Sunday, January 30, 2011

សិស្ស​បឋម​​នៅ​តំបន់​ដាច់ស្រយាល​ជិត១ពាន់​នាក់​ទទួល​បានសំភារ​សិក្សា

ខេត្ត​ក្រចេះ ៖ សិស្សកំរិត​បឋម​សិក្សា​នៅ​តំបន់​ដាច់​ស្រ​យា​ល​ចំនួន​៤​ឃុំ​ ក្នុង​ស្រុក​ចិត្រ​បុរីបាន​ទទួល​សំលៀក​បំពាក់ និង​សំភារ​សិក្សា​ក្នុង​ម្នាក់​មួយ​ឈុត ពី​តំណាងមន្ដ្រី​អង្គការ​សមា​គម​ខ្មែរ ​ដើម្បី​អភិវឌ្ឍន៍ជនបទ​កម្ពុជា ហៅ​កាត់​ថា កាដុក (KAFDOC​) ដោយ​មានការ​គាំទ្រពី​អង្គការ​អូស្ដ្រាលី​សង្គ្រោះ​កុមារហៅ​កាត់​ថា​«SCA»។
កាលពី​ព្រឹក​ថ្ងៃ​ទី​២៧ មក​រា មន្ដ្រី​តំណាង​ការិយាល័យ​អប់រំ​ស្រុក លោកឈឺ​ន រឹទ្ធ មន្ដ្រី​របស់​អង្គការ​កា​ដុក ព្រមទាំង​លោក​មេឃុំ​ ក្នុង​ឃុំ​គោលដៅ​ទាំង​៤ រួម​មាន ឃុំ​ថ្មី ឃុំ​កន្ទួត ឃុំ​ថ្មអណ្ដើក និង​ឃុំ​ដា ក្នុងស្រុក​ចិត្រ​បុរី បានចែក​​ឯកសណ្ឋាន​សិស្ស​ចំនួន​៨២៨​សំរាប់ សំពៀត​៨២៨​ ប៊ិច​ខៀវ និង​ប៊ិច​ក្រហម​ចំនួន​៣៣១២​ដើម និង​សៀវភៅ​ស​រសេរ​ចំនួន​​២.៤៨៤​ក្បាល បន្ទាត់​ និង​ជ​រ័​លុប រួម​ទាំងខ្មៅ​ដៃ​ចំនួន​៨២៨​ដើមជូន​ដល់​សិស្ស​កំរិត​បឋម​សិក្សា​ចំនួន​៨២៨​នាក់​ដោយ​ក្នុងម្នាក់​ៗ​ទទួល​បាន​សំភារ​១​ឈុត​។
លោកឈឺ​ន រឹទ្ធ មន្ដ្រី​សំរបសំរួល​កម្មវិធី​ទូទៅ​​របស់​អង្គការ​ប្រាប់​កោះសន្ដិភាពថា ការ​ចុះ​ចែក​ជូន​សំភារ​សិក្សាដល់​​សិស្ស​កំរិត​បឋម​សិក្សា​នេះជា​វគ្គ​ទី​៣ និង​គំរោង​ចុង​ក្រោយ ដែល​បាន​ចាប់ផ្ដើម​តាំងពី​ខែ​មីនា ឆ្នាំ​២០១០ រហូត​ខែ​មី​នា ឆ្នាំ​២០១១ ។ ​គំរោង​នេះ​ គឺ​ផ្ដល់​ជូន​តែ​ឃុំ​គោល​ដៅ​ទាំង​បួន​ក្នុងស្រុក​ចិត្រ​បុរី ព្រោះ​ឃុំ​គោលដៅ​ទាំង​បួន​នេះ ជា​ឃុំ​ដែល​ស្ថិត​នៅ​តំបន់​ដាច់​ស្រ​យា​ល​ពី​ទី​ប្រជុំ​ជន ហើយក៏មាន​បងប្អូន​ជន​ជាតិ​ភាគតិច​រស់នៅ​ច្រើន ​។ 
