ដោយសារតែសោភណភាពខ្សាច់នៅឆ្នេរកែបកាន់តែបាត់បង់ទៅៗរហូតប្រែជាពណ៌ក្រម៉ៅ ភ្ញៀវទាំងឡាយហាក់មានការខកចិត្ត ព្រោះមិនហ៊ានចុះហែលលេងកម្សាន្តដោយសារខ្លាចប៉ះ ពាល់ដល់សុខភាពផ្ទាល់ខ្លួន ។ ជាមួយទិដ្ឋភាពបែបនេះ មតិប្រជាពលរដ្ឋ ក៏ដូច ជាមន្ត្រីរាជការមួយចំនួនបាននិយាយរិះគន់ថា បើសិនជាការផ្លាស់ប្តូរគុណភាពខ្សាច់មិនត្រូវបានធ្វើឡើងទេ ខេត្តមួយនេះនឹងបាត់បង់ចំណូលដល់គ្រប់ផ្នែកទាំងអស់ ដែលពាក់ព័ន្ធជាមួយសេវាកម្មទេសចរណ៍ ព្រោះតែភ្ញៀវបង្វែទិសសំដៅទៅកន្លែងផ្សេង ។
អ្នកលក់ដូរតាមឆ្នេរសមុទ្រកែបបានឲ្យដឹងថា បច្ចុប្បន្នភ្ញៀវទេសចរភាគច្រើនមិនហ៊ានចុះហែលទឹកលេងដូចមុនទេ ព្រោះពួកគេឃើញខ្សាច់ពណ៌អាក្រក់ពេក ខ្លាចផ្តល់ផលអាក្រក់ដល់រាងកាយរបស់ពួកគាត់ ។ ដូច្នេះការលក់ដូររបស់គាត់ចំណូលមិនសូវបានទេ ដោយភ្ញៀវខ្លះគេសុខចិត្តជិះទូកបន្តទៅ លេងដល់កោះទន្សាយឯណោះ ។ បើសិនជារដ្ឋមិនផ្លាស់ប្តូរខ្សាច់ទេ ពួកគាត់ពិតជាដាច់បាយហើយ ។
លោក ហាស់ សារ៉េត អភិបាលខេត្តកែបបានឲ្យដឹង កាលពីរសៀលថ្ងៃទី២២ ខែមករា ឆ្នាំ២០១១នេះថា ចំពោះបញ្ហាខ្សាច់នេះ លោកបានគិតគូរតាំងពីលោកទើបតែចូលមកដល់ខេត្តនេះម្ល៉េះ ព្រោះវាជាចំណុច មួយដ៏សំខាន់បំផុតក្នុងការទាក់ទាញភ្ញៀវ តែដោយសារខេត្តនេះនៅខ្វះសព្វមុខពេក ។ តែត្រូវសិក្សាពីលក្ខណៈបច្ចេកទេស ពីរបបខ្យល់ទឹកជោរនាច ដោយគម្រោងនោះត្រូវបានថ្នាក់លើគាំទ្រហើយ តែដោយនៅដំណាច់ឆ្នាំមុន ការចំណាយថ្នាក់ជាតិលើមុខព្រួញសំខាន់ៗ ច្រើនក៏ទុករឿងនេះសិនទៅ ។ ឆ្នេរខ្សាច់ ជាមុខសញ្ញាសំខាន់ណាស់ ព្រោះអាជ្ញាធរកំពុងតែខ្វល់ខ្វាយ ជាពិសេសលើវិស័យទេសចរណ៍នេះឯង ដូចឃើញស្រាប់ហើយព្រោះតែការកែលំអកន្លែងលេងនេះ មិនទាន់បានសមរម្យ លោកបានដឹកនាំមន្ត្រីរាជការទៅបោសសម្អាតនៅកោះទន្សាយនាពេលកន្លងមក ដើម្បីឲ្យភ្ញៀវនៅបន្តមកកាន់ខេត្តកែបចៀសវាងការខាតបង់ ដោយសារតែភ្ញៀវបង្វែទិសទៅកន្លែងផ្សេង ។
លោក ហាស់ សារ៉េត បញ្ជាក់ទៀតថា ការងារនេះត្រូវការពិគ្រោះយោបល់គ្នាទៀត ហើយមិនមែនត្រឹមតែក្រសួងមួយអាចសម្រេចបាននោះទេ ពោលគឺត្រូវពិគ្រោះច្រើនស្ថាប័ន ព្រោះវាជាការចំណាយកម្រិតខ្ពស់មិនមែនតិចតួចបានទេ ៕
No comments:
Post a Comment