រាជធានីភ្នំពេញ ៖ ក្នុងគោលបំណងចង់ស្វែងយល់ និងរៀនសូត្រអំពីសកម្មភាពកំចាត់មីននៅកម្ពុជា គណៈប្រតិភូមជ្ឈមណ្ឌលកំចាត់មីនរបស់ប្រទេសថៃដឹកនាំដោយលោកអាត់ថាត់ ណុបស៊ីរីសាក់ (Attanopsirisak) នាយកគ្រប់គ្រងទូទៅនៅមជ្ឈមណ្ឌលកំចាត់មីនរបស់ថៃបានអញ្ជើញមកបំពេញទស្សនកិច្ចនៅមជ្ឈមណ្ឌលសកម្មភាពកំចាត់មីនកម្ពុជានៅភ្នំពេញកាលពីថ្ងៃទី២៧ មករា ហើយបន្តទៅទស្សនកិច្ចនៅសាលាហ្វឹកហ្វឺនកំចាត់មីននៅខេត្តកំពង់ឆ្នាំងក្នុងថ្ងៃដដែលនោះដែរ ។
មជ្ឈមណ្ឌលសកម្មភាពកំចាត់មីនកម្ពុជាហៅកាត់ថាស៊ីម៉ាក់ ជាស្ថាប័នជាតិដែលនាំមុខគេក្នុងវិស័យដោះមីនដោយផ្តោតសំខាន់ទៅលើការអនុវត្តកម្មវិធី៤គឺ ការស្រាវជ្រាវ និងការកាត់បន្ថយផ្ទៃដីមីន ការបោសសំអាតមីន និងយុទ្ធភណ្ឌមិនទាន់ផ្ទុះ ការអប់រំអំពីគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះ និងការហ្វឹកហ្វឺនស្រាវជ្រាវ និងអភិវឌ្ឍន៍ ។ បច្ចុប្បន្ននេះ ស៊ីម៉ាក់មានបុគ្គលិកសរុបចំនួន២.០១៨នាក់នៅទូទាំងប្រទេស ដែលរួមមានទីបញ្ជាការភ្នំពេញ កងកំចាត់មីនទាំង៦តាមបណ្តាខេត្តនានា និងសាលាហ្វឹកហ្វឺននៅក្នុងខេត្តកំពង់ឆ្នាំង ដែលការងារទាំងអស់នេះឆ្លើយតបទៅនឹងបេសកកម្មរបស់ខ្លួនគឺសង្គ្រោះជីវិត និងគាំទ្រការអភិវឌ្ឍនៅកម្ពុជា ។
ស៊ីម៉ាក់ ត្រូវបានបង្កើតឡើងក្នុងសម័យអ៊ុនតាក់នាឆ្នាំ១៩៩៣ ក្នុងគោលដៅជួយដល់ការធ្វើមាតុភូមិនិវត្តន៍ទូទាំងប្រទេសប្រកបដោយសុវត្ថិភាពរបស់បងប្អូនជនភៀសខ្លួនក្នុងការត្រឡប់ទៅកាន់មាតុភូមិវិញ ។ ដោយមើលឃើញថា គ្រាប់មីន និងយុទ្ធភណ្ឌមិនទាន់ផ្ទុះនៅមានចំនួនច្រើនក្នុងប្រទេសកម្ពុជា ដែលជាការគំរាមកំហែងដល់ការកសាង និងអភិវឌ្ឍន៍ប្រទេសជាតិនោះ ស៊ីម៉ាក់បានក្លាយជាស្ថាប័នឯករាជ្យមួយនៅឆ្នាំ២០០០ហើយបានបង្កើតកម្មវិធីសំខាន់ជាច្រើនរួមមាន ការអប់រំយល់ដឹងអំពីមីន ការផ្តល់ព័ត៌មានអំពីចំការមីន ការបោសសំអាតមីន និងយុទ្ធភណ្ឌមិនទាន់ផ្ទុះ និងការហ្វឹកហ្វឺនក្នុងសកម្មភាពបោសសំអាតមីន ។
នៅឆ្នាំ១៩៩៩ ប្រទេសកម្ពុជាបានក្លាយទៅជារដ្ឋសមាជិកនៃសន្ធិសញ្ញាហាមប្រាមប្រើប្រាស់មីនប្រឆាំងមនុស្សដែលហៅថា សន្ធិសញ្ញាអូតាវ៉ា ហើយយោងទៅតាមសន្ធិសញ្ញានេះគ្រាប់មីន និងយុទ្ធភណ្ឌមិនទាន់ផ្ទុះត្រូវតែកំណត់ឱ្យបាន និងបោសសំអាតឱ្យអស់ក្នុងរយៈពេល១០ឆ្នាំ គិតចាប់ពីប្រទេសនីមួយៗបានចុះសន្ធិសញ្ញា ។ ដោយគ្រាប់មីននៅកម្ពុជាមានកំរិតធំធេងពេក កម្ពុជាមិនអាចសំរេចបាននូវគោលដៅក្នុងការបោសសំអាតមីនឱ្យអស់នៅឆ្នាំ២០០៩ នោះទេ ។ ហេតុដូច្នេះហើយ ទើបនៅក្នុងសន្និបាតនៃប្រទេសជាសមាជិកក្នុងឆ្នាំ២០០៩ បានសំរេចផ្តល់រយៈពេល១០ឆ្នាំថែមទៀតដល់ប្រទេសកម្ពុជា ដើម្បីឱ្យសំរេចដល់គោលដៅរបស់ខ្លួន ៕
ដោយ ៖ កោះឯករាជ្យ
No comments:
Post a Comment