Saturday, January 15, 2011

បន្ទាយមានជ័យ​: ផ្លាស់ប្ដូរ​មន្ត្រី​មន្ទីរអប់រំ​

លោក​បណ្ឌិត អ៊ឹម សិទ្ធី ប្រគល់ត្រាជូនលោក លោក ឈើ​យ ចាន់ណា ប្រធាន​ថ្មី​មន្ទីរអប់រំ យុវជន និង​កីឡា ខេត្ត​បន្ទាយមានជ័យ
បន្ទាយមានជ័យ​: ក្រសួង​អប់រំ​បាន​ធ្វើ​ការតែងតាំង​ប្រធាន​មន្ទី​អប់រំ យុវជន និង​កីឡា ខេត្ត​បន្ទាយមានជ័យ បន្ទាប់ពី​លោក​ប្រធាន​មន្ទីរ​ចាស់​បាន​ចូលនិវត្តន៍​។​

ពិធី​ចូល​កាន់ដំណែង​បាន​ប្រព្រឹត្តទៅ​នៅ​សាលប្រជុំ​សាលាខេត្ត​បន្ទាយមានជ័យ កាលពី​ថ្ងៃ​ទី​១៣ មករា ២០១១ និង​មាន​ការចូលរួម​ពី​សំណាក់​លោក អ៊ឹម សិទ្ធី រដ្ឋមន្ត្រី​ក្រសួង​អប់រំ​, រដ្ឋលេខាធិការ លោក ប៉ុក សា​លុយ ប្រធាន​ក្រុមប្រឹក្សា​ខេត្ត​, លោក អ៊ុង អឿន អភិបាលខេត្ត មន្ត្រី​ស្ថាប័ន​អង្គភាព​ពាក់ព័ន្ធ​រាប់រយ​នាក់​ផងដែរ​។​

លោក នៀ សុ​ផន ប្រធាន​នាយកដ្ឋាន​បុគ្គលិក​នៃ​ក្រសួង​អប់រំ បាន​អាន​ប្រកាស​ក្រសួង​អប់រំ យុវជន និង​កីឡា លេខ​៣៣៧៦ អ​.​យ​.​ក​./​ប្រ​.​ក​. ចុះ​ថ្ងៃ​ទី​២២ ខែ​ធ្នូ ឆ្នាំ​២០១០ ចុះហត្ថលេខា​ដោយ​រដ្ឋមន្ត្រី អ៊ឹម សិទ្ធី ដែល​តែងតាំង លោក ឈើ​យ ចាន់ណា ពី​អនុប្រធាន​ជា​ប្រធាន​មន្ទីរអប់រំ យុវជន និង​កីឡា ខេត្ត​បន្ទាយមានជ័យ ជំនួស លោក ប្ល៉ែ​ង សា​រុត ប្រធាន​ដែល​ចូលនិវត្តន៍​។​

លោក ប្ល៉ែ​ក សា​រុត ប្រធាន​មន្ទីរ​អប់រំ យុវជន និង​កីឡា ខេត្ត​បន្ទាយមានជ័យ ដែល​ចូល​និវត្តន៍​បាន​លើក​ពី​លទ្ធផល និង​សមិទ្ធផល​ការងារ​ក្នុង​អំឡុង​លោក​កាន់ការ​នៅ​ខេត្ត​នេះ ដែល​មាន​ការអភិវឌ្ឍ​ន៍​ឈានឡើង ហើយ​ត្រូវ​ជំរុញ​បន្តទៀត​។​

លោក ឈើ​យ ចាន់ណា ប្រធាន​ថ្មី​មន្ទីរអប់រំ យុវជន និង​កីឡា ខេត្ត​បន្ទាយមានជ័យ បាន​ឡើង​ប្ដេជ្ញា​ចិត្ត​យ៉ាង​ក្លៀវក្លា​ថា នឹង​ទទួលខុសត្រូវ​ចំពោះមុខ​នាទី ភារកិច្ច​ដូច​ដែល​ថ្នាក់លើ អង្គភាព​ពាក់ព័ន្ធ​ដឹកនាំ ​ណែនាំនិង​សហការ​ដើម្បី​ឲ្យ​វិស័យ​អប់រំ យុវជន និង​កីឡា​ខេត្ត​នេះ បាន​លទ្ធផល និង​ប្រសិទ្ធភាព​ថែម​ទៀត​។​

លោក អ៊ុង អឿន អភិបាល​ខេត្ត​បន្ទាយមានជ័យ​និយាយថា ថ្នាក់ដឹកនាំ​ថ្មី​របស់​មន្ទីរ​អប់រំ​ខេត្ត​ នឹង​ដឹកនាំ​អនុវត្ត​ការងារ​ឲ្យ​រលូន​ជាមួយ​មន្ត្រី​ក្នុង​អង្គភាព និង​ពន្លឿន​នូវ​ការបំពេញ​បន្ថែម​ចំណុច​ខ្វះ​ចន្លោះ​កន្លងមក ចៀសវាង​ភាព​លំ​អៀង ។ ទី​២ ធានា​គុណភាព​ប្រសិទ្ធភាព និង​ការទទួល​នូវ​សេវា​អប់រំ​ល្អ និង​ទី​៣ ធានា​កសាង​សមត្ថភាព និង​អភិវឌ្ឍន៍​ស្ថាប័ន​រដ្ឋ​ស្រប​តាម​អទិភាព​នៃ​គោលនយោបាយ​អប់រំ រួម​មាន​ចក្ខុវិស័យ និង​ការកសាង​ធនធានមនុស្ស​។​

លោក​បណ្ឌិត អ៊ឹម សិទ្ធី ថ្លែងថា ប្រធាន​មន្ទីរ​អប់រំ​ថ្មី​ត្រូវ​តែ​បង្កើប​នូវ​បទពិសោធន៍​ស្នាដៃ​ច្រើន​ថែមទៀត​ក្នុង​បេសកកម្ម​ពី​ពេល​នេះ​ត​ទៅ​របស់​ខ្លួន​។ ត្រូវ​ជួសជុល​ចំណុច​ខ្វះខាត​ក្នុង​អង្គភាព​កន្លងមក ដើម្បី​ឲ្យ​ការងារ​ទីនោះ បាន​ជោគជ័យ​ថ្មីៗ​ទៀត ត្រូវ​អនុវត្តឲ្យ​វិស័យ​អប់រំ​បាន​បំរើ​ការបណ្ដុះបណ្ដាល​ធន​ធាន​មនុស្ស​ប្រកបដោយ​សមធម៌​៕
​​​​​​
ដោយ : សុផុន

No comments:

Post a Comment