ខេត្តឧត្តរមានជ័យ ៖ ជនជាប់ចោទជាមេខ្យល់នាំពលករទៅធ្វើការនៅប្រទេសថៃដែលប្តីឈ្មោះហួត យីន អាយុ២៦ឆ្នាំ និងប្រពន្ធឈ្មោះសល ហាក់ អាយុ២៦ឆ្នាំដែរ រស់នៅភូមិគូ ឃុំគោកខ្ពស់ ស្រុកបន្ទាយអំពិល បានត្រូវសមត្ថកិច្ចប៉ូលិសក្រុងសំរោងឃាត់ខ្លួនកាលពីរសៀលថ្ងៃទី១៩ មករា ខណៈព្យាយាមនាំពលករចំនួន១៦នាក់ ក្នុងនោះមានក្មេងតូចចំនួន២នាក់ផង ចូលទៅប្រទេសថៃ ។ លោកវរសេនីយ៍ត្រីនួន អេត អធិការប៉ូលិសក្រុងសំរោង បានឱ្យដឹងថា មុនពេលឃាត់ខ្លួន បុរស-ស្ត្រីប្តីប្រពន្ធនេះគឺសមត្ថកិច្ចបានធ្វើការស៊ើបអង្កេតជាច្រើនខែមកហើយឃើញថា ប្តីប្រពន្ធនេះ រកស៊ីនាំពលករចូលទៅធ្វើការនៅក្នុងប្រទេសសៀមដោយខុសច្បាប់ដោយយកកំរៃក្នុងម្នាក់ពី១ពាន់ទៅ២ពាន់បាត ។ ពួកគេប្រើល្បិចទិញសំបុត្រចូលទៅតាមមាត់ច្រកទ្វារអន្តរជាតិអូរស្មាច់់ ក្នុងតម្លៃ១០បាត បន្ទាប់មកធ្វើដំណើរបន្តចូលទៅតាមបណ្តាខេត្តផ្សេងៗក្នុងប្រទេសថៃជាច្រើនលើកមកហើយ ។
លោកវរសេនីយ៍ត្រីបន្តទៀតថា ជាក់ស្តែងនារសៀលថ្ងៃទី១៩ មករា ទាំងពីរនាក់ប្តីប្រពន្ធនេះបានប្រមូលប្រជាពលរដ្ឋដែលរស់នៅក្នុងស្រុកបន្ទាយអំពិលចំនួន១៦នាក់ ក្នុងនោះមានក្មេងចំនួន២នាក់ផង អាយុ៤ឆ្នាំ និងអាយុ៦ឆ្នាំ ធ្វើដំណើរតាមរថយន្តនីស្សាន់ មួយគ្រឿង បំណងចូលទៅប្រទេសថៃ ហើយត្រូវសមត្ថកិច្ចប៉ូលិសស្ទាក់ចាប់បាននៅចំណុចភូមិផ្អុង សង្កាត់កូនក្រៀល ក្រុងសំរោង និងនាំខ្លួនមកអធិការដ្ឋានក្រុងដើម្បីសាកសួរ ។ បន្ទាប់ពីធ្វើការសាកសួរ ពលករទាំង១៦នាក់ បានឆ្លើយបំភ្លឺថា ពួកគេត្រូវមេខ្យល់ទាំងពីរនាក់ប្តីប្រពន្ធនាំទៅធ្វើជាពលករនៅក្នុងប្រទេសសៀម ដើម្បីរកការងារបានប្រាក់កំរៃខ្ពស់ ហើយមេខ្យល់នេះតំរូវឱ្យបង់លុយក្នុងម្នាក់ពី១ពាន់ទៅ២ពាន់បាត ។ រីឯមេខ្យល់ទាំងពីរនាក់ប្តីប្រពន្ធឆ្លើយថា ខ្លួនពិតជាបាននាំប្រជាពលរដ្ឋខ្មែរចូលទៅធ្វើការនៅប្រទេសសៀមមែន ។ លោកអធិការក្រុងបានឱ្យដឹងទៀតថា បន្ទាប់ពីសាកសួររួចហើយលោកក៏បានធ្វើការអប់រំប្រជាពលរដ្ឋទាំង១៦នាក់ ដែលចាញ់បោកមេខ្យល់នោះឱ្យវិលត្រឡប់់ទៅលំនៅឋានវិញ រីឯមេខ្យល់ទាំងពីរនាក់ប្តីប្រពន្ធសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តនៅថ្ងៃទី២០ មករា ៕
ដោយ ៖ កោះឯករាជ្យ
No comments:
Post a Comment