ពោធិ៍សាត់ ៖ អាជ្ញាធររដ្ឋបាលព្រៃឈើខាងត្បូងបឹងទន្លេសាប សហការជាមួយព្រះរាជអាជ្ញា ស្ដីទី និងមន្រ្តីពាក់ព័ន្ធ បានចេញប្រតិបត្តិការបង្រ្កាបកន្លែងស្តុកឈើប្រណិតប្រភេទគ្រញូងបានជា ច្រើន នៅក្នុងទីរួមខេត្តពោធិ៍សាត់តែម្ដង។
ការបង្រ្កាបនេះបានធ្វើឡើងកាលពីវេលាម៉ោង១១ថ្ងៃត្រង់ ថ្ងៃទី១៦ ខែមករា ឆ្នាំ២០១១នេះ នៅចំណុចផ្ទះរបស់ឈ្មោះផាត់ ដែលមានឈ្មោះចន្ទ្រា ភេទ ស្រី អាយុ២៩ឆ្នាំ ជាអ្នកនៅចាំផ្ទះ និងរក ឃើញមានឈើចំនួន១២៧កំណាត់ ស្មើនឹង ១,៦៦៤ម៉ែត្រគីប សុទ្ធតែជាប្រភេទឈើគ្រញូង និងទី តាំងម្ចាស់ផ្សេងមួយកន្លែងទៀតមានឈ្មោះភុំ ប្រសើ អាយុ៥៤ឆ្នាំ ភេទប្រុស រកឃើញមានឈើគ្រញូង២៤ដុំ ស្មើនឹង០,៩៩១ ម៉ែត្រគីប ទីតាំងទាំងពីរស្ថិតនៅក្នុងភូមិចំការចេកខាងត្បូង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។
សមត្ថកិច្ចចុះបង្រ្កាបនោះមានលោកព្រះរាជអាជ្ញាស្ដីទី លោកយូ យឺននី, លោកគឹម ចេបថាវី ផ្នែករដ្ឋបាលព្រៃឈើស្រុកក្រគរ, លោកមាស សម្បត្តិ អធិការដ្ឋានខាងត្បូងបឹងទន្លេសាប និងមន្រ្តី ពាក់ព័ន្ធផ្សេងៗទៀត។
លោកព្រះរាជអាជ្ញាស្ដីទីបានមានប្រសាសន៍ថា ចំពោះជនសង្ស័យទាំងអស់ដែលបានលាក់ ទុកឈើប្រណិតប្រភេទគ្រញូងនេះ នឹងត្រូវបង្កសំណុំរឿងបញ្ជូនទៅកាន់តុលាការដើម្បីចាត់ការតាមផ្លូវច្បាប់។
គួរបញ្ជាក់ថា ការចុះបង្រ្កាបកន្លែងស្ដុកឈើគ្រញូងខុសច្បាប់ក្នុងថ្ងៃនេះ ស្របពេលដែល លោកច័ន្ទ សារុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ កំពុងបំពេញបេសកកម្មផ្ដល់កូន ឈើ និងពិនិត្យដំណាំស្រូវដល់សហគមន៍ប្រជាកសិករនៅស្រុកភ្នំក្រវ៉ាញ់៕
លានគ្រន
No comments:
Post a Comment