ភ្នំពេញ ៖ សាមិត្ត វីរៈ ជាឧត្ដមសេនីយ៍យោធាផ្កាយមួយ ដែលត្រូវបានចាប់ខ្លួនករណីដីធ្លី និងក្លែងបន្លំ ឯកសារកាលពីថ្ងៃទី១០ ខែមករា ឆ្នាំ២០១១នេះ ត្រូវបានអយ្យការតុលាការយោធារកឃើញករណីមួយផ្សេង ទៀត គឺជាកងកម្លាំងភេរវកម្មCFF ដែលប៉ុនប៉ងផ្ដួលរំលំរដ្ឋាភិបាលកម្ពុជាកាលពីឆ្នាំ២០០០។
លោកនាយឧត្ដមសេនីយ៍សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានមានប្រសាសន៍នៅព្រឹកថ្ងៃទី១១ ខែមករា ឆ្នាំ២០១១នេះថា ឈ្មោះសាមិត្ត វីរៈ កាលពីអំឡុងកងកម្លាំងភេរវកម្មCFF ប្រឆាំងនឹងរដ្ឋាភិបាលកម្ពុជា ត្រូវបានចាប់ខ្លួនម្ដងរួចមកហើយនៅខេត្តបន្ទាយមានជ័យ។ ប៉ុន្តែមិនដឹងជាមូលហេតុយ៉ាងម៉េចបានជាឈ្មោះនេះ បានចេញនៅក្រៅឃុំ និងបានចូលក្នុងកងកម្លាំងយោធារហូតពាក់ផ្កាយ១ក្នុងជួរកងទ័ព។ លោកនាយឧត្ដមសេនីយ៍ សៅ សុខា បានមានប្រសាសន៍បន្តទៀតថា ឈ្មោះនេះបានបង្កកម្លាំងកងទ័ពមិនឲ្យស្ថិតនៅក្រោមការគ្រប់គ្រងរបស់កងទ័ពរាជរដ្ឋាភិបាលកម្ពុជានោះទេ ថែមទាំងបន្លំឯកសារពាក់ព័ន្ធនឹងដីធ្លី និងឋានន្តរសក្ដិខ្លួនទៀតផង។
នៅព្រឹកថ្ងៃទី១១ ខែមករា ឆ្នាំ២០១១នេះ តំណាងអយ្យការតុលាការយោធាក្រុងភ្នំពេញ បាននាំជន នេះទៅឆ្លើយបំភ្លឺករណីបន្លំឯកសារ និងពាក់ព័ន្ធដីធ្លីមួយចំនួន ក៏ស្រាប់តែលេចចេញនូវករណីថ្មីមួយទៀត គឺ ជននេះធ្លាប់បានជាប់ពាក់ព័ន្ធជាមួយមេភេរវកម្មឈុន យ៉ាសិទ្ធ CFF កាលពីឆ្នាំ២០០០ ត្រូវបានចាប់ខ្លួនម្ដងរួច មកហើយ ប៉ុន្តែមិនដឹងជាមូលហេតុអ្វីបានជាជននេះត្រូវបាននៅក្រៅឃុំ និងតម្លើងឋានន្តរសក្ដិខ្លួន រហូតមក ដល់សព្វថ្ងៃនេះ។ តុលាការយោធាកំពុងសាកសួរនិងស៊ើបអង្កេតករណីឈ្មោះសាមិត្ត វីរៈ តាមនីតិវិធីច្បាប់។
លោកនាយកឧត្ដមសេនីយ៍ សៅ សុខា បានថ្លែងទៀតថា កងកម្លាំងប្រដាប់អាវុធយោធា ត្រូវបានរឹត បន្តឹងឲ្យបានកាន់តែខ្លាំងឡើង ជាពិសេសនៅក្នុងជួរយោធាតែម្ដងដើម្បីរក្សាសន្តិភាពចៀសវាងការបង្កភេរវកម្ម និងការបង្កើតកងកម្លាំងណាមួយប្រឆាំងនឹងរាជរដ្ឋាភិបាលកម្ពុជា៕
នរា
No comments:
Post a Comment