ភ្នំពេញ: សមាជិកនៃបណ្តាប្រទេសទាំង១០របស់អាស៊ាន រួមទាំងចិន កូរ៉េ ជប៉ុនបានឯកភាព អនុម័តគាំទ្រទាំងស្រុងនូវផែនការយុទ្ធសាស្ត្រទេសចរណ៍អាស៊ាន ដែលបានដាក់ចេញពីឆ្នាំ២០១១ ដល់ ឆ្នាំ២០១៥ ។ នេះបើតាមការអះអាងរបស់លោក ទិត ចន្ថា អគ្គនាយកក្រសួងទេសចរណ៍បានប្រាប់ក្នុងអង្គសន្និសីទសារពត៌មានមួយនាព្រឹកថ្ងៃទី១៨ ខែមករា នៅវិមានសន្តិភាព។
លោកបានបញ្ជាក់ថា យុទ្ធសាស្ត្រទេសចរណ៍អាស៊ាននេះមានទិសដៅសំខាន់ធំចំនួន៣។ ទី១-ធ្វើយ៉ាងណាជំរុញការអភិវឌ្ឍន៍ទេសចរណ៍អាស៊ានឲ្យ ក្លាយជាគោលដៅទេសចរណ៍លំដាប់ពិភពលោកផ្តល់នូវភាពកក់ក្តៅទេសចរគ្រប់រូបក្នុងនោះក៏ត្រូវអភិវឌ្ឍន៍ផលិតផលទេសចរណ៍។ផ្សព្វផ្សាយគោលដៅទេសចរណ៍ឱ្យស្គាល់។ ទី២-ត្រូវលើកកំពស់គុណភាពសេវា ធនធានមនុស្ស គុណភាពលើផលិតផលទេសចរណ៍ទាំងអស់ឱ្យមានស្តង់ដារ ធ្វើម៉េចឱ្យទេសចរមកលេង ឱ្យគេទទួលស្គាល់សេវា ស្តង់ដាទទួលភ្ញៀវល្អដូចគ្នានៅក្នុងតំបន់យើងនេះ។ ទី៣-គឺបញ្ហាសម្រួលការធ្វើដំណើរឆ្លងកាត់ព្រំដែនដឹកជញ្ជូនទាំងអស់ ទាំងផ្លូវគោក ផ្លូវអាកាស ផ្លូវទឹក ធ្វើយ៉ាងណាឱ្យរហ័ស ឱ្យស្រួលមិនបង្កការលំបាកអ្វីទាំងអស់ដល់ភ្ញៀវ។ ធ្វើយ៉ាងណាឱ្យប្រទេសក្នុងតំបន់អាស៊ាន ឱ្យភ្ញៀវធ្វើដំណើរទៅលេងទីណាឱ្យមានភាពកក់ក្តៅដល់គេ ធ្វើឱ្យមានសុវត្ថិភាព សន្តិសុខល្អប្រសើរ។
ផែនការជាយុទ្ធសាស្ត្រនេះ នឹងក្លាយទៅជាឯកសារផ្លូវការសំរាប់ឱ្យប្រទេសនីមួយៗអនុវត្ត។ នៅឆ្នាំ២០០៣ កម្ពុជាក៏ធ្លាប់បានធ្វើជាម្ចាស់ផ្ទះលើកទីមួយផងដែរ ហើយបានត្រៀមឯកសារសំខាន់មួយ សំរាប់កិច្ចព្រមព្រៀងទេសចរណ៍អាស៊ាន ដែលបានចុះហត្ថលេខានៅក្រុងភ្នំពេញ។
ចំពោះបណ្តាប្រទេសក្នុងមហាអនុតំបន់ទន្លេមេគង្គ បានបង្កើតឱ្យមានផែនទីបង្ហាញផ្លូវមួយ លើវិស័យទេសចរណ៍និងគាំទ្រការផ្តល់ជំនួយបន្ថែមលើ G.M.S។បញ្ហាការហោះតាមផ្លូវអាកាសនេះជាកត្តាសំខាន់ដែរធ្វើឱ្យភ្ញៀវមានកំណើនលឿន។៥០ភាគរយនៃភ្ញៀវមកដល់គឺជាភ្ញៀវមកតាមផ្លូវអាកាស។ដូច្នេះទាំងប្រទេសក្នុងអាស៊ានក៏ដូចជាអាស៊ានបូក៣ គឺជំរុញឱ្យមានការហោះហើយត្រង់ឱ្យបានច្រើនថែមទៀត។ដោយឡែកកម្ពុជា ចិននិងកម្ពុជា កូរ៉េ យើងបានធ្វើការហោះហើរត្រង់រួចហើយ។ នៅតែកម្ពុជាជាមួយជប៉ុន យើងត្រូវជំរុញឱ្យមានការហោះហើរត្រង់ឱ្យបានឆាប់ ៕
ដោយ : សេរី
No comments:
Post a Comment