Monday, January 31, 2011

ទាហាន​ថៃ​ចំនួន​២​នាក់​ចូល​មក​ទឹក​ដី​កម្ពុជា​ជួញ​ដូរ​គ្រឿង​ញៀន​ត្រូវ​បាន​សមត្ថកិច្ច​ចាប់​ឃាត់​ខ្លួន​រួម​ទាំង​វត្ថុ​តាង


ឧត្តរមានជ័យ ៖ ពួក​ទា​ហាន​សៀម​ចំនួន​២​នាក់​ចូល​មក​ទឹក​ដី​កម្ពុជា​ជួញ​ដូរ​ថ្នាំ​ញៀន​ត្រូវ​​បាន​កម្លាំង​អធិការ​ដ្ឋាន​នគរបាល​ស្រុក​សហការ​ជា​មួយ​កម្លាំង​ប៉ុស្តិ៍​នគរបាល​ច្រក​ទ្វារ​អន្តរជាតិ​ជាំ​ចាប់​ឃាត់​ខ្លួន​រួម​ទាំង​វត្ថុ​តាង​ខណៈ​ពេល​ដែល​កំពុង​ធ្វើ​ការ​ចែក​ចាយ​។
ហេតុការណ៍​ដែល​សមត្ថកិច្ច​ប៉ូលិស​ស្រុក​អន្លង់​វែង​និង​នគរបាល​ប៉ុស្តិ៍​ច្រក​ទ្វារ​អន្តរជាតិ​ជាំ​ចាប់​ឃាត់​ខ្លួន​ទាហាន​ថៃ​២​នាក់​ជួញ​ដូរ​គ្រឿង​ញៀន​បាន​កើត​ឡើង​កាល​ពី​វេលា​ម៉ោង​៨​និង​៤០​នាទី​ព្រឹក​ថ្ងៃ​ទី​៣០​ខែ​មករា​ឆ្នាំ​២០១១​នៅ​ចំណុច​ច្រក​ជាំ​ក្នុង​ទឹក​ដី​កម្ពុជា​ស្ថិត​នៅ​ក្នុង​ ភូមិ​លើ​ភ្នំ ឃុំ​ត្រពាំង​ប្រីយ៏​ ស្រុក​អន្លង់​វែង ខេត្ត​ឧត្តរ​មាន​ជ័យ​។

លោក​វរសេនីយ៍ត្រី​ ស៊ុយ​ សេង អធិការ​នគរបាល​ស្រុក​អន្លង់​វែង​បាន​ឲ្យ​ដឹង​ថា​ករណី​ក្នុង​ការ​ចាប់​ខ្លួន​ទាហាន​ជន​ជាតិ​ថៃ​ទាំង​២​នាក់​នេះ​សមត្ថកិច្ច​បាន​ដក​ហូត​វត្ថុ​តាង​ដូច​ជា​ថ្នាំ​ញៀន​គ្រាប់​យ៉ាម៉ា​ពណ៌​ផ្កា​ឈូក​ចំនួន​២៧​គ្រាប់​និង​ប្រាក់​ចំនួន​១១៧២​បាត​ ទូរស័ព្ទ​ដៃ​ម៉ាក​ណូ​គារ​ចំនួន​២​គ្រឿង​បារី​ចំនួន​៥​សុង​ទៀត​ផង​។
ទាហាន​ជន​ជាតិ​ថៃ​នោះ​ទី​១​ឈ្មោះ​ ថា​លើន​សាក់​ខែន​តាប់​ ភេទ​ប្រុស​អាយុ​២១​ឆ្នាំ​រស់​នៅ ភូមិ​ស្រែ​ប្រី​ ឃុំ​ផៃ​ផាត់​ថះ​ណា ​ស្រុក​ភូ​សិ​ង ខេត្ត​ស៊ី​សះ​កេត​ប្រទេស​ថៃ​មុខ​របរ​ជា​ទាហាន​កាតព្វកិច្ច​កង​កម្លាំង​សុរះណារី​​(ប៉ា​រ៉ា)ប្រចាំ​នៅ​ស្រែ​ប្រី​ ទី២​ឈ្មោះ​ ភី​និត​ប៊ុន​មី ភេទ​ប្រុស​អាយុ​២០​ឆ្នាំ​រស់​នៅ​ភូមិ​ឃុំ​ស្រុក​ខេត្ត​ខាង​លើ​មុខ​របរ​ជា​ទាហាន​ដូច​គ្នា​។
លោក​បន្ត​ថា​ករណី​នេះ​អធិការ​នគរបាល​ស្រុក​អន្លង់​វែង​បាន​កសាង​សំណុំ​រឿង​តាម​នីតិវិធី​បញ្ជូន​ជន​ជាតិ​ថៃ​ទាំង​២​នាក់​និង​វត្ថុ​តាង​ខាង​លើ​ទៅ​តុលា​ការ​ដំបូង​ខេត្ត​សៀម​រាប​ដើម្បី​ផ្ដន្ទា​ទោស​តាម​ផ្លូវ​ច្បាប់​៕
ចាន់ ធី

No comments:

Post a Comment