ហេតុការណ៍ទាហានសៀមឈុតខ្មៅបាញ់ប្រជាជនកម្ពុជាខាងលើ កើតឡើងនៅវេលាម៉ោង ១១ និង ៣០នាទី ថ្ងៃត្រង់ទី៧ ខែមករា ឆ្នាំ២០១១ ស្ថិតក្នុងទឹកដីសៀម ភូមិដូនអាវ ឃុំដូនអាវ ស្រុកខាន់តាឡាក់ ខេត្តស៊ីកាកេត ឈមនឹងទឹកដីកម្ពុជាចំណុចអូរ ៥០ ឃុំត្រាំប៉ោង ស្រុកត្រពាំងប្រាសាទ ខេត្តឧត្ដរមានជ័យ ។ ប៉ុន្តែទោះបីយ៉ាងណាក៏ដោយ ជនកម្ពុជាទាំង ៦០ នាក់ ដែលសៀមដេញបាញ់នោះគឺមានពលរដ្ឋកម្ពុជាម្នាក់ត្រូវទាហានសៀមឈុតខ្មៅសៀម ចាប់ខ្លួនបាន ហើយក៏ត្រូវបានដោះលែងឲ្យវិលត្រឡប់មកដីកម្ពុជាវិញបន្ទាប់ពីសមត្ថកិច្ចកម្ពុជា ធ្វើការសម្របសម្រួលគ្នាជាមួយទាហានសៀម ។
សេចក្ដីរាយការណ៍ខាងលើបានបញ្ជាក់ថា ពលរដ្ឋទាំង ៦០ នាក់នោះមានទីលំនៅឃុំត្រាំប៉ោង ស្រុកត្រពាំងប្រាសាទ ខេត្តឧត្ដរមានជ័យ ។ ពួកគាត់ទាំងអស់គឺបានចូលទៅកាន់ទឹកដីសៀម ដើម្បីអូសឈើគ្រញូងដែលកាប់រួចតាមរយៈឈ្មួញកម្ពុជាមួយរូបជួលឲ្យទៅជួយអូស ។
សេចក្ដីរាយការណ៍ខាងលើថា ឈ្មួញកម្ពុជាដែលជួលឲ្យពលរដ្ឋខ្មែរ ៦០ នាក់ចូលទៅអូសឈើគ្រញូង នៅទឹកដីសៀមនោះមានឈ្មោះ លោកអនុសេនីយ៍ទោ លី គឹមស្រ៊ុន ធ្វើការនៅការិយាល័យ ទី២ នៃកងពលតូចអន្ដរាគមន៍លេខ ៨ ។
ព័ត៌មានដដែលបានបញ្ជាក់ថា ប្រជាជនកម្ពុជាទាំង ៦០ នាក់នោះគឺមានម្នាក់ឈ្មោះយី ឌី ភេទប្រុស អាយុ ២៥ ឆ្នាំ រស់នៅភូមិត្រពាំងបី ឃុំត្រាំប៉ោង ស្រុកត្រពាំងប្រាសាទ ត្រូវទាហាន ឈុតខ្មៅចាប់ខ្លួន ប៉ុន្ដែបានដោះលែងត្រឡប់មកវិញនៅម៉ោង១៤ ថ្ងៃដដែល បន្ទាប់ពីសមត្ថកិច្ច កម្ពុជាចូលទៅសម្រុះសម្រួលជាមួយទាហានសៀម ។
គេបានរាយការណ៍ថា នេះមិនមែនជាលើកទី១ ឡើយ ដែលទាហានសៀមបាញ់ពលរដ្ឋខ្មែរ ពេលដែលពួកគេចូលទៅកាប់ឈើក្នុងទឹកដីសៀម ហើយត្រូវសៀមបាញ់ឲ្យស្លាប់និងរបួស ជាច្រើននាក់រួចមកហើយ ។ គេបានបញ្ជាក់ថា ជំនួញឈើគ្រញូងនៅព្រំដែនកម្ពុជាសៀម កើតមានរាល់ថ្ងៃ ពុំមានការទប់ស្កាត់បានឡើយ ហើយឈ្មួញនោះគេបានស្គាល់ឈ្មោះគ្រប់ៗគ្នា ទៀតផង ៕
សារព័ត៌មាន CEN
No comments:
New comments are not allowed.