Monday, January 10, 2011

មេ​បញ្ជា​ការ​​កងទ័ពជើង​គោក​ថៃ​អំពាវ​នាវ​​ឱ្យកំណត់ព្រំដែនកម្ពុជា​​​-ថៃ​​តាម​បច្ចេក​ទេស​ទំនើប​​...កម្ពុជា​មានផែនទី​អន្តរជាតិ ប៉ុន្តែ​ថៃ​​មិនគោរព



(រូបថត កាសែតថៃ)
មេបញ្ជា​ការ​​កង​ទ័ព​ជើង​គោក​ថៃ ឧត្តមសេនីយ៍​​ប្រាយុទ្ធ​​ ចាន់​អ៊ូចា

យោង​តាម​កាសែត​ឌឹណេស្សិន​​ចេញ​ផ្សាយ​ថ្ងៃទី​​១០ មករា ​​​ថា មេបញ្ជា​ការ​​កង​ទ័ព​ជើង​គោក​ថៃ ឧត្តមសេនីយ៍​​ប្រាយុទ្ធ​​ ចាន់​អ៊ូចា ​បាន​អំពាវ​នាវ​​ឱ្យមាន​យន្ត​ការ​ថ្មីមួយ ដើម្បី​ដោះ​ស្រាយ​​ជំលោះ​​ព្រំដែន​​ជា​មួយ​កម្ពុជា ដោយ​លោក​​ថ្លែង​ថា ការកំណត់​ព្រំ​ដែន​លើក​​មុនដែល​ធ្វើឡើង​​កាលពី​​៣០​ឆ្នាំ​កន្លង​​ទៅ​គឺ​​ប្រើ​បច្ចេកទេស​​​មិនទំនើប ។ កាសែត​ថៃ​ដដែល​​បានដកស្រង់​​សំដីលោក​ប្រាយុទ្ធ ​ថ្លែង​ថា នៅពេលកំណត់ព្រំដែន​​​កាល​​នោះ​ គេ​ប្រើប្រាស់​​ដំរីមិន​មែនប្រើ​ប្រាស់​​​​​យន្ត​ហោះ​​ទេ ។ ​កង​ទ័ពថៃ​នឹង​មិន​បណ្តោយ​​​ឱ្យ​ប្រទេស​​បាត់បង់​ទឹកដីឡើយ ហើយ​​ពេលនេះ​​បានត្រៀម​​ខ្លួន​​រួច​ជាស្រេច​​ដើម្បី​​ការពារ​អធិប​តេយ្យ​ភាព​ជាតិ ប៉ុន្តែ​​ទាក់ទិន​​ទៅ​នឹង​​ករណី​ពល​រដ្ឋ​ថៃ​​៧​នាក់​ដែលត្រូវ​បាន​ចាប់ខ្លួន ​ពីបទ​​ចោទ​ប្រកាន់​​ចូលទឹកដីកម្ពុជា​ដោយ​ខុស​ច្បាប់​​​នោះ​ កង​ទ័ពត្រូវ​តែ​រង់ចាំ​​ទទួល​លទ្ធ​ផល​តាម​រយៈ​​​ការ​ដោះស្រាយ​​ដោយ​តុលាការ ។
ឧត្តមសេនីយ៍​​​មេ​បញ្ជា​ការ​​កង​ទ័ព​ថៃ​រូបនេះ​​អះអាង​ថា ប្រសិនបើ​​​ការ​កំណត់ព្រំដែន​​គោក​​មានលក្ខណៈ​ច្បាស់លាស់​ ហើយភាគី​ម្ខាង​​រំលោភ​​បំពាន​​​ទឹកដី​របស់​យើង​​វា​នឹង​មាន​ការ​បាញ់​តប​តគ្នា​ ដើម្បី​​ការពារ​អធិប​តេយ្យភាព​​​ ។ ​ដើម្បី​ទប់ស្កាត់​​ប្រទេស​ទាំង​ពីរ​កុំ​​ឱ្យ​ធ្វើសង្គ្រាម​​ជាមួយគ្នា​ដោយសារ​ការ​អះអាង​​ពី​ការ​ទន្ទ្រាន​ទឹកដី ប្រទេស​ទាំង​ពីរ​ (កម្ពុជា និង​ថៃ) ត្រូវតែ​​​ចុះហត្ថលេខា​​លើ​សន្ធិ​សញ្ញា​​មួយ ដើម្បី​ឈាន​​ដល់​ការ​សំរេច​បាន​កិច្ចព្រមព្រៀង​មួយ ហើយ​លោក​​ចង់​ឱ្យ​ព្រំដែន​រវាង​ប្រទេសថៃ​​ និង​កម្ពុជា​ត្រូវ​កំណត់​​ និងវាស់​ឡើង​​វិញដោយ​ប្រើប្រាស់​​បច្ចេក​ទេស​ទំនើប ។
