សម្ដេចអគ្គមហាសេនាបតីតេជោ ហ៊ុន សែន មានប្រសាសន៍នៅថ្ងៃទី ០៩ ខែកុម្ភៈ ឆ្នាំ ២០១១ ថា ការប្រយុទ្ធគ្នានៅតំបន់ព្រំដែនត្រង់តំបន់ ប្រាសាទព្រះវិហារគឺជា សង្គ្រាមពិតប្រាកដហើយមិនគ្រាន់តែជាការប៉ះទង្គិចគ្នានោះឡើយ ព្រោះថា ការប្រយុទ្ធគ្នាបានអូសបន្លាយអស់រយៈពេលជា ច្រើនថ្ងៃដោយមានទាំងការប្រើអាវុធធុនធ្ងន់។ ថ្លែងនៅក្នុងពិធីបិទសន្និបាតប្រចាំឆ្នាំរបស់ក្រសួងពាណិជ្ជកម្ម សម្ដេចតេជោនាយករដ្ឋមន្ដ្រីបានថ្លែងអំណរគុណដល់ប្រជាពលរដ្ឋកម្ពុជាទូទៅគ្រប់លំដាប់ថ្នាក់ ព្រមទាំងបានថ្លែងអំណរគុណទៅដល់សង្គមស៊ីវិលបណ្ដាគណបក្សនយោបាយនានា ដែល បានចូលរួមឧបត្ថម្ភគាំទ្រនូវថវិកាផ្ទាល់ខ្លួន ទោះបីជាតិចតួចក្ដីចូលរួមចំណែកក្នុងមូលនិធិរបស់ស្ថានីយ៍វិទ្យុ និង ទូរទស្សន៍ បាយ័ន ក៏ដូចបណ្ដាញទូរទស្សន៍កម្ពុជា ស៊ីធីអិន និងការគាំទ្រចំពោះការសម្រេចចិត្ដរបស់រាជរដ្ឋាភិបាលក្នុងការប្រកាន់យក ឥរិយាបថដើម្បីកាច់បំបាក់ការឈ្លានពានរបស់ថៃមកលើកម្ពុជា ព្រោះថាការបង្កើតសង្គ្រាមនេះមិនមែនកម្ពុជាជាអ្នកបង្កើតទេ គឺថៃជាអ្នកបង្កើត ហើយភស្ដុតាងជាក់ស្ដែង នាយករដ្ឋមន្ដ្រីថៃ អាប់ភីស៊ីតវេចាជីវ៉ា ត្រូវតែទទួលខុសត្រូវក្នុងឋានៈជាឧក្រិដ្ឋជនសង្គ្រាម ព្រោះការបាញ់ផ្លោងបំផ្លាញតាមប្រាសាទ និងវត្តកែវសិក្ខាគីរីស្វារៈ គឺជាឧក្រិដ្ឋកម្មសង្គ្រាមមួយទៅហើយ ។
សម្ដេច ហ៊ុន សែន មានប្រសាសន៍ថា ការចូលរួមនៅក្នុងចលនាស្នេហាជាតិ ដើម្បីការពារប្រទេសនេះ ត្រូវធ្វើរយៈ ពេលវែងគឺជាការឯកភាពជាតិមួយនៅក្នុងនយោបាយ ដែលរាជរដ្ឋាភិបាលប្រកាន់យកនូវវិធានការទាំងវិស័យយោធា ទាំង វិស័យនយោបាយ និង ការទូតផងដែរ ។ សម្ដេចតេជោមានប្រសាសន៍ថា ខឿន ការពារជាតិរបស់ប្រជាជនគឺបែបនេះឯង ព្រោះទឹកដីនេះជាទឹកដីយើងទាំងអស់គ្នា ហើយការចូលរួមនេះមានតម្លៃណាស់ បើ ទោះបីជាទឹកលុយចំនួនតិច ក៏ប៉ុន្ដែទឹកចិត្ដមានទំហំធំណាស់ ដែលយើងត្រូវមើលឃើញពីការចូលរួមរបស់ប្រជាជន ក្នុងផែនការ ការពារជាតិ ខឿនការពារជាតិរបស់ប្រជាពលរដ្ឋ ។
