Tuesday, January 25, 2011

មណ្ឌល​គី​រី​: ទទួល​ចំណេះដឹង​អភិបាលកិច្ច​មូលដ្ឋាន​នៅ​ប្រទេស​ជប៉ុន

មណ្ឌលគិរី: មន្ត្រី​ពាក់ព័ន្ធ​មួយចំនួន​របស់​ខេត្ត​មណ្ឌល​គី​រី​បានទទួល​ចំណេះដឹង​ស្តីអំពី​អភិបាលកិច្ច​មូលដ្ឋាន ដើម្បី​ពង្រឹង​នូវ​សមត្ថភាព​កាន់តែ​ប្រសើរឡើង​ទាក់ទង​ទៅនឹង​អភិបាលកិច្ច​មូលដ្ឋាន​ឆ្លើយតប​ទៅនឹង​ការអភិវឌ្ឍន៍​តាម​ភូមិ​-​ឃុំ ។​
​    
​តាមរយៈ​សិក្ខាសាលា​ផ្សព្វផ្សាយ​បទពិសោធន៍​និង​ចំណេះដឹង​ស្តីអំពី អភិបាលកិច្ច​មូលដ្ឋាន​នៅ​ប្រទេស​ជប៉ុន ដែល​ត្រូវ​បានរៀបចំ​ទ្បើង​ដោយមាន​ការគាំទ្រ​ពី​ទីភ្នាក់ងារ​សហប្រតិបត្តិ​ការ​អន្តរជាតិ​នៃ​ប្រទេស​ជប៉ុន (JICA) ប្រចាំ​នៅ​កម្ពុជា រួមសហការ​ជាមួយ​គំរោង​កសាង​សមត្ថភាព​អភិវឌ្ឍន៍ជនបទ​នៅក្នុង​ខេត្ត​ភាគ​ឥ​សាន្ត ហៅ​កាត់​ថា (PRDNEP)  របស់ JICA និង សមាគម​មិត្តភាព​យុវជន​កម្ពុជា​-​ជប៉ុន (JAAC)  កាលពី​ចុង​សប្តាហ៍​កន្លងទៅនេះ ។​
 
   ​លោក ហេង សំណាង អភិបាលរង​ខេត្ត​មណ្ឌល​គី​រី​បាន​មានប្រសាសន៍ថា សិក្ខាសាលា​នេះ​ធ្វើឡើង​ក្នុង​គោលបំណង​ដើម្បី​ចែករំលែក​នូវ​បទពិសោធន៍ និង​ចំណេះដឹង​ដែល​ពាក់ព័ន្ធ​នឹង​ការងារ អភិបាលកិច្ច​មូលដ្ឋាន​នៅ​ប្រទេស​ជប៉ុន និង​ពិភាគ្សា​អំពី​បទពិសោធន៍​ល្អៗ ដែល​អាច​យកមកអនុវត្ត​ន៍​បាន​នៅក្នុង​ភារកិច្ច​ប្រចាំថ្ងៃ ដើម្បី​ជាការ​ចូលរួមចំណែក​ក្នុងការ​ធ្វើឱ្យ​ប្រសើរ​ទ្បើង​នូវ​វិស័យ​អភិបាលកិច្ច​មូលដ្ឋាន​នៅ​កម្ពុជា​។ ការចែករំលែក​បទពិសោធ​ន៍​នេះ​នឹងធ្វើ​ទ្បើង តាមរយៈ​បទ​បង្ហាញ​របស់​សិក្ខាកាម ដែល បាន​ចូលរួម​កម្មវិធី បណ្តុះបណ្តាល​សំរាប់​អ្នកដឹកនាំ​វ័យក្មេង នៅ​ប្រទេស​ជប៉ុន ដែល​បាន​ប្រព្រឹត្តទៅ​កាល ពីថ្ងៃ​ទី​១៤ ខែវិច្ឆិកា ដល់ ថ្ងៃទី​១ ធ្នូ ឆ្នាំ​២០១០ កន្លងទៅនេះ ក្រោម​ប្រធានបទ  អភិបាលកិច្ច​មូលដ្ឋាន ។​

​ជាមួយគ្នា​នោះ​លោក​អភិបាលខេត្ត​បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​ទីភ្នាក់ងារ​សហប្រតិបត្តិ​ការ អន្តរជាតិ​នៃ​ប្រទេស​ជប៉ុន JICA ក៏ដូចជា​គំរោង PRDNEP ដែល​បានសំរេច​ជ្រើស​រើសយក​ខេត្ត​ម​ណ្ធ​ល​គី​រី ជាទី​តាំង​ក្នុងការ​រៀបចំ​សិក្ខាសាលា​នេះ ។ នេះ​ជាការ​ផ្តល់ឱកាស​ដ៏​ល្អ​សំរាប់​មន្ត្រី​ពាក់ព័ន្ធ​នៅ ថ្នាក់​ខេត្ត និង​ថ្នាក់ស្រុក នៅក្នុង​ខេត្ត​មណ្ឌល​គី​រី​ទាំងមូល អាច​រៀនសូត្រ​នូវ​ចំណេះដឹង និង​បទពិសោធន៍​ថ្មីៗ​បន្ថែមទៀត សំរាប់​ការងារ​អភិវឌ្ឍ​មូលដ្ឋាន​របស់​ពួកគាត់ ។ 

 លោក ភោគ ភី​រ៉ា តំណាង​ការិយាល័យ JICA ប្រចាំ​នៅ​កម្ពុជា​បាន​មានប្រសាសន៍​ឱ្យដឹងថា JICA បាន​ផ្តោតលើ​ការយកចិត្តទុកដាក់​លើ​អភិបាលកិច្ច​ល្អជា​អតិ​ភាព​មួយ​ក្នុង​អតិ​ភាព​នានា ដែល​ជួយ​ដល់​កម្ពុជា​ក្នុងនោះ​មាន​គម្រោង​២ គឺ PILAC2 និង PRDNEP ព្រមទាំង​វគ្គ​បណ្តុះបណ្តាល​នានា​ដូចជា TPYL ជាដើម​៕

ដោយ : សេសា

No comments:

Post a Comment