កំពង់ធំ៖បុរសស្ត្រីចំនួន៤នាក់ដែលមានវ័យចំណាស់ទៅហើយមិនគួរនិងអគតិជួញដូរគ្រឿងញៀនជាច្រើនដងរហូតដល់នគរបាលប្រឆាំងគ្រឿងញៀនខេត្តកំពង់ធំក្របួចកជាប់កាលពីវេលាម៉ោង៦និង៤៨នាទីល្ងាចថ្ងៃទី១២ខែមករាឆ្នាំ២០១១នៅលើកំណាត់ផ្លូវជាតិលេខ៦អាត្រង់ចំណុចភូមិអាចារ្យលាក់សង្កាត់អាចារ្យលាក់ស្រុកស្ទឹងសែនខេត្តកំពង់ធំនៅខណៈពេលដែលជនសង្ស័យទាំងនោះកំពុងតែធ្វើការចែកចាយគ្រឿងញៀន។
វត្ថុតាងដែលសមត្ថកិច្ចប្រមូលបានភ្ជាប់ជាមួយជនសង្ស័យទាំងនោះរួមមានថ្នាំញៀនប្រភេទមេតុបហ្វេតតាមីនពណ៌ម្ទេសទុំចំនួន៤១៦គ្រាប់ថ្នាំនេះមានអក្សរWជាប់នៅលើគ្រាប់ថ្នាំនិងម៉ូតូម៉ាកហុងដាសេរី២០០៩ពណ៌ខ្មៅ១គ្រឿងគ្មានស្លាកលេខ។
ជនសង្ស័យទាំង៤នាក់នេះទី១មានឈ្មោះសុខសារឿនភេទប្រុសទី២ឈ្មោះស៊ឹមសុភាពភេទស្រីអ្នកទាំង២រស់នៅខេត្តកំពង់ធំទី៣ឈ្មោះម៉ឹងចាន់តារាភេទប្រុសនិងទី៤ឈ្មោះភាតដាលីនភេទស្រីអ្នកទាំង២រស់នៅខេត្តព្រះវិហារ។
លោកវរសេនីយ៍ត្រីងួនហៀងនាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ធំបាននិយាយថាជនសង្ស័យខាងលើជាមុខសញ្ញាដែលសមត្ថកិច្ចតាមដានមកយូរហើយរហូតឈានដល់ការចាប់ខ្លួននេះហើយការចាប់ខ្លួននេះគឺធ្វើឡើងតាមការអនុញ្ញាតពីលោកប៉ែនសារ៉ាត់ព្រះរាជអាជ្ញាអមសាលាដំបងខេត្តកំពង់ធំផងដែរ។លោកបញ្ជាក់ថាចំពោះសំណុំរឿងនេះគឺសមត្ថកិច្ចរបស់លោកកំពុងកសាងសំណុំរឿងតាមនីតិវិធីដើម្បីបញ្ជូនទៅព្រះរាជអាជ្ញា៕
កងចេស្ដា
No comments:
Post a Comment