សម្ដេចតេជោបានអំពាវនាវឱ្យប្រជាពលរដ្ឋកម្ពុជាគ្រប់ស្រទាប់វណ្ណៈបន្ដចូលរួមក្នុងចលនានេះ ព្រោះ យើងត្រូវដាក់ចេញនូវការតស៊ូក្នុងក្របខ័ណ្ឌនៃយុទ្ធសាស្ដ្រតស៊ូយូរអង្វែង ព្រោះការតស៊ូជាមួយថៃ មិនមែនតស៊ូ១ថ្ងៃឬ១ឆ្នាំទេ គឺច្រើនឆ្នាំ ។ សម្ដេចតេជោនាយករដ្ឋមន្ដ្រីបានលើកឡើងនូវបទពិសោធន៍ពីអតីតកាលលើបញ្ហាប្រាសាទព្រះវិហារនេះ ដែលសម្ដេចព្រះនរោត្ដម សីហនុ បានប្រើប្រាស់ការចរចាតាំងពីឆ្នាំ ១៩៥៤ ហើយប្រាំឆ្នាំក្រោយទើបបានព្រះអង្គសម្រេចប្ដឹងទៅ តុលាការអន្ដរជាតិទីក្រុងឡាអេ ។ យើងក៏ដូចគ្នាដែរ យើងប្រើប្រាស់ការចរចាទ្វេភាគីដំណើរការជាងពីរឆ្នាំ ឥឡូវនេះ យើង ត្រូវសម្រេចចិត្ដធ្វើសកម្មភាពដោយតាមផ្លូវច្បាប់។
សម្ដេចតេជោ ហ៊ុន សែន មានប្រសាសន៍ថា ឥឡូវនេះយើងដើរដល់ដំណាក់កាលមួយដែលមិនអាចថយក្រោយគឺយន្ដការអន្ដរជាតិ ព្រោះយើងអត់ទុកចិត្ដបានទេ ដោយសារភាគីថៃបានចុះហត្ថលេខានិងដៃលប់នឹងជើង។ សម្ដេចតេជោថ្លែងថា ខ្ញុំសូមប្រកាសចាប់ពីម៉ោងនេះ ពេលនេះទៅ កម្ពុជាបន្ដការចរចាដោះស្រាយបញ្ហាដោយសន្ដិវិធី ក៏ប៉ុន្ដែលើមូលដ្ឋាននៃភាគីទីបីចូលរួម មិនអាចចរចាទ្វេភាគីទៀតទេ។
សម្ដេចតេជោ ហ៊ុន សែន មានប្រសាសន៍ថា ខ្ញុំអំពាវនាវឱ្យប្រជុំក្រុមប្រឹក្សា សន្ដិសុខជាបន្ទាន់ នេះជាចំណុចទី១ ហើយចំណុចទី២ ខ្ញុំសូមឱ្យបញ្ជូនមកនូវកងរក្សាសន្ដិភាព អ.ស.ប ឬក៏អ្នកសង្កេត ការណ៍យោធា អ.ស.ប មកកាន់កម្ពុជា បើទោះបីជាយើងដឹងថា កាតព្វកិច្ចការពារនេះ មិនមែនជាសមត្ថកិច្ចរបស់អគ្គលេខាធិការ អ.ស.