ភ្នំពេញ: លោក សម រង្ស៊ី មិនអាចចូលក្នុងប្រទេសបាន លោកគង់ គាំអនុប្រធានគណបក្សសម រង្ស៊ីបានកោះប្រជុំសមាជិកគណៈកម្មការនាយកជាបន្ទាន់មួយនៅព្រឹកថ្ងៃទី ២៥ មករា ឆ្នាំ២០១១។
គឺជាកិច្ចប្រជុំដែលផ្តោតលើប្រធានបទសំខាន់ពីរគឺទី១-ផ្សព្វផ្សាយពីលទ្ធផលកិច្ចប្រជុំរវាងលោក សម រង្ស៊ី ជាមួយគណៈកម្មាធិការអចិន្ត្រៃយ៍គណបក្ស នៅទីក្រុងម៉ានីល ប្រទេសហ្វីលីពីន និងទី២និយាយពីសំណើរសុំអនុវត្តគោលការណ៍ផ្លាស់ប្តូរតំណាងរាស្ត្រពាក់កណ្តាលអាណត្តិ។
តាមគម្រោង គណៈអចិន្ត្រៃយ៍គណបក្សសមរង្ស៊ី ដែលដឹកនាំដោយលោក គង់ គាំ ត្រូវវិលត្រឡប់មកដល់អាកាសយានដ្ឋានភ្នំពេញវិញនាម៉ោង ៧ យប់ថ្ងៃទី២៤មករានេះ។
ខុទ្ទកាល័យប្រធានគណបក្សសមរង្ស៊ី បានជូនដំណឹងកាលពីថ្ងៃទី២៤មករាថា នៅថ្ងៃទី២៥មករា ឆ្នាំ២០១១ វេលាម៉ោង ៩ ព្រឹក គណបក្សសមរង្ស៊ីនឹងធ្វើសន្និសីទ កាសែត ស្តីពី លទ្ធផលកិច្ចប្រជុំលោកប្រធានសមរង្ស៊ី ជាមួយគណៈកម្មាធិការអចិន្ត្រៃយ៍គណបក្ស នៅទីក្រុងម៉ានីល ប្រទេសហ្វីលីពីន។
លោក សមរង្ស៊ី បានអំពាវនាវឲ្យបេក្ខជនតំណាងរាស្ត្រដែលតវ៉ារឿងអាណត្តិតំណាងរាស្ត្រចូលរួមប្រជុំ ដើម្បីដោះស្រាយដោយការយោគយល់ក្នុងការពង្រឹងគណបក្សប្រឆាំង ដែលកំពុងតែជួបការលំបាកនាពេលនេះ។
កិច្ចប្រជុំរវាងគណៈកម្មការនាយកនឹងធ្វើនៅម៉ោង ៨ ព្រឹកថ្ងៃទី២៥មករា ឆ្នាំ២០១១ ដឹកនាំដោយលោក គង់ គាំ។ កិច្ចប្រជុំនេះបានធ្វើឡើងភ្លាមៗបន្ទាប់ពីកិច្ចប្រជុំរវាងគណៈកម្មាធិការអចិន្ត្រៃយ៍ ១៥ រូប ជាមួយលោកប្រធានសមរង្ស៊ី នៅប្រទេសហ្វីលីពីន ចាប់ពីថ្ងៃទី១៦ ដល់ថ្ងៃទី២៤មករា ឆ្នាំ២០១១។
ចំណែកលោក កែត ឃី បេក្ខជនតំណាងរាស្ត្រ និងជាសមាជិកគណៈកម្មការនាយកនៃគណបក្សសមរង្ស៊ីបានអះអាងនៅរសៀលថ្ងៃទី២៤មករាថា ក្រុមបេក្ខជនតំណាងរាស្ត្ររង់ចាំមើលលទ្ធផលនៃកិច្ចប្រជុំគណៈកម្មការនាយកនាព្រឹកថ្ងៃទី២៥មករា ថាតើលោកប្រធានសមរង្ស៊ី បានសម្រេចចិត្តបែបណាលើគោលការណ៍ធ្វើតំណាងរាស្ត្រពាក់កណ្តាលអាណត្តិនោះ។
ម្យ៉ាងទៀត ញ្ញាត្តិតវ៉ាទៅកាន់លោកប្រធានសមរង្ស៊ី ក្នុងពេលលោកជួបប្រជុំជាមួយគណៈអចិន្ត្រៃយ៍នៅហ្វីលីពីននោះ ក៏គ្រាន់តែជាការក្រើនរម្លឹក ចំពោះសេចក្តី សម្រេចចិត្តរបស់លោកប្រធាន ព្រោះថា អ្នកនៅក្នុងប្រទេស មិនងាយនឹងបានជួបជាមួយលោកប្រធានឡើយ។
លោក កែត ឃី ជាក្រុមការងារក្នុងខេត្តកំពង់ធំ ហើយដែលត្រូវទទួលសិទ្ធិឡើងធ្វើតំណាងរាស្ត្រជំនួសលោក ម៉ែន សុថាវរិន្ទ្រ។ លោក កែត ឃី បានចុះហត្ថលេខាលើញ្ញាត្តិជាមួយនឹងបេក្ខជនតំណាងរាស្ត្រ ៧ រូបផ្សេងទៀត ដើម្បីសុំឱ្យលោកសម រង្ស៊ីអនុវត្តគោលការណ៍ធ្វើតំណាងរាស្ត្រពាក់កណ្តាលអាណត្តិ តាមការសន្យា៕
ដោយ : លីហូវ
No comments:
Post a Comment