មន្ដ្រី​​អង្គការ​កា​ដុក​ដដែល​បាន​បន្ថែម​ទៀត​ថា ​អង្គការ​ និង​ដៃគូជំនួយបាន​លើក​គំរោង​នេះ​ឡើង ក្នុង​គោលបំណង​ជំរុញ​ឱ្យ​កុមារ​គ្រប់​គ្នាទៅ​សាលារៀន​ ជា​ពិសេស​កុមារី ព្រមទាំង​ជួយ​លើក​ស្ទួយ​ដល់​សិ​ទ្ធិកុមារ ជា​ពិសេស​គាំទ្រ​ដល់​ការ​ពង្រឹង​ជីវភាព​ទៅ​លើ​គ្រួសារ​កុមារ​ក្រីក្រ ព្រម​ទាំង​ពង្រឹងសមត្ថភាព​សហគមន៍ ។ សិស្ស​ដែល​ទទួល​បាន​សំភារ​សិក្សា​ទាំង​ចំនួន៨២៨​នាក់​នោះជា​កុមារ​ដែល​ងាយ​រង​គ្រោះ​ដោយ​​ការ​បោះ​បង់​ការ​សិក្សា ​។
លោកឈឺ​ន រឹទ្ធ បាន​​ប្រៀប​ធៀប​ថា បន្ទាប់​ពី​មាន​គំរោង​ផ្ដល់​ជូន​សំភារ​សិក្សា​ដល់​សិស្សជា​ច្រើន​វគ្គ​កន្លង​មក គឺ​កំរិត​នៃ​ការ​ចូល​រៀន​របស់​សិស្ស​ក្នុង​ឃុំ​គោលដៅ​ទាំង​បួន​នេះ មាន​អត្រា​កើតឡើងពី​៥០​ទៅ​៧០​ភាគរយ បើ​ប្រៀបធៀប​កាលពី​កន្លង​ទៅ​អត្រា​សិស្ស​ចូល​រៀនមាន​តែ​៣០​ភាគ​រយ​ប៉ុណ្ណោះ ​។ ក្រៅពី​ផ្ដល់​សំភារ​សិក្សា​ជូន​ដល់​សិស្ស​ទាំង​ជិត​១​ពាន់នាក់បាន​ផ្ដល់​ជូនកម្មវិធី​អភិវឌ្ឍន៍​លើ​វិស័យ​កសិកម្មដោយ​មានការ​រៀបចំ​ធនា​គារ​ស្រូវ​សំរាប់​សហគមន៍ ផ្ដល់​អណ្ដូងទឹក និង​បង្គន់​អនាម័យ​តាម​សាលា​រៀន និង​សហ​គមន៍​​ជូន​ដល់​ឃុំ​គោលដៅ​ទាំង​បួន​ក្នុងស្រុក​ចិត្រ​បុរីនេះបន្ថែម​ទៀត​។ លោក​បាន​ឱ្យ​ដឹង​ថា សំភារ​និងសំលៀក​បំពាក់​ដែល​ចែក​ចាយ​នេះ​មាន​តំលៃ​​ជា​ប្រាក់​ជាង​៨​ពាន់​ដុល្លារ។
នៅ​ក្នុង​ឱកាស​នៃ​ការ​ចុះ​ចែក​ជូន​សំភារ​សិក្សា​ដល់​សិស្ស​ទាំងអស់​នា​ព្រឹក​នោះលោកឈឺ​ន រឹទ្ធ មន្ដ្រី​សំរបសំរួល​កម្មវិធី​ទូទៅ​របស់​អង្គការសមា​គម​​ខ្មែរ​ ដើម្បី​អភិវឌ្ឍន៍​ជនបទ​កម្ពុជា​​បាន​សំណូម​ពរ​ដល់​អា​ណា​ព្យាបាល​សិស្ស និង​អាជ្ញា​ធរ​​មូលដ្ឋាន​ត្រូវ​ជំរុញ​ការ​ចូល​រៀនរបស់​កុមារ ព្រមទាំង​លើក​ស្ទួ​យដល់​សិ​ទ្ធិរបស់​ពួក​គេឱ្យ​ស្រប​ទៅ​តាម​គោល​ការ​ណ៍ទាំង​៤​យ៉ាង​ស្ដី​ពី​សិទ្ធិ​​កុមារ​ ៕

ដោយ ៖ កោះឯករាជ្យ

No comments:

Post a Comment