នាព្រឹកថ្ងៃទី១១ ខែមករា ឆ្នាំ២០១១ នៅទីស្តីការគណៈរដ្ឋមន្រ្តី ឯកឧត្តម វ៉ា គឹមហុងទេសរដ្ឋមន្ត្រីទទួលបន្ទុកកិច្ចការព្រំដែន បានទទួលជួបសមភាគីថៃឯកឧត្តម អាសាដា ឆៃយ៉ាណម(Asda Jayanama)ដែលត្រូវបានតែងតាំងជាប្រធានថ្មី នៃគណៈកម្មការចំរុះខ័ណ្ឌសីមា ព្រំដែន គោកថៃ-កម្ពុជា។
ឯកឧត្តម វ៉ា គឹមហុង បានមានប្រសាសន៍ឲ្យដឹងថា នេះជាជំនួបធម្មតា រវាងឯកឧត្តម និងឯកឧត្តម អាសាដា ឆៃយ៉ាណម(Asda Jayanama) ដែលទើបនឹងត្រូវតែងតាំងថ្មី ហើយបានដឹកនាំប្រតិភូគណៈកម្មការចំរុះខ័ណ្ឌសីមា ព្រំដែនគោកថៃ-កម្ពុជា មកសំដែងការគួសម។
ឯកឧត្តម វ៉ា គឹមហុង បានមានប្រសាសន៍ចាត់ទុកថា ជំនួបនៅពេលនេះគឺជាចំនុចល្អ ដែលនឹងនាំឲ្យមានការជួបគ្នារវាងគណៈកម្មការចំរុះខ័ណ្ឌសីមា ព្រំដែនគោកប្រទេសទាំងពីរកម្ពុជា-ថៃ នាពេលក្រោយបន្តបន្ទាប់ទៀត។ ឯកឧត្តម អាសាដា ឆៃយ៉ាណម(Asda Jayanama) បាន ស្វាគមន៍ ដោយបានលើកឡើងថា គណៈកម្មការចំរុះខ័ណ្ឌសីមា ព្រំដែនគោកប្រទេសទាំងពីរ ត្រូវតែ ជួបធ្វើការងារជាមួយគ្នាបន្តទៀត។
សូមរំលឹកផងដែរថា គណៈកម្មការចំរុះខ័ណ្ឌសីមាព្រំដែនគោកកម្ពុជាដឹកនាំដោយ ឯកឧត្តម វ៉ា គឺមហុង និង ឯកឧត្តម វ៉ាស៊ីន ទីរ៉ាវិឈីយ៉ាន(Vasin Teeravechyan) អតីតប្រធាន គណៈកម្មការចំរុះខ័ណ្ឌសីមាព្រំដែនគោកថៃ បានជួបប្រជុំជាមួយគ្នាជាលើកចុងក្រោយនៅរាជធានី ភ្នំពេញកាលពីឆ្នាំ២០០៩ កន្លងមក ហើយត្រូវបានអាក់ខានដោយសារតែ កំណត់ហេតុនៃការ ប្រជុំនាពេលកន្លងមក មិនត្រូវបានអនុម័ត ដោយរដ្ឋសភាថៃ។ ទាក់ទិននឹងបញ្ហានេះ ឯកឧត្តម អាសាដា ឆៃយ៉ាណម(Asda Jayanama) បានឲ្យដឹងថា រដ្ឋសភាថៃបានពន្យារពេលនៃការពិភាក្សា បញ្ហានេះក្នុងរយៈពេល ៣០ ថ្ងៃ ដើម្បីសុំការអនុម័តពីតុលាការធម្មនុញ្ញរបស់ថៃ។ ឯកឧត្តម អាសាដា ឆៃយ៉ាណម(Asda Jayanama) បានបញ្ជាក់ថា នៅក្នុងខណៈដែលរដ្ឋសភា និងរដ្ឋាភិបាល ថៃមិនទាន់បានសម្រេចយ៉ាងណានោះ ខ្ញុំបានគិតថា គណៈកម្មការចំរុះខ័ណសីមា ព្រំដែនគោកប្រទេស ទាំងពីរត្រូវតែបន្តជួបធ្វើការងារជាមួយគ្នាទៀត។
(រូបភាព៖ ស៊ឹម លាភ
ឯកឧត្តមទេសរដ្ឋមន្រ្តី វ៉ា គឺមហុង បានមានប្រសាសន៍ឲ្យដឹងថា ក្នុងជំនួបនេះភាគី ទាំងពីរបានពិភាក្សាលើបញ្ហាធម្មតា ដែលមិនទាក់ទងដល់ការសុំការអនុម័តពីរដ្ឋសភាថៃ គឺការបញ្ជូន អ្នកបច្ចេកទេស នៃគណៈកម្មការចំរុះខ័ណ្ឌសីមា ព្រំដែនគោកប្រទេសទាំងពីរកម្ពុជា-ថៃ ដើម្បីទៅពិនិត្យ មើលបង្គោលលេខ១ នៅច្រក ជាំសាងាំ និងទៅបង្គោលលេខ ២៣ ជាដើម។
No comments:
Post a Comment