នៅក្នុងឱកាសទទួលជួបធ្វើសវនាការជាមួយប្រតិភូរដ្ឋមន្រ្តីទេសចរណ៍អាស៊ាននារសៀលថ្ងៃទី១៧ ខែមករា ឆ្នាំ២០១១ នៅវិមានសន្តិភាពរាជធានីភ្នំពេញ សម្ដេចអគ្គមហាសេនាបតីតេជោ ហ៊ុន សែនបានស្វាគមន៍ និង គាំទ្រទាំងស្រុង លើអ្វីដែលកិច្ចប្រជុំរបស់ រដ្ឋមន្ដ្រីទេសចរណ៍ អាស៊ាននិង ប្រទេស បូកបី ដែលបានសម្រេចអំពីសាមគ្គីភាពរវាងបណ្ដាប្រទេសអាស៊ាន និង ប្រទេសជាដៃគូរបស់អាស៊ាន។
ឯកឧត្តម អ៊ាង សុផល្លែត ជំនួយការរបស់សម្ដេចតេជោនាយករដ្ឋមន្ដ្រីឱ្យដឹងថា នៅក្នុងជំនួប សំដែងការគួរសមនោះ លោក JERO VACIK ប្រធានគណៈប្រតិភូរដ្ឋមន្ដ្រីទេសចរណ៍អាស៊ាន និង ជារដ្ឋមន្ដ្រី ក្រសួងទេសចរណ៍ឥណ្ឌូណេស៊ីបានរាយការណ៍ជូនសម្ដេចតេជោ ហ៊ុន សែន អំពី លទ្ធផល នៃកិច្ចប្រជុំទេសចរណ៍អាស៊ានដែលកិច្ចពិភាក្សាបានឯកភាពគ្នាធ្វើយ៉ាងណាដើម្បីពង្រីក និង ពង្រឹង ទេសចរណ៍ រវាងប្រទេសអាស៊ានទាំងអស់ និង ដៃគូរបស់អាស៊ានឱ្យបានកាន់តែរីកធំធាត់ឡើង ។
នៅក្នុងឱកាសនោះដែរ សម្ដេចនាយករដ្ឋមន្ដ្រីបានសំដែងនូវការអបអរសាទរ និង គាំទ្រទាំង ស្រុងនូវការដាក់ចេញទេសចរណ៍ សម្រាប់ឆ្នាំ ២០១១-២០១៥ រវាងប្រទេសអាស៊ាន និង ប្រទេស ជាដៃគូ ហើយសម្ដេចក៏បានអបអរសាទរ និង គាំទ្រចំពោះការពិនិត្យឡើងវិញនូវយុទ្ធសាស្ដ្រ ទេសចរណ៍ក្នុងក្របខណ្ឌមហាអនុតំបន់មេគង្គផងដែរ ។
ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍ មានប្រសាសន៍ឲ្យដឹងនៅក្នុង បទសំភាសន៍ មួយថា យុទ្ធសាស្ដ្រសំខាន់ សម្រាប់វិស័យទេសចរណ៍គឺផ្ដោតជាសំខាន់ទៅលើអាស៊ានទាំងមូលត្រូវតែ ខិតខំធ្វើការ ផ្សព្វផ្សាយវិស័យទេសចរណ៍ឱ្យកាន់តែខ្លាំងឡើង ដោយពង្រីកផលិតផលទេសចណ៍ ទាក់ទាញអ្នកវិនិយោគ ពង្រឹងគុណភាពសេវា តាមរយៈការបណ្ដុះបណ្ដាល ធនធានមនុស្ស ជាពិសេស វិជ្ជាជីវៈជំនាញទេសចរណ៍ ក៏ដូចជាការសម្រួលការធ្វើដំណើរ និង ការដឹកជញ្ជូនជាដើម ។ ឯកឧត្ដម រដ្ឋមន្ដ្រីថ្លែងថា វិស័យទេសចរណ៍មិនអាចអភិវឌ្ឍបានទេ បើគ្មានការគាំទ្រ ការសហការពីការដឹកជញ្ជូន ពីព្រោះថា អាស៊ានទេសចណ៍នេះមានសារៈសំខាន់ណាស់ ទាំងក្នុងតំបន់ និង ពីក្រៅតំបន់ចូល មក ផងដែរ ។
ឯកឧត្ដមរដ្ឋមន្ដ្រីបានលើកឡើងថា ថា កិច្ចប្រជុំក៏បានផ្ដោតផងដែរទៅ លើទីផ្សារសម្រាប់ ពេលអនាគត ដែលមិនអាច ចោលបាននូវទីផ្សារអឺរ៉ុប ហើយក៏ត្រូវតែផ្ដោតការយកចិត្ដទុកដាក់ ទៅលើ ទីផ្សារក្នុងតំបន់អាស៊ានខ្លួនឯង ដោយធ្វើយ៉ាង ណាឱ្យ ចលនាទេសចរណ៍ ក្នុងអាស៊ានដើរទៅ ជាមួយ គ្នាកាន់តែខ្លាំងឡើងទាំងផ្លូវទឹក ផ្លូវគោក ផ្លូវអាកាស និង ផ្លូវដែក ដោយឯកឧត្តម ថោង ខុនបាន បញ្ជាក់ថា នេះគឺជាចំណុចគន្លឹះសំខាន់បំផុត ។
កិច្ចប្រជុំរដ្ឋមន្ដ្រីទេសចរណ៍អាស៊ាន កិច្ចប្រជុំរដ្ឋមន្ដ្រីអាស៊ានជាមួយប្រទេសបូកបី(អាស៊ានបូកចិន ជប៉ុន កូរ៉េខាងត្បូង)និងកិច្ចប្រជុំពាក់ព័ន្ធជាច្រើនទៀតបានចាប់ផ្ដើមកាលពីថ្ងៃទី ១៥ មករារហូតដល់ ថ្ងៃទី ២១ មករា ដែលពិធីបើកជាផ្លូវការនឹងប្រព្រឹត្ដទៅនៅរសៀល ថ្ងៃទី ១៨ ខែមករា ឆ្នាំ ២០១១ ក្រោមអធិបតីភាពរបស់សម្ដេចតេជោ ហ៊ុន សែន នៅមជ្ឈមណ្ឌលសន្និសីទកោះពេជ្រ ។
No comments:
Post a Comment