រាជធានីភ្នំពេញ ៖ មេអំបៅដ៏ធំចំលែកមួយក្បាល មានពណ៌លឿងដូចមាសបានហើរចូលទៅទុំលើជញ្ជាំងផ្ទះមួយនៅភូមិបោះអង្កាញ់ សង្កាត់ព្រែកឯង ខណ្ឌមានជ័យ កាលពីវេលាម៉ោង៩ព្រឹក ថ្ងៃទី២១ មករា ឆ្នាំ២០១១ ។លោកស្រីសួន នី អាយុ៥០ឆ្នាំ ជាម្ចាស់លំនៅឋានមានប្រសាសន៍ថា នៅពេលគាត់ឡើងទៅលើផ្ទះបំណងបិទបារ៉ែតភ្លើង ដើម្បីចេញទៅចូលរួមពិធីជប់លៀងមង្គលការកូនអ្នកស្រុកស្រាប់តែប្រទះឃើញមេអំបៅចំលែកនេះកំពុងទំលើជញ្ជាំងក្តារនៅមាត់បង្អួច ។ គាត់បានហៅកូនឡើងទៅមើលមេអំបៅចំលែកនោះ ។ កូនរបស់គាត់ខ្លះចង់លូកដៃចាប់វាលេង ប៉ុន្តែគាត់ និងកូនខ្លះទៀតឃាត់ ព្រោះចង់ទុកវាគ្រាន់មើល និងចង់ដឹងថា តើពេលណាទើបវាហើរចេញពីក្នុងផ្ទះវិញ ។
យុវជនម្នាក់ជាកូនម្ចាស់ផ្ទះនិយាយថា មេអំបៅចំលែកនេះ សាំងខ្លាំងណាស់ គឺវាអត់ហើរទៅណាទេ ទោះបីជាលូកដៃរកប៉ះ ឬបិទបង្អួចខ្លាំងៗក៏ដោយ ។ មេអំបៅនេះពេលត្រដាងស្លាបពីម្ខាងទៅម្ខាងមានប្រវែងជាងមួយចង្អាម និងមានពណ៌ដូចមាស ។ ចុងស្លាបវាម្ខាងៗមានរូបដូចក្បាលពស់គួរឱ្យចាប់អារម្មណ៍ណាស់ ។ ម្ចាស់ផ្ទះមិនមានការភ័យខ្លាចមេអំបៅនេះទេ ព្រោះវាសាំង និងមានពណ៌ដូចមាស គួរឱ្យចង់គយគន់ ។ លោកស្រីសួន នី មានប្រសាសន៍ថា មុនពេលមេអំបៅចំលែកហើរចូលផ្ទះមួយថ្ងៃ គាត់យល់សប្តិឃើញពាងទឹកធំនៅខាងក្រោយផ្ទះអណ្តែតឡើងទៅលើគ្រែ ។ តាមរយៈការយល់សប្តិនេះ គាត់កាត់ចាក់ឆ្នោតត្រូវ៥០០រៀល ។ ពេលមានមេអំបៅចំលែកហើរចូលផ្ទះបែបនេះ គាត់ប្រាថ្នាសុំតែសេចក្តីសុខ និងចំរុងចំរើនក្នុងគ្រួសារតែប៉ុណ្ណោះ ។
សត្វមេអំបៅជាទូទៅ គឺអំបូរវាកើតចេញពីដង្កូវ ។ ដង្កូវដែលក្លាយទៅជាមេអំបៅចំលែកនោះទំនងមិនមែនជាដង្កូវតូចតាចទេ ព្រោះវាមានស្លាបធំគួរឱ្យចំលែក ឯដងខ្លួនប៉ុនម្រាមដៃ ។ ពុំទាន់មានអ្នកជំនាញណានិយាយថា ដង្កូវដែលក្លាយខ្លួនជាមេអំបៅប្រភេទនេះជាដង្កូវប្រភេទអ្វីឡើយ ។ ម្ចាស់លំនៅឋានមិនដេញមេអំបៅនោះចេញពីផ្ទះទេ គឺស្រេចតែចិត្តវា បើចង់នៅផ្ទះហ្នឹងក៏នៅបើចង់ហើរចេញទៅវិញក៏ហើរទៅ ។ សូមរំលឹកថា មេអំបៅប្រភេទនេះកោះសន្តិភាពធ្លាប់បានចុះផ្សាយម្តងរួចមកហើយ កាលពីឆ្នាំទៅ ដោយទទួលបានពីអ្នកអានម្នាក់ដែលថតបាន និងមានរូបរាងដូចគ្នា គឺស្លាបមេអំបៅចំលែកនោះមានរូបក្បាលពស់គួរឱ្យខ្លាច ។ នេះគឺជាមេអំបៅទី២ហើយដែលប្រទះឃើញ ៕
ដោយ ៖ កោះឯករាជ្យ
No comments:
Post a Comment