ខេត្តព្រះសីហនុ ៖ អត្តសញ្ញាណប័ណ្ណចំនួនជាង៧០០សន្លឹក ត្រូវអាជ្ញាធរយកទៅចែកជូនប្រជាពលរដ្ឋរស់នៅក្នុងឃុំចំនួនពីរក្នុងស្រុកព្រៃនប់ ។ ពិធីនេះបានធ្វើឡើងកាលពីថ្ងៃទី២១ មករា នៅក្នុងវត្តព្រៃនប់ ឃុំព្រៃនប់ ក្រោមអធិបតីភាពលោកទិត វុទ្ធី អភិបាលស្រុកព្រៃនប់ លោកវរសេនីយ៍ត្រី សៅ ស៊ាន ប្រធានការិយាល័យស្ថិតិ និងអត្តសញ្ញាណប័ណ្ណស្នងការដ្ឋាននគរបាលខេត្ត លោកវរសេនីយ៍ត្រី ឈុន វ៉ាង អនុប្រធានការិយាល័យស្ថិតិ លោកអធិការ អធិការរង មេឃុំ នាយប៉ុស្តិ៍ និងប្រជាពលរដ្ឋចូលរួមយ៉ាងច្រើន ។
បន្ទាប់ពីលោកប៉ែន សំបូរ មេឃុំព្រៃនប់ ឡើងអានរបាយការណ៍សង្ខេបរួចមក លោកទិត វុទ្ធី អភិបាលស្រុកព្រៃនប់ បានឡើងមានមតិសំណេះសំណាលនឹងបកស្រាយពន្យល់ណែនាំពីអត្ថប្រយោជន៍ និងតួនាទីយ៉ាងសំខាន់របស់អត្តសញ្ញាណប័ណ្ណ ក្នុងនោះលោកអភិបាលស្រុកបានឱ្យដឹងថា អត្តសញ្ញាណប័ណ្ណ គឺជាប័ណ្ណសំរាប់សំគាល់ខ្លួនមួយ ដែលចង្អុលបង្ហាញពីសញ្ជាតិ ពីនាមត្រកូល ទីកន្លែងកំណើត និងទីលំនៅបច្ចុប្បន្ន ហើយអត្តសញ្ញាណប័ណ្ណនេះ គឺជាលិខិតសំគាល់ខ្លួនដែលស្របច្បាប់សំរាប់យកទៅបំពេញលិខិតស្នាមផ្សេងៗគ្រប់បែបយ៉ាងដែលជាតំរូវការចាំបាច់របស់ប្រជាពលរដ្ឋគ្រប់ជាន់ថ្នាក់ ។
លោកអភិបាលស្រុកបានបន្តថា អត្តសញ្ញាណប័ណ្ណដែលយកមកចែកជូននាពេលនេះមានចំនួន៧៨៧នាក់ ក្នុងនោះចែកជូនប្រជាពលរដ្ឋមកពីឃុំទួលទទឹង ចំនួន៣៣៤នាក់ ប្រុសចំនួន១៥៣នាក់ ស្រី១៨១នាក់ និងឃុំព្រៃនប់ ចំនួន៤៥៣នាក់ ប្រុសចំនួន២០៥នាក់ ស្រីចំនួន២៤៨នាក់ ហើយចំពោះអត្តសញ្ញាណប័ណ្ណនេះ គឺធ្វើជូនប្រជាពលរដ្ឋចាប់ពីអាយុ១៥ឆ្នាំឡើងទៅ ។ ជាចុងបញ្ចប់លោកអភិបាលស្រុកបានសំណូមពរ និងផ្តាំផ្ញើ ដល់ប្រជាពលរដ្ឋដែលបានទទួលអត្តសញ្ញាណប័ណ្ណ សូមថែរក្សាអត្តសញ្ញាណប័ណ្ណនេះ ឱ្យបានល្អ កុំឱ្យមានការបាត់បង់ ព្រោះអត្តសញ្ញាណប័ណ្ណនេះមានសុពលភាពរហូត១០ឆ្នាំឯណោះ ហើយបើមានការបាត់បង់សុំរាយការណ៍ជូនអាជ្ញាធរមូលដ្ឋានជាប្រញាប់ ៕
ដោយ ៖ កោះឯករាជ្យ
No comments:
Post a Comment