Saturday, January 08, 2011

ទាហាន​សៀម​បាញ់​ពលរដ្ឋ​ខ្មែរ​ទៀតហើយ ស្លាប់​ម្នាក់ របួស​ម្នាក់ បាត់​ខ្លួន​ម្នាក់

បន្ទាយមានជ័យ: ​ទាហាន​ឈុតខ្មៅ​សៀម​ការពារ​ព្រំដែន​នៅក្បែរ​បង្គោល​ព្រំដែន​លេខ​២៦ ស្រុក​ឡាក់​ហាន​សាយ ខេត្ត​បូរី​រម្យ​របស់​ថៃ​បាន​ស្ទាក់​បាញ់រះ​លើ​ហ្វូង​ពលរដ្ឋ​ខ្មែរ​ក្រីក្រ​ ប្រមាណ ១០​នាក់ ដែល​ឡើង​កាប់​ឈើ​គ្រញូង​នៅ​ខ្នងភ្នំ​ដងរែក​ដោយបាន​សម្លាប់​ពលរដ្ឋ​ខ្មែរ​ ម្នាក់​និង​ធ្វើ​ឲ្យ​របួស​ម្នាក់ ។​

​    ​លោក​យ៉​ត រ៉ា​យ អធិការ​ប៉ូលិស​ស្រុក​ថ្មពួក​បាន​និយាយថា កាលពី​ម៉ោង​៣​និង​៣០​នាទី ថ្ងៃទី​៦​មករា​២០១១ នៅ​ខាងជើង​បង្គោល​ព្រំដែន​លេខ​២៦ លើ​ខ្នងភ្នំ​ដងរែក ឈម​នឹង​ភូមិ​ធ្លក ឃុំ​បន្ទាយឆ្មារ ស្រុក​ថ្មពួក ខេត្តបន្ទាយមានជ័យ ទាហាន​ឈុតខ្មៅ​សៀម​ឈរជើង​ក្បែរ​បង្គោល​ព្រំដែន​នោះបាន​ស្ទាក់​បាញ់ប្រហារ​លើ ​ហ្វូង​ពលរដ្ឋ​ខ្មែរ​ក្រីក្រ​ចំនួន ១០​នាក់ ដែល​ស៊ីឈ្នួល​ឈ្មួញ​ឡើង​កាប់​ឈើ​គ្រញូង​តាម​ព្រំដែន ។​

​    ​លោក​បន្តថា ជនរងគ្រោះ​ម្នាក់​ដែល​បាន​ត្រូវ​បាញ់​ស្លាប់ ហើយ​ពុំទាន់​បញ្ជូន​សព​ត្រឡប់មកវិញ​មានឈ្មោះ​ឡាង សម្បត្តិ អាយុ ៣២​ឆ្នាំ រស់នៅ​ភូមិ​បឹង​តា​ស្រី ឃុំ​គោក​រមៀត ស្រុក​ថ្មពួក ខេត្តបន្ទាយមានជ័យ ។ ម្នាក់ទៀត​បាត់​ខ្លួន​តែ​បាន​វិល​មក​ផ្ទះ​នៅ​ថ្ងៃទី​៧ មករា ២០១១ ។ ពលរដ្ឋ​ទាំងនោះ គឺ​៦​នាក់​រស់នៅ​បឹង​តា​ស្រី និង ៤​នាក់​ទៀត​នៅ​ភូមិ​ធ្នង់ ឃុំ​បន្ទាយឆ្មារ ។ ពួកគេ​បាន​រត់​ប្រសេចប្រសាច​ទម្លាក់ខ្លួន​ពីលើ​ភ្នំ​មកក្រោម​វិញ​ហើយ​វិល​មក ​ភូមិ ។ ឈ្មួញ​បាន​ជួល​ពួកគេ​កាប់​ឈើ​គ្រញូង​រួច​ស្តុក​ក្នុង​កន្លែង​ដែល​យោធា​ ការពារ​ព្រំដែន​កម្ពុជា​ការពារ ។​

​    ​ទោះយ៉ាងណា​មាន​ប្រភព​មួយ​ទៀតថា មាន​ពលរដ្ឋ​ម្នាក់ទៀត​បាន​របួស​ហើយ​កំពុង​សម្ងំ​ព្យាបាល​នៅ​ពេទ្យ​ឯកជន​ ណាមួយ ព្រោះ​គេចវេះ​ពី​សមត្ថកិច្ច​តាម​ស្រាវជ្រាវ​រក​ជនល្មើសរ​ក​ស៊ី​ឈើ​គ្រញូង ។​

​    ​ចំណែក​លោក​កុយ គួ​ង អ្នកនាំពាក្យ​ក្រសួងការបរទេស​កម្ពុ​ជាមាន​ប្រសាសន៍ថា យើង​ទើបតែ​ទទួលបាន​ព័ត៌មាន​បឋម​ទាក់ទង​នឹង​រឿងនេះ ។ ក្រសួងការបរទេស​បាន​ប្រាប់​ឲ្យ​អគ្គ​កុងស៊ុល​កម្ពុជា​នៅ​ខេត្ត​ស្រះកែវ​ ពិនិត្យ​ជាក់ស្តែង និង​ស្វែងរក​ព័ត៌មាន​លម្អិត​អំពី​មូលហេតុ និង​អត្តសញ្ញាណ​របស់​ជនរ​ង​គ្រោះ ។​

​    ​នៅពេល​សួរថា តើ​កម្ពុជា​នឹងមាន​ប្រតិកម្ម​យ៉ាងណា​ចំពោះ​ករណីនេះ​លោក​កុយ គួ​ង បាន​ឆ្លើយថា យើង​រង់ចាំ​ព័ត៌មាន​លម្អិត​សិន ។ ទោះជា​យ៉ាងណាក្តី​លោក​បាន​និយាយ​បន្ថែមទៀតថា ជាទូទៅ​នៅពេល​មាន​ករណី​កាច​សាហាវ​បែបនេះ​យើង​តែង​ធ្វើការ​តវ៉ា​តាម​កំណត់​ ការទូត​ដោយ​មិន​ធ្វើ​ឲ្យ​ប៉ះពាល់​ដល់​ទំនាក់ទំនង​ការទូត​រវាង​ប្រទេស​ កម្ពុជា​និង​ប្រទេស​ថៃ​ឡើយ ។​    ​

​    ​ចំពោះ​បញ្ហា​ដែលថា តើ​ករណី​បាញ់សម្លាប់​ពលរដ្ឋ​កម្ពុជា​នេះ​អាច​នឹង​ជះឥទ្ធិពល​ដល់​ករណី​ជនជាតិ ​ថៃ ៧​នាក់ ដែល​កំពុង​ស្ថិតនៅក្នុង​មន្ទីរឃុំឃាំង​កម្ពុជា​ដែរ ឬ អត់​នោះ​លោក​កុយ គួ​ង​បាន​និយាយថា យើង​មិនបាន​ភ្ជាប់​ករណី​មួយ​ជាមួយនឹង​ករណី​មួយ​ផ្សេង​ទៀតឡើយ ។ យើង​មិន​ចង់​ធ្វើ​អ្វី​នាំ​ឲ្យ​ប៉ះពាល់​ដល់​ទំនាក់ទំនង​កម្ពុជា​-​ថៃ​ឡើយ ៕
CEN

No comments: