ភ្នំពេញ ៖ សម្តេចតេជោនិងលោកជំទាវបានប្រកាសជួយឧបត្ថម្ភថវិកាផ្ទាល់ខ្លួនចំនួនជាង ៣១ ម៉ឺនដុល្លារសម្រាប់ ការកសាង ពុទ្ធិកៈសកល វិទ្យាល័យព្រះសីហមុនីរាជ ស្ថិតនៅក្នុងវត្តស្វាយពពែក្នុងខណ្ឌចំការមន រាជធានីភ្នំពេញដែលអគារ មានកម្ពស់ ៤ ជាន់នេះនឹងត្រូវចំណាយថវិកាសរុបរហូតដល់ទៅជាង ៤៨ ម៉ឺនដុល្លារអាមេរិក ។
កាលពីថ្ងៃទី២៣ មករានៅពេលដែលមានពិធីជាច្រើនបានប្រារឰធ្វើឡើងនៅឯវត្តស្វាយពពែ ជាអារាមគណៈ ធម្មយុត្តិកនិកាយដែលមានអាយុកាល ១៤៤ ឆ្នាំ ដោយរួមមានទាំងកម្មវិធីសម្ពោធសមិទ្ធផលជាច្រើននៅក្នុងវត្តគណៈធម្មយុត្តិកនិការនៅទូទាំងប្រទេស និង ពិធីចម្រើនព្រះជន្មវស្សាសម្តេចព្រះអភិសិរីសុគន្ធាធិបតី បួរ គ្រី សម្តេចព្រះ មហាសង្ឃរាជគណៈធម្មយុត្តិកនិកាយ នៃព្រះរាជាណាចក្រកម្ពុជាក្នុងគម្រប់ ៦៦ ព្រះវស្សាយាងចូល ៦៧ ព្រះវស្សាផង នោះ សម្តេចអគ្គមហាសេនាបតីតេជោ ហ៊ុន សែន ដែលអញ្ជើញជាអធិបតីក្នុងពិធីនោះមានប្រសាសន៍ថា អគារនោះ សម្រេចកសាងបានចំនួន ១៥ ភាគរយហើយដោយចំណាយអស់ថវិកាចំនួនជាង៧ម៉ឺន ២ ពាន់ដុល្លារ ។ សប្បុរសជននានាបានជួយឧបត្ថម្ភថវិកាចំនួនប្រមាណ ៩ ម៉ឺន ៩ ពាន់ដុល្លារនៅក្នុងពិធីនោះ ។
សម្តេចនាយករដ្ឋមន្ត្រីថ្លែងថា យើងគ្មានការរើសអើងណាមួយសម្រាប់ជំនឿរបស់ប្រជាពលរដ្ឋទៅលើព្រះពុទ្ធ សាសនាទាំងខាងគណៈធម្មយុត្តិ ឬគណៈមហានិកាយនោះឡើយ ។ ខ្ញុំនៅតែយល់ថា ការផ្សារភ្ជាប់គ្នារវាងផ្នែកពុទ្ធចក្រ និង អាណាចក្រតាមរយៈផ្នែកអាណាចក្រត្រូវបំពេញបន្ថែមដោយហេដ្ឋារចនាសម័្ពន្ធរូបវន្តនានាក្នុងទីអារាមមានដូចជា ព្រះវិហារ សេនាសនៈ សាលាបាលី ឧបដ្ឋានសាលា ស្រះទឹក និង អណ្តូងទឹកជាដើម ហើយផ្នែកពុទ្ធចក្រផ្តល់មកវិញនូវ ពុទ្ធិការអប់រំសីលធម៌ ចរិយាធម៌ និង ការឈ្វេងយល់អំពីព្រះធម៌ នៅតែជាកិច្ចការដ៏ចាំបាច់សម្រាប់សង្គមជាតិទាំងបច្ចុប្បន្ន និង អនាគតផងដែរ ។
សម្តេចតេជោថ្លែងថា ប្រសិនបើយើងធ្វើឱ្យមានការរីកចម្រើននៃហេដ្ឋារចនាសម័្ពន្ធរូបវន្តទាំងនេះនឹងធ្វើឱ្យសង្គមជាតិទាំងមូលទទួលបានមកវិញកាន់តែទូលំទូលាយលើការអប់រំសីលធម៌ ចរិយាធម៌ និង ព្រះធម៌ ហើយពុទ្ធបរិស័ទដែលមានសទ្ធាជ្រះថ្លាចូលរួមកសាងសមិទ្ធផលរូបវន្តទាំងនេះ ក៏ទទួលបានអានិសង្សទៅតាមកម្លាំងសទ្ធានៃសេចក្តីជ្រះថ្លារបស់ខ្លួននោះដែរ ។ សម្តេចមានប្រសាសន៍ថា ជារួមព្រះពុទ្ធសាសនាមានតួនាទីយ៉ាងសំខាន់ដែលធ្វើឲ្យពុទ្ធបរិស័ទមានជំនឿ និង សទ្ធាជ្រះថ្លាក្នុងការកសាងសមិទ្ធផលនានា ។
មកដល់ឆ្នាំ ២០១១នេះវត្តគណៈធម្មយុត្តិកនិកាយនៅក្នុងប្រទេសកម្ពុជាមានចំនួន ១៦១ វត្តមានព្រះសង្ឃចំនួន ២៥០០ អង្គ ហើយវត្តគណៈមហានិកាយមានទាំងអស់ ៤៣០៧ វត្ត និង មានព្រះសង្ឃចំនួន ៥៤.៨៦១ អង្គ៕
ស្នាយពល
No comments:
Post a Comment