ភ្នំពេញ: គ្រួពេទ្យនិងអ្នកកាសែតបានសម្រេចចិត្តបង្កើតវេបសាយ www.health.com.kh ក្នុងបំណងផ្តល់ព័ត៌មានអំពីការស្រាវជ្រាវវេជ្ជសាស្ត្រនិងអប់រំសុខភាពដើម្បីបម្រើផល ប្រយោជន៍សុខភាព និងវិស័យសុខាភិបាលនៅក្នុងប្រទេសកម្ពុជា។
លោកវេជ្ជបណ្ឌិត ងួន សេរ័ត្ន នាយកគ្រប់គ្រងវេបសាយសុខភាពនេះបាននិយាយថា
វេបសាយនេះត្រូវបានបង្កើតឡើងនៅក្នុងគោលបំណងឆ្លើយតបទៅនឹងសេចក្តីត្រូវការ
ធនធានវេជ្ជសាស្ត្រនិង សុខភាព ជាភាសាខ្មែរដែលទាំងគ្រូពេទ្យនិងសាធារណជនអាចទទួលបានតាមរយ:វេបសាយ ww.health.com.kh។
លោកនិយាយថាបំណងរបស់ក្រុមគ្រូពេទ្យ និងអ្នកសារព័ត៌មានដែលចូលរួមចំណែកនៅក្នុងការបង្កើតវេបសាយនេះគឺជំរុញទស្សនវិជ្ជា”សុខភាពសម្រាប់ទាំងអស់គ្នា” តាមរយ:ការផ្តល់ព័ត៌មានសុខភាព ដែលត្រឹម ត្រូវ តាម លក្ខណ:បច្ចេកទេសវេជ្ចសាស្ត្រជូនដល់ប្រជាជនកម្ពុជា។
ក្រុមគ្រូពេទ្យដែលចូលរួមនៅក្នុងវេបសាយនេះសុទ្ឋតែបានទទួលការបណ្តុះបណ្តាលនៅប្រទេសបារាំង ប្រទេសបែលហ្សិច ប្រទេសកូរ៉េខាងត្បូង និងប្រទេសវៀតណាមជាដើម។
គ្រូពេទ្យដែលចូលរួមនៅក្នុងការបង្កើតវេបសាយនេះរួមមានលោកវេជ្ជបណ្ឌិតងួន សេរ័ត្ន ដែលក៏ជាអ្នកនិពន្ឋរបស់កាសែតរស្មីកម្ពុជា លោកវេជ្ជបណ្ឌិតស៊ិកធីរ:ដែលទទួលការបណ្តុះបណ្តាលផ្នែកវះកាត់ពីកូរ៉េខាងត្បូង លោកវេជ្ជបណ្ឌិតលឹម វណ្ណនិត គ្រូពេទ្យជំនាញខាងជំងឺកុមារដែលទទួលការបណ្តុះបណ្តាលនៅសាកលវិទ្យាល័យ Nantes Universityប្រទេសបារាំង លោកវេជ្ជបណ្ឌិតងូវ បូរ៉ា ទទួលសញ្ញាប័ត្រអនុបណ្ឌិតផ្នែកសុខភាពសាធារណ:នៅប្រទេសបែលហ្ស៊ិចនិងលោកវេជ្ជបណ្ឌិតម៉ែនបញ្ញារតន៍ដែលមានបទពិសោធន៍ជាច្រើនទាក់ទងនឹងការព្យាបាលជំងឺអេដស៍ និងការព្យាបាលសម្រន់ការឈឺចាប់ជាដើម។
គ្រួពេទ្យទាំងអស់នេះនឹងចូលរួមចំណែកត្រួតពិនិត្យនិងសរសេរអត្ថបទសុខភាពនិងវេជ្ជសាស្ត្រតាមជំនាញរបស់ពួកគេរៀងៗខ្លួន។ វេបសាយwww.health.com.kh នឹងមានផ្តល់ព័ត៌មានគ្រប់ប្រភេទទាក់ទងនឹងជំងឺទូទៅការអប់រំសុខភាពផ្លួវភេទការអប់រំសុខភាពទូទៅសម្រាប់បុរស ស្ត្រី យុវវ័យនិងកុមារ។
ការថែរក្សាសម្រស់និងរបៀបជួយសង្គ្រោះមនុស្សនៅក្នុងពេលអាសន្នក៏ជាប្រធានបទដែលនឹងធ្វើការផ្សព្វផ្សាយតាមរយ:វេបសាយនេះផងដែរ។ក្រៅពីនេះវេបសាយក៏នឹងមានផ្តល់ជូនផងដែរអំពីរបកគំហើញថ្មីៗផ្នែកសុខភាពនិងវេជ្ជសាស្ត្រដែល មានប្រយោជន៍ទាំងសម្រាប់គ្រូពេទ្យ និស្សិតពេទ្យនិងសាធារណជនទូទៅ។
លោកវេជ្ជបណ្ឌិត ងួន សេរ័ត្ន និយាយថាការបង្កើតវេបសាយនេះគឺដើម្បីផ្តល់ព័ត៌មានសុខភាព និងវេជ្ជសាស្ត្រ ដែលត្រឹមត្រូវ និងមានប្រយោជន៍សំខាន់ជូនដល់ប្រជាជន។ហេតុដូច្នេះហើយបានជាវេបសាយនេះមានគ្រូពេទ្យជំនាញចូលរួមត្រួតពិនិត្យខ្លឹមសារទាំងអស់។នេះជាលើកដំបូងហើយដែលគ្រូពេទ្យមួយក្រុមរួមជាមួយនឹងអ្នកកាសែតរួមគ្នាបង្កើតវេបសាយសុខភាពដ៏មានសារសំខាន់។
លោកបាននិយាយបន្ថែមទៀតថាគោលបំណងរបស់យើងគឹប្រមូលគ្រូពេទ្យអោយបានច្រើនដើម្បីចូលរួមផ្តល់ព័ត៌មានសុខភាពត្រឹមត្រូវជូនដល់ប្រជាជនកម្ពុជាដោយសង្ឃឹមថានៅពេលដែលពួកគេទទួលបានព័ត៌មានកាន់តែច្រើនពួកគេនឹងកាន់តែមានសុខភាពល្អនិងកាត់បន្ថយការចំណាយមិនចាំបាច់សម្រាប់សុខភាព។
គ្រូពេទ្យផ្សេងទៀតនឹងត្រូវបានស្វាគមន៍អោយចូលរួមវិភាគទាននៅក្នុងការសរសេរអត្ថបទសុខភាពសម្រាប់រការផ្សព្វផ្សាយតាមរយ:វេបសាយwww.health.com.kh៕
ដោយ : សម្បត្តិ
No comments:
Post a Comment