ភ្នំពេញ: ដើម្បីដោះស្រាយការកកស្ទះចរាចរផងនិងបញ្ចៀសគ្រោះថ្នាក់ដោយយថាហេតុជាថ្មីទៀត ហើយបើតាមប្រភពពីមន្ត្រីសាលារាជធានីភ្នំពេញបានឲ្យដឹងកាលពីព្រឹកថ្ងៃទី២៤ ខែមករា ឆ្នាំ២០១១ នេះថាបើមិនមានការប្រែប្រួលកម្មវិធីទេនោះនៅថ្ងៃទី៣១ ខែមករា ឆ្នាំ២០១១ ខាងមុខនេះសម្តេចតេជោហ៊ុន សែន និងលោក ជំទាវនឹងអញ្ជើញជាអធិបតីដ៏ខ្ពង់ខ្ពស់ក្នុងពិធីបើកការដ្ឋានសាងសង់ស្ពាននាគភ្លោះ២ខ្សែចេញចូលកោះពេជ្របន្ថែម ២ខ្សែ
ក្រោយពីធ្វើការប្រជុំពិភាក្សាជាច្រើនលើកលើគម្រោងស្ថាបនាស្ពានបន្ថែមពីរទៀតដែលភ្ជាប់ពីតំបន់កោះពេជ្រមក សួនច្បារសម្តេចតេជោ ហ៊ុន សែន នោះ សាលារាជធានីបានទទួលការឯកភាពដខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន លើ Design និងទីតាំងស្ថាបនាស្ពានភ្លោះដោយមានបង្កាន់ដៃរូបនាគហើយ។ ស្ពានភ្លោះដែលនៅប៉ែកខាងជើងនៃស្ពានពេជ្រនេះជាស្ពានបេតុងអារមេមានប្រវែងបណ្តោយ១០១ម៉ែត្រ ទទឹង ១២ម៉ែត្រ មានក្បាលនាគនៅដើម និងចុងស្ពាន ដោយមានបង្កាន់ដៃជារាងខ្លួននាគ មានកម្ពស់ ១.០៥ម៉ែត្រ។ ស្ពាននីមួយៗ ជាស្ពានឯកទិស ដែលស្ពានទី១ សម្រាប់រថយន្ត ៣ខ្សែ ក្នុងទិសដៅចេញពីផ្លូវផ្នែកខាងត្បូងជាប់ សួនសម្តេច ហ៊ុន សែន ចូលមកកោះពេជ្រ ឯស្ពានទី២ សម្រាប់រថយន្ត ៣ខ្សែ ក្នុងទិសដៅចេញពីកោះពេជ្រឆ្ពោះទៅ ផ្លូវផ្នែកខាងជើងជាប់សួនសម្តេច ហ៊ុន សែន វិញ។ ស្ពាននេះនឹងត្រូវក្រុមហ៊ុនវិនិយោគទន់អណិកជនកម្ពុជា “OCIC”ធ្វើការស្ថាបនាដោយប្រើប្រាស់ថវិកាក្រុមហ៊ុនប្រមាណ ២,៥៥៥,០៩០ USD ដុល្លារសហរដ្ឋអាមេរិកហើយប្រើប្រាស់រយៈពេល ០៩ខែ ក្នុងការសាងសង់។
សាលារាជធានីដោយសហការជាមួយក្រុមហ៊ុនវិនិយោគខាងលើនឹងរៀបចំពិធីបើកការដ្ឋានសាងសង់ស្ពានភ្លោះ នេះ នៅថ្ងៃទី៣១ ខែមករាឆ្នាំ២០១១ខាងមុខនេះក្រោមអធិបតីភាពដ៏ខ្ពង់ខ្ពស់បំផុតរបស់សម្តេចអគ្គមហាសេនា បតីតេជោ ហ៊ុន សែន និង លោកជំទាវ។ គួររំលឹកថា កាលពីព្រឹកថ្ងៃទី០៨ ខែធ្នូ ឆ្នាំ២០១០ នេះសាលារាជធានីភ្នំពេញនិង ក្រុមហ៊ុនកោះពេជ្រ បានសហការគ្នានិមន្តព្រះសង្ឃចំនួន ៧អង្គ ធ្វើពិធីសែនក្រុងពាលីនៅលើកោះពេជ្រត្រង់ខាងកើតគល់ស្ពានពេជ្រទៅតាមជំនឿដើម្បីសុំម្ចាស់ទឹកម្ចាស់ដីបើកឱ្យដំណើរការជាថ្មីឡើងវិញ ស្ពានពេជ្រក្រោយពីបិទអស់រយៈពេល ១៦ថ្ងៃ បន្ទាប់ពីមានកើតឧបទ្ទវហេតុកាលពីយប់ថ្ងៃទី២២ ខែវិច្ឆិកា ឆ្នាំ២០១០ បណ្តាលមានអ្នកស្លាប់ចំនួន ៣៥៣នាក់ និងរងរបួស៣៩៤នាក់។គួរបញ្ជក់ដែរថាស្ពានកោះពេជ្របន្ទាប់ពីបើកឱ្យធ្វើដំណើរឆ្លងកាត់ស្ពានឡើងវិញជាលើកដំបូងពេលនោះលោក កែប ជុតិមា បានអះអាងថា ដោយ អនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោហ៊ុន សែន សាលារាជធានីភ្នំពេញគ្រោងសាងសង់ស្ពានថ្មី២ខ្សែបន្ថែមទៀតជាប់ស្ពានពេជ្រចាស់អមសងខាងសួនច្បារ សម្តេចតេ ជោហ៊ុន សែន និងសង់ស្តូបគោរព វិញាណក្ខន្ធជនរងគ្រោះដែលស្លាប់នៅលើស្ពានពេជ្រនៅត្រង់គល់ស្ពានផ្នែកខាងជើង ត្រើយខាងលិច ។មន្ត្រីជំនាញបានអះអាងថាស្ពានថ្មី ២ខ្សែដែលគ្រោងធ្វើការសាងសង់ថ្មីនេះ ១ខ្សែ ទំហំ ១២ម៉ែត្រទទឹងនិងបណ្តោយប្រវែង ១០១ម៉ែត្រដដែល៕
ដោយ : សេរី
No comments:
Post a Comment