ភ្នំពេញៈ សហមេធាវីរបស់ អៀង សារី បានស្នើឱ្យសាលាក្ដីខ្មែរក្រហម កាត់ទោសត្រឹមតែពាក់កណ្ដាលថ្ងៃរាល់ ការបើកសវនាការម្ដងៗ។ មូលហេតុ នៃការស្នើសុំនេះ ដោយសារតែលោក អៀង សារី មានបញ្ហាសុខភាព។
ការស្នើនេះធ្វើឡើងកាលពីថ្ងៃពុធ ដល់អង្គជំនុំជម្រះសាលាដំបូងរបស់ សាលាក្ដីខ្មែរក្រហមដោយក្រុមមេធាវីសម្អាងទៅលើមូលហេតុសុខភាពរបស់ កូនក្ដីរបស់ពួកគេ ។
សំណើនេះធ្វើឡើង ពេលដែលអង្គ ជំនុំជម្រះសាលាដំបូងគ្រោងនឹងកាត់ ទោសអតីតមេដឹកនាំកំពូលនៃរបបកម្ពុជា ប្រជាធិបតេយ្យរបស់ពួកខ្មែរក្រហម បួននាក់នៅក្នុងសំណុំរឿង០០២ នៅក្នុង អំឡុងខែមិថុនាឆ្នាំនេះ។
សហមេធាវីកម្ពុជាលោក អាង ឧត្ដម និងសហមេធាវីអន្ដរជាតិលោក ម៉ាយ ឃើល កាណាវ៉ាស(Michael Karnavas ) បានលើកឡើងនៅក្នុងសំណើរបស់ខ្លួនថា អៀង សារីឈឺខ្នងហើយបណ្ដាលឱ្យមាន ការឈឺចាប់នៅពេលដែលអង្គុយយូរ ។
សហមេធាវីនេះថ្លែងថា កូនក្ដីរបស់ ខ្លួនមានបញ្ហាតម្រងនោម ហើយគាត់ ពិបាកនឹងប្រមូលអារម្មណ៍ និងថាមពល សម្រាប់អង្គុយនៅក្នុងសវនាការរយៈ ពេលយូរ ។
សហមេធាវីទាំងពីររូបក៏បានស្នើផងដែរ សុំឱ្យមានការសម្រាករយៈពេល ១៥នាទី រាល់ការបើកសវនាការម្ដងៗ។
លោកអាង ឧត្ដម សហមេធាវី កម្ពុជាមានប្រសាសន៍ថា ការបើកសវ នាការរយៈពេលពេញមួយថ្ងៃនិងធ្វើឱ្យ កូនក្ដីរបស់លោកកាន់តែមានសភាព ជំងឺធ្ងន់ខ្លាំង ។
លោកអាង ឧត្ដម ថ្លែងថា “ខ្ញុំកត់ សម្គាល់ថា គាត់មិនអាចអង្គុយបានទេ ពេញម៉ោងពេញថ្ងៃនោះ គឺដូចឱ្យគាត់ កាន់តែឈឺធ្ងន់ទៅ ហើយរឹតតែបង្អាក់ ពេលវេលារបស់តុលាការទៅវិញទេ។ យើង មើលឃើញថា ការជំនុំជម្រះក្ដីតែមួយ ពេលសម្រាប់មួយថ្ងៃជាការសមរម្យ”។
លោកឡាស អលសិន មន្ដ្រីផ្នែក ទំនាក់ទំនងកិច្ចការច្បាប់របស់សាលា ក្ដីខ្មែរក្រហមមានប្រសាសន៍ថា សាលា ដំបូងនឹងពិចារណាទៅលើសំណើរបស់ ក្រុមមេធាវីការពារក្ដី ។
លោកឡាស អលសិន ថ្លែងថា “តុលាការ បានទទួលសំណើពីលោក អៀង សារី ហើយ។ តុលាការនឹងពិចារណាលើ សំណើនេះ ខណៈដែលពេលនេះ តុលាការ កំពុងរៀបចំផែនការសម្រាប់ការកាត់ ទោស។ ប៉ុន្ដែយើងមិនទាន់ដឹងថា តើ តុលាការនឹងសម្រេចលើសំណើនេះនៅ ពេលណានោះទេ”។
អតីតឧបនាយករដ្ឋមន្ដ្រីនិងជារដ្ឋ មន្ដ្រីការបរទេសខ្មែរក្រហមអៀង សារី អាយុ៨៥ឆ្នាំនៅឆ្នាំនេះ ត្រូវចោទប្រកាន់ ពីបទឧក្រិដ្ឋកម្មសង្គ្រាមឧក្រិដ្ឋកម្មប្រល័យ ពូជសាសន៍ និងឧក្រិដ្ឋកម្មប្រឆាំងមនុស្ស ជាតិ ។
របបកម្ពុជាប្រជាធិបតេយ្យរបស់ ពួកខ្មែរក្រហមត្រូវរងស្ដីបន្ទោសចំពោះ មរណភាពឱ្យប្រជាជនកម្ពុជាពី១.៧ លាននាក់ទៅ២.២លាននាក់ ចន្លោះ ពីឆ្នាំ១៩៧៥ ដល់ឆ្នាំ ១៩៧៩ ៕
ដោយ ៖ សហការី
No comments:
Post a Comment