គួរបញ្ជាក់​ថា ​ខ្សែ​ប​ន្ទាត់ព្រំដែន​​​ត្រូវបាន​ធ្វើ​ការ​​​វាស់វែង​​រួច​រាល់​​ជាស្ថាពរ​ហើយ​ ដោយ​មាន​ផែន​ទី​ច្បាស់លាស់​ទទួលស្គាល់​​ពីតុលាការ​​យុត្តិ​ធម៌​​​​អន្តរជាតិ​​ក្រុង​​ឡាអេ...​​ជាមួយនេះ​មាន​​បង្គោល​​​សីមា​ច្បាស់លាស់​​ ប៉ុន្តែ​​​យើង​ទទួល​​ស្គាល់​​​ផងដែរ​ថា តំបន់​​ខ្លះ​​បង្គោល​សីមា​ខ្លះ​ វា​រលុប​​បាក់បែក ដោយសារ​​ការបំផ្លិច​បំផ្លាញ​​នៃ​​សង្គ្រាម​​​​ជិត​៣ទសវត្ស​​របស់កម្ពុជា ធ្វើ​ឱ្យ​ពិបាក​​កំណត់​ ដូច្នេះ​ត្រូវ​ការ​ពិនិត្យ​​​ឡើងវិញ ​ប៉ុន្តែ​​ភាគី​សៀម​​​ទៅវិញទេ ដែល​កំសាក​ក្នុង​ការ​បោះ​បង្គោល​​​​សីមា​នៅកន្លែង​ដែលគ្មាន​​បង្គោល ។​
គួររំលឹក​ថា ថ្មីៗ​នេះ​លោក​ឧប​នាយករដ្ឋ​មន្ត្រី​​​ហោ ណាំហុង បានជំរុញ​​លោកកាស៊ីត ភីរម្យ ​រដ្ឋ​មន្ត្រីការបរទេសថៃ ​ខណៈ​អញ្ជើញ​​ទស្សន​កិច្ច​​ផ្លូវការ​នៅកម្ពុជា​​ថា សូមជួយធ្វើយ៉ាង​ណា​ជំរុញ​​ឱ្យ​សភាថៃ​​អនុម័ត​​៣​ចំណុច​​ ដែលថៃ​​ព្រមព្រៀង​​ជាមួយកម្ពុជាកន្លង​មក ទាក់ទង​នឹងបញ្ហាព្រំដែន​​ ​បញ្ហា​​យោធា និងជា​បញ្ហា​​ច្រើនទៀត​...​​រហូត​មក​ដល់​​ពេលនេះ​​សភា​ថៃ​​មិន​​ទាន់អនុម័ត​នៅឡើយ​ទេ​...​​មិន​ដឹង​ថា ថៃ​មាន​ចេតនា​ធ្វើ​ឱ្យយឺត​? ឬ​មិន​ចង់​?
អ្នក​តាម​​ដាន​​សភាពការណ៍​រវាង​កម្ពុជា-ថៃ ​បានលើកឡើង​​ថា បញ្ហា​​ព្រំដែន​នេះ ចង់​វាស់​តាម​លក្ខណៈ​​ទំនើប​​ ឬបោះ​បង្គោល​​តាមលក្ខណៈ​​​ទំនើប​​​​យ៉ាង​ណាក៏ដោយ ​ឬ​ជិះ​​យន្តហោះ​​យ៉ាង​ណា​ក៏ដោយ ​គឺ​កម្ពុជារង់ចាំ​ដោយរីករាយ​​ដែរ ព្រោះ​យើង​មាន​​ផែនទី​អន្តរជាតិ​​ទាំងអស់គ្នា​...​​កុំ​យក​​អាផែនទី​ឯកតោ​ភាគី​​មក​ឱ្យសោះ (ផែន​ទី​​គូរ​ខ្លួនឯង) ​ប៉ុន្តែ​ថៃ​​មិន​​ព្រមធ្វើ​​ ហើយ​​​​នៅ​តែចិញ្ចឹម​​មហិច្ឆតាឈ្លានពាន​​មកលើ​កម្ពុជា​​ដដែល​​ជា​ដដែល ៕​ 

ដោយ ៖ កោះឯករាជ្យ

No comments: