សេចក្តីថ្លែងការណ៍ដដែលនោះ បានលើកឡើងថា កាលពីថ្ងៃទី២៩ ខែធ្នូ ឆ្នាំ២០១១ ជនជាតិថៃចំនួនប្រាំពីរនាក់ ក្នុងនោះ មានសមាជិកសភាថៃមួយរូបផង បានឆ្លងព្រំដែន ដោយខុសច្បាប់ ចូលជ្រៅមកក្នុងទឹកដីកម្ពុជា។ ក្រុមជនជាតិថៃនេះ ត្រូវបានចាប់ខ្លួន និងប្រគល់ ទៅឲ្យតុលាការកម្ពុជា ចាត់ការតាមនីតិវិធី ដោយត្រូវអនុលោមទៅតាមច្បាប់អន្តោប្រវេសន៍កម្ពុជា។
សេចក្តីថ្លែងការណ៍របស់អ្នកនាំពាក្យក្រសួងការបរទេស បានបន្ថែមថា កាលពីថ្ងៃទី១៣ ខែមករា ឆ្នាំ២០១១ តុលាការកម្ពុជាបានសម្រេចដោះលែងពិរុទ្ធជនថៃ ចំនួន ពីររូប គឺលោក Panich Vikitceth និងលោកស្រី Naruemol Chitwaratana ឲ្យនៅក្រៅឃុំបណ្តោះអាសន្ន ដោយផ្អែកលើសុខភាពរបស់ជនទាំងពីររូប។ តុលាការកម្ពុជា កំពុងបន្តពិចារណាអំពីករណីពិរុទ្ធជនថៃប្រាំរូបទៀត។
ជុំវិញករណីនេះ អ្នកនាំពាក្យក្រសួងការបរទេស បានគូសបញ្ជាក់ថា តុលាការកម្ពុជា នឹងដោះស្រាយបញ្ហានេះ ស្របទៅតាមច្បាប់អន្តោប្រវេសន៍កម្ពុជា ដោយយោងលើទំនាក់ទំនងល្អប្រសើររវាងប្រទេសកម្ពុជា និងថៃ ដែលមានក្នុងពេលបច្ចុប្បន្ននេះ ដោយពុំមានគំនិតអាក្រក់គុំគួន ចំពោះជនជាតិថៃទេ។
សេចក្តីថ្លែងការណ៍ខាងលើនេះ បានធ្វើឡើងតែពីរបីថ្ងៃប៉ុណ្ណោះ មុនពេលប្រមុខការទូតកម្ពុជា និងថៃ ត្រូវជួបពិភាក្សាទ្វេភាគី នៅក្រៅកិច្ចប្រជុំរដ្ឋមន្ត្រីការបរទេសអាស៊ានមិនចំហ នៅប្រទេសឥណ្ឌូនេស៊ី នាថ្ងៃទី១៧មករា ឆ្នាំ២០១១។ បញ្ហាដែលកំពុងកើតមានយ៉ាងក្តៅកគុក ជុំវិញការចាប់ខ្លួនជនជាតិថៃ ៧ នាក់ ដែលបានឆ្លងដែនខុសច្បាប់ចូលទឹកដីកម្ពុជា កាលពីថ្ងៃទី២៩ធ្នូ ឆ្នាំ២០១០ អាចនឹងក្លាយជារបៀបវារៈមួយ ដែលរដ្ឋមន្ត្រីការបរទេសថៃ លោក កាស៊ីត ភិរម្យ នឹងត្រូវលើកឡើងក្នុងជំនួបទ្វេភាគីនោះ។
ម្យ៉ាងវិញទៀត សេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជា ដែលបានបញ្ជាក់ពីចំណាត់ការចំពោះពិរុទ្ធជនថៃយ៉ាងដូច្នេះ ក៏បានធ្វើឡើង ដើម្បីជាការឆ្លើយតបនឹងរដ្ឋមន្ត្រីការបរទេសថៃ លោក កាស៊ីត ភិរម្យ ដែលបានជម្រុញដល់អាជ្ញាធរកម្ពុជា ឲ្យបង្កើនល្បឿនផ្នែកនីតិវិធីច្បាប់លើករណីចាប់ឃុំខ្លួនជនជាតិថៃ ៧ រូប ដែលបានឆ្លងដែនចូលទឹកដីកម្ពុជា ដោយខុសច្បាប់។
តាមសេចក្តីរាយការណ៍ រដ្ឋមន្ត្រីការបរទេសថៃ លោក កាស៊ីត ភិរម្យ ក៏បានអំពាវនាវឲ្យ មានការចាប់ផ្តើមយន្តការជាច្រើនលើកិច្ចសហប្រតិបត្តិការទ្វេភាគីរវាងកម្ពុជា និងថៃ ដើម្បីផលប្រយោជន៍ទៅវិញទៅមក។
ក្នុងដំណើរបំពេញទស្សនកិច្ចនៅប្រទេសទីម័រ កាលពីថ្ងៃទី១៣មករា លោក កាស៊ីត ភិរម្យ បានអត្ថាធិប្បាយ ក្រោយពីជនជាតិថៃ ២ រូប ក្នុងចំណោមជនជាតិថៃទាំង ៧ រូប ត្រូវបានតុលាការក្រុងភ្នំពេញ អនុញ្ញាតឲ្យស្ថិតនៅក្រៅឃុំជាបណ្តោះអាសន្ន ថា កម្ពុជាគួរតែដោះស្រាយករណីនេះឲ្យបានឆាប់រហ័ស ដោយសារវាមិនមែនជារឿងឧក្រិដ្ឋកម្មធ្ងន់ធ្ងរនោះទេ៕
ដោយ : លីហូវ
No comments:
Post a Comment