Tuesday, January 25, 2011

ស្រុក​ត្រពាំង​ប្រាសាទ​ខេត្ត​ឧត្តរ​មាន​ជ័យ​ការ​ដឹក​ជញ្ជូន​ឈើ​កក្រើក​វិញ​ហើយ​នៅ​ក្នុង​ទឹក​ដី​ស្រុក​ត្រពាំង​ប្រាសាទ

ឧត្តរមានជ័យ​ ៖ បទ​ល្មើស​ព្រៃ​ឈើ​នៅ​តែ​មាន​ធ្វើ​សកម្មភាព​ដឹក​ជញ្ជូន​យ៉ាង​គគ្រឹក​គគ្រេង​ក្នុង​ទឹក​ដី​ស្រុក​ត្រពាំង​ប្រាសាទ​ខេត្ត​ឧត្តរ​មាន​ជ័យ​។
តាម​ប្រភព​ព័ត៌មាន​ពី​ស្រុក​ត្រពាំង​ប្រាសាទ​បាន​ប្រាប់​អ្នក​យក​ព័ត៌មាន​កម្ពុជា​ថ្មី​ថា​រាល់​ថ្ងៃ​គេ​នៅ​តែ​ឃើញ​មាន​រថយន្ត​កាមរី​និង​រថយន្ត​នី​សាន់​ដឹក​ឈើ​ចេញ​ពី​ក្នុង​ទឹក​ដី​ស្រុក​ត្រពាំង​ប្រាសាទ​តាម​ផ្លូវ​យុទ្ធ​សាស្ត្រ​ថ្មី​ឆ្ពោះ​មក​កាន់​ស្រុក​ស្វាយ​លើ​និង​ស្រុក​សុទ្រ​និគម​មក​ខេត្ត​សៀមរាប​។

ប្រភព​ដដែល​បាន​បន្ត​ថា​តាម​បណ្ដោយ​ផ្លូវ​ខាង​លើ​ពី​ស្រុក​ត្រពាំង​ប្រាសាទ​ខេត្ត​ឧត្តរ​មាន​ជ័យ​មក​ទល់​និង​ស្រុក​ស្វាយ​លើ​គ្រប់​ៗ​គ្នា​គេ​ឃើញ​មាន​សមត្ថកិច្ច​និង​ជំនាញ​រាប់​មិន​អស់​តែ​រថយន្ត​នៅ​តែ​ដឹក​ឈើ​បាន​យ៉ាង​រលូន​ប្រភព​បន្ត​ថា​ម្ចាស់​រថយន្ត​ដែល​ដឹក​ឈើ​ខាង​លើ​ដែល​យើង​បាន​ឃើញ​នេះ​ជា​របស់​ឈ្មោះ​ ផន​ អ៊ីគី ហៅ​​ វិត ជា​ឈ្មួញ​ដុះ​ស្លែ​នៅ​ស្រុក​ស្វាយ​លើ​ខេត្ត​សៀមរាប​។
តែ​បើ​តាម​ការ​រិះ​គន់​ចំ​ៗ​ពី​សំណាក់​ប្រជា​ពលរដ្ឋ​នៅ​តាម​ដង​ផ្លូវ​យុទ្ធ​សាស្ត្រ​ថ្មី​នេះ​គេ​ឃើញ​មាន​សមត្ថកិច្ច​កង​រាជ​អាវុធ​ហត្ថ​ ប៉ូលិស​និង​មេព្រៃ​នៅ​តាម​បណ្ដោយ​ផ្លូវ​ប្រដាក់​គ្នា​ដូច​ខ្យង​​តែ​រថយន្ត​នៅ​តែ​ដឹក​ឈើ​យ៉ាង​រលូន​ហើយ​មាន​សុវត្ថិ​ភាព​ទៀត​ផង​។
ប្រភព​ខាង​លើ​បាន​បន្ថែម​ទៀត​ថា​ការ​ដឹក​ជញ្ជូន​ឈើ​បាន​រលូន​ឆ្លង​កាត់​២​ទៅ​៣​ស្រុក​ខាង​លើ​តែ​បើ​សមត្ថកិច្ច​តាម​ផ្លូវ​មិន​បាន​ទទួល​លាភ​​សក្ការ​ពី​ឈ្មួញ​ទាំង​នោះ​ទេ​តើ​រថយន្ត​ដឹក​ឈើ​អាច​ដឹក​ជញ្ជូន​ដោយ​ស្រួល​យ៉ាង​នេះ​ទេ​?​ ។ពាក់​ព័ន្ធ​និង​ការ​ដឹក​ជញ្ជូន​ឈើ​ខាង​លើ​លោក​នាយ​ខណ្ឌ​ខេត្ត​ឧត្តរ​មាន​ជ័យ​បាន​ដឹង​ដែល​ឬ​យ៉ាង​ណា​ឬ​ដឹង​ហើយ​ធ្វើ​ជា​មិន​ដឹង​ឬ​មួយ​ក៏​កូន​ចៅ​នៅ​តាម​ដង​ផ្លូវ​មិន​រាយការណ៍​ប្រាប់​អោយ​ដឹង​៕

No comments:

Post a Comment