នេះជាការប្រែប្រួលនូវក្តីសង្ឃឹមស្ទើរកម្រិត ១៨០អង្សារ របស់ក្រុងទេសចរណ៍ឆ្នេរសមុទ្រទៅនឹង មោទនភាពដែលបានកើតឡើងពេលក្រុមហ៊ុនមកដល់ដំបូងដោយរាយការណ៍ថា ប្តេជ្ញាដាក់ចិត្តដាក់កាយមកអភិវឌ្ឍន៍ជាមួយអាជ្ញា ធរខេត្តឱ្យមានការរីកចម្រើនឆាប់រហ័សក្នុងទំហំទឹកប្រាក់ ៤លានដុល្លា ដែលមិនត្រឹមតែក្នុងទីប្រជុំជនតំបន់រដ្ឋបាលប៉ុណ្ណោះទេ សូម្បី រមណីយដ្ឋានកោះទន្សាយឆ្លងកាត់សមុទ្ររហូតចម្ងាយ៤ គីឡូម៉ែត្រក៏ទទួលបានទឹកស្អាតប្រើប្រាស់គ្រប់គ្រាន់ដែរ ។
ចំណាយពេលធ្វើដំណើរបែកចេញពីផ្លូវឆ្ពោះទៅកាន់រមណីយដ្ឋានឆ្នេរកែបត្រង់ចំណុចក្បែរសាលាបឋមសិក្សាស្បូវ ដោយ ឆៀងចូលទៅខាងឆ្វេងដៃចម្ងាយប្រមាណប្រហែលមួយគីឡូម៉ែត្រ នោះនឹងដល់ទំនប់ប៉ោហេងដែលស្ថិតនៅចន្លោះភ្នំជាទីប្រជុំនៃប្រ ភពទឹកដ៏សម្បូរបែបក្នុងករណីមានការទប់ និង គ្រប់គ្រងបានល្អ ។ បច្ចុប្បន្ននៅទីនេះមានសភាពស្ងាត់ជ្រងំដោយសារការដ្ឋានទំនប់ ទឹកស្អាតត្រូវបានគេផ្អាកសកម្មភាព បន្សល់នូវគ្រោងសំណង់បញ្ឈររខេករខាកគួរឱ្យទាស់ភ្នែក ។ ចំណែកទំនប់ទឹកដែលបានធ្វើឡើងវិញ ដោយពេលកំពុងមានសកម្មភាពមន្ត្រីជំនាញផ្នែកសំណង់បានធ្លោយមាត់ថា មិនត្រឹមត្រូវតាមលក្ខណៈស្តង់ដារនិងគ្មានគុណភាពនោះ កំពុងបាក់ស្រុតគ្មានការថែទាំគ្រាន់ជាទំនុកចិត្តបន្តិចណាឡើយ ។ ព្រោះតែទិដ្ឋភាពបែបនេះទើបមតិសាធារណជនមួយចំនួន និយាយតាមបែបសង្ស័យថា ក្រុមហ៊ុននេះមកវិនិយោគដោយរបៀបធ្វើនំដែលមិនចាំបាច់ចំណាយម្សៅ ខណៈពេលស្វែងរកដៃគូមិន បានក៏ដាក់មេផាយ បន្ទាប់ពីបញ្ចេញសកម្មភាពសើៗសម្រាប់គ្រាន់តែល្អភ្នែកមើលនៅគ្រាដំបូងនោះ ។
ជុំវិញមតិរិះគន់ និង ការវាយលុកចោទប្រកាន់ខាងលើ ស៊ី.អ៊ី.អិន មិនអាចស្វែងរកការបំភ្លឺណាមួយ ពីក្រុមហ៊ុន Western Coastal Development Co.ltd នូវមូលហេតុនៃការផ្អាកសកម្មភាពនោះបានទេ ។ ប៉ុន្តែលោក ហាស់ សារ៉េត អភិបាលខេត្តកែបបានមានប្រសាសន៍កាលពីថ្ងៃសុក្រចុងសប្តាហ៍ទីពីរនៃខែមករា ឆ្នាំ២០១១ ទាក់ទិននឹងការងារទឹកស្អាតនេះថា នាអំឡុងពេលប៉ុន្មានសប្តាហ៍នេះអាជ្ញាធរកំពុងចាត់ការដោយហៅភាគីអ្នកកាន់កាប់នោះចូលដោះស្រាយជាមួយក្រសួង ត្បិតរឿងនេះមន្ទីរឧស្សាហកម្មបានធ្វើលិខិតបញ្ជូនទៅក្រុមហ៊ុនហើយ ដើម្បីឱ្យក្រុមហ៊ុនធ្វើរបាយការណ៍តបមកវិញថា តើអាចធ្វើបានត្រឹមកម្រិតណា ហើយមិនអាចធ្វើបានកម្រិតណា ។
លោកចុះឡើងភ្នំពេញប៉ុន្មានលើកចុងក្រោយនេះសុទ្ធតែពាក់ព័ន្ធនឹងបញ្ហាទឹកស្អាត ព្រោះកែបខ្វល់ខ្វាយណាស់ពីរឿងនេះ ដូច្នេះដើម្បីទទួលបាននូវភាពឈ្នះទាំងអស់គ្នាត្រូវរកដំណោះស្រាយសិន ។ តាមមើលទៅក្រុមហ៊ុននេះប្រហែលជាមិនមានលទ្ធភាពទេ ម្ល៉ោះហើយបើអ្នកចាស់ធ្វើមិនបានត្រូវរកអ្នកមានលទ្ធភាព តែសំខាន់អាចទទួលយកបានទាំងអស់គ្នាតាមរយៈដំណោះស្រាយឈ្នះឈ្នះ ។ លោកអភិបាលបន្តទៀតថា ខេត្តមិនអាចទុកឱ្យរឿងនេះនៅរាំងស្ទះបានឡើយ ព្រោះកែបនៅខ្វះតែបញ្ហាទឹកស្អាតមួយមុខទៀតប៉ុណ្ណោះ ។ លោកមិនទាន់និយាយអ្វីវែងឆ្ងាយទេ លទ្ធផលយ៉ាងណានឹងដឹងនៅពេលក្រោយ ៕
ដោយ : ចក្រី
No comments:
Post a Comment