ភ្នំពេញ: លោកវេជ្ជបណ្ឌិតម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីពេលថ្មីៗនេះ បានធ្វើការអំពាវនាវដល់ប្រជាពលរដ្ឋ ឲ្យកាត់បន្ថយ ឬឈានទៅបញ្ឈប់ការពិសារស្រា ដើម្បីសុខភាពផ្ទាល់ខ្លួន ដើម្បីសេចក្តីថ្លៃថ្នូរក្នុងសង្គម។
លោកបានបន្តដោយបង្ហាញពីផលវិបាកនៃការពិសាគ្រឿងស្រវឹងថា ការពិសារសុរា ឬជាតិអាល់កុល ប៉ះពាល់យ៉ាងធ្ងន់ធ្ងរចំពោះពួកគេ និងសង្គមជាតិ ដែលនាំឲ្យកើតជំងឺរលាកថ្លើម ជំងឺរលាកពោះវៀន ជំងឺបេះដូង និងជំងឺដាច់សសៃឈាម ក្នុងខួរក្បាល ដែលអាចបណ្តាលឲ្យពួកគេ ស្លាប់ ហើយក៏បណ្តាលឲ្យមានគ្រោះថ្នាក់ចរាចរផងដែរ។
លោកវេជ្ជបណ្ឌិត ម៉ម ប៊ុនហេង បានបន្តថា “ ការពិសាស្រាឬជាតិអាល់កុល ក៏បណ្តាលឲ្យ មានអំពើហឹង្សាក្នុងគ្រួសារ ការឈ្លោះ ប្រកែកទាស់ទែងគ្នាតាមភោជនីយដ្ឋាន ឬទីកន្លែងសាធារណៈ ការប្រឈមនឹងជំងឺអេដស៍ នៅពេលដែលពួកគេបាត់បង់ម្ចាស់ការលើខ្លួនឯង និងបណ្តាលឲ្យពួកគេពុលស្រាឬជាតិអាកុល ដែលផលិតទ្បើងគ្មានស្តង់ដាត្រឹមត្រូវ ” ។
លោកបន្តថា យោងតាមការសិក្សា ប្រជាជនកម្ពុជា៦៥ភាគរយ ដែលមានអាយុចាប់ពី២៥ ដល់៦៥ឆ្នាំ ទទួលទានសុរា ឬជាតិអាល់កុល ។ លោកបានលើកទ្បើងពីភាពគ្រោះថ្នាក់ជាក់ស្តែង ដែលកើតមាននៅប្រទេសកម្ពុជាកន្លងមក ដោយចង្អុលបង្ហាញថា នៅឆ្នាំ១៩៩៦ មនុស្ស៤៥នាក់ បានបាត់បង់ជីវិត ដោយសាស្រា លាយជាមួយថ្នាំពុល នៅឆ្នាំ១៩៩៨ មនុស្ស៥០នាក់បានស្លាប់ ដោយសារជាតិ មេតាណុល ។ នៅឆ្នាំ២០១០កន្លងមកថ្មីៗនេះ មនុស្ស៤នាក់បានស្លាប់ ដែលគេសង្ស័យថា បណ្តាលមកពីជាតិពុលស្រានៅក្នុង ស្រុកអូររាំងឪ ខេត្តកំពង់ចាម ។
យោងតាមការសិក្សាមួយទៀត ដែលធ្វើទ្បើងដោយមជ្ឈមណ្ឌលប្រជាពលរដ្ឋ កាលពីឆ្នាំ ២០០៩ ដែលបានធ្វើការសាកសួរមនុស្ស១.៤០០នាក់ នៅក្នុងខេត្ត-ក្រុង ចំនួន៧ បានរកឃើញថា ៨៥ភាគរយ នៃប្រជាជនដែលបានសាកសួរ អះអាងថាពួកគេចូលចិត្តទទួលទានជាតិ អាល់កុល ក្នុងនោះ ១៤ភាគរយ មានអាយុ១៤ឆ្នាំ និង៥២ភាគរយ មានអាយុចន្លោះពី១៨ ទៅ២៥ឆ្នាំ ។
លោកស្រីអ៊ឹង កន្ថាផាវី រដ្ឋមន្ត្រីក្រសួងកិច្ចការនារីក្រសួងកិច្ចការនារី បានឲ្យដឹងនាព្រឹកថ្ងៃព្រហស្បត៍ ទី១៣មករា កន្លងមកថា ស្រាជាមូលហេតុ មួយ ក្នុងចំណោមមូលហេតុដទៃទៀត ដែលបណ្តាលឲ្យមានអំពើហឹង្សាក្នុងគ្រួសារ ។ លើសពីនេះការទទួលទានស្រានាំឲ្យមានអំពើហឹង្សា ដទៃទៀតដូចជា ករណីរំលោភសេពសន្ថវៈ យើងឃើញថាជនល្មើសភាគច្រើន ទទួលទានសុរា ដែលធ្វើឲ្យគាត់មិនអាចគ្រប់គ្រងខ្លួនឯងបាន ។
លោកស្រីបានបន្តថា “ ខ្ញុំសូមអបអរចំពោះក្រសួងសុខាភិបាល ដែលបានចេញការអំពាវនាវ កាលពីពេលថ្មីៗនេះ ឲ្យប្រជាជនកាត់បន្ថយ ឬបញ្ឈប់ការទទួលទានគ្រឿងស្រវឹង ដើម្បីធ្វើឲ្យប្រជាជន មានការប្រុងប្រយ័ត្នចំពោះសុខភាពរបស់ខ្លួន ” ។
នៅថ្ងៃអង្គារ ទី១១ មករា កន្លងមកនេះ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីកម្ពុជា បានស្នើសុំឲ្យសមត្ថកិច្ច កុំពិសារសុរា នៅពេលកំពុងបំពេញការងារ ជាពិសេសនគរបាលចរាចរ ដែលមានតួនាទីអនុវត្តន៍ការផាកពិន័យ អ្នកបើកបរស្រវឹងដែលល្មើសច្បាប់ចរាចរ ។ សម្តេចអគ្គមហាសេនាបតីតេជោហ៊ុន សែន ក៏បានបន្តដាស់តឿនមន្ត្រីរាជការ និងប្រជាពលរដ្ឋទាំងអស់ឲ្យប្រុងប្រយ័ត្ន ចំពោះគ្រោះថ្នាក់ចរាចរ ដែលបណ្តាលមកពីការសេពគ្រឿងស្រវឹង ព្រោះពេលនេះជារដូវរៀបអាពាហ៍ពិពាហ៍ ដែលមនុស្សគ្រប់រូបសប្បាយនឹងគ្រឿងស្រវឹង ៕
No comments:
Post a Comment