បទល្មើសព្រហ្មទណ្ឌនៅក្នុងរាជធានីភ្នំពេញ រយៈពេលមួយឆ្នាំ គិតដល់ថ្ងៃទី១៧ ធ្នូ ២០១០ បានកើតឡើងចំនួន៣១៨លើក ថយចុះជាងឆ្នាំកន្លងមកចំនួន៧៥លើក ស្មើនឹង១៩,០៨% បណ្តាលឱ្យមនុស្សស្លាប់៤៤នាក់ របួស៩៣នាក់ ។ នេះជាតួលេខបង្ហាញដោយរបាយការណ៍របស់ការិយាល័យកណ្តាលនគរបាលព្រហ្មទណ្ឌនៃស្នងការដ្ឋានរាជធានីដែលកោះសន្តិភាពទទួលបាន ។ តាមការត្រួតពិនិត្យសភាពការណ៍ក្នុងឆ្នាំ២០១០ បទល្មើសព្រហ្មទណ្ឌមានការថយចុះទាំងបទល្មើសមជ្ឈិមនិងបទល្មើសឧក្រិដ្ឋ ។ បទល្មើសឧក្រិដ្ឋមានចំនួន១២៧លើក ប្រៀបធៀបនឹងឆ្នាំ២០០៩ ថយចុះមួយលើក បទល្មើសមជ្ឈិមមានចំនួន១៩១លើក ថយចុះ៧៤លើក ។ ប្រភពព័ត៌មានដដែលបង្ហាញថា បទល្មើសឧក្រិដ្ឋក្នុងឆ្នាំ២០១០ កើតឡើង១២៧លើក បណ្តាលឱ្យមនុស្សស្លាប់ចំនួន៤៤នាក់ របួស២១នាក់ ។ កំហែងយក (ប្លន់) កើតឡើង៦៥លើក ក្នុងនោះមានកំហែងយកដោយប្រើប្រាស់អាវុធ៤១លើក និងកំហែងយកដោយប្រើប្រាស់មធ្យោបាយផ្សេងៗ២៤លើក ធ្វើឱ្យមនុស្សស្លាប់១១នាក់ របួស១៧ នាក់ ។
ឃាតកម្មដោយចេតនាកើតឡើង៣៣លើក បណ្តាលឱ្យមនុស្សស្លាប់៣៣នាក់ របួស៤នាក់ ក្នុងនោះករណីបាញ់ប្រហារតាមផ្លូវសាធារណៈ១២លើក សម្លាប់នៅក្នុងផ្ទះសំណាក់៧លើក និងវាយកាប់ចាក់សម្លាប់តាមផ្លូវសាធារណៈ១៤លើក ។ មូលហេតុគឺផ្តើមចេញពីគំនុំទំនាស់ អំពើហិង្សាក្នុងគ្រួសារ និងទំនាស់របស់ក្មេងទំនើងឈានទៅវាយកាប់សម្លាប់គ្នា ។ ចំណែកបទល្មើសមជ្ឈិមកើតឡើង១៩១លើក បើប្រៀបធៀបឆ្នាំ២០០៩ ថយចុះ៧៤លើក ក្នុងនោះមានលួច (គ្មានស្ថានទម្ងន់) ចំនួន៧៥លើក ឆក់ (កំហែងយកគ្មានស្ថានទម្ងន់) ចំនួន៤៤លើក អំពើហិង្សា (ទំនាស់) ចំនួន៥៣លើក ករណីផ្ទុះអាវុធចំនួន១៥លើក ដាក់ថ្នាំសណ្តំចំនួន២លើក និងឆបោកចំនួន២លើក ។ ដោយឡែក បទល្មើសរំលោភសេពសន្ថវៈកើតឡើង២៩លើក ភាគច្រើនបង្កឡើងដោយសមាសភាពយុវជនលួងលោមជនរងគ្រោះយកទៅរំលោភនៅផ្ទះសំណាក់ ឬតាមគោលដៅដែលណាត់ជួប ។ សមត្ថកិច្ចស្រាវជ្រាវបង្ក្រាបបាន២៨ករណី ឃាត់ខ្លួន២៨នាក់ ។
យោងតាមរបាយការណ៍បូកសរុបសភាពការណ៍ការងាររក្សាសន្តិសុខ សណ្តាប់ធ្នាប់សង្គមដដែល បានវាយតម្លៃសភាពការណ៍បទល្មើសព្រហ្មទណ្ឌជារួមត្រូវបានកាត់បន្ថយឱ្យថយចុះទាំងបទល្មើសឧក្រិដ្ឋ ទាំងបទល្មើសមជ្ឈិម។ ក្នុងនោះបទល្មើសកំហែងយកដោយមានប្រដាប់អាវុធ ដែលជាកង្វល់និងការភ័យខ្លាចរបស់ប្រជាពលរដ្ឋ ករណីលួចគ្មានស្ថានទម្ងន់ដូចជាឆក់ លួច គាស់ផ្ទះនៅតាមមូលដ្ឋាន ត្រូវបានទប់ស្កាត់ និងកាត់បន្ថយស្ថិតក្នុងកំរិតមួយដែលអាចទទួលយកបាន ។ ប៉ុន្តែនៅក្នុងអំឡុងខែវិច្ឆិកា ២០១០ បទល្មើសកំហែងយកឬប្លន់ ឃាតកម្ម បានកំរើកឡើងវិញ គួរឱ្យកត់សំគាល់ទាំងបរិមាណនិងសកម្មភាពដែលមិនធ្លាប់កើតមានក្នុងរយៈពេលកន្លងមកនៅរាជធានីភ្នំពេញ ។ តែសភាពការណ៍នេះមិនធ្វើឱ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់សាធារណៈក្នុងរាជធានីភ្នំពេញឡើយ ដោយសារសមត្ថកិច្ចបានម្ចាស់ការសហការស៊ើបអង្កេត ស្រាវជ្រាវបង្ក្រាបជនល្មើសជាមេខ្លោង និងបក្សពួក កសាងសំណុំរឿងបញ្ជូនទៅតុលាការផ្តន្ទាទោសតាមច្បាប់បានទាន់ពេល ទ្រោលភាពការណ៍ទាំងនោះឱ្យមានការស្ងប់ស្ងាត់ជាប្រក្រតីឡើងវិញបានឆាប់រហ័ស ៕
ដោយ ៖ កោះឯករាជ្យ
No comments:
Post a Comment