ប ក្ដី ដើម្បីឱ្យដឹងថា តើអ្នកណាឈ្លានពានអ្នកណា ។ ប្រសិនបើក្រុមប្រឹក្សាសន្ដិសុខជួបការលំបាក ក្រុមប្រឹក្សាសន្ដិសុខប្រគល់តួនាទីនេះ ឱ្យទៅប្រធានអាស៊ាន ប៉ុន្ដែដំបូងបំផុតត្រូវតែប្រជុំ ដែលយន្ដការនេះត្រូវការបំពេញឱ្យគ្នា ដោយមិនមែនជាការទាមទារដាច់ចេញពីគ្នាទេ ។ យន្ដការអាស៊ាន និង អសប បំពេញឱ្យគ្នាដែលយើងនឹងកំដរលេង នៅលើបញ្ហានេះ ។ សម្ដេចតេជោ ហ៊ុន សែន មានប្រសាសន៍ទៀតថា ឥឡូវនេះកម្ពុជាកំពុងត្រៀមប្ដឹងទៅតុលាការយុត្ដិធម៌ អន្ដរជាតិ ដើម្បីបកស្រាយសាលក្រមតុលាការក្រុងឡាអេ ឆ្នាំ ១៩៦២ បើមិនដូច្នេះទេវាគ្រាន់តែជាដំណោះស្រាយបណ្ដោះអាសន្នក្នុងការឈប់បាញ់ តែវាមិនបានបញ្ចប់បញ្ហាទាំងស្រុងទេ។
សូមបញ្ជាក់ថា ដោយទទួលយកនូវសំណើរបស់ប្រទេសកម្ពុជា ដែលសុំឱ្យក្រុមប្រឹក្សាសន្ដិសុខ អ.ស.ប កោះប្រជុំជាបន្ទាន់ដើម្បី ដោះស្រាយបញ្ហាជម្លោះរវាងកម្ពុជា-ថៃនោះ ក្រុមប្រឹក្សាសន្តិសុខ អ.ស.ប បានសម្រេចយកថ្ងៃច័ន្ទទី ១៤ ខែកុម្ភៈ ឆ្នាំ ២០១១ បើកកិច្ចប្រជុំបន្ទាន់ មួយ ដែលមានការចូលរួមដោយប្រទេសជាសមាជិកអចិន្ដ្រៃយ៍ និង មិនអចិន្រៃ្ដយ៍ទាំង ១៥ ព្រមទាំងរដ្ឋមន្ដ្រីការបរទេស កម្ពុជា ថៃ និងឥណ្ឌូនេស៊ីដែលជាប្រធានអាស៊ានផងដែរ ។
ដោយឡែកសម្រាប់កងកម្លាំងប្រដាប់អាវុធគ្រប់ប្រភេទ ដែលកំពុងឈរជើងការពារបូរណភាពទឹកដី ក៏ដូចក្រុមគ្រួសាររបស់គេផងនោះ រាជរដ្ឋាភិបាលបានសម្រេចផ្ដល់ថវិកាចំនួន ១ម៉ឺនដុល្លារ រួមទាំងការចំណាយ សម្រាប់ការធ្វើបុណ្យទានផងសម្រាប់គ្រួសារយុទ្ធជនពលីម្នាក់ ។ ចំណែកយុទ្ធជនដែលរបួសធ្ងន់ទទួលបានថវិកាចំនួន ៣០០០ដុល្លារ ឯអ្នករបួសស្រាលទទួលបានថវិកាចំនួន ១៥០០ដុល្លារ ។ រាជរដ្ឋាភិបាលក៏បានឧបត្ដម្ភដល់ជនស៊ីវិលដែលពលី ម្នាក់ៗទទួលបានថវិកាចំនួន ៥០០០ដុល្លារ ។ ចំណែកមូលនិធិបាយ័នក៏បានប្រកាសអំពីការសម្រេចផ្ដល់ថវិកាចំនួន ១ ម៉ឺន ដុល្លារសម្រាប់គ្រួសារយុទ្ធជនពលីម្នាក់ និង ជនស៊ីវិលដែលពលីម្នាក់នូវថវិកាចំនួន ៥០០០ ដុល្លារផងដែរ។
No comments:
New comments are not allowed.