធំ​ឡើង​ ខណ្ឌ​រដ្ឋបាល​ព្រៃឈើ​សៀមរាប​បាន​ដាក់​ពាក្យ​បណ្តឹង​ទៅ​តុលាការ​ដើម្បី​ចាត់​ការ​បុគ្គល​​នេះ​តាម​ផ្លូវ​ច្បាប់​ ហើយ​តុលាការ​ក៏​បាន​ជំនុំជម្រះ​លើ​សំណុំ​រឿង​នេះ​រួច​ម្តង​មក​ហើយ​។
នាយ​ខណ្ឌ​រដ្ឋបាល​ព្រៃឈើ​សៀមរាប​លោក​ទា​ គឹម​សុទ្ធ​ បាន​ឲ្យ​ដឹង​ថា​ ស្ថាប័ន​រដ្ឋបាល​ ព្រៃឈើ​កំពុង​ខិត​ខំ​ប្រឹងប្រែង​ធ្វើ​កិច្ចការ​នេះ​ដើម្បី​យក​ដី​ព្រៃឈើ​តំបន់​ព្រៃ​ជាំ​នេះ​មក​រក្សា​ទុក​ជា​សម្បត្តិ​សាធារណៈ​របស់​រដ្ឋ​វិញ​។ លោក​បាន​បន្ត​ថា​ រដ្ឋបាល​ព្រៃឈើ​ត្រៀម​គម្រោង​រួច​ជា​ស្រេច​ក្នុង​ការ​ដាំ​ដើម​ឈើ​ ឡើង​វិញ​នៅ​តំបន់​នេះ​ក្នុង​នោះ​និង​ដាំ​ដើម​ឈើ​ប្រភេទ​ប្រណិត​ដូចជា​ ឈើ​បេង​ ឈើ​គ្រញូង​ជាដើម​៕
អង្គរជ័យ

No comments:

Post a Comment