ព្រះវិហារ ៖ នៅថ្ងៃទី១៧ដល់១៩ខែមករាឆ្នាំ២០១១កម្លាំងចំរុះដឹកនាំដោយលោកសថាវីអភិបាលរងខេត្តលោកឧត្ដមវរសេនីយ៍ត្រីស្រីបូរ៉ាមេបញ្ជាការរងកងពលធំអន្តរាគមន៍លេខ៣លោក ប៉ុល ខាំណារ៉េត នាយខណ្ឌរដ្ឋបាលព្រៃឈើនិងលោក ថុល គឹមហុង ព្រះរាជអាជ្ញាអមសាលាដំបូងខេត្តបានចុះទៅធ្វើប្រតិបត្តិការពិសេសចុះរុះរើសំណង់អនាធិបតេយ្យបានចំនួន៩៧កូនខ្ទមដែលពុំមានមនុស្សរស់នៅសង់ទុកចោលតាមប្លង់ដីនីមួយៗស្ថិតនៅចំណុចស្វាយជ្រុំក្នុងភូមិឬស្សីឃុំកន្ទួតស្រុកជាំក្សាន្ត។
លោកអភិបាលរងខេត្តបញ្ជាក់ទៀតថាក្នុងការចុះអនុវត្តការងារខាងលើកម្លាំងចម្រុះបានជួបប្រទះការលាក់ស្តុកទុកបទល្មើសព្រៃឈើមានដូចជាឈើក្រញូងបេងនាងនួនធ្នង់ គគីរនៅតាមផ្ទះនិងសិប្បកម្មរបស់ជនល្មើសឈ្មោះ វ៉ាន់ទឹង និងឈ្មោះ គិនចាន់ថា ហៅ សាំងសន ដែលលួចធ្វើការកែច្នៃឈើគ្រញូងមានរាងជាដុំទ្រវែងមានកម្រាស់ពី៨ទៅ១០សង់ទីម៉ែត្រប្រវែង៦ទៅ៨តឹកចំនួន១៦ការុងក្នុង១ការុងមានទម្ងន់៦០ទៅ៧៤គីឡូក្រាមដើម្បីលួចលាក់ដឹកយកទៅលក់ក្រៅប្រទេសដោយខុសច្បាប់ដោយរឹបអូសបានជញ្ជីងថ្លឹងទម្ងន់១០០គីឡូក្រាមចំនួន១និងគោយន្តច្នៃចំនួន១ពេលនេះគំនរឈើប្រណិតនិងវត្ថុតាងបានយកទៅរក្សាទុកនៅសង្កាត់រដ្ឋបាលព្រៃឈើកន្ទួត។
ចំណែកជនល្មើសទាំង២នាក់ខាងលើត្រូវបានមន្ត្រីតុលាការចេញដីកាតាមចាប់ខ្លួនយកមកផ្ដន្ទាទោសតាមផ្លូវច្បាប់ផងដែរ។
គួរបញ្ជាក់ថាសំណង់ប្រជាពលរដ្ឋកំពុងរស់នៅគឺក្រុមការងារនឹងអោយពួកគាត់ទៅរស់នៅក្នុងភូមិធម្មជាតិសម្ដេចតេជោវិញដោយទទួលបានប្លង់ដីទំហំ១០០ម៉ែត្រគុណ៥០ម៉ែត្រក្នុង១គ្រួសារ៕
មង្គល
No comments:
Post a Comment