កាសែតបាងកកប៉ុស្តិ៍របស់ថៃបានចុះផ្សាយរូបថតនៃការវាយកម្ទេចផ្ទាំងថ្មចារឹកនោះដោយដាក់ចំណងជើងថា “ស្លាកសញ្ញាត្រូវបានកម្ទេចចោល” ។ បាងកកប៉ុស្តិ៍រាយការណ៍ថាកងកម្លាំងកម្ពុជាបានវាយកម្ទេចផ្ទាំងថ្មបង្កជម្លោះនោះចោលដោយសារភាគីទាំងពីរព្រមព្រៀងគ្នាថាគ្មានការដាក់តាំងស្លាកសញ្ញាអ្វីទាំងអស់នៅក្នុងតំបន់ជម្លោះ។
ប្រភពពីជាយដែនឱ្យដឹងថា ស្លាកសញ្ញាថ្មមួយផ្សេងទៀតរបស់ទាហានថៃដែលមានន័យថា “ទំហំដី៤,៦គីឡូម៉ែត្រ ជាទឹកដីថៃ” ដែលតាំងនៅចំណុចសំបុកឃ្មុំនោះ ក៏ត្រូវបានរុះរើចេញវិញផងដែរ។ ចំណែកទាហានថៃ ដែលចូលមកឈរជើងនៅ ចំណុចសំបុកឃ្មុំទល់មុខប្រាសាទព្រះវិហារកាលពីព្រឹកមិញនោះ ត្រូវបានដកចេញទៅវិញអស់ហើយ។
ការរុះរើនេះបានធ្វើឡើងបន្ទាប់ពី មេទ័ពនៃភាគីទាំង២ កម្ពុជា-ថៃ បានជួបចរចាគ្នានៅក្នុងបរិវេណវត្តកែវសិក្ខាគិរីស្វារៈនៅវេលាម៉ោង១១ព្រឹកថ្ងៃនេះដើម្បីពិភាក្សាដោះស្រាយការរុះរើស្លាកសញ្ញាថ្មចារឹកទាំង២ភាគីនោះចេញ។
ក្រោយជំនួបនោះ ភាគីកម្ពុជាយល់ព្រមរុះរើស្លាកថ្មចារឹករបស់ខ្លួនចេញទាំង ២ ចំណែកភាគីថៃក៏យល់ព្រមរុះរើស្លាកថ្មរបស់ពួកគេចេញវិញផងដែរ រីឯកងទ័ពថៃជាច្រើនរយនាក់ត្រូវបានដកចេញពីតំបន់សំបុកឃ្មុំអស់ហើយ៕
ដោយ : សម្បត្តិ
No comments:
Post